I se vaegā tulaga penā, e ‵tau o ‵kilo atu te fakapotopotoga ki te avaga mua e pelā me ko oti atu i te taimi e toe avaga ei te tagata kae e ‵kilo atu ki te avaga fou e pelā me ko te avaga tonu. Ke malamalama i te pogai o te fakaikuga tenei, ke na mafau‵fau tatou ki pati a Iesu e uiga ki te ‵talaga o avaga mo te ‵toe avaga.

E ‵tusa mo te Mataio 19:9, ne fakasino atu a Iesu ki te pogai faka-te-Tusi Tapu fua e tasi ke fakagata ei se fakaipoipoga. Ana muna: “So se tagata telā e ‵tala ne ia tena avaga kae seki agasala a ia i amioga fakatauavaga sē ‵tau, e mulilua eiloa māfai e toe avaga ki se isi fafine.” Mai i pati konei a Iesu, e tauloto ne tatou (1) me i amioga fakatauavaga sē ‵tau ko te pogai faka-te-Tusi Tapu fua e mafai o fakagata ei te avaga māfai ko ‵tala, kae ko te (2) a te tagata telā e ‵tala tena avaga e aunoa mo se pogai faka-te-Tusi Tapu kae toe avaga ki te suā tino ko agasala a ia i te mulilua. *

E mata, ne fakauiga a Iesu i ana pati me i te tagata telā e aofia i amioga fakatauavaga sē ‵tau kae ‵tala tena avaga ko saoloto o avaga e ‵tusa mo te Tusi Tapu? Ikai. Kafai ko mulilua se tino i te tauavaga, ko te avaga ‵ma e fakaiku aka ne ia me ka fakamagalo io me ka se fakamagalo ne ia tena avaga. Kafai ko se fakamagalo ne tou fafine kae taumafai o ‵tala te avaga i te tulafono, ko saoloto ei lāua tokolua ke toe a‵vaga māfai ko oti ne ‵tala te lā avaga.

I te suā feitu, a te avaga ‵ma kāti e manako tonu ke fakatumau te fakaipoipoga kae fakaasi atu ne ia tena loto fiafia ke fakamagalo tena avaga. Kae e a māfai ko se talia ne te avaga mulilua a te loto fakamagalo o tena avaga kae taumafai tokotasi eiloa a ia ke ‵tala te avaga i te tulafono? Ona ko te mea ne loto fiafia tou fafine ke fakamagalo a ia kae fakatumau te avaga, e se saoloto tou tagata i te Tusi Tapu ke toe avaga. Kafai e tumau eiloa a ia i te auala telā e se ‵lago ki ei te Tusi Tapu kae toe avaga ki te suā tino i te taimi e seki saoloto ei a ia ke fai penā, ko mulilua foki a ia telā ko ‵tau ei o fai ne te fakapotopotoga se fono fakamasino mō tou tagata.—1 Koli. 5:1, 2; 6:9, 10.

Kafai se tagata ko avaga e aunoa mo se pogai ‵tau faka-te-Tusi Tapu, e ‵tau o pefea te kilokiloga a te fakapotopotoga ki te avaga mua mo te avaga fou? E mata, ka tumau eiloa te avaga mua e ‵tusa mo te kilokiloga i te Tusi Tapu? E mata, koi maua eiloa ne te avaga ‵ma a te tiute ke fakamagalo io me se fakamagalo a tena avaga mua? E mata, e ‵tau o ‵kilo atu te fakapotopotoga ki te avaga fou tenā e pelā me koi mulilua eiloa?

I aso ko ‵teka, ne ‵kilo atu te fakapotopotoga ki te avaga fou e pelā me koi mulilua eiloa i te taimi koi ola ei, seki avaga, kae e seki aofia foki te avaga ‵ma i amioga fakatauavaga sē ‵tau. Kae ne seki aofia ne Iesu a te avaga ‵ma i te taimi ne faipati mai ei a ia e uiga ki te ‵talaga o avaga mo te ‵toe avaga. I lō te fai penā, ne fakamatala  mai ne ia me i te tagata telā e taumafai o ‵tala te avaga e aunoa mo se pogai faka-te-Tusi Tapu kae toe avaga ki te suā tino, ko agasala a ia i te mulilua. Kafai ko tupu te mea tenā, a te ‵talaga mo te ‵toe avaga telā e ‵pau mo te mulilua ko fakagata atu ei a te avaga mua.

Kafai ko gata atu a te avaga ona ko te ‵talaga o te avaga mo te ‵toe avaga, ko se toe maua ei ne te avaga ‵ma a te tiute ke fakamagalo io me ke se fakamagalo. Tela la, ko se toe amo ne ia a te tiute ke fakaiku aka me e ‵tau o fakamagalo io me ke se fakamagalo tena avaga mua. E se gata i ei, ko se toe fakalagolago a te kilokiloga a te fakapotopotoga ki te avaga fou ki te mate, te ‵toe avaga, io me ko te agasala o te avaga ‵ma i amioga fakatauavaga sē ‵tau. *

E pelā mo te fakaakoakoga ne taku atu mai luga, ko agasala te tagata i te mulilua, telā ne iku atu ki te ‵talaga o te avaga. Kae e a māfai ne seki agasala te tagata i te mulilua, ‵tala te avaga kae toe avaga? Io me e a māfai e seki aofia te tagata i amioga fakatauavaga sē ‵tau a koi tuai o ‵tala te avaga kae ne aofia i ei mai tua o te ‵talaga o te avaga kae toe avaga faitalia te loto fiafia o tena avaga ke fakamagalo tou tagata? I fakaakoakoga katoa konei, a te ‵talaga o te avaga mo te ‵toe avaga kolā ko faifaiga mulilua, ko fakagata atu i ei te avaga mua. Ko talia eiloa te avaga fou tenā i te tulafono. E ‵tusa mo mea e fakaasi mai i The Watchtower i a Novema 15, 1979, itulau 32, “nei la ko aofia a ia i se avaga fou kae ko se mafai ne ia o toe fakagata kae toe foki ki tena avaga mua; ko gata te fakaipoipoga mua i te ‵talaga o te avaga, mulilua, mo te ‵toe avaga.”

A te kilokiloga fou tenei e se fakaseaoga ei a te ‵malu o te fakaipoipoga io me fakafeoloolo aka ei a te matagā o te mulilua. A te tagata e ‵tala tena avaga e aunoa mo pogai faka-te-Tusi Tapu kae toe avaga ki te suā tino, kae seki saoloto e ‵tusa mo tulaga faka-te-Tusi Tapu, e ‵tau o fai se fono fakamasino ki tena amioga mulilua. (Kafai a te avaga fou se Kelisiano, e ‵tau foki o fai se fono fakamasino ki tena amioga mulilua.) E tiga eiloa a te fakaipoipoga fou e se fai pelā me koi mulilua eiloa lāua, ko se fetaui a te tagata mo so se tauliaga i te taviniga i te fakapotopotoga mō tausaga e uke, kae penā foki māfai koi ita a nisi tino ki a ia io me māfai koi mafau‵fau me e se mafai o āva latou ki tou tagata. E aofia i te mea tenei a te mafaufau ki fakanofonofoga ‵fou o tena avaga mua telā ne amio faitogafiti ne ia mo so se tamaliki telā ne tuku tiaki ona ko tena agasala.—Mala. 2:14-16.

E ‵tusa mo ikuga matagā konei ki te ‵talaga mo te ‵toe avaga e aunoa mo pogai ‵tau faka-te-Tusi Tapu, se mea poto mō Kelisiano ke ati aka ne latou a te kilokiloga a Ieova mai te fakamaluga aka a te ‵malu o te fakatokaga i te fakaipoipoga.—Fai. 5:4, 5; Epe. 13:4.