Se Faka‵leiga Tumau
E lau i miliona o tino ne fakagalue ne latou a fakatakitakiga kolā ne fakamatala mai i mataupu mai mua kae ne mafai ei o tapale kea‵tea ne latou te fakailoga tino mai i olotou loto. Kae se mea tonu me e se mafai o fakaseai katoatoa ne tatou a te fakailoga tino i a tatou eiloa. Tela la, e mata, ko seai se fakamoemoega ki te feitu tenā?
Se Malo ‵Lei Katoatoa
Ne seki mafai ne malo o tāgata o fakaseai katoatoa a te fakailoga tino. Kae e mata, e fakauiga i ei me ko seai eiloa se malo e mafai o fakaseai ne ia te fakailoga tino?
A te malo telā ka faka‵lei ne ia a te fakailoga tino e ‵tau o
-
1. Fakamalosi ne ia ke ‵fuli te kilokiloga a tino mo olotou lagonaga e uiga ki nisi tino.
-
2. Fakaseai a lagonaga fakailoga tino kolā e fakamāfua aka i ei a faifaiga sē ‵lei e fai ne latou ki nisi tino.
-
3. Maua ne ia ne takitaki kolā e se fakailoga tino kae faka‵pau katoa ne latou a tino i te fenua.
-
4. Fai ke ‵kau fakatasi a tino o fenua katoa.
E fakamaoni mai ne te Tusi Tapu me tuku mai ne te Atua se vaegā malo penā. E fakaigoa ki “te Malo o te Atua.”—Luka 4:43.
Mafaufau ki mea ka fai ne te malo tenā.
1. Akoakoga ‵Lei
“[Ka] tauloto ne tino kolā e ‵nofo i te fenua a mea e uiga ki te amiotonu.” —ISAIA 26:9.
“E iku atu a te tinā amiotonu ki te filemu, kae ko fuataga o te tinā amiotonu ko te tokagamalie mo te saogalemu tumau.”—ISAIA 32:17.
Se a te uiga o te mea tenei? Ka akoako ne te Malo o te Atua a tino ki te mea tonu. Kafai ko iloa ne tino a te mea tonu mai te mea ‵se—te fai mea tonu mai te fai mea sē tonu—ka ‵fuli ei a faifaiga a latou e uiga ki nisi tino. Ka iloa ne tino katoa i te mea e ‵tau o fai ko te alofa ki vaegā tino kese‵kese katoa.
2. Se Faka‵leiga
A te Atua “ka ‵solo kea‵tea ne ia a loimata katoa mai olotou mata, kae ka se toe ai se mate, ka se toe ai foki se fanoanoa, se tagi io me se ‵mae. Ko palele atu a mea mua.”—FAKAASIGA 21:4.
Se a te uiga o te mea tenei? Ka fakaseai ne te Malo o te Atua a logo‵maega katoa kolā ne māfua mai ona ko faifaiga sē ‵tonu. A tino kolā ne pokotia ona ko faifaiga sē ‵tonu ka se toe maua ne latou ne lagonaga kaitāua.
3. Se Takitakiga ‵Lei
“Ka se fai fua ana fakamasinoga e ‵tusa mo mea e lavea ki ana mata, io me polopoloki ‵mafa e ‵tusa mo mea e lagona ki ana taliga. Ka fakamasino ne ia a tino ma‵lalo mo te ‵lei, kae e auala i te fai mea tonu ka polopoloki ‵mafa ne ia a nisi tino ona ko tino agamalu i te lalolagi.”—ISAIA 11:3, 4.
Se a te uiga o te mea tenei? A Iesu Keliso te Tupu o te Malo o te Atua i te lagi, ka pule atu ki tino i te lalolagi kātoa e aunoa mo te fakailoga tino. E se fapito a Iesu ki se fenua e tasi, kae ka fakamautinoa ne ia me i tino katoa i te lalolagi ka faka‵logo ki ana tulafono amio‵tonu.
4. ‵Kau Fakatasi Kae Fealofani
Ka akoako ne te Malo o te Atua a tino ke ‵kau fakatasi ‘i te tasi o olotou mafaufau mo te tasi o te lotou a‵lofa, e fealofani katoatoa, kae e tasi latou i olotou manatu.’—FILIPI 2:2.
Se a te uiga o te mea tenei? A te ‵kau fakatasi mo te fealofani o tino i te Malo o te Atua e se lavea atu fua i olotou pati. Ka ‵kau fakatasi kae “fealofani katoatoa” latou ona ko te alofa tonu telā e fakaasi atu ne latou i a latou eiloa.
