1. Ne a mea ne fai ne Ieova mō koe?

NE FAI pefea koe mo fai se tokotasi o Molimau a Ieova? Kāti ne lagona ne koe te “tala ‵lei” i te taimi muamua—mai i ou mātua, mai se tino e ga‵lue tasi koulua io me se tamaliki i tau vasega, io me e auala i te galuega talai mai fale ki fale. (Male. 13:10) Kae ne fakamāumāu ne se tino a taimi e uke mo taumafaiga ke fai tau akoga faka-te-Tusi Tapu. I te taimi ko fai ei tau akoga, ko kamata koe o alofa ki a Ieova kae tauloto me e alofa a ia ki a koe. Ko ‵taki mai koe ne Ieova ki te munatonu, kae nei, e pelā me se soko o Iesu Keliso, ko maua ne koe te fakamoemoega ke ola ki te se-gata-mai. (Ioa. 6:44) E mautinoa eiloa me e loto fakafetai koe ki a Ieova me ne fakamalosi ne Ia se tino ke akoako koe ki te munatonu, kae talia ne Ia koe ke fai mo se tokotasi o Ana tavini.

2. Ne a mea ka sau‵tala tatou ki ei i te mataupu tenei?

² Ona ko te mea ko iloa ne tatou te munatonu, e maua ne tatou te tauliaga ke fesoasoani ki nisi tino ke sa‵sale tasi mo tatou i te auala ki te ola. Kāti e faigofie ke talai tatou mai fale ki fale, kae kāti e tai faigata ke ofo kae fai ne tatou ne akoga faka-te-Tusi Tapu. E mata, konā loa ou lagonaga? Kafai e penā loa, e mafai o maua ne koe a manatu fesoasoani aoga i te mataupu tenei. Ka sau‵tala tatou ki mea kolā e fakamalosi aka ei tatou ke fai a soko. Ka onoono foki tatou ki te auala e mafai o manumalo tatou i mea faiga‵ta kolā e mafai o taofi ei tatou mai te faiga o se akoga faka-te-Tusi Tapu. Muamua la, ke onoono tatou ki te pogai e se ‵tau fua o fai tatou mo tino talai kae ke fai foki mo faiakoga o te tala ‵lei.

3. Kaia e talai ei tatou?

³ I te nofoga a Iesu i te lalolagi, ne fakatonu ne ia ana soko ke fai se galuega e lua ana vaega. Muamua, ne fai atu a ia ki a latou ke talai te tala ‵lei o te Malo, kae ne fakaasi atu ne ia te auala ke fai ei. (Mata. 10:7; Luka 8:1) I tafa o nisi mea aka, ne fakatoka ne Iesu ana soko ke talai atu te fekau o te Malo faitalia me talia io me ‵teke mai a tino. (Luka 9:2-5) Ne ‵valo mai foki ne ia te lasi o te galuega talai ka fai ne latou, mai te fai atu ki ana soko me ka avatu ne latou “se molimua ki atufenua katoa.” (Mata. 24:14; Galu. 1:8) Faitalia te auala e ‵saga mai ei a tino ki te fekau, e ‵tau mo soko o fakailoa atu ki tino e uiga ki te Malo o te Atua mo mea ka fakataunu ne ia.

4. E ‵tusa mo te Mataio 28:18-20, ne a mea e ‵tau o fai ne tatou i tafa o te talai atu e uiga ki te Malo?

⁴ Se a te vaega i te lua o te fakatonuga telā ne tuku atu ne Iesu ki ana soko? Ne fai atu a ia ki ana soko ke akoako a latou kolā ka fai mo soko ke faka‵logo ki mea katoa ne fakatonu mai ne ia. Kae e mata, ne fakatapula te talai mo te akoako atu i te senitenali muamua, e pelā mo pati a nisi tino? Ikai, ne fakaasi mai ne Iesu me i te galuega tāua tenei ka fai eiloa ke oko mai loa ki ‵tou aso nei, “ke oko eiloa ki te gataga o te olaga tenei.” (Faitau te Mataio 28:18-20.) Ne tuku atu ne Iesu te fakatonuga tenā i te taimi ne fakasae atu a ia ki ana soko e silia atu mo te toko 500. (1 Koli. 15:6) Kae i te fakaasiga ne tuku atu ne ia ki a Ioane, ne fakaasi manino atu ne Iesu me e ‵tau mo ana soko katoa o fesoasoani atu ki nisi tino ke tauloto e uiga ki a Ieova.—Faka. 22:17.

5. E ‵tusa mo te 1 Kolinito 3:6-9, ne fakamatala mai pefea ne Paulo a te sokoga i te va o te talai mo te akoako atu?

⁵ Ne fakatusa ne te apositolo ko Paulo a te galuega ko te faiga o soko ki te ‵tokiga o lakau, se fakaasiga me e ‵tau o uke atu ‵tou mea e fai i lō te ‵toki fua o fuaga. Ne fakamasaua atu a ia ki te kau Kolinito: “Ne ‵toki ne au, ne fakasiusiu ne Apolo . . . Kae ko te Atua ne fai faeloa ne ia ke ola te lakau.” (Faitau te 1 Kolinito 3:6-9.) E pelā me ne tino ga‵lue i te “fatoaga a te Atua,” e se ‵toki fua ne tatou a fuaga kae e fakasiusiu ne tatou kae asi faeloa me e ola ‵lei io me ikai. (Ioa. 4:35) Kae e iloa ne tatou me ko te Atua e fai ne ia ke ola a te fuaga tenā.

6. Ne a mea e aofia i te ‵tou galuega e pelā me ne faiakoga?

⁶ E ‵sala tatou ki tino “loto ‵lei kolā e ‵tau o maua ne latou a te ola se-gata-mai.” (Galu. 13:48) Ke fesoasoani ki tino taki tokotasi ke fai mo soko, e ‵tau mo tatou o fesoasoani atu ki a latou ke (1) malamalama, (2) talia, kae ko te (3) fakagalue a mea e tauloto ne latou mai te Tusi Tapu. (Ioa. 17:3; Kolose 2:6, 7; 1 Tesa. 2:13) E mafai ne tino katoa i te fakapotopotoga o fesoasoani ki tino a‵koga ki te Tusi Tapu, mai te fakaasi atu te alofa ki tino ‵fou kae tali fiafia latou māfai ko ‵kau atu ki fakatasiga. (Ioa. 13:35) Kāti e ‵tau foki mo te faiakoga o fakamāumāu a taimi e uke mo tena malosi o fesoasoani ki se tino akoga ke ‵fuli mai talitonuga mo faifaiga kolā “ne ‵mau [i ei] olotou aka.” (2 Koli. 10:4, 5) E mafai o lau i masina ke fesoasoani atu ki se tino ke fai ne ia a ‵fuliga i tena olaga, ke mafai o fetaui ‵lei a ia ke papatiso. Kae e manakogina a taumafaiga e uke.

7. Kaia e talai ei tatou ki nisi tino kae akoako latou ki te tala ‵lei?

⁷ Kaia e talai ei tatou ki tino kae akoako latou ke fai mo soko? Muamua la, me e a‵lofa tatou ki a Ieova. Kafai e fai ne koe te ‵toe mea e mafai ke fakalogo ki te fakatonuga ke talai kae fai a soko, ko fakaasi atu ne koe a tou alofa ki te Atua. (1 Ioa. 5:3) Mafaufau ki te mea tenei: Ne fakamalosi koe ne tou alofa ki a Ieova ke talai atu mai fale ki fale. E mata, e faigofie ke fakalogo ki  te fakatonuga tenā? E se faigofie. Kafai ko tou taimi muamua ke fano i te galuega talai, e mata, a koe e mā? E mautinoa eiloa me ka mā koe! Kae ko oti ne iloa ne koe me e manako a Iesu ke fai ne koe te galuega tenei, kae ne fakalogo koe ki ei. Kae fakamuli loa, ko faigofie ke talai atu koe. Kae e a te faiga o se akoga faka-te-Tusi Tapu? E mata, ka mā koe māfai e mafaufau ki ei? Kāti la. Kae kafai e ‵talo koe ki a Ieova ke fesoasoani atu ke manumalo koe i te mata mā kae tuku atu te loto malosi ke ofo atu ne koe se akoga faka-te-Tusi Tapu, e mafai eiloa o fesoasoani atu a Ieova ke fakamalosi aka a tou manakoga ke fai a soko.

8. E ‵tusa mo te Maleko 6:34, ne a nisi mea e fakamalosi ei tatou ke akoako a nisi tino?

⁸ Te lua, ko te ‵tou a‵lofa ki tuakoi ka fakamalosi ei tatou ke akoako latou ki te munatonu. I se taimi e tasi, ne fi‵ta ‵ki a Iesu mo ana soko i te otiga o te lotou galuega talai. Ne ma‵nako latou ke olo atu ki se koga telā e mafai o mā‵nava i ei, kae ne maua atu latou ne se vaitino tokouke. Ona ko tena loto alofa, ne kamata o akoako atu ne Iesu a tino ki mea e “uke.” (Faitau te Maleko 6:34.) Ne galue malosi a ia i te taimi tenā. Kaia? Ne iloa ne Iesu a lagonaga o te vaitino tokouke. Ne lavea ne ia te lasi o te lotou logo‵mae—te manakogina ne latou se fakamoemoega—kae ne manako a ia o fesoasoani atu ki a latou. E tenā foki te tulaga o tino i aso nei. Ke mo a ma faka‵segina ne olotou foliga mai tua. E fai loa latou e pelā me ne mamoe kolā ko tapea‵pea malielie atu mai te lafu, e seai se tausi mamoe ke takitaki latou. Ne fai mai te apositolo ko Paulo me i vaegā tino penā e se iloa ne latou te Atua kae seai ne olotou fakamoemoega. (Efe. 2:12) E sa‵sale atu eiloa latou i te “auala telā e tau atu ki te fakaseaiga”! (Mata. 7:13) Kafai e mafau‵fau tatou ki te tulaga faka-te-agaga o tino i ‵tou koga talai, e fakamalosi tatou ne te alofa mo te atafai ke fesoasoani ki a latou. Kae ko te ‵toe auala ‵lei ke fesoasoani ki a latou, ko te ofo atu ke suke‵suke mo latou ki te Tusi Tapu.

9. E ‵tusa mo te Filipi 2:13, e mafai pefea o fesoasoani atu a Ieova ki a koe?

⁹ Kāti e manavase koe ma ofo atu se akoga faka-te-Tusi Tapu, me e iloa ne koe me ka uke ou taimi e fakamāumāū ke fakatoka kae ke fai se akoga a se tino. Kafai tenā te mea e mafaufau koe ki ei, fakaasi atu ou lagonaga konā ki a Ieova. Fakamolemole atu ke fesoasoani mai ke ati aka ne koe te manakoga ke ‵sala kae ke fai se akoga. (Faitau te Filipi 2:13.) Ne fakatalitonu mai ne te apositolo ko Ioane me ka tali ne te Atua a ‵talo a latou kolā e fetaui mo Tena loto. (1 Ioa. 5:14, 15) Tela la, e mafai o mautinoa i a koe me ka fesoasoani atu a Ieova ke ati aka ne koe a te manakoga ke aofia koe i te akoakoga o tino ke fai mo soko.

10-11. Ne a mea e mafai o fakatalave ei tatou mai te faiga o se akoga faka-te-Tusi Tapu?

¹⁰ E fakatāua eiloa ne tatou te fakatonuga ke akoako faitalia me e fe‵paki tatou mo fakalavelave kolā e mafai o taofi aka ei tatou mai te faiga o soko. Ke sau‵tala nei tatou ki nisi fakalavelave konā mo te auala ke manumalo i ei.

¹¹ Kati e mafau‵fau tatou me ko fakatapulagina tatou ne ‵tou fakanofonofoga. E pelā mo nisi tino talai ko ma‵tua kae fakamasaki‵saki. E mata, tenā tou tulaga? Kafai e tenā loa, ke mafau‵fau ki akoakoga e tauloto ne tatou mai te famai ko te COVID-19. Ko oti ne iloa ne tatou me e mafai o fai a akoga faka-te-Tusi Tapu i se auala magoi, mai te fakaaogaga o telefoni io me ko te itaneti! Tela la, e mafai o fai ne koe se akoga mai tou fale eiloa. Kae e isi se suā auala ‵lei. Nisi tino e fia‵fia o suke‵suke ki te Tusi Tapu, kae e se avanoa latou i taimi masani kolā ko oti ne fakatoka ke talai i ei a ‵tou taina mo tuagane. Kae kāti e avanoa latou i se tafataeao ‵malu io me i te po. E mata, e mafai o avanoa koe i taimi konā ke fai se  akoga? Ne akoako ne Iesu a Nikotemo i se po, ko te taimi telā ne ‵lei ki a Nikotemo.—Ioa. 3:1, 2.

12. Ne a pogai e tolu e fesoasoani mai ke loto tali‵tonu me e mafai o fai tatou pela me ne faiakoga apo?

¹² Kāti e se lava te loto talitonu ke fai se akoga faka-te-Tusi Tapu. Kāti e mafau‵fau tatou me e ‵tau o momea aka te lasi o ‵tou iloa io me ke fai pelā me se faiakoga apo koi tuai o fai ne tatou se akoga mo se tino. Kafai konā ou lagonaga, mafaufau ki pogai e tolu e mafai o fesoasoani mai ke fakamalosi aka ei tou loto talitonu. Te mea muamua, e kilo atu a Ieova i a koe ko fetaui ‵lei ke akoako a nisi tino. (2 Koli. 3:5) Te lua, ko Iesu eiloa telā e nofo mo te “pule i mea katoa i te lagi mo te lalolagi,” ne fakatonu atu ke akoako ne koe a tino. (Mata. 28:18) Kae ko te tolu, e mafai o fakalagolago koe ki nisi tino ke feosoasoani atu. Ne fakalagolago a Iesu ki mea ko oti ne akoako atu ne tena Tamana ke fai ne ia, kae e mafai foki koe o fai penā. (Ioa. 8:28; 12:49) E se gata i ei, e mafai o fakamolemole koe ki te ovasia o te galuega talai, se paenia io me se tino talai apo, ke fesoasoani atu ke iloa ne koe o kamata kae fai se akoga faka-te-Tusi Tapu. Te auala e tasi ke mafai o fai pelā me se faiakoga apo, ko te kau atu ki olotou akoga faka-te-Tusi Tapu.

13. Kaia e ‵tau ei o fakamasani tatou ki auala kese‵kese ke akoako ei a tino?

¹³ Kāti e tai faigata ke fakamasani ki auala ‵fou mo mea faigaluega ‵fou. Nei la, ko mafuli te auala e fai ei ne tatou a akoga faka-te-Tusi Tapu. I te tusi fakavae mō fai a akoga ko te Ke Ola ki te Se-Gata-Mai!, e manakogina ke fakatoka tatou mō te akoga kae akoako i se auala e tai ‵kese mo te faiga mua. E fai‵tau tatou ki nāi palakalafa, kae ka isi aka foki ne nisi mea ka aofia i te sau‵talaga mo te tino akoga. I te taimi o te akoga, e fakaaoga ne tatou a vitio e uke mo nisi mea faigaluega, pelā mo te JW Library^®. Kafai e se iloa ne koe o fakaaoga a mea faigaluega konei, faipati ki se tino telā e mafai o fesoasoani atu ke iloa ne koe o fakaaoga a mea konā. E fia‵fia loa a tino o fai a mea i te auala e masani latou ki ei. E se faigogie ke fakamasani tatou ki auala ‵fou e fai ei a mea. Kae mai te fesoasoani o Ieova mo nisi tino, ka faigofie ke fakamasani ki ei kae ka fia‵fia malosi foki tatou o suke‵suke mo nisi tino. E pelā mo pati a se paenia tokotasi, a te vaegā sukesukega tenei e “fakamalosi loto ki te tino akoga mo tena faiakoga.”

14. Se a te mea e ‵tau o masaua ne tatou māfai e talai i se koga talai faigata, kae e fakamalosi mai pefea a pati i te 1 Kolinito 3:6, 7 ki a tatou?

¹⁴ Kāti e ‵nofo atu tatou i se koga talai telā e faigata ke maua ne akoga faka-te-Tusi Tapu. Kāti e se fia‵ saga mai a tino ki te ‵tou fekau io me ‵teke ne latou. Se a te mea e mafai o fesoasoani mai ke fakatumau ne tatou se kilokiloga ‵lei ki te ‵tou koga talai? Masaua me e mafai o ‵fuli fakavave a fakanofonofoga o tino i te lalolagi tenei e ‵fonu i fakalavelave, kae kāti a tino kolā ne seki fia‵fia i te taimi muamua ka ma‵nako ki te takitakiga a te Atua fakamuli. (Mata. 5:3) Nisi tino kolā ne masani o se talia ne latou a ‵tou tusi, ko oti ne talia ne latou fakamuli se akoga faka-te-Tusi Tapu. E iloa foki ne tatou i a Ieova ko te Matai o te ‵katiga o saito. (Mata. 9:38) E manako a ia ke tumau tatou i te ‵toki kae fakasiusiu, me i o Ia loa te tiute ke fakaola aka. (1 Koli. 3:6, 7) Kae ko oko loa te fakamalosi loto ke masaua me kafai foki e seki maua sau akoga faka-te-Tusi Tapu i te taimi nei, e fakamanuia eiloa ne Ieova ‵tou taumafaiga, kae e se ko ikuga o ‵tou galuega ne fai! *

15. E pefea a lagonaga o Ieova māfai e talia ne se tino se akoga faka-te-Tusi Tapu kae fakagalue ana mea ne tauloto?

¹⁵ A Ieova e fiafia māfai e talia ne se tino a te munatonu i te Tusi Tapu kae fakailoa atu ne ia ki nisi tino. (Faata. 23:15, 16) Kae ka sili atu te fiafia  o Ieova māfai e lavea ne ia a mea ko ‵tupu i ‵tou aso nei! E pelā me se fakaakoakoga, e tiga loa te famai fakamataku tenei i te lalolagi kātoa, talu mai te tausaga faka-te-taviniga i te 2020, e ‵tusa mo te 7,705,765 akoga faka-te-Tusi Tapu ne fai, telā ne fesoasoani atu ki tino e toko 241,994 ke tuku atu olotou ola ki a Ieova kae papatiso. Kae ko soko ‵fou konei, ka fai ne latou a akoga faka-te-Tusi Tapu, kae ka maua foki i ei a soko ‵fou. (Luka 6:40) E seai se fakalotolotolua, me ka fiafia a Ieova māfai e ‵kau tatou ki te galuega ko te faiga o soko.

16. Se a te fakamoemoega gali e mafai o kausaki tatou ki ei?

¹⁶ A te faiga o soko se galuega faigata ‵ki, kae mai te fesoasoani o Ieova, ko mafai ei o fai ‵tou tusaga i te akoakoga o tino ‵fou ke a‵lofa ki te ‵tou Tamana faka-te-lagi. E mata, e mafai o fai pelā me se fakamoemoega ke kamata kae fai se akoga faka-te-Tusi Tapu e tasi? E mafai o ‵poi tatou māfai e ‵kilo atu ki mea ka ‵tupu māfai e fakaaoga ne tatou so se taimi ke fesili atu ki a latou kolā e fetaui mo tatou ke fai olotou akoga. E tali‵tonu tatou me ka fakamanuia eiloa ne Ieova a ‵tou taumafaiga.

17. Ka pefea ‵tou lagonaga māfai ko fai ne tatou se akoga faka-te-Tusi Tapu?

¹⁷ Se tauliaga eiloa ke talai kae akoako atu ne tatou te munatonu ki nisi tino! E fai eiloa ne te galuega tenei ke maua ne tatou te fiafia tonu. A te apositolo ko Paulo ne fesoasoani atu ki tino Tesalonia e tokouke, kae ne fakamatala mai ne ia ana lagonaga i te auala tenei: “Se a te fakavae o te motou fakamoemoega io me ko te motou fiafia io me ko te motou foualiki i mua o te ‵tou Aliki ko Iesu i tena fakatasi mai? E a, e se ko koutou? Ko koutou eiloa te motou ‵malu mo te motou fia‵fia.” (1 Tesa. 2:19, 20; Galu. 17:1-4) E tokouke a tino i aso nei ne mafau‵fau penā. Ne fai mai te tuagane ko Stéphanie, telā ne fesoasoani atu mo tena avaga ki tino e tokouke ke papatiso, “E seai se mea e mafai o fakatusa ki te fiafia māfai e fesoasoani atu koe ki tino ke tuku atu a latou eiloa ki a Ieova.”