I a Ianuali 27, 2023, ka fakamanatu ne tino e tokouke te Aso Fakamanatu o te Tamatega Lasi o Tino [International Holocaust Remembrance Day]. A mea matagā kolā ne ‵tupu i se 75 tausaga ko ‵teka kāti ka fai ei ke mafaufau koe me kaia ne talia ei ne te Atua a te Tamatega Lasi o Tino.

•   Ke iloa ne koe a pati a te Tusi Tapu, faitau ki te mataupu “Kaia ne Tupu ei te Tamatega Lasi o Tino? Kaia ne Seki Fakagata ne te Atua?”

 Ne logo‵mae malosi a tino Iutaia i te Tamatega Lasi o Tino tenei. E lau i miliona a tino ne tamate i se auala telā ne fakatoka faka‵lei. A tino mai nisi potukau ne ‵sala ke tamate i te taimi o te Tamatega Lasi o Tino. E aofia i a latou ko Molimau a Ieova, kolā ne fakasauagina ona ko mea e tali‵tonu latou ki ei i te Tusi Tapu.

•   Ke tauloto ki mea e uke atu, faitau ki te mataupu “What Happened to Jehovah’s Witnesses During the Time of the Holocaust?”

 E ma‵taku a tino e tokouke i te mea ma toe tupu se Tamatega Lasi o Tino. Fakafetai me fakaasi mai i te Tusi Tapu e uiga ki se taimi i aso mai mua telā ka se toe ai ne fakalavelave penei e ‵tupu.

•   “‘Me iloa ‵lei ne au a mafaufauga e mafaufau ne au e uiga ki a koutou,’ ko te folafolaga a Ieova, ‘ko mafaufauga o te filemu, kae e se ko fakalavelave, ke tuku atu ki a koutou a aso mai mua mo se fakamoemoega.’”—Ielemia 29:11. a

 Ka fakataunu a te fakamoemoega tenei māfai ko saga mai a Ieova te Atua o fakaseai a mea ma‵sei kae faka‵lei a fakamaseiga kolā ne māfua mai i ei. Ko pili fua o:

•   Fakaseai ne ia a tino kolā e fakalogo‵mae ne latou a nisi tino.—Faataoto 2:22.

•   Faka‵lei ne ia a logo‵maega o tino.—Fakaasiga 21:4.

•   Toe fakaola aka a tino kolā ne ‵mate ke ola i te lalolagi.—Ioane 5:28, 29.

 E mafai o talitonu koe ki te fakamoemoega fakamafanafana e maua i te Tusi Tapu. Ke iloa ne koe te pogai, e ‵kami ne matou koe ke tofotofo ki te faiga o se akoga faka-te-Tusi Tapu sē ‵togi.