I te taimi ne fai ei se malaga a te akoga, e isi ne talavou tāgata ne maneanea ne latou se tamaliki tagata i te lotou kautama. E aofia katoa latou konei i se akoga maumea kae takutakua telā e se fakatele ne te Malo i Kanata. Mai tua ifo o te mea tenei ne tupu, ne tusi mai te tino tusitala ko Leonard Stern i te nusipepa Ottawa Citizen, penei: “A te mauaga o se akoga lei, te poto mo te maumea e se akoako i ei a talavou ke ‵kalo kea‵tea mai te faiga o uiga ma‵sei.”

Ne fai mai foki a ia, penei: “E mafaufau koe me i te ‵toe mea tāua telā e ‵tau o fai ne mātua ko te akoako atu ki olotou tama‵liki a te mea ‵lei mai te mea masei. A ko te ‵tonuga loa, e manava‵se eiloa a mātua e tokouke ke kausaki atu olotou tama‵liki ki akoakoga ma‵luga mo galuega togi ‵lei ke mafai o uke olotou tupe.”

E tonu, e tāua te akoga. Kae ke oko foki eiloa ki ‵toe akoakoga ‵lei, e se mafai o fesoasoani atu ki te tino ke ‵teke atu ki manakoga mo faifaiga ma‵sei. Tefea te koga ka maua ne tatou a akoakoga konā—kolā e maua i ei a fakatakitakiga ki mea tau amioga?

E fai eiloa te Tusi Tapu e pelā me se kilo. Kafai e ‵kilo atu tatou ki ei, e lavea i ei ne tatou ‵tou tapula mo ‵tou vāivāiga. (Iakopo 1:23-25) Kae e uke atu a mea e fakaasi mai ne te Tusi Tapu. E fesoasoani mai ke fai ne tatou a fakama‵fuliga kolā e manakogina, ke ati aka a uiga kolā e fakamalosigina i ei te filemu tonu mo te ‵kau fakatasi. E aofia i uiga konei a te aga‵lei, atafai, kufaki, loto pulea, mo te alofa. Me i te alofa ko “te fusi ‵lei katoatoa telā e fai ei ke ‵kau fakatasi a tino.” (Kolose 3:14) Kaia e tu ‵kese ei te alofa? Ke onoono ki te auala e fakamatala mai i te Tusi Tapu a te uiga tenei.

• “A te alofa e kufaki kae atafai. A te alofa e se loto masei. E se tavae ne ia a ia eiloa, e se ‵fonu i te fakamatamata, e se fakamaualuga, e se salasala ki mea mō tena ‵lei eiloa, e se kaitaua vave. E se ita fakamoemoe. E se fiafia ki amioga ma‵sei, kae e fiafia eiloa ki te munatonu. E onosai i mea katoa, . . .  , e kufaki i mea katoa. A te alofa e se mafai o gata.”—1 Kolinito 13:4-8.

• “E se fai ne te alofa a mea ma‵sei ki te tuakoi o se tino.”—Loma 13:10.

• “E sili atu i mea katoa, ke fakatau a‵lofa koutou, me e ‵tao ne te alofa a agasala e uke.”—1 Petelu 4:8.

Kafai e ‵kau fakatasi koe mo tino kolā e a‵lofa ki a koe, e pefea ou lagonaga? E maua ne koe se puipuiga? Tokagamalie? Te filemu? Ao, me e iloa ne koe me e ma‵nako latou ke maua ne koe toe mea ‵lei, kae se fakalogo‵mae atu latou ki a koe.

A te alofa e fai i ei a tino ke gasue‵sue o fai a fakama‵fuliga faitalia olotou fakanofonofoga, ke oko ki te auala e ola i ei latou, mō te ‵lei o nisi tino. E pelā me se fakaakoakoga, i te taimi ne fai i ei a George mo fai se tupuna, ne manako malosi eiloa a ia o fakamāumāu ana  taimi o ‵nofo mo tena mokopuna tagata. Kae ko te fakalavelave, a George se tagata ‵pusi malosi, kae ko te avaga a tena tama fafine ne seki manako ke ‵pusi tou tagata i tafa o te lā tama. Se a te mea ne fai ne George? Faitalia me ne ‵pusi a ia mō se 50 tausaga, ne tiaki katoatoa atu ne ia ona loa ko tena mokopuna. Ao, e malosi ‵ki eiloa te alofa!

A te alofa se uiga telā e ‵tau o tauloto tatou ki ei. I o mātua te tiute ke akoako ne latou olotou tama‵liki ke iloa ne latou o a‵lofa. E fagai ne latou olotou tama‵liki kae tausi atu foki ki a latou i taimi e ma‵saki i ei. A mātua ‵lei e fakatonutonu kae akoako ne latou olotou tama‵liki. E se gata foki i ei, e polopoloki ne latou olotou tama‵liki mai te akoako atu a fakatakitakiga ‵lei e uiga ki te faiga o mea ‵lei mai mea ma‵sei. Kae e tuku atu foki ne mātua se fakaakoakoga ‵lei ki olotou tama‵liki e auala i olotou faifaiga.

Se mea fakafanoanoa me ne fakatamala eiloa a nisi mātua i te faiga o olotou tiute. E mata, e fakauiga i ei me ka fai ne olotou tama‵liki a amioga sē ‵lei? Ka sē fai eiloa penā! Ke oko foki eiloa ki tino ma‵tua kolā ne ‵tupu aka i kāiga kolā e se ‵lei a faifaiga i ei, ne mafai eiloa o fai ne latou a fakama‵fuliga ‵lei i olotou olaga, mai te fai e pelā me ne tino atafai kae fakatalitonugina. E pelā mo te mea ka lavea ne tatou i te suā mataupu, e aofia i ei a tino kolā ne mafau‵fau me se mafai o ‵fuli olotou olaga!