“E ‵tau ei o a‵lofa a tāgata a‵vaga ki olotou avaga e pelā eiloa me ko olotou foitino ‵tonu. A te tagata telā e alofa ki tena avaga e alofa ki a ia eiloa, me e seai se tagata kai takalialia ki tena foitino eiloa, e fagai kae e fakapelepele ne ia.”—EFESO 5:28, 29.

A te tagata ko te ulu o te kāiga. (Efeso 5:23) Kae ko te tagata avaga ‵lei e se uiga saua io me uiga faimalo. E fakatāua ne ia tena avaga kae tausi faka‵lei atu ki ana manakoga faka-te-foitino mo ana lagonaga. E taumafai malosi foki a ia o fakafiafia tou fafine kae e se fai faeloa a mea e manako a ia ki ei. (Filipi 2:4) E faipati atu faeloa a ia ki tou fafine kae fakalogologo faka‵lei atu ki ei. E se “tō kaitaua malosi” tou tagata ki a ia io me tā io me faipati ‵mafa atu ki ei.—Kolose 3:19.

“A te fafine avaga e ‵tau o āva malosi ki tena avaga.”—EFESO 5:33.

A te fafine telā e āva ki tena avaga kae ‵lago atu ki ana fakaikuga, e fakamalosi ne ia te filemu i te kāiga. Kafai e fai ne te tagata se mea ‵se, e se fakatauemu atu tou fafine ki a ia kae tumau i te agamalu mo te āva. (1 Petelu 3:4) Kafai e manako tou fafine o faipati ki se mea, e filifili ne ia se taimi ‵lei kae faipati atu ki a ia mo te āva.—Failauga 3:7.

“Te tagata . . . ka ‵piki ‵mau a ia ki tena avaga, kae ka fai lāua mo fai se foitino e tasi.”—KENESE 2:24.

Kafai ko avaga se tagata mo se fafine, ko ati aka ne lāua se fesokotakiga ‵pili. Tela la, e ‵tau mo se tauavaga o taumafai o fakamalosi te lā olaga avaga e auala i lā tamā sau‵talaga atafai. E ‵tau foki o fakatau fakamaoni lāua mai i te sē ‵moe fakatauavaga mo te suā tino. A te sē fakamaoni ki tau avaga se faifaiga fakalogo‵mae. E fakamasei i ei a te loto talitonu kae ofa foki ei a te kāiga.—Epelu 13:4.

“Ke fakamasani se tamaliki ki te auala e ‵tau o fano a ia i ei; kafai ko matua a ia ka se tiaki eiloa ne ia te auala tenā.”—FAATAOTO 22:6, fml.

Ne tuku ne te Atua ki mātua a te tiute ke fakamasani olotou tama‵liki. E aofia i te mea tenā te akoako atu ki a latou a mea e ‵tau o fai kae ke fakaasi atu se fakaakoakoga ‵lei ki a latou. (Teutelonome 6:6, 7) Kafai ko se fakalogo se tamaliki, a te mātua poto e se kaitaua vave. E ‵tau mo mātua o “vave o fakalogo‵logo, kae fakatuai o fai‵pati, ke se ita vave.” (Iakopo 1:19) Kafai e fakaiku aka ne se mātua ke polopoloki tena tama, e fai ne ia te mea tenā mo te alofa kae e se mo te kaitaua.

“Tama‵liki, faka‵logo ki otou mātua . . . ‘Āva ki tou tamana mo tou mātua.’”—EFESO 6:1, 2.

E ‵tau mo tama‵liki o faka‵logo. ki olotou mātua kae ke āva malosi foki ki a lāua. Kafai e āva a tama‵liki ki olotou mātua, ka maua ei. te fiafia, te filemu mo te fealofani i te kāiga. E fakaasi atu ne tama‵liki kolā ko ma‵tua a te āva ki olotou mātua mai te tausi faka‵lei atu ki a latou. E mafai o aofia i ei a te faiga faka‵lei o olotou fale io me ko te fesoasoani atu i mea tau tupe.—1 Timoteo 5:3, 4.