Kae ko nisi tino kolā e fakaaoga malosi ne latou a ‵poto ‵fou ke fakatumau olotou fesokotakiga mo nisi tino e masani o . . .

• se fia ‵saga malosi ki olotou taugasoa.

• se sologa malosi kae fanoanoa.

• ‵saga malosi ifo ki a latou eiloa i lō nisi tino.

LOTO MALAMALAMA

A te loto malamalama e fai ei ke faifai malie au mea kae ke mafaufau ki te suā tino—se mea faigata ona ko te uke o mea a tino e faka‵pa i te neti mo te uke o taimi e fakamāumāu ki te fai‵tau mo te lafoatuga o fekau i ei.

Fakamuli ifo, kafai ko pule koe ne poto ‵fou, a te tali atu ki fekau a ou taugasoa, e mafai o fai pelā me se galuega fakaopoopo. Ko saga koe o tali a fekau a tino kae ko se lavea ei ne koe tou taugasoa telā ko manako ki se fesoasoani.

MAFAUFAU IFO: E fakatumau pefea ne koe a “lagonaga fakataina” māfai e fakaaoga ne koe a poto ‵fou ke fesokotaki mo ou taugasoa?—1 PETELU 3:8.

LOTO FANOANOA

Ne iloa aka mai i se sukesukega ne fai me masani o se fia‵fia a tino māfai ko oti ne onoono ki ata mo sau‵talaga i te neti. Ne fakaiku aka ne tino fai sukesukega me i te onoono atu ki ata mo mea ne fai ne nisi tino, e mafai o fai i ei se tino ke maua ne ia “se lagonaga me e seai sena mea aoga ne fai.”

E se gata i ei, a te onoono atu ki ata o mea ‵gali ne faka‵pa ne nisi tino i te neti, e mafai o mafau‵fau a nisi tino me se ‵gali olotou olaga. Tela la, e foliga mai me ko oko eiloa i te fia‵fia a tino katoa ki olotou olaga kae ko koe e se gali tou olaga.

MAFAUFAU IFO: Kafai e onoono ki te neti, e ‵kalo keatea pefea koe mai i te uiga sē ‵lei ko te fakatautau ki nisi tino?—KALATIA 6:4.

SAGA IFO FUA KI A KOE

Ne iloa aka ne se faiakoga me i nisi tama‵liki i tena vasega e fai taugasoa fua ki tino kolā e fia‵fia o fai a mea mō latou. * A va fakataugasoa penā e fakavae fua ki mea aoga e maua i te fesokotakiga tenā. E mafai o kamata se tino o kilo atu ki ana taugasoa e pelā me se telefoni telā e mafai o fakaaoga ne ia māfai e manako ki ei kae ka oti ko tiaki ei.

MAFAUFAU IFO: E mata, a mea e faka‵pa ne koe i te neti e fakaasi atu ei me e isi se uiga fakatau‵fai i a koe io me ko tō saga ifo fua ki a koe?—KALATIA 5:26.

KE ILOILO TE FAKAAOGAGA O POTO ‵FOU

Kafai e fai a poto ‵fou mo tau tavini kae e se ko tou matai, ka fesoasoani atu ke fesokotaki koe mo ou taugasoa kae ke pili malosi atu ki a latou.

Fili a manatu e manako koe o fakaaoga io me tusi ki lalo ou manatu totino.

• Fai ke uke a taimi e sau‵tala tonu koe mo tino (i lō te faka‵na ki te aveavega fua o fekau io me ko meli)

• Tuku fakaatea (io me tamate te ‵tagi) o tau telefoni māfai ko sau‵tala mo nisi tino

• Fakamu‵tana a taimi e onoono ki mea i luga i te neti

• Fai mo fai se tino fakalogologo faka‵lei

• Fesokotaki atu ki se taugasoa telā e fepaki mo se fakalavelave