E mata, e talitonu koe me e mafai ne tāgata o faka‵lei aka a fakalavelave e uke kolā e ave kea‵tea i ei te filemu mo te tokagamalie kae fakamataku ki ‵tou olaga i aso mai mua? A te auala magoi ke faka‵lei aka ei ‵tou fakalavelave, ko te iloilo aka a pogai ne māfua i ei a fakalavelave konā.

Mafaufau ki te tala tenei, a Tom ne masaki kae ne mate fakamuli ifo. Kaia ne mate i ei a ia? “I te taimi ne ‵sae aka fakailoga o tena masaki, e seai eiloa se tino ne mafaufau ke iloilo aka ne ia te māfuaga o tena masaki,” ko pati a te tokita o te fakaimasaki telā ne avatu ki ei a Tom koi tuai ei o mate. E foliga mai me i tokita muamua kolā ne tausi atu ki ei ne avatu fua ne latou a vailakau ke fakafeoloolo atu ki tena masaki.

E mata, e ‵pau te mea tenei mo te mea e fai ne tino ke faka‵lei aka ei a fakalavelave i te lalolagi nei? E pelā me se fakaakoakoga, ke faka‵lei aka a amioga solitulafono, ne faite ne malo a tulafono, faka‵piki a mea puke ata i koga e tokouke i ei a tino, kae fakatokouke a pulisimani. Faitalia me ma‵goi a auala konei, i nisi feitu, e se fakaasi ‵tonu mai i ei a te māfuaga o te fakalavelave. A te ‵tonuga loa, a faifaiga a tino e fai e fakaasi mai i ei a olotou lagonaga, mafaufauga mo olotou manakoga.

A Daniel, e nofo i se fenua ki Saute o Amelika telā ko gasolo o se ‵lei te tulaga o mea tau tupe ne fai mai, penei: “Ne ola muamua matou i se olaga masani. Ne seki ma‵taku matou, me e seai ne tino kai‵soa e oloolo mo fana. Kae nei lā, ko seai eiloa se filemu i te fakai. A te sē ‵lei o te tulaga i mea tau tupe i te fenua, ne fakaasi faka‵sau mai i ei a uiga ‵tonu o tino—e kaima‵nako kae se āva ki ola mo kope a nisi tino.”

A te tagata e igoa ki a Elias ne tele kea‵tea mai se taua i fenua i te Saegala ki te Kogaloto, kae fakamuli ifo ne fai tena akoga faka-te-Tusi Tapu. Ne fai mai a ia, penei: “E tokouke a talavou tāgata mai i toku fakai tonu ne fakamalosigina ne olotou kāiga mo takitaki lotu kolā e ‵lago atu ki mea fakapolitiki ke ‵kau atu ki te taua kae ka fai latou e pelā me ne tino ‵toa. A tino kolā ne ‵kau ki te suā feitu ne fakamalosigina foki ke fai penā! A mea katoa konei ne lavea ne au e fakaasi mai i ei me se mea fakafanoanoa eiloa ke talitonu koe ki pulega a tāgata.”

E fai mai te Tusi Tapu, penei:

• “Me i manakoga o te loto o te tagata e ma‵sei faeloa mai te taimi koi foliki ei o fano ki mua.”—Kenese 8:21.

• “A te loto e sili atu tena faitogafiti i lō so se isi mea aka kae e fakamataku. Ko oi e mafai o iloa ne ia?”—Ielemia 17:9.

• “E māfua mai i te loto a mea ma‵sei katoa, ko te tatino, . . . amioga fakatauavaga sē ‵tau, te kaisoa, te molimau ‵pelo.”—Mataio 15:19.

Ne faigata ke ‵sala ne tino se faka‵leiga ki uiga ma‵sei o tino kolā e mafai o fakapa‵kia ei a nisi tino. A te ‵tonuga loa, a uiga konei ko gasolo aka eiloa o ma‵sei atu, e pelā mo fakalavelave kolā ne fakaasi mai i te mataupu mai mua. (2 Timoteo 3:1-5) Kae e ‵tupu eiloa a mea konei faitalia eiloa te gasoloakaga o poto o tāgata mo auala e uke e fai ei a fesokotakiga mo nisi tino i lō aso mua! Tela la, kaia e se mafai ei ne tatou o fai te lalolagi mo koga filemu kae tokagamalie? E mata, e mafai ne tino o aumai te filemu mo te tokagamalie ki te lalolagi? E mata, ka mafai o maua te filemu mo te tokagamalie i te lalolagi?

Faitalia me e isi se auala ke ‵fuli aka i ei a uiga ma‵sei o tino, e se mafai eiloa o fai ne tatou te lalolagi kātoa ke filemu kae tokagamalie. Kaia? Ona ko ‵tou tapula.

Tenei te munatonu faigofie ki ei: “E seai se pule a te tagata ke fakatonutonu ne ia tena auala.” (Ielemia 10:23) Ao, ne seki faite tatou ke pule atu ki a tatou eiloa. A te ‵tonuga  loa, ne seki faite foki tatou ke pule atu ki nisi tino e pelā eiloa mo tatou ne seki faite ke ola i lalo i te tai io me i te vanimonimo!

Ke mafaufau ki te mea tenei:E mata, e ‵lei ki tino ke fakatonutonu latou ne nisi tino e uiga ki te auala e ‵tau o ola ei latou mo tulaga i mea tau amioga kolā e ‵tau o fai ne latou? E mata, e ‵lei ki tino ke fai atu ne nisi tino a te kilokiloga e ‵tau o maua ne latou e uiga ki te faka‵toga o pepe mo te auala e ‵tau o akoako ei olotou tama‵liki? A mea konei ne nāi mataupu kolā e fakamavae‵vae i ei a tino. Tela la, ke loto maulalo o talia me e ‵tonu eiloa a mea kolā e fakaasi mai i loto i te Tusi Tapu. E se maua ne tatou te atamai io me ko te aiā ke pule atu ki nisi tino. Tefea lā te koga e maua i ei ne tatou te fesoasoani?

A te tali tonu ki ei, ko te ‵sala atu ki te ‵tou Mafuaga. Me ne faite ne ia tatou katoa! E sē pelā mo mafaufauga o nisi tino, e seki puli eiloa i a ia tatou. A te ‵tonuga loa, a tena manavase ki a tatou e fakaasi mai i muna ‵poto i loto i te Tusi Tapu. Kafai e malamalama faka‵lei tatou i te tusi fakapito tenei, ka lasi foki ‵tou malamalama e uiga ki a tatou taki tokotasi. Ka mafai ei o maina tatou i te tala fakasolopito fakafanoanoa o tāgata. Tenā te pogai e lavea ei ne tatou i konei, me e pelā mo te pati a se tagata poto ne tusi, e fai mai penei, “ne seki tauloto eiloa ne tino mo malo a akoakoga mai i tala fakasolopito mua, io me fakagalue ne latou a fakatakitakiga mai i ei, tenā te pogai ne seki mafai eiloa o ‵fuli olotou amioga.”

Ne fai mai se tagata poto me “e fakatalitonugina te poto o te tagata e auala i ana tama‵liki,” io me ko ikuga e maua mai i ei. (Luka 7:35) A te fakaakoakoga o te poto tenā e maua i te Isaia 2:22, e fai mai, penei: “Mō te otou ‵lei eiloa, ke se toe tali‵tonu ki te tagata.” A pati fakatonutonu konei e puipui ei tatou mai i fakamoemoega sē ‵tonu kae se fakatuagagina foki. A Kenneth, telā ne sikomia ne fakasauaga i se fakai i Amelika ki Mātu, ne fai mai, penei: “E tauto mai nei a tino o te malo me ka faka‵lei aka ne latou a fakalavelave, kae e se mafai eiloa o fakataunu ne latou. Ko fakatalitonu mai i ei me i pati i te Tusi Tapu e ‵tonu kae maua i ei te poto.”

A Daniel, telā ne sau‵tala muamua ki ei, ne tusi mai penei: “E fakamasaua mai faeloa ki a au i aso takitasi me e se mafai lele eiloa o pule faka‵lei mai a malo o tāgata. . . . E se fakauiga i ei me i te ‵teu ne koe au tupe i te pagike io me ko penefiti ko mafai o tokagamalie i ei tou olaga i aso mai mua. Ko oti ne lavea ne au te puapuaga o tino i te fakalagolago ‵se ki mea konei.”

E uke atu a mea e mafai o maua ne tatou mai i te Tusi Tapu i lō te puipui fua o tatou mai i fakamoemoega sē fakatuagagina. E tuku mai foki i ei se fakamoemoega ke olioli tatou ki ei, kae ka lavea eiloa ne tatou i mataupu mai mua nei.