Au ne tupu aka i Graz, i Austria. I te fitu o oku tausaga, ne avatu au ki se akoga ke akoako au ki mea fakalotu. Kae ui i ei, ne molimau ne au a amioga fakatauavaga sē ‵tau i te vā o faifeau mo sina. Tela la, ne talia ne toku matua ke tiaki ne au a te akoga i loto i se tausaga e tasi.

Fakamuli ifo, ne fanatu au ki se akoga e ‵nofo i loto a tama‵liki a‵koga. I se po e tasi, ne fanatu toku tamana o puke au ona ko Graz ne pōmu valevale. Ne olo atu matou o faka‵lafi i te fakai o Schladming. Mai tua malie o te okoatuga kae olo atu i te puliti, mea loa ko ‵pa. I te suā taimi, ne fanafana mai ki a māua mo toku tupuna fafine ne vakalele tau i te motou koga. I te otiga o te taua, ne foliga mai me ko tuku tiaki atu fua matou ne te malo mo te lotu.

I te 1950, ne sau‵tala eiloa se tokotasi o Molimau a Ieova mo toku mātua ki te fekau mai te Tusi Tapu. Ne fakalogologo eiloa au ki lā sau‵talaga kae olo fakatasi mo toku mātua ki fakatasiga a te fakapotopotoga. Ona ko te loto talitonu me ne maua ne Molimau a Ieova a te munatonu, ne papatiso ei tou fafine i te 1952.

I te taimi tenā, ne foliga mai me i te fakapotopotoga tenei e pelā me se koga mō loma‵tua fua. Kae fakamuli ifo, ne asi atu matou ki se fakapotopotoga telā e tokouke i ei a talavou—e sē se kalapu a loma‵tua! I te ‵fokiatuga ki Graz, ne kamata o kau atu au ki fakatasiga katoa, kae ne kamata o loto talitonu au me i mea kolā ne tauloto ne au, ko te munatonu eiloa. Ne kamata foki o iloa ne au a Ieova e pelā me ko te Atua telā e tuku mai ne ia te fesoasoani ki ana tavini. E fai a ia penā māfai foki loa e mafau‵fau tatou me fakafesagai atu tatou ki fakanofonofoga kolā e se mafai o fakafesagai atu ki ei i a tatou eiloa.—Sala. 3:5, 6.

Ne manako au o fakasalalau atu te munatonu ki nisi tino. Ne kamata muamua au ki oku taina ‵tonu. Ne tiakina ne oku taina ma‵tua e tokofa a te fale kae olo atu o ga‵lue e pelā me ne faiakoga. Kae ne asi atu au ki a latou i fakai kese‵kese kae  fakamalosi latou ke suke‵suke ki te Tusi Tapu. Fakamuli loa, ne fai eiloa oku taina e pelā me ne Molimau a Ieova.

I te lua vaiaso o oku i te galuega talai mai fale ki fale, ne fetaui au mo se fafine telā ko 30 tupu ana tausaga kae ne kamata māua o suke‵suke ki te Tusi Tapu. Ne gasolo a ia ki mua kae papatiso, kae fakamuli ifo, ne fai foki penā a tena avaga mo ana tamaliki tāgata e tokolua. Ne aoga eiloa a te akoga tenā ki a au i te feitu faka-te-agaga. Kaia? Ia, ne seki ai eiloa se tino ne fai faka‵lei ne au sena akoga faka-te-Tusi Tapu. Ne ‵tau mo au o fakatoka faka‵lei mō mataupu takitasi. I te auala tenā, ne fesoasoani mai ke akoako muamua ne au a au eiloa ko te mea ke mafai ne au o akoako atu taku tino akoga! Ne fai ne te mea tenā ke ‵poko toku loto fakafetai mō te munatonu. I a Apelila 1954, ne fakamailoga taku tukuatuga ki a Ieova ki te papatisoga ki te vai.

I te 1955, ne kau atu au ki fono o atufenua i Siamani, Falani mo Egelani. I taku nofoga i Lonitoni, ne fetaui au mo Albert Schroeder. A ia se faiakoga i te Akoga Faka-te-Tusi Tapu ko Kiliata, kae fakamuli ifo ne tavini atu a ia e pelā me se sui o te Potukau Pule. I te taimi o se asiga ki te Fale Tausi Mea Mua i Peletania, ne fakasino mai ne te Taina ko Schroeder ki a matou a nisi tusitusiga o te Tusi Tapu. Ne aofia i ei a te igoa o te Atua i mataimanu Epelu, kae ne fakamatala mai ne ia te olotou tāua. Ne otia eiloa au i te mea tenei kae ne fai ei ke alofa malosi au ki a Ieova mo te munatonu, kae ke fakaiku aka ke fakasalalau atu ne au te munatonu mai te Muna a te Atua.

Ne kamata o tavini atu au e pelā me se paenia tumau i a Ianuali 1, 1956. I se fa masina mai tua ifo, ne ‵kami au ke tavini atu e pelā me se paenia fakapito i Austria. I te taimi tenā, ne seki ai eiloa ne Molimau i Mistelbach, te fakai telā ne tavini atu ei au. Kae ne fakafesagai atu au mo se tofotofoga e tasi. Ne tai ‵kese eiloa au mo toku soa paenia. Au ko 19 oku tausaga kae ne tupu aka au i se fakai ‵lasi; a ko ia ko 25 ana tausaga kae ne tupu aka i se fakai foliki. Ne fiafia eiloa au o ala tuai i taeao katoa; ne fiafia tou fafine o ala ‵malu i te taeao. Kafai ko po, ne fiafia au o ‵pula leva; kae ne manako tou fafine o moe vave. Kae ui i ei, mai te fakagalue aka o manatu fesoasoani mai te Tusi Tapu, ne ga‵lue eiloa māua ki mea konā e ‵kese i ei māua kae ne maua i ei te fiafia mo te fakamanuiaga e pelā me ne soa paenia.

A te ‵tonuga loa, ne isi aka foki nisi mea faiga‵ta ne fe‵paki mo māua. E pelā mo fakasauaga, kae ne seki “tuku tiaki” eiloa māua. (2 Koli. 4:7-9) I se taimi e tasi i te galuega talai i se fakai i te vao, ne fakaoso mai ne tino i konā a olotou kuli. Ne fakatamilo māua mo toku soa ne kuli ‵lasi e kā‵ka mai kae fakaasiasi mai olotou nifo. Ne pikilima māua, kae ne ‵talo atu au, “Ieova, fakamolemole, kafai e oso mai latou, e mafai māua o ‵mate fakavave!” I te taimi ne fakapilipili mai ei a kuli ki a māua, ne ‵tu latou, fakagasue‵sue olotou felo kae sasale atu kea‵tea. Ne lagona ne māua me ne puipui eiloa māua ne Ieova. Mai tua i konā, ne talai atu māua i te fakai kātoa, kae ne ‵poi māua me ne tali fia‵fia māua ne tino i konā. Kāti ne ‵poi eiloa latou me ne seki fakapa‵kia ne kuli a māua io me ne lavea ne latou me ne tumau eiloa māua i te kufaki mai tua o se mea fakamataku ne tupu. Ne fai a nisi o latou fakamuli mo Molimau a Ieova.

Ne toe isi foki se suā tala fakamataku a māua. I te aso e tasi ne vau te tino i ō ia te fale kae vale, kae ne fakamatakutaku ne ia ke tamate māua  kae ke fai atu me ne fakalavelave māua ki tuakoi. Ne taumafai tena avaga o faka‵noga aka tou tagata kae ne seki iku manuia. Ne lagona ne māua ana pati katoa mai te ma potu i luga. Ne faka‵tu fakavave ne māua a nofoaga i mua o te mataloa kae kamata o fakatoka ma pausi. I te taimi ne ‵tala ei ne māua a te mataloa, ne tu mai te tino i ō ia te fale i te kakega, kae puke i ana lima a te naifi lasi. Telā ne tele ei māua mai i te mataloa mai tua kae ulu atu i loto i se fatoaga mo ma kopekopega katoa, kae seki toe ‵foki atu.

Ne olo atu māua ki se fale talimalo kae fakamolemole atu mō se potu. Tela la, toeitiiti ko kātoa te tausaga ne ‵nofo atu māua i konā, telā ne aoga eiloa ki te mā galuega talai. I te auala fea? A te fale talimalo tenā e tu i te kogaloto o te fakai, kae e isi ne mā akoga faka-te-Tusi Tapu ne ma‵nako ke fai olotou akoga i konā. E se leva, kae ne fai ne matou te sukesukega ki te tusi mo te Sukesukega ki Te Faleleoleo Maluga i te ma potu, mo se toko 15 ne ‵kau atu ki ei.

Ne ‵nofo atu māua i Mistelbach mō se tausaga tupu. Kae ne toe fakagasue atu au ki Feldbach , i te feitu ki saute o Graz. Ne maua foki ne au se soa paenia fou, kae e seai foki se fakapotopotoga i konā. Ne ‵nofo atu māua i se potu foliki i te lua o fata o se fale laupapa. A te matagi e sao mai loto ki loto i vasia o laupapa, tela la ne taumafai māua o pono a pūga ki nusipepa. Ne asu foki ma vai mai se vaikeli. Kae ne gali ‵ki eiloa. I nāi masina mai tua ifo, ne fakatu aka ei se potukau. Fakamuli loa, e nofo ki se 30 tino mai se kāiga telā ne suke‵suke mo māua ne ‵mai katoa ki loto i te munatonu!

Ne fakamalosi aka ne mea konei a toku loto fakafetai ki te fesoasoani tumau o Ieova ki tino kolā e kausaki atu ki manakoga o te Malo. Faitalia eiloa me ko se maua ne tatou a te fesoasoani mai tino, a ko Ieova e toka faeloa.—Sala. 121:1-3.

I te 1958, ne fai se fono i te atufenua i Niu Ioki, i te Yankee Stadium mo te Polo Grounds. Ne tusi atu au ke kau ki ei, kae ne fakamolemole mai a te ofisa lagolago i Austria me ko au e fiafia o kau ki te Akoga Kiliata, te vasega 32. Kaia fua la ka fakaseke ei ne au te tauliaga tenei? Ne tali fakavave atu au, “Ao!”

I te akoga i Kiliata, ne saga‵saga tasi eiloa māua mo Martin Poetzinger. Ne fakafesagai atu eiloa a ia mo te kufaki ki mea matagā i te falepuipui a te kau Nasi. Ne tavini fakamuli atu foki  a ia e pelā me se sui o te Potukau Pule. I taimi o te akoga, ne musumusu mai sāle a Martin ki a au, “Erika, se a te uiga o te mea tenā i te ‵gana Siamani?”

Kāti ko pilipili o oti te akoga, kae ne faka‵pula mai ne te Taina ko Nathan Knorr a fenua e olo matou o galue i ei. Au ne ‵tofi ki Paraguay. Ona ko au se talavou foliki, ne manakogina se taliaga mai toku tamana ke fanatu au ki te fenua tenā. I te mauaga ne au, ne oko atu au ki Paraguay i a Mati 1959. Ne ‵tofi aka au ke nofo i se fale misionale i Asunción, fakatasi mo se soa paenia fou.

E se leva, kae ne fetaui māua mo Walter Bright, se misionale i te vasega 30 mai Kiliata. E se leva, kae ne avaga māua kae ne mafai o fakafesagai tokolua atu ki mea faiga‵ta. E tiga eiloa ne fakafesagai atu māua ki se fakalavelave faigata, ne fai‵tau faeloa māua ki te folafolaga a Ieova i te Isaia 41:10: “Sa mataku, me i a au e fakatasi atu ki a koe. Sa manavase, me i a au ko tou Atua. Ka fakamalosi ne au a koe.” Ne fakatalitonu mai ne te mea tenei me kafai e taumafai māua o tumau i te fakamaoni ki te Atua kae fakamuamua tena Malo, ka se tuku tiaki eiloa ne ia māua.

Fakamuli loa, ne ‵tofi aka māua ki se kogā koga e pili ki te tuakoi o Pasili. Ne fakamalosi ne faifeau i konā a talavou ke peipei ne latou a te fale misionale ki fatu, telā ko se ‵lei te tulaga o ia. Kae ne kamata ne Walter se akoga faka-te-Tusi Tapu mo te pule o pulisimani. Ne fakamautinoa aka faeloa ne ia ke tu atu a pulisimani i tafa o te mā fale mō se vaiaso, kae ne seki toe fakalavelave mai ki a māua a tino fakasauā. E se leva mai tua ifo, ne olo atu māua ki nisi fale tai ‵lei atu i te tuakoi o Pasili. Ne faigofie eiloa te fakatokaga tenei ona ko te mea ko mafai ne māua o fai a fakatasiga i te ‵gana Paraguay mo te ‵gana Pasili. A koi tuai o tiakina ne māua a te fenua tenā, kae ko oti ne ‵tu a fakapotopotoga e lua i te koga tenā.

Ne fai mai a oku tokita me sē mafai o isi ne aku tamaliki, kae ne ‵poi māua ke iloa atu me i te 1962, au ko faitama! Ne olo fakamuli atu māua o ‵nofo i Hollywood, i Florida, ke pili ki te kāiga o Walter. I se fia o tausaga, ne seki mafai ne māua mo Walter o paenia. Ne ‵tau o tausi atu māua ki te mā kāiga. Kae tiga te feitu tenā, ne tumau eiloa māua i te fakamuamua a manakoga o te Malo.—Mata. 6:33.

I te taimi ne oko atu ei māua ki Florida i a Novema 1962, ne ‵poi eiloa māua ke iloa atu me ne seki ma‵nako a tino i konā ko tino ‵kena ke ‵kau fakatasi mo tino uli i te koga e tasi kae ‵kese foki olotou koga talai. Kae ko Ieova e se fakakese‵kese ne ia a tino mai fenua kese‵kese, kae seki leva mea loa ko toe ‵kau fakatasi a fakapotopotoga kolā e aofia i ei a taina mai fenua kese‵kese. Ne lavea ‵lei atu eiloa te lima fesoasoani o Ieova i te fakatokaga tenei, me ko lau nei i te fia o fakapotopotoga i te kogā koga tenā.

Se mea fakafanoanoa me ne galo atu a Walter mai te kenisa o te mafaufau i te 2015. A ia se avaga gali telā ne ola mai mō se 55 tausaga, se tino telā ne alofa ki a Ieova kae fesoasoani atu ki taina e tokouke. E olioli eiloa au ke toe fetaui mo ia i te ola mo te malosi māfai ko toe fakatu mai a ia.—Galu. 24:15.

Ko oko eiloa toku fiafia ke tumau i te taviniga tumau mō se 40 tupu tausaga, kae maua a fakamanuiaga e uke. E pelā me se fakaakoakoga, ne mafai ne māua mo Walter o ‵kau atu ki papatisoga a mā a‵koga faka-te-Tusi Tapu e toko 136. E tonu, e uke a mea faiga‵ta. Kae ne seki ‵kilo atu māua ki ei e pelā me ko te pogai ke taofi aka ei te ma taviniga ki te ‵tou Atua fakamaoni. I lō te fai penā, ne fakapili‵pili atu māua ki a ia, kae tali‵tonu me ka faka‵lei ne ia a mea i tena taimi tonu mo tena auala. Kae ka fai eiloa a ia penā!—2 Timo. 4:16, 17.

E misi malosi ne au a Walter, kae e fesoasoani mai te galuega fakapaenia ke fa‵ki au. Ne lavea ne au te tāua ke akoako atu a nisi tino, kae ke fakailoa atu foki ki a latou a te fakamoemoega e uiga ki te toetuga. E tonu, e uke ‵ki auala koi masaua atu ne au a te fesoasoani o Ieova ki a au. E fai mea tonu, ne fakatumau ne ia au, fakamalosi ne ia au, kae puke ‵mau ne ia au ki tena “lima fakaatamai o te amiotonu.”—Isa. 41:10.