“Kafai e ola aka a tino amio ma‵sei e pelā me ne mouku ma‵sei kae ko tino fai mea ‵se katoa e olaola ‵lei, tenā ko mafai ei latou o fakaseai atu ki te se-gata-mai.”—SALAMO 92:7.

E pelā mo mea ne tauloto ne tatou i te mataupu mai mua, e gasolo aka eiloa o uke a mea ma‵sei. E se ‵tau o ‵poi tatou i ei. Kae ko leva ne ‵valo mai i te Tusi Tapu, i te 2 Timoteo 3:1-5 me “i aso fakaoti” a tino ka gasolo eiloa o ma‵sei atu. Se a te mea e fakauiga ki ei a aso fakaoti? Ko aso fakaoti o te lalolagi o tino sē amio atua. Ko pili o fakaseai atu ne te Atua a tino kolā e ita ma ‵fuli olotou faifaiga ma‵sei. Kae ka ‵toe mai fua i ei a tino ‵lei, ko latou kolā e faka‵logo ki te Atua. “A tino amio‵tonu ka fai mō latou te lalolagi, kae ka ‵nofo latou i ei ki te se-gata-mai.”—Salamo 37:29.

Ko pili o tuki pala ne te Atua o te filemu a Satani.”—LOMA 16:20.

Kafai ko seai ne tino ma‵sei, e aofia i ei a Satani mo ana temoni, ka maua eiloa te filemu i te lalolagi kātoa. Ne tauto mai te ‵tou Mafuaga: “Ka seai se tino e ma‵taku [koutou] ki ei.”—Mika 4:4.

“Ko ‵nofo nei mo tino te faleie o te Atua . . . Kae ka ‵solo kea‵tea ne ia a loimata katoa mai i olotou mata, kae ka se toe ai se mate, ka se toe ai foki se fanoanoa, se tagi io me se ‵mae.”—FAKAASIGA 21:3, 4.

Ka se toe ai ne logo‵maega mo masaki me ka toe faka‵lei ne te Atua a mea ma‵sei katoa kolā ne māfua mai i a Satani, Atamu, Eva, mo ‵tou tulaga sē ‵lei katoatoa. Ona ko te mea tenā, “ka se toe ai [foki] se mate.” A tino kolā e a‵lofa kae faka‵logo ki te Mafuaga, ka ola ki te se-gata-mai. Kae ka ola latou i fea?

“A te koga lavaki mo te koga e se uke a vai i ei ka fia‵fia, kae ko te toafa laugatasi ka ‵lifu kae ‵pula aka e pelā mo te lakau ko te safaloni.”—ISAIA 35:1.

Kafai ko fakaseai ne te Atua a tino amio ma‵sei, ka lauolaola te lalolagi! Ka ‵fonu i malae ta‵fao mo fatoaga ‵gali, kae ka ‵fua mai i ei a mea‵kai e uke. (Salamo 72:16) Ka ‵ma a te moana, vaituloto, mo vaitafe kae ‵fonu i mea ola e uke. Ke oko ki te pati “fakalailaiga o te ea” ka se iloa ne tino! Ka faite ne tino olotou fale kae ‵nofo foki i ei. Kae ka se toe ai se tino e seai sena fale, fiakai, io me mativa.—Isaia 65:21, 22.

“Ka toe‵tu mai a tino.”—GALUEGA 24:15.

E mata, e fia fetaui koe mo ou tino pele kolā ko oti ne ‵mate? A te Atua malosi katoatoa ka toe fakaola aka ne ia latou—io me toe faka‵tu aka latou—i te lalolagi Palataiso. Ka masaua ‵lei ne koe a latou kae masaua foki ne latou a koe. Mafaufau la ki te fia‵fia o koutou! Kaia e mautinoa ei i a tatou a te fakamoemoega tenei? Me e fakaasi mai i i te Tusi Tapu a tala o tino ma‵tua mo tama‵liki kolā ne faka‵tu aka kae toe ‵kau fakatasi mo olotou kāiga. E se gata i ei, ne faka‵tu sāle ne Iesu a tino ‵mate i mua o tino e tokouke.—Luka 8:49-56; Ioane 11:11-14, 38-44.