A akoakoga e fakavae mai i te Tusi Tapu e isi sena malosi fakaofoofogia o faka‵lei aka a tulaga o olaga o tino. Ke onoono ki fakaakoakoga e lua konei: Ricardo mo Andres.

RICARDO: I te taimi ko 15 ei oku tausaga, ne aofia au i se potukau o tino ma‵sei. Ne uke ‵ki a fakamalosiga ne maua ne au mai i oku taugasoa ‵fou konei. A te ‵tonuga loa, ko toku fakamoemoega loa ke ‵pei atu ki te falepuipui mō se 10 tausaga! Se mea valea eiloa tenā. I te koga telā e nofo i ei au, a tino kolā ne ‵pei atu mō se fia tausaga ki falepuipui e lauiloa kae āva malosi ki ei a nisi tino. Kae ne manako foki au ke fai penā.

Ne fai ne au a mea ma‵sei katoa kolā e fai i se olaga o se potukau ma‵sei, te fakaaogaga o vailakau tapu, faifaiga fakatauavaga sē ‵tau, mo fakasauaga. I se po e tasi, ne aofia au i se fakatau fanafanaga ne fai. Au ne mafaufau me ka mate eiloa au, kae ko au ne sao. I te otiga o te mea tenā ne tupu, ne kamata o mafaufau ‵mafa au ki toku olaga mo oku fakamoemoega, kae ne fakaiku aka ke fai ne au a fakama‵fuliga. Ka fai la ne au pefea? Tefea te koga ka maua ne au se fesoasoani?

A te tokoukega o oku kāiga ne fanoa‵noa sāle. Olotou olaga ne ‵fonu faeloa i fakalavelave. Kae e se fai eiloa penā a te olaga o se tuatina o oku e tokotasi. Ne iloa ne au i a latou ne tino ‵lei, kae e ola latou e ‵tusa mo fakatakitakiga mai i te Tusi Tapu. A te ‵tonuga loa, e isi se taimi ne tauloto ne au mai i a latou me i te igoa o te Atua ko Ieova. Se leva mai tua o te fakatau fanafanaga, ne ‵talo au ki a Ieova, mai te fakaaogaga o tena igoa kae akai atu mō tena fesoasoani. Ne poi eiloa au, i te aso mai tua ifo, ne tukituki mai se tokotasi o Molimau a Ieova i toku mataloa! Ne fai a ia mo fai toku faiakoga faka-te-Tusi Tapu.

Fakamuli ifo ne fakafesagai atu au ki se mea faigata. Oku taugasoa mua ne masani sāle o telefoni mai ki a au, o ‵kami au ke olo tasi mo latou. Faitalia me se mea faigata, kae ne seki talia eiloa ne au. Ne loto malosi eiloa au ke fai taku akoga faka-te-Tusi Tapukae ne fiafia ‵ki au me ne fai eiloa ne au! Ne kamata o ‵lei toku olaga, kae ko maua nei ne au te fiafia tonu.

Koi masaua eiloa ne au taku ‵talo ne fai ki te Atua me ko toka au ke ‵pei ki te falepuipui mō se sefulu tausaga ko te mea ke āva mai oku taugasoa i te potukau ma‵sei. Tela la, ne toe fakamolemole atu au ki ei ke talia mai ne ia au ke tavini tumau atu e pelā me se paenia ko te mea ke fesoasoani atu ki nisi tino e pelā eiloa mo te fesoasoani ne maua ne au. Ne tali eiloa ne te Atua a taku ‵talo, me ko ‵tusa nei mo te 17 tausaga ne fai ei taku taviniga tumau! Kae ke fai ‵tonu atu au, ne seki ‵pei aka eiloa au ki te falepuipui.

E ui i ei, a oku taugasoa tāgata mua, ko ‵nofo atu nei i falepuipui mō se fia tausaga. Nisi ko oti ne ‵mate. Mai te mafaufau ki taimi mua konā, ko oko eiloa toku loto fakafetai ki oku kāiga Molimau. Ne fia‵fia eiloa latou ke tu ‵kese mai nisi tino, mai te ola e ‵tusa mo mea e akoako mai i te Tusi Tapu. Ne gasolo aka o lasi toku āva ki a latou i lō toku āva ki tino i te potukau ma‵sei telā ne kau au ki ei. Kae e sili i mea katoa, e fakafetai eiloa au ki te Atua mo te akoako mai ne ia ki a au a te ‵toe auala ‵lei ke ola i te olaga nei.

 ANDRES: Au ne fanau kae puti aka i se fakai mativa telā e lauiloa i ei a uiga kai‵soa, tatino, mo te mulilua e pelā me ne faifaiga masani. A toku tamana se tagata e umiti ki te kava mo te cocaine. E kinau kae ‵fusu sāle a ia mo toku mātua.

I te taimi koi tai foliki ei au, ne kamata o inu malosi au ki meainu ma‵losi kae fakaaoga a vailakau tapu. I te ukega o taimi e nofo atu au i auala, o kaisoa kae ‵togi ki tua aku mea ne kaisoa. I te taimi ko tai matua ei au, ne taumafai a toku tamana ke ‵pili te mā va i se auala sē tonu, ke fakaakoako ne ia au ke kaisoa a vailakau tapu mo nisi mea aka kolā e tapu ki loto i te fenua kae ke ‵togi atu ki tua. Ne maua ne au a tupe e uke—i se auala vave. I se aso e tasi, ne tu mai te pulisimani i toku fale. Ne ‵loka ne latou au, kae ne ‵pei au ki te falepuipui mō se lima tausaga ona ko te ‵losiga me ne tamate ne au se tino.

I te taeao e tasi ne faka‵pula i loto i te falepuipui i mea faka‵lasi leo o ‵kami a pagota ki se sau‵talaga faka-te-Tusi Tapu telā ka fai ne Molimau a Ieova. Ne fakaiku aka ne au ke kau atu ki ei. Aku mea ne lagona ne mea ‵tonu eiloa, tenā ne kamata ei o fai taku akoga mo Molimau a Ieova. Ne fakafiafia mai faeloa a te fekau ne fakaasi mai ne latou mai te Tusi Tapu kae ne fakaasi mai foki ne latou a tulaga ma‵luga o te Atua e uiga ki mea tau amioga.

Ne iloa aka ne au me e se mafai ne au o fai a ‵fuliga e aunoa mo se fesoasoani, maise eiloa a fakamatakutakuga mai pagota ne ‵nofo tasi mo au kolā e se fia‵fia ki ‵fuliga e fai ne au. Tela la, ne ‵talo au ki a Ieova ke tuku mai te malosi mo te poto, kae ne fesoasoani mai eiloa a ia. E tonu, i lō te saga atu ki olotou fakamatakutakuga, ne maua eiloa ne au te loto toa ke fakaasi atu ki nisi pagota a mea mai te Tusi Tapu.

I te taimi ko pili au o ‵tala ki tua, ne polepole malosi eiloa au telā ne manako fua au ke nofo leva i loto i te falepuipui! I te taimi ne fano ei au ki tua, e tokouke a pagota ne fakatofa mai ki a au. Nisi ne fai mai mo te atafai, “Foki ki te fale, te Tausi Mamoe foliki.”

Ne mataku ‵ki au me se a te mea ne mafai o tupu ki au moi ne seki talia ne au te Atua ke akoako ne ia au. E lasi ‵ki toku loto fakafetai me ne alofa mai eiloa te Atua ki a au kae ne seki kilo mai me i a au se tino se aoga. a