AKOAKOGA FAKAVAE I TE TUSI TAPU: “Sa toe manava‵se ki otou ola.”—Mataio 6:25.

Se a te mea e fakauiga ki ei? Ne taku mai ne Iesu a pati konā i tena Lāuga i luga i te Mauga. E ‵tusa mo pati i se tikisionale o se Tusi Tapu e tasi, a te veape telā ne ‵fuli ki te “ke manavase” e mafai o fakasino atu ki “te auala masani e saga atu ei a te tagata ki te tulaga mativa, te fiakai mo nisi fakalavelave kolā e fepaki mo ia i aso katoa o tena olaga.” E aofia i te manavase a te sē toka o te mafaufau ki mea kolā e mafai o ‵tupu i aso mai mua. Se mea masani kae ‵lei a te mafaufau e uiga ki ‵tou manakoga faka-te-foitino mo te ola ‵lei o ‵tou tino pele. (Filipi 2:20) Kae i te taimi ne fai atu ei a Iesu, “ke mo a e manava‵se,” ne fakamalosi atu eiloa tou tagata ki tino kolā ne tau‵tali atu i a ia ke ‵kalo kea‵tea mai te sōna manavase—ko te mataku e uiga ki te aso taeao telā ka ave kea‵tea ne ia te fiafia o koe ke ola i te aso nei.—Mataio 6:31, 34.

E mata, e aoga eiloa te mea tenā mō aso nei? E ‵poto eiloa tatou māfai e fakagalue ne tatou a pati a Iesu. Kaia? E isi ne fakamatalaga e fai mai me kafai ko manavase ‵ki a tino, e isi se vaega i loto i te foitino e taku ko te sympathetic nervous system e mafai o oko atu ki se tulaga telā ko se galue ‵lei telā e mafai ei o “iku atu ki te mauaga o masaki e pelā mo tona (ulcer), masaki o te fatu mo te gaegae.”

Ne tuku atu ne Iesu se pogai ‵lei ke ‵kalo kea‵tea mai te sōna manavase: E seai sena aoga. Ne fesili atu a Iesu, “Ko oi i a koutou konā, e mafai o fakaloa malie aka ne ia tena ola i tena manavase?” (Mataio 6:27) A te mafaufau ki mea kolā e manava‵se tatou ki ei ka se fakaloa ne ia ‵tou ola i se sekone e tasi. E se gata i ei, e masani o se ‵tupu a mea kolā ne ma‵taku tatou ki ei me ka ‵tupu. Ne fai mai se tino akoga e tokotasi penei: “A te manavase ki aso mai mua e fakamāumāu taimi, kae e masani o ‵lei atu a mea e ‵tupu i aso mai mua i lō te mea telā ne mafaufau tatou ki ei.”

E mafai pefea o ‵kalo kea‵tea tatou mai te manavase? Te mea muamua, talitonu ki te Atua. Kafai e tuku atu ne te Atua a mea‵kai ki manu kae fakagaligali ne ia a pulalakau, e mata ka se tuku mai ne ia a mea tāua ki ola o tino kolā e fakamuamua ne latou a tena tapuakiga i olotou olaga? (Mataio 6:25, 26, 28-30) A te lua, manavase ki mea fua o te aso nei. E fai mai a Iesu: “Ke mo a e manava‵se koutou ki te aso ma taeao, me e manavase loa te aso ma taeao ki ana mea.” E mata, e lotomalie koe “me e tofu eiloa te aso mo ana fakalavelave?”—Mataio 6:34.

A te fakagalue ne tatou o pati fakamalosi a Iesu, ka mafai o saogalemu tatou mai fakalavelave kolā e fakalogo‵mae mai. Kae e sili atu i ei, ka mafai o maua ne tatou te filemu i te loto—ko te mea telā e taku ne te Tusi Tapu ki “te filemu o te Atua.”—Filipi 4:6, 7.