1, 2. (a) E ‵saga atu pefea a nisi mātua Kelisiano māfai ko fai atu olotou tamaliki i a latou ko fia papatiso? (e) Kaia e masani o ‵sili atu ki tino papatiso me ko oti ne fai ne latou se tukuatuga ki a Ieova? (Ke onoono ki te ata i te kamataga.)

I TE taimi ne ‵kilo atu ana mātua Kelisiano ki a ia, telā ka fakaigoa ne tatou ki a Maria, ne tu aka a tou fafine fakatasi mo nisi tino kolā ka papatiso. I se leo lasi kae manino, ne tali eiloa ne tou fafine a fesili e lua kolā ne ‵sili atu ne te failāuga. E se leva, kae papatiso tou fafine.

² Ne fakamata‵mata eiloa a mātua o Maria i te fakaikuga a te lā tamaliki fafine ke fai tena tukuatuga mautinoa ki a Ieova kae papatiso. Kae ui i ei, ne ‵sae aka a nāi fesili i te mafaufau o tena mātua. Ne ‵sili ifo a ia eiloa penei: ‘E mata, a Maria ko tō foliki ke papatiso? E mata, e malamalama eiloa tou fafine i te tāua o te mea e fai ne ia? E mata, se mea ‵lei ke tai faka‵tali malie tou fafine a koi tuai o papatiso?’ Konei a fesili e ‵sili sāle ne te tokoukega o mātua ki a latou eiloa māfai ko fakaasi atu ne se tamaliki a tena manakoga ke papatiso. (Fai. 5:5) Ao, a te tukuatuga mo te papatisoga ko toe  lasaga tāua i te olaga o se Kelisiano.—Ke onoono ki te pokisi ko te “ E Mata, ko Oti ne Fai Tau Tukuatuga ki a Ieova?”

3, 4. (a) Ne fakatusa ne te apositolo ko Petelu a te papatisoga ki te a? (e) Kaia e mafai ei o fakatusa a te papatisoga ki te faitega o te vaka i aso o Noa?

³ E uiga ki te papatisoga, ne fakasino atu eiloa a te apositolo ko Petelu ki te faitega o te vaka o Noa: “A te papatisoga telā e ‵pau mo te mea tenei, e faka‵sao foki i ei koutou.” (Faitau te 1 Petelu 3:20, 21.) A te vaka se fakaasiga matea ke fakamaoni atu i ei me ne tuku katoatoa atu eiloa a Noa ki te faiga o te loto o te Atua. Ne fakataunu ne Noa mo te fakamaoni a te galuega telā ne tuku atu ne Ieova ke fai ne ia. Ao, ne iku atu a faiga matea o te fakatuanaki ki te ‵sao o Noa mo tena kāiga i te Lolo. Se a te uiga o te fakatusaga tenei a Petelu?

⁴ E pelā eiloa mo te vaka se fakamaoniga matea o te fakatuanaki o Noa, a te papatisoga foki se fakamaoniga matea ki tino kolā e ‵nofo atu i te taimi tenā. Se a te mea e fakaasi mai i ei? Me i te soko Kelisiano ko oti ne tuku atu ki a Ieova e auala i te fakatuanaki ki te Keliso telā ne toetu mai. E pelā mo Noa, e faka‵logo eiloa a soko tukugina atu o fai te galuega telā ne fakatonu atu te Atua ke fai ne latou. E pelā mo Noa telā ne sao atu i te Lolo, ka ‵sao atu eiloa a tino papatiso fakamaoni māfai ko oko mai te gataga ki te olaga masei tenei. (Male. 13:10; Fa 7:9, 10) E fai ne te mea tenei ke tāua ‵ki eiloa a te tukuatuga mo te papatisoga. A te tino telā e fakatalave ne ia tena papatisoga e aunoa mo se pogai, e fai i ei ke ‵tu i se tulaga fakamataku a tena fakamoemoega ke ola ki te se-gata-mai.

5. Ne a mea ka sau‵tala tatou ki ei i te mataupu tenei?

⁵ Mai te mafaufau ki te tāua o te papatisoga, e tolu a fesili ka mafau‵fau tatou ki ei. Se a te mea e akoako mai i te Tusi Tapu e uiga ki te papatisoga? Ne a mea e ‵tau o fai ne se tino a koi tuai a ia o papatiso? Kaia e ‵tau ei o mafaufau  faka‵lei se faiakoga Kelisiano ki te tāua o te papatisoga māfai ko akoako ne ia tena tamaliki io me se suā akoga faka-te-Tusi Tapu?

6, 7. (a) Fakamatala mai te tāua o te papatisoga a Ioane. (e) Se a te papatisoga tu ‵kese ne fai ne Ioane?

⁶ Ne fai‵tau muamua tatou ki papatisoga i te Tusi Tapu kolā ne fai ne Ioane te Papatiso. (Mata. 3:1-6) A latou kolā ne talia ne latou te papatisoga a Ioane ne papatiso eiloa ke fakamaoni atu ei a te lotou loto sala‵mo ki agasala kolā ne ‵teke atu ki te tulafono faka-Mose. Kae se mea tāua me i te ‵toe papatisoga tāua telā ne fai ne Ioane ne seki manakogina i ei te loto salamō. Ne maua ne Ioane te tauliaga tu ‵kese ke papatiso ne ia a Iesu, te Tama ‵lei katoatoa a te Atua. (Mata. 3:13-17) Ne seki agasala a Iesu, tela la ne seki manakogina ke salamō a ia. (1 Pe. 2:22) A tena papatisoga ko te fakamailoga o te fai ne ia te loto o te Atua.—Epe. 10:7.

⁷ Talu mai te taviniga a Iesu i te lalolagi, ne fai foki ne ana soko a papatisoga. (Ioa. 3:22; 4:1, 2) E pelā mo te papatisoga ne fai ne Ioane, a papatisoga konei ne fakailoga o te sala‵mo tonu o tino ki olotou agasala kolā e se fetaui mo te tulafono faka-Mose. Kae, mai tua o te mate mo te toetuga o Iesu, ne tai ‵kese eiloa te uiga o te papatisoga mō ana soko.

8. (a) Mai tua o tena toetuga, se a te fakatonuga ne fai atu ne Iesu ki ana soko? (e) Fakamatala mai te tāua o te papatisoga faka-Kelisiano.

⁸ I te 33 T.A., ne fakasae atu a Iesu telā ne toetu mai ki se vaitino kolā e silia atu mo te 500 tāgata, fāfine, kae penā foki loa a tama‵liki. Kāti ko te taimi eiloa tenā ne fai atu ei a ia, penei: “Tela la, olo atu koutou ki fenua katoa o fai a tino i ei mo fai a soko kae papatiso atu latou i te igoa o te Tamana mo te agaga tapu, akoako atu latou ke faka‵logo ki mea katoa ne fakatonu atu ne au ki a koutou.” (Mata. 28:19, 20; 1 Koli. 15:6) Ao, kaati e lau i selau o ana soko ne ‵nofo atu i konā i te taimi ne fai atu ne Iesu te fakatonuga ke fai a soko. Ne fakaasi mai ne Iesu me i te papatisoga se fakatonuga mō latou kolā e talia ne latou te amoga Kelisiano ke fai pelā me ne soko. (Mata. 11:29, 30) E ‵tau mo so se tino telā e manako ke tavini atu ki te Atua mo te loto fiafia o iloa kae talia ne ia te tiute o Iesu i te fakataunuga o te fuafuaga a Ieova. Kafai ko oti, ko mafai ei a ia o papatiso. Tenei fua te papatisoga ki te vai ka maua i ei te taliaga a te Atua. E maua i tala i te Tusi Tapu a fakamaoni e uke me i te senitenali muamua, ne malamalama eiloa a soko ‵fou o Keliso i te tāua o te papatisoga. Kae ne seki fakatalave ne latou e aunoa mo se pogai a te lotou papatisoga.—Galu. 2:41; 9:18; 16:14, 15, 32, 33.

9, 10. Se a te mea e mafai o tauloto ne tatou e uiga ki te papatisoga a te tagata Aitiope mo te apositolo ko Paulo?

⁹ Faitau te Galuega 8:35, 36. Mafaufau ki te fakaakoakoga a te tino Aitiope telā ne foki atu ki tena fale mai te fanoga o tapuaki i Ielusalema. E auala i te fakamalosiga a te agelu a Ieova, ne fanatu a Filipo ki te Aitiope kae “folafola atu ne ia ki tou tagata a te tala ‵lei e uiga ki a Iesu.” Se a te tali a te tagata Aitiope? A te mea ne fai ne ia mai tua, se fakamaoniga o te lasi o tena loto fakafetai mō muna‵tonu ne tauloto ne ia. Ne manako eiloa a ia o galue e ‵tusa mo te fakatokaga a Ieova, tela la, ne seki fakatalave a ia o papatiso.

¹⁰ A te lua o fakaakoakoga ko te tagata Iutaia telā ne fakasauagina ne ia a Kelisiano. Ne fanau a ia i se fenua telā ne tuku atu ki te Atua. E ui i ei, ne galo atu i te kau Iutaia a te lotou fesokotakiga fakapito mo Ieova. Ne fiafia eiloa te tagata tenā ki tuu faka-Iutaia, kae ne tauloto ne ia a mea i se auala e ‵lei atu. Ne maua ne ia se molimau totino mai i a Iesu Keliso telā ne toetu mai kae faka‵malugina. Se a  te kilokiloga a te tagata tenā? Ne talia ne ia te tino fesoasoani mai soko Kelisiano, ko Anania. E uiga ki te tagata tenā, e fai mai te Tusi Tapu: “Tenā, ne tu aka ei a ia ki luga ko te mea eiloa ko papatiso a ia.” (Galu. 9:17, 18; Kala. 1:14) E mautinoa eiloa me i te tagata Iutaia tenei ne lauiloa fakamuli e pelā me ko te apositolo ko Paulo. Kae ko te mafaufau ki pogai ne loto fakafetai ei a ia mō te munatonu e uiga ki te tusaga o Iesu i te fakataunuga o te fuafuaga a te Atua, ne gasuesue eiloa a Paulo. Ne papatiso eiloa a ia e aunoa mo te fakatalave.—Faitau te Galuega 22:12-16.

11. (a) Se a te mea e fakamalosi aka i ei a tino a‵koga ki te Tusi Tapu i aso nei ke papatiso? (e) E pokotia pefea tatou māfai e lavea atu a soko ‵fou kolā ko oti ne tukugina atu ko papatiso?

¹¹ E ‵pau eiloa mo tino a‵koga ki te Tusi Tapu i aso nei, faitalia me e fo‵liki io me ma‵tua. A latou kolā e fakatuanaki kae fia‵fia tonu ki te munatonu i te Tusi Tapu e loto finafinau o fai olotou tukuatuga totino kae papatiso. A te lāuga telā e fakapitoa eiloa mō vaegā tino penā se vaega e tāsi o fono o te fenua mo fono o te atufenua. E fia‵fia eiloa a Molimau a Ieova māfai e talia ne se tino akoga ki te Tusi Tapu a te munatonu kae gasolo ki mua kae papatiso ki te vai. E mata, e se fia‵fia a mātua Kelisiano ke lavea atu olotou tama‵liki e aofia i nisi soko ‵fou kolā e papatiso? I te tausaga faka-te-taviniga i te 2017, e silia atu mo te 284,000 a “tino loto ‵lei” kolā ne fakamailoga olotou tukuatuga e auala i te papatisoga ki te vai. (Galu. 13:48) E manino ‵lei me ne malamalama a soko ‵fou konei me i te papatisoga se fakatonuga mō Kelisiano. Ne a auala kolā e takitaki ei latou ki te papatisoga?

12. Ne a auala kolā e ‵tau o galue muamua ki ei a te tino akoga ki te Tusi Tapu mai mua o te papatisoga?

¹² A koi tuai o papatiso se tino akoga, e ‵tau o ati aka ne ia te fakatuanaki telā e fakavae ki te iloaga tonu e uiga ki te Atua, Tena fuafuaga, mo Ana fakatokaga mō te faka‵saoga. (1 Timo. 2:3-6) E fakamalosi ne te vaegā fakatuanaki tenā a te tino akoga ke ‵teke atu ki amioga kolā e fakafanoanoa ki te Atua kae ke fakafetaui mo tulaga amio‵tonu o Ieova. (Galu. 3:19) E malamalama me e se mafai ne se tino o fai tena tukuatuga ki te Atua kae aofia foki i so se amioga telā e fai ei ke se ulu atu ki te Malo. (1 Koli. 6:9, 10) Kae e uke atu a mea e manakogina i lō te faka‵logo fua ki tulafono a Ieova i mea tau amioga. A te tino telā e kausaki atu ki te amiotonu e kau atu foki ki fakatasiga a te fakapotopotoga kae aofia katoatoa i te galuega talai faka‵sao ola mo te faiga o soko. Ne fai mai a Iesu me i te galuega tenei ka fai eiloa ne ana soko ‵tonu. (Galu. 1:8) E mafai fua ne se soko fou o fai tena tukuatuga ki a Ieova e auala i se ‵talo totino kae fakamailoga ki te papatisoga i mua o tino maimoa e tokouke, māfai e galue a ia ki feitu konā.

13. Kaia e ‵tau ei o masaua ne faiakoga o te Tusi Tapu me i te papatisoga se fakatonuga faka-Kelisiano?

¹³ I te taimi e fesoasoani atu ei tatou ki ‵tou tama‵liki mo nisi tino a‵koga ki te Tusi Tapu ke iloa a mea tāua e ‵tau o fai, e ‵tau o masaua ne tatou me i te fai mō fai se soko ‵tonu e ‵tau eiloa te tino o papatiso. Kafai e masaua ne tatou te mea tenā, ka fesokotaki atu tatou i se auala magoi ki ‵tou tino a‵koga. Ka se fakatalave tatou mai te sau‵tala mo latou i taimi ‵lei e uiga ki te tāua o te tukuatuga mo te papatisoga. Ao, e ma‵nako tatou ko ‵tou tama‵liki mo tino a‵koga ki te Tusi Tapu ke ga‵solo ki mua kae papatiso!

14. Kaia e se faimālo aka ne tatou so se tino ke papatiso?

¹⁴ E mautinoa eiloa me e se ‵tau o papatiso se tino ona ko te faimālo atu o se mātua, tena faiakoga, io me ko so se tino i te fakapotopotoga  ke papatiso a ia. E se tenei te auala o Ieova. (1 Ioa. 4:8) I lō te fai penā, kafai e akoako ne tatou a tino penā, ko faka‵mafa atu eiloa ne tatou a te tāua o te atiakaga o se fesokotakiga totino mo te Atua. Ka fakamalosi aka ne te loto fakafetai o te tino akoga ki te munatonu mo tena manakoga ke amo ne ia te amoga ke fai pelā me se soko o Keliso ke papatiso a ia.—2 Koli. 5:14, 15.

15, 16. (a) E mata, e isi se tausaga fakapitoa e ‵tau ei mo se tino o papatiso? (e) Kaia e ‵tau ei mo se tino akoga ki te Tusi Tapu o papatiso e pelā me se Molimau a Ieova faitalia me ko oti ne papatiso muamua i te suā talitonuga?

¹⁵ E seai se tausaga mautinoa e ‵tau ei mo se tino o papatiso. E kese‵kese a taimi e ga‵solo aka ei ki mua a tino a‵koga o ma‵tua ‵lei. A te tokoukega ne papatiso a koi fo‵liki ‵ki ei latou, kae e tumau eiloa lat ou i te fakamaoni ki a Ieova. E lavea ne nisi tino a‵koga a te tāua ke papatiso mai tua o te taulotoga ki te munatonu māfai ko ma‵tua ‵ki—kāti a nisi ko silia atu mo te 100 tausaga!

¹⁶ Ne ‵sili atu se tino akoga ki te Tusi Tapu telā ko matua ki tena faiakoga me e mata, se mea ‵lei ke toe papatiso a ia, ona ko ia ko oti ne papatiso muamua i lotu kese‵kese i se fia tausaga ko teka. Ne sau‵tala te tino akoga mo tena faiakoga ki tusi fai‵tau i te Tusi Tapu kolā e fetaui ‵lei. Ne fatoa iloa ne te tino akoga a te fakatonuga i te Tusi Tapu kae ne papatiso a ia fakamuli. Faitalia ko 70 tupu ana tausaga, ne mafaufau tou fafine me e aoga eiloa ki a ia te papatisoga. E tonu, a te papatisoga tāua e fakavae ki iloaga tonu e uiga ki te loto o Ieova. Tela la, e ‵tau mo soko ‵fou o papatiso faitalia me ne papatiso latou i te suā talitonuga.—Faitau te Galuega 19:3-5.

17. Kaia e ‵tau ei o masaua ne te tino a te aso ne papatiso i ei a ia?

¹⁷ A te aso o te papatisoga o se tino, se taimi o te fiafia tonu. Se taimi foki o te ‵tagi fia‵fia. A te ola e ‵tusa mo ‵tou tukuatuga e aofia i ei a te galue malosi. Tenā te pogai ne fakatusa ne Iesu a te tulaga e pelā me se soko ki se amo. E ‵tau mo soko o Iesu o “se toe ola mō latou eiloa, kae mō ia telā ne mate mō latou kae toe fakatu aka.”​—2 Koli. 5:15; Mat 16:24.

18. Ne a fesili ka sau‵tala tatou ki ei i te suā mataupu?

¹⁸ Ne uke ‵ki a mafaufauga o te mātua o Maria i te taimi ne ‵sili atu ne ia a fesili kolā ne faka‵sae atu i te kamataga. Kafai koe se mātua, e mafai o ‵sili ifo koe, penei: ‘E mata, ko toka eiloa taku tamaliki o papatiso? E mata, e lava tena iloaga ke mafai o fai tena tukuatuga? Kae e a fakamoemoega kolā e isi se lotou sokoga ki akoakoga ma‵luga mo se galuega ‵togi? E a māfai e papatiso taku tamaliki kae oti aka ko tosina atu ki se agasala matagā?’ I te suā mataupu, ka sau‵tala eiloa tatou ki mea konei kae ke iloa aka te auala e mafai ei ne mātua Kelisiano o fakatumau se kilokiloga paleni e uiga ki te papatisoga.