MŌ TAUAVAGA
4: Fakamagalo
TENA UIGA
A te fakamagalo e fakauiga loa ki te fakapuli ne koe se mea ‵se io me ita fakamoemoe. Ke fakamagalo ne koe se tino e se fakauiga i ei me fakamāmā ne koe a te mea ‵se ne fai io me kilo atu a koe ki ei e pelā eiloa me seai se mea ne tupu.
FAKATAKITAKIGA MAI I TE TUSI TAPU: “Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino māfai e isi se pogai e fameo ei se tino ki te suā tino.”—Kolose 3:13.
“Kafai e alofa tonu koe ki se tino, e se saga atu koe ki ana mea ‵se ne fai kae e kilo atu eiloa koe ki ana taumafaiga e fai ke galue ki ana vāivāiga.”—Aaron.
TE POGAI E TĀUA I EI
A te ita fakamoemoe e mafai eiloa o fakamasei atu ki a koe i te feitu faka-te-foitino mo mea tau lagonaga, e fakamasei atu foki ki tou olaga avaga.
“E isi se taimi ne fakatoese mai a taku avaga tagata ki se mea telā ne faka‵mae ‵ki ki a au. Kae ne faigata ‵ki eiloa ke fakamagalo ne au a ia. Fakamuli loa ne fakamagalo ne au a ia, kae ne salamō eiloa au me ne seki fai fakavave ne au te mea tenā. Ne tai pokotia loa i ei a te mā fesokotakiga fakatauavaga.”—Julia.
MEA E MAFAI O FAI NE KOE
TOFOTOFO AKA KOE KI EI
I te suā taimi e logo‵mae ei koe i se pati io me se mea ne fai atu ne tau avaga ki a koe, fesili ifo ki a koe eiloa:
-
‘E a, ko tō saga faeloa au ki tāma mea ‵se ne fai?’
-
‘E mata, a te mea ‵se ne fai ko tō masei ‵ki telā e manakogina ke fakatoese mai a ia ki au, io me mafai fua ne au o fakapuli?’
KE SAU‵TALA KI EI MO TAU AVAGA
-
E pefea te leva e mafai ei ne māua o fakatau fakamagalo te suā tino ki te suā tino?
-
Ne a mea e mafai o fai ne māua ko te mea ke fakamagalo fakavave ne te suā tino a te suā tino?
NISI MANATU FESOASOANI
-
Kafai e isi se mea e tai sē fiafia a koe ki ei, ke mo a eiloa o ‵losi atu ki ki tau avaga.
-
Taumafai o fakapuli a te mea ‵se a tau avaga ne fai, kae masaua “me i a tatou katoa e ‵siga i taimi e uke.”—Iakopo 3:2.
“E faigofie ke fakamagalo māfai ko māua talua e ‵se, kae e tai faigata eiloa māfai se tokotasi fua e ‵se. A te talia o te fakatoesega kae loto fakamagalo e manakogina i ei a te loto maulalo tonu.”—Kimberly
FAKATAKITAKIGA MAI TE TUSI TAPU: “Ke vave o faka‵lei te fakalavelave.”—Mataio 5:25.
A te ita fakamoemoe e mafai eiloa o fakamasei atu ki a koe i te feitu faka-te-foitino mo mea tau lagonaga, kae e fakamasei foki ki tou olaga avaga
