‵SALA ATU KI AUALA KE FAKAFEOLOOLO AKA TE MANAVASE
Ka Mafai Eiloa o Maua se Olaga Telâ e Seai se Manavase
A te poto mai te Tusi Tapu e mafai o fesoasoani mai ki a tatou ke fakafeoloolo aka ei te ‵tou manavase. E se mafai eiloa ne tatou o fakaseai atu a mea kolā e manava‵se tatou ki ei. Kae e mafai ne te ‵tou Mafuaga o fai te mea tenā. Ko oti ne ‵tofi ne ia te tino ke fesoasoani mai ki a tatou. A te tino tenā ko Iesu Keliso. I se taimi pili mai mua nei, ka fai ne ia a mea ‵gali e tai uke atu i te lalolagi nei i lō te taimi ne nofo ei i te lalolagi nei e pelā me se tagata. E pelā me se fakaakoakoga:
KA FAKA‵LEI NE IESU A MA‵SAKI, I TE AUALA NE FAKAASI MAI NE IA.
“Kae ne aumai ne latou ki a ia a latou katoa kolā e logo‵mae i masaki kese‵kese kae tigaina . . . , kae ne faka‵lei ne ia a latou.” —MATAIO 4:24.
KA TUKU MAI NE IESU A MEA‵KAI MO FALE ‵NOFO KI TINO KATOA.
“Ka faite ne [tino mai lalo o te pulega a Keliso] olotou fale kae ‵nofo i ei, kae ka ‵toki ne latou a togavine kae ‵kai ki olotou fuataga. Ka se faite ne latou a fale kae ‵nofo i ei a nisi tino, io me ‵toki ne latou a fuaga kae ‵kai ki ei a nisi tino.” —ISAIA 65:21, 22.
KA MAUA TE FILEMU MO TE TOKAGAMALIE MAI LALO O TE PULGA A IESU.
“I ana aso a tino amio‵tonu ka lauolaola, kae ka lasi te filemu ke oko ki te taimi ko seai ei se masina. Ka isi ne tino e ‵nofo mai lalo i a ia mai te tai e tasi ke oko atu ki te suā tai kae mai te Vaitafe ke oko ki koga ‵mao o te lalolagi. . . . Kae ko ana fili ka sepo ne latou a ‵pefu.”—SALAMO 72:7-9.
KA FAKASEAI NE IESU A FAIFAIGA SĒ FAKAMAONI.
“Ka alofa a ia ki tino ma‵lalo mo tino ma‵tiva, kae ka fakaola ne ia a tino ma‵tiva. Ka faka‵sao ne ia latou mai pulega fakasaua mo fakasauaga.”—SALAMO 72:13, 14.
KA FAKASEAI NE IESU A LOGO‵MAEGA MO TE MATE.
“Kae ka se toe ai se mate, ka se toe ai foki se fanoanoa, se tagi io me se ‵mae.”—FAKAASIGA 21:4.
