“E auala i te tagata fua e tokotasi ne oko mai ei te agasala ki te lalolagi, mo te mate e auala i te agasala tenā, i te auala tenā ne maua ei ne tino katoa te mate.”—LOMA 5:12.

Ne faite ne te Atua ‵tou mātua muamua, ko Atamu mo Eva, mo mafaufau mo foitino ‵lei katoatoa. Ne tuku atu foki ne ia lāua ke ‵nofo i te lalolagi palataiso—telā e taku ki te fatoaga o Etena. Ne fai atu a ia me e mafai o ‵kai lāua ki lakau katoa i te fatoaga, kae e tasi fua te lakau e tapu lāua i ei. Kae ne filifili aka ne Atamu mo Eva ke ‵kai ki nisi fuaga mai te lakau tenā, kae ko te mea tenā se agasala. (Kenese 2:15-17; 3:1-19) Mai tua o te lā ‵tekeatuga, ne ‵tuli kea‵tea ne te Atua te tauavaga mai te fatoaga kae ne kamata o faigata te lā olaga. Fakamuli ifo, ne isi ne lā tama‵liki, kae ne faigata foki te lotou olaga. Ne olo aka latou o ma‵tua kae ‵mate atu. (Kenese 3:23; 5:5) E ma‵saki, olo aka o ma‵tua, kae ‵mate tatou me ne ‵tupu mai tatou i te kāiga tenā.

“Te lalolagi kātoa ko nofo mai lalo i te pule a te tino masei.”—1 IOANE 5:19.

A te “tino masei” tenā ko Satani. A ia se tino faka-te-agaga sē matea, telā ne ‵teke atu ki te Atua. (Ioane 8:44; Fakaasiga 12:9) Fakamuli ifo, ne ‵kau atu foki ki a Satani a  nisi tino faka-te-agaga. E taku latou ki temoni. E fakaaoga ne tino faka-te-agaga ma‵sei konei a te lotou malosi ke fakaloiloi a tino kae fai ke fulitua atu latou ki te Mafuaga. E fakamalosi ne latou a tino e tokouke ke fai ne latou a mea ma‵sei. (Salamo 106:35-38; 1 Timoteo 4:1) E fia‵fia a Satani mo temoni o fakalogo‵mae atu ki tino.

“So se mea e ‵toki ne se tino, ka tau eiloa ne ia te mea tenā.”—KALATIA 6:7.

E logo‵mae tatou i auala e uke, ona ko te agasala ne togi mai ki a tatou mo fakamalosiga a Satani ki te lalolagi i ‵tou tafa. Kae i nisi taimi e fakafaigata foki eiloa ne tino olotou olaga. E pefea la? Kafai e fai ne latou a mea ma‵sei io me ko fakaikuga va‵lea, e tau foki loa ne latou a ikuga ma‵sei. I te suā feitu, kafai e fai ne tino a mea ‵lei, e tau ne latou a ikuga ‵lei. E pelā mo se avaga tagata kae se tamana foki telā e fakamaoni, e galue malosi, kae alofa ki tena kāiga, ka tau ne ia a mea ‵lei e uke kae fai ei ke fiafia tena kāiga. Kae ko te tino telā e kemupolo, e inu malosi io me paie, e mafai o fai ne ia a latou mo tena kaiga ke ma‵tiva. Tela la, e ‵poto tatou māfai e faka‵logo ki te ‵tou Mafuaga. E manako a ia ke tau ne tatou a mea ‵lei e uke, e aofia i ei a “te lasi o te filemu.”—Salamo 119:165.

“I aso fakaoti . . . , tino ka a‵lofa fua ki a latou eiloa, fia‵fai tupe, . . . e se faka‵logo ki mātua, . . . e seai se loto pulea, e amio fakasaua, e se fia‵fia ki te aga‵lei.”—2 TIMOTEO 3:1-5.

I aso nei, e fai ne tino e tokouke a mea konā ne ‵valo mai. E fakamaoni mai i olotou amioga me ko ‵nofo tatou “i aso fakaoti” o te lalolagi tenei. Ne ‵valo mai foki i te Tusi Tapu me ka fakamailoga ‵tou taimi ki taua, oge meakai, mafuie ‵lasi, mo masaki. (Mataio 24:3, 7, 8; Luka 21:10, 11) Konei a mea e māfua mai i ei a logo‵maega mo te mate.