A te manavase se fakailoaga mai te foitino me e manakogina ke saga atu ki ei. A te mafaufau e fai ne ia a hormones ke tufa atu ki te foitino kātoa. Telā e fai ei ke tuki fakavave te fatu, ke maluga te toto, e fai ke lasi io me foliki tou māmā, kae fakama‵keke ou taganoa. Koi tuai o iloa ne koe a mea ka ‵tupu ki a koe, ko toka tou foitino ki mea ka ‵tupu. Kafai ko oti te tulaga mafatia tenā, ko foki tou foitino ki te tulaga masani.

A te manavase se lagonaga masani, telā e fai ei ke toka koe o fakafesagai atu ki tulaga faiga‵ta io me fakama‵taku. A te manavase e kamata i tou mafaufau. A te manavase ‵lei e fai ei ke galue io me gasue fakavave koe o fai se mea. Nisi taimi a te manavase e mafai o fesoasoani atu ki a koe ke taunu ou fakamoemoega io me ke tai ‵lei atu au taumafaiga, kāti i se sukega, sukega ki se galuega ‵togi, io me i se fakatau‵faiga i te tafaoga.

Kae ko te sōna manavase faeloa e mafai o fakamataku ki a koe. Kafai ko lagona ne koe a tou foitino ko fai fakaa‵tea, ko tena uiga ko tu koe i se “tulaga fakamataku” telā e mafai o pokotia ei koe i te feitu faka-te-foitino, mea tau lagonaga, mo te mafaufau. E mafai foki o ‵fuli au faifaiga ki nisi tino. A te sōna manavase tenei e mafai foki o fai ke inu faeloa ki meainu ma‵losi, fakaaoga vailakau tapu, fakaaoga ‵se a vailakau mai te fakaimasaki, ‵kai malosi, ‵pusi mo nisi faifaiga ma‵sei foki. E mafai o pokotia i te loto mafatia, fi‵ta te foitino, io me ko lagonaga fia fakamate.

E tiga eiloa e kese‵kese a auala e pokotia ei a tino taki tokotasi i te manavase, kae e mafai o iku atu ki nisi masaki valevale. Kae pokotia ei a vaega o te foitino kese‵kese.