FAKATAKITAKIGA MAI TE TUSI TAPU: “A te tino e tuai o ita e ‵lei atu i lō se tagata mafi.”—Faataoto 16:32.

TE MEA E FAKAUIGA KI EI: E maua ne tatou a mea aoga māfai e loto ma‵losi tatou o pule faka‵lei atu ki ‵tou lagonaga. I nisi taimi e ita tatou ona ko pogai ‵tau, kae kafai e se mafai o pule faka‵lei atu tatou ki ‵tou kaitāua, ka ‵tupu i ei a fakalavelave. I se sukesukega a tāgata ‵poto, ne fai mai latou me i te taimi e kaitaua malosi i ei te tino, ka fai eiloa ne te tino tenā a mea io me ko pati kolā ka salamō fakamuli i ei a ia.

MEA E MAFAI NE KOE O FAI: Ke taumafai o pule faka‵lei atu ki tou kaitaua a koi tuai o tupu se fakalavelave. Faitalia loa me mafau‵fau nisi tino me i te fakaasi atu o tou kaitaua se fakaasiga i a koe e mafi, a ko te ‵tonuga loa, a te mea tenā se fakailoga o te tino ‵seva. “E pelā me se fakai ne ofa ki lalo, ko seai sena ‵pui, ko te tagata telā e se mafai o taofi tena kaitaua,” ko pati a te Tusi Tapu. (Faataoto 25:28) A te auala aoga e mafai o pule faka‵lei atu koe ki tou kaitaua ko te ‵sala atu ki ne fakamaoniga ‵tonu o te tala. “A te ‵loto o te malamalama o se tagata e fakatuai ei tena kaitaua.” (Faataoto 19:11) Se mea poto ke fakalogo‵logo faka‵lei ke iloa ne tatou a feitu e lua o te tala, me ka fesoasoani mai ei ke malamalama tatou kae fai ei ke taofiofi aka ei a ‵tou lagonaga.

FAKATAKITAKIGA MAI TE TUSI TAPU: “Ke fakaasi atu te otou loto fakafetai.”—Kolose 3:15.

 TE MEA E FAKAUIGA KI EI: Ko oti ne lagona ne tatou me i te tino telā e loto fakafetai ka fiafia. Kae ka lotoma‵lie foki ki ei a tino kolā ne ‵galo atu olotou tino pele. A te mea telā e fesoasoani atu ke fakafeoloolo aka ei olotou lagonaga ko te loto fakafetai ki mea koi maua ne latou i lō te mafau‵fau faeloa ki mea kolā ko ‵galo atu.

MEA E MAFAI NE KOE O FAI: I aso takitasi, ke tusi ki lalo a mea kolā e loto fakafetai koe ki ei. E se manakogina i ei a mea ‵lasi. Ke mafaufau foki ki mea fo‵liki, e pelā mo te gali o te saeakaga o te lā i te tafataeao, se sau‵talaga gali mo se tino pele, io me ko te mauaga o te ola i te aso tenā. A mea konei ka fesoasoani atu ki ou lagonaga—māfai e fakamāumāu ne koe ou taimi ke mafaufau ki ei kae loto fakafetai e uiga ki ei.

Ka aoga malosi eiloa ki a koe māfai e loto fakafetai koe e uiga ki ou kāiga mo ou taugasoa. Kafai e iloa ne koe a mea kolā e loto fakafetai ki ei e uiga ki nisi tino, ke fakaasi tonu atu ne koe ki a latou, io me auala i se tusi io me se meli iti. Ka fakamalosi eiloa ne te mea tenei tou vā fesokotaki mo latou kae ka lagona ne koe te fiafia telā e maua mai te tuku atu o au mea ‵gali ki nisi tino.—Galuega 20:35.

KALO KEA‵TEA MAI KINAUGA.

“A te kamataga o se taua e pelā eiloa mo te ‵talaga o se mea e taofi ei a vai; koi tuai o kamata se kinauga, ke na fano kea‵tea koe.”​—FAATAOTO 17:14.

KALO KEA‵TEA MAI TE SŌNA MANAVASE KI ASO MAI MUA.

“Ke mo a ma manava‵se ki te aso ma taeao, me e manavase eiloa te aso ma taeao ki ana mea. E tofu eiloa te aso mo ana fakalavelave.”​—MATAIO 6:34.

KE MAFAUFAU MUAMUA KOI TUAI O FAI SE MEA KAE SA SAGA KI OU LAGONAGA.

“A te mafaufau ‵lei ka leoleo ne ia koe, kae ko te atamai i te faiga o faka‵tauga ‵lei ka puipui ei koe.”​—FAATAOTO 2:11.