Ko oko loa i te sē ‵lei māfai a tino ‵lei e logo‵mae. E mafau‵fau a nisi tino me seai se aoga ke fai pelā me se tino ‵lei, me ka logo‵mae fua koe i ei.

Nisi tino e tali‵tonu me isi se tamilosaga o te mate mo te ‵toe fanau mai. E fai mai latou i tino kolā ne fai ne latou a mea ‵lei e toe fa‵nau mai ki se olaga tai ‵lei atu, kae ko latou kolā e amio ma‵sei e toe fa‵nau mai ki se olaga o puapuaga. E ‵tusa mo te talitonuga tenā, e mafai foki loa o logo‵mae se tino ‵lei māfai ne fai ne ia a mea ma‵sei i tena “olaga mua.” Kae . . .

• Se a la te pogai e ‵tau ei o logo‵mae se tino māfai ko oti ne toe fanau mai a ia kae ko se toe masaua tena olaga mua?

• Kafai tatou e ma‵saki io me ‵tupu a fakalavelave ki a tatou ona ko mea ne fai ne tatou i aso ko ‵teka, kaia fua ka taumafai malosi ei tatou o fakatumau ‵tou ola ‵lei kae ‵kalo kea‵tea mai fakalavelave?

  KE TAULOTO KI MEA E TAI UKE ATU

  Onoono ki te vitio ko te Kaia ne Talia ei ne te Atua a Logo‵maega? i te jw.org.

A logo‵maega e sē se fakasalaga mai i te Atua.

E ‵kese mai i ei, a te ukega o fakalavelave e ‵tupu fakafuasei—maise māfai e nofo atu se tino i te koga ‵se i te taimi ‵se.

“A tino ‵tele ma‵kini e se ‵sili faeloa i te fakatau‵telega, a tino ‵mafi e se manumalo faeloa i te taua, a tino ‵poto e se maua faeloa olotou meakai, a tino malamalama e se maua faeloa olotou maumea, a latou kolā e isi se iloaga i ei e se manuia faeloa, me i taimi o fakalavelave mo mea ‵tupu fakafuasei e ‵tupu ki tino katoa.”—FAILAUGA 9:11.

E logo‵mae foki tatou ona ko ‵tou tulaga sē ‵lei katoatoa.

E fakaaoga sāle ne tino a te pati “agasala” ke fakasino atu ki se amioga masei ne fai ne se tino. Kae e fakaaoga foki i te Tusi Tapu ke fakamatala mai i ei a te tulaga sē ‵lei katoatoa telā e maua ne tino katoa—tino ‵lei mo tino ma‵sei.

“Au ne fanau mo te agasala, kae ne agasala talu mai te taimi ne fakafua ei au ne toku mātua.”—SALAMO 51:5, Fakamatalaga mai lalo.

Ne maua ne tino a ikuga matagā ona ko te agasala.

Ne fakamasei i ei a ‵tou fesokotakiga mo te ‵tou Mafuaga, pelā foki mo nisi mea ola katoa a te Atua ne faite. Ne iku atu te mea tenā ki te mauaga ne tino taki tokotasi mo te kaukāiga o tino a logo‵maega e uke.

“Kafai e manako au o fai a te mea ‵lei, kae e nofo i a au a te mea masei.”—LOMA 7:21.

“Mea katoa ne faite ne mā‵nava fi‵ta faeloa kae logo‵mae fakatasi ke oko mai ki te taimi nei.”—LOMA 8:22.