“A TE FAKAMOEMOEGA . . . SE VAEGA TĀUA O ‵TOU OLA FAKA-TE-AGAGA,” ko pati i te tusi ko te Hope in the Age of Anxiety. “Kae ko te ‵toe vailakau sili ke faka‵lei aka i ei a lagonaga sē aoga, te ‵vae kea‵tea mo te mataku.”

Ne faka‵mafa mai eiloa i te Tusi Tapu a te ‵tou fakamoemoega, telā e fakailoa mai foki i ei ke fakaeteete i fakamoemoega ‵se. “Sa tali‵tonu ki pelenise io me ki se tama a se tagata, telā e se mafai o aumai ne ia te fakaolataga,” ko muna a te Salamo 146:3. I lō te tali‵tonu ki taumafaiga a tāgata ke faka‵sao ei tatou, se mea poto ke tali‵tonu tatou ki te ‵tou Mafuaga, telā e maua ne ia te ‵mana ke fakataunu ana tautoga katoa. Se a tena tautoga ki a tatou? Ke onoono ki mea konei mai lalo.

KA FAKASEAI ATU A AMIOGA MA‵SEI; KA OKO MAI A TE FILEMU TUMAU KI TINO AMIO‵TONU: “E se leva nei, kae ka ‵galo atu a tino amio ma‵sei . . . Kae ko tino agamalu ka fai mō latou te lalolagi, kae ka maua ne latou te fiafia sili ona ko te lasi o te filemu,” ko pati i te Salamo 37:10, 11. E toe fai mai te fuaiuou e 29 me “i tino amio‵tonu . . . ka ‵nofo i ei ki te se-gata-mai” i te lalolagi.

KA GATA ATU A TAUA: “E aumai ne [Ieova] te gataga ki taua i te lalolagi kātoa. E fatifati ne ia a kausana kae ofa likiliki ne ia a te tao; e ‵sunu ne ia a ka a te kautau ki te afi.”—Salamo 46:8, 9.

KA SE TOE AI NE MASAKI, LOGO‵MAEGA, IO ME KO TE MATE: “Ko ‵nofo nei mo tino te faleie o te Atua . . . Ka ‵solo kea‵tea ne ia a loimata katoa mai i olotou mata, kae ka se toe ai se mate, ka se toe ai foki se fanoanoa, se tagi io me se ‵mae.”—Fakaasiga 21:3, 4.

KA LAVA A MEA‵KAI MŌ TINO KATOA: “Ka malaku eiloa a saito i te laukele; ka ‵fonu a taulu o mauga.”—Salamo 72:16.

SE PULEGA FAI MEA TONU E AUALA I TE MALO FUA E TASI I TE LALOLAGI KĀTOA—TE MALO O KELISO: “Ne tuku atu ki a [Iesu Keliso] a te pulega, te fakaaloalo, mo te malo, kae e ‵tau mo tino, atufenua mo ‵gana katoa o tavini atu ki a ia. A tena pulega se puelga ki te se-gata-mai telā ka se mafai o galo atu, kae ko tena malo ka se fakaseai atu.”—Tanielu 7:14.

E mafai pefea o mautinoa i a tatou a te ‵tonu o folafolaga konei? I tena nofoga i te lalolagi, ne fakamaoni atu ne Iesu ki tino katoa a tena fetaui ‵lei ke fai mo Tupu Filifilia. Ne faka‵lei ne ia a tino ma‵saki, fagai a tino ma‵tiva, kae ne faka‵tu aka ne ia a tino ‵mate. Kae e sili atu la i te tāua ko ana akoakoga, me ne aofia i ei a akoakoga fakavae kolā ka fesoasoani atu ki tino ke ola fakatasi ki te se-gata-mai i te filemu mo te fealofani. Ne ‵valo mai foki ne Iesu a mea kolā ka ‵tupu i aso mai mua, e aofia i ei a mea kolā ka fakamailoga i ei a aso fakaotioti o te lalolagi tenei koi ola ei tatou.

Ne ‵valo mai a Iesu me ka fakamailoga eiloa a aso fakaoti, e se ki te filemu mo te tokagamalie, kae ki fakalavelave! E aofia i fakailoga “o te olaga masei tenei” ko taua i va o atufenua ki te suā atufenua, oge meakai, famai, mo mafuie fakama‵taku. (Mataio 24:3, 7; Luka 21:10, 11; Fakaasiga 6:3-8) Ne fai mai foki a Iesu: “Ona ko te gasolo aka o amioga solitulafono ko gasolo ifo ei o se a‵lofa a tino e tokouke.”—Mataio 24:12.

E fakamaoni mai eiloa a te se a‵lofa o tino i auala e uke, telā ne ‵valo ‵tonu mai foki ne te suā tino tusitala. I te 2 Timoteo 3:1-5, e fai‵tau tatou me i “aso fakaoti,” a tino masani ka a‵lofa fua ki a latou eiloa, tupe mo fakafiafiaga. Ka fakamaua‵luga kae amio fakasaua. Ka seai se alofa masani i kāiga, kae ko tama‵liki e se faka‵logo ki mātua. Ka salalau atu eiloa a te loi i mea fakalotu.

E fakamaoni mai ne tulaga ma‵sei konei me ko pili o fakaseai atu a te lalolagi tenei. E fakamautinoa mai foki ne mea konei me ko pili mai eiloa a te pulega o te Malo. E tonu, ne aofia ne Iesu a fakamaoniga konei i tena valoaga e uiga ki aso fakaoti: “Kae ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa, ko oko mai ei te gataga.”—Mataio 24:14.

E tuku mai ne te tala ‵lei tenā se faka‵pulaga ki tino fai mea ‵se mo se fakamoemoega ki tino amio‵tonu, kae fakatalitonu mai me ko pili o fakataunu nei a fakamanuiaga kolā ko oti ne folafola mai. E mata, e fiafia koe o tauloto ki mea e uke atu e uiga ki fakamanuiaga konā? Kafai e penā loa, fakamolemole ke ‵suke ki te itulau fakaoti o te mekesini tenei.