Kafai e ‵vae kea‵tea tatou mai tino kolā e mafau‵fau tatou me e se ‵lei, ka fakamalosi aka i ei ne tatou te ‵tou fakailoga tino. Kae kafai e fakamasani fua tatou ki tino kolā e ‵pau mo tatou, e mafai o mafau‵fau tatou i mea e fai ne tatou, tou mafaufauga, lagonaga mo ‵tou faifaiga ko toe mea ‵lei eiloa.

“‵Tala otou loto ke ma‵tala lei.” —2 KOLINITO 6:13.

Se a tena uiga? A ‵tou “loto” e fakasino loa ki ‵tou lagonaga mo ‵tou faifaiga a‵lofa. Kafai e a‵lofa fua tatou ki tino kolā e ‵pau mo tatou, ka fai i ei ke ‵pono ‵tou loto. Ke faka‵lei aka te fakalavelave tenā, e ‵tau mo tatou o fakamasani ki tino kolā e ‵kese mo tatou.

Kafai e fakamasani faka‵lei tatou ki nisi tino, ka fai i ei ke malamalama ‵lei tatou i te pogai e ‵kese i ei olotou mea e fai. Kae kafai ko gasolo o ‵pili atu tatou ki a latou, ka lavea i ei ne tatou me ‵pau eiloa latou mo tatou. Ka fakatāua ne tatou a latou, kae ka fia‵fia tatou ki mea e fia‵fia ki ei latou, kae ka fanoa‵noa fakatasi foki tatou māfai e fanoa‵noa latou.

Mafaufau ki te tala o Nazaré. Muamua la, ne seki fiafia a ia ki tino ‵fou kolā e ‵mai ki te lotou fenua. Ne fakamatala mai ne ia a te mea ne fesoasoani atu ki a ia: “Ne fakaaoga ne au a taimi e uke kae ga‵lue fakatasi mo latou. Ne masani au ki tino kolā e ‵kese ‵mao mo te mea ne logo ei au mai nisi tino. Kafai  e fakamasani koe ki tino kolā e ‵kese olotou tuu mo aganuu, ka fai i ei ke se faka‵kese ne koe a latou, kae ka fai foki i ei ke alofa kae fakatāua ne koe a latou.”

Taumafai ke faipati ki tino kolā e ‵kese te lotou fenua, olotou telega io me ko te lotou ‵gana mai i a koe. E mafai ne koe o

• Fai atu ke fakamatala mai a mea e uiga ki a latou.

• ‵Kami mai ke ‵kai fakatasi koutou.

• Fakalogologo ki olotou tala kae ka iloa ne koe a mea kolā e tāua ki a latou.

Kafai e taumafai ke iloa ne koe a mea ne ‵tupu ki olotou olaga tenā ne pogai i ei o fai latou penā, ka ati aka i ei ne koe se kilokiloga ‵lei ki tino konā.