1-2. E fakamalosi mai pefea a pati a Ieova i te Isaia 65:16, 17 ke se ‵fiu tatou?

“KE SE ‵FIU!” ko te matua fakamalosi loto o te fono o te atufenua i te 2017. Ne fakaasi mai i te polokalame a te auala e mafai ei ne tatou o kufaki i fakalavelave. Ko fa nei tausaga ko ‵teka atu, kae tenei loa koi kufaki tatou i te olaga tenei.

² Ne a fakalavelave ne fe‵paki mo koe fakamuli nei? E mata, ne galo atu sou tino pele io me se taugasoa pele? Se masaki faigata? Mea faiga‵ta ona ko te tulaga matua? Se fakalavelave o te natula, amioga fakasaua, io me ko fakasauaga? Io me ko ikuga o se masaki, e pelā mo te COVID-19? E olioli malosi eiloa tatou ki te aso telā ka oti atu ei a fakalavelave katoa konā—ko se toe manatua kae ko se toe ‵tupu foki!—Faitau te Isaia 65:16, 17.

3. Ne a ‵tou mea e ‵tau o fai nei, kae kaia?

³ A te olaga i te lalolagi nei e faigata, kae kāti ka fe‵paki foki tatou mo nisi mea tai faiga‵ta atu i aso mai mua nei. (Mata. 24:21) Tela la, e manino ‵lei me e ‵tau o fakamalosi aka faeloa ‵tou kufaki. Kaia? Me ne fai mai a Iesu: “E auala i te otou kufaki ka faka‵sao ei ne koutou a otou ola.” (Luka 21:19) A te mafau‵fau ki te auala ne kufaki ei a nisi tino mo te manuia i mea faiga‵ta konei e fe‵paki foki mo tatou, e mafai o fakamalosi aka ei ‵tou kufaki.

4. Kaia e fai ei tatou i a Ieova ko te ‵toe fakaakoakoga ‵lei o te kufaki?

⁴ Ko oi te ‵toe fakaakoakoga ‵lei o te kufaki? Ko Ieova te Atua. E mata, e ofo koe i te tali tenā? Kāti e ofo koe kae e mafai foki o se malamalama i te pogai. A te lalolagi tenei e pule ki ei te Tiapolo, tenā te pogai ko ‵fonu ei i fakalavelave. E isi se malosi o Ieova ke fakagata aka i te taimi nei, kae e faka‵tali eiloa a ia ki te taimi tonu ke fai ei te mea tenā. (Loma 9:22) I te taimi nei, koi tumau loa te Atua i te kufaki ke oko ki tena taimi tonu. Ke na sau‵tala nei tatou ki pogai e iva e kufaki ei a Ieova.

5. I te auala fea ne fakamasei ei a te igoa o te Atua, kae e pefea ou lagonaga e uiga ki ei?

⁵ Fakamaseiga ne fai ki tena igoa. A Ieova e alofa ki tena igoa, kae manako a ia ko tino katoa ke āva ki ei. (Isa. 42:8) Kae i se 6,000 tausaga ko ‵teka, ne taku fakamasei a tena igoa ‵lei. (Sala. 74:10, 18, 23) Ne kamata i te fatoaga o Etena i te taimi ne ‵losi atu te Tiapolo (tena uiga “Tino fatufatu”) me i te Atua e se manako ke maua ne Atamu mo Eva se mea telā e ‵tau o maua ne lāua ko te mea ke fia‵fia. (Kene. 3:1-5) Talu mai te taimi tenā, ko oti ne fai a ‵losiga ‵se i a Ieova e taofi ne ia a mea kolā e ‵tau o maua ne tino. Ne manavase a Iesu ki te ‵losiga tenā ne fai ki te igoa o tena Tamana. Ona ko te mea tenā, ne akoako ne ia ana soko ke ‵talo atu penei: “Te motou Tamana telā i te lagi, ke tapu tou igoa.”—Mata. 6:9.

6. Kaia ne talia ei ne Ieova se taimi leva ke faka‵lei aka ei ne ia te kinauga e uiga ki tena pulega sili?

⁶ Te ‵tekeatuga ki tena pulega sili. Ko Ieova fua e maua ne ia te aiā tonu ke pule ki te lagi mo te lalolagi, kae ko tena pulega, ko te ‵toe pulega e sili i te ‵lei. (Faka. 4:11) Kae ne taumafai te Tiapolo o takitaki ‵se a agelu mo tino ke mafau‵fau me e se maua ne te Atua te aiā tenā. E se mafai o faka‵tonu fakavave aka a te ‵losiga tenā e uiga ki te ‵tonu o te pulega a Ieova. Ona ko tena poto, ne talia ne te Atua se taimi leva ke fakamaoni aka ne tino me kafai e ‵tu tokotasi latou mai te Mafuaga, ka se manuia eiloa latou. (Iele. 10:23) Ona ko te kufaki o te Atua, ko pili fua nei o faka‵lei katoatoa aka ne ia a te kinauga tenā. Ka fakamalugagina a ia i te taimi e fakamaoni atu ei ne ia me ko tena Malo fua e mafai o aumai ne ia te filemu tonu mo te tokagamalie ki te lalolagi.

7. Ko oi ne ‵teke atu ki a Ieova, kae ne a ana mea ka fai ki a latou?

⁷ Te ‵tekeatuga o ana nisi tama‵liki. Ne faite ne Ieova a tino faka-te-agaga mo ana tamaliki ‵lei katoatoa, e aunoa mo se agasala. Kae ne fai ne sena tama faka-te-agaga ‵teke ko Satani (fakauiga ki se “Tino ‵Teke”) ke fulitua atu a tino ‵lei katoatoa, ko Atamu mo Eva, ki a Ieova. Ne ‵kau atu foki a nisi agelu ki te ‵tekeatuga tenā. (Iuta 6) Fakamuli ifo, ne ‵teke atu foki a tino Isalaelu, te fenua filifilia o te Atua ki a ia kae fulitua atu o tapuaki ki atua ‵se. (Isa. 63:8, 10) Ne fakaloiloigina eiloa a Ieova i te taimi tenei. Kae ne kufaki a ia, kae ka kufaki eiloa a ia ke oko ki te taimi tonu ke fakaseai atu ne ia a tino ‵teke katoa. Kae ka maua eiloa ne ia fakatasi mo ana tavini fakamaoni a te fiafia, me ko se toe manakogina ke kufaki latou i mea ma‵sei o te olaga tenei!

8-9. Ne a loi ko oti ne fakasalalau atu e uiga ki a Ieova, kae e ‵saga atu pefea tatou ki ei?

⁸ Se toe oti a loi o te Tiapolo. Ne ‵losi atu a Satani ki a Ieova me i tena tavini fai mea tonu ko Iopu mo ana nisi tino tapuaki katoa e tavini atu ki a ia ona ko manakoga kaima‵nako. (Iopu 1:8-11; 2:3-5) Ne tumau loa te Tiapolo i te faiga o te ‵losiga tenā ke oko mai ki ‵tou aso nei. (Faka. 12:10) E mafai o fai ‵tou tusaga ke fakamaoni atu me i a Satani se tino loi, mai te kufaki i ‵tou fakalavelave kae tumau i te fakamaoni ki a Ieova ona ko te a‵lofa ki a Ia. E pelā mo Iopu, ka fakamanuiagina tatou ona ko te ‵tou kufaki.—Iako. 5:11.

⁹ E fakaaoga ne Satani a takitaki o lotu ‵se ke fai atu i a Ieova e masei kae e pogai mai i a ia a logo‵maega o tino. E fai mai foki a nisi tino me kafai ko ‵mate a tama‵liki, ko puke ne ia latou me e manakogina ne ia ne agelu e tokouke i te lagi. A te mea tenei se faifaiga sē āva ki te Atua! Kae e iloa ne tatou i a Ieova se Tamana alofa. Kafai e fe‵paki tatou mo se masaki faigata io me e mate se ‵tou tino pele, e se mafai o ‵losi atu ne tatou ki te Atua. I lō te fai penā, e fakatuanaki tatou me i se aso e tasi ka faka‵tonu  ne ia a mea katoa. E mafai o fai atu tatou ki tino katoa kolā ka faka‵logo mai, i a Ieova se Atua alofa. A te mea tenā e fai ne ia ke fiafia a Ieova kae ke tuku atu ne ia se tali mautinoa ki te tino e fakaitaita atu ki a ia.—Faata. 27:11.

10. Se a te mea e fakaasi mai i te Salamo 22:23, 24 e uiga ki a Ieova?

¹⁰ Te logo‵mae o ana tavini taulia. A Ieova se Atua alofa fakamagalo. A ia e fanoanoa māfai e lagona ne ia ‵tou ‵tagi ona ko logo‵maega e kufaki ne tatou—e pelā mo fakasauaga, masaki io me ko ‵tou tulaga sē ‵lei katoatoa. (Faitau te Salamo 22:23, 24.) E lagona ne Ieova a te ‵tou logo‵mae; e manako a ia o fakagata, kae ka fakagata eiloa ne ia. (Fakatusa ki te Esoto 3:7, 8; Isaia 63:9.) Ka oko mai te aso “ka ‵solo kea‵tea ne ia a loimata katoa mai i [‵tou] mata, kae ka se toe ai se mate, ka se toe ai foki se fanoanoa, se tagi io me se ‵mae. Ko palele atu a mea mua.”—Faka. 21:4.

11. E pefea a lagonaga o Ieova ki ana tavini fakamaoni kolā ko oti ne ‵mate atu?

¹¹ Ko māvae a ia mo ana taugasoa kolā ko oti ne ‵mate. E pefea a lagonaga o Ieova e uiga ki tāgata mo fāfine fakamaoni kolā ko oti ne ‵mate atu? E manako ‵ki eiloa ke toe lavea ne ia latou! (Iopu 14:15) E mata, e mafai o fakaataata ne koe te misi ne Ieova a tena taugasoa ko Apelaamo? (Iako. 2:23) Io me ko Mose, telā ne faipati a ia ki ei “mata ki mata”? (Eso. 33:11) Kae e mautinoa eiloa me e olioli malosi a ia ke lagona ne ia a Tavita mo nisi faisalamo e usu a pese ‵gali o vikiga! (Sala. 104:33) E tiga eiloa ko oti ne ‵mate atu a taugasoa konei o te Atua, kae e se puli latou i a Ieova. (Isa. 49:15) E masaua ne ia a fakamatalaga liki‵liki katoa e uiga ki a latou. E fai mai te Tusi Tapu, “me i a latou e ola katoa i tena kilokiloga.” (Luka 20:38) Ko pili mai te aso ka toe faka‵tu aka ne ia latou ki te ola, kae ka toe lagona ne ia a olotou ‵talo kolā e fai atu mo te loto kātoa,  kae talia ne ia te lotou tapuakiga. Kafai e isi sou tino pele ko oti ne galo atu i te mate, ka fakamafanafana atu eiloa a mafaufauga konei ki a koe.

12. Se a te mea e fai ei ke fanoanoa malosi a Ieova i te vaitaimi matagā tenei i aso fakaoti?

¹² Ko tino amio ma‵sei e fakalogo‵mae atu a nisi tino. I te taimi ne kamata ei te ‵tekeatuga i Etena, ne iloa ne Ieova me ka gasolo aka o ma‵sei a tulaga o te lalolagi a koi tuai o faka‵lei aka. A Ieova e takalialia ki amioga ma‵sei, faifaiga sē fakamaoni, mo amioga fakasaua i te lalolagi i aso nei. Ne atafai faeloa a ia ki tino vāi‵vai kolā e se mafai o puipui ne latou a latou eiloa—ko tama‵liki e seai ne mātua mo fāfine ko ‵mate olotou avaga. (Saka. 7:9, 10) E fanoanoa eiloa a Ieova māfai e lavea ne ia ana tavini fakamaoni e fakasauagina kae ‵pei ki falepuipui. E mautinoa eiloa me e alofa a ia ki a tatou katoa kolā e kufaki fakatasi mo ia.

13. Ne a amioga fakatakalia‵lia e lavea ne te Atua e fai ne te kaukāiga o tino, kae se a te mea ko pili o fai ne ia?

¹³ Ko te kaukāiga o tino e fai ne latou a amioga fakatakalia‵lia. E manako a Satani o fakamasiasi a tino kolā ne faite ki te fakatusa o te Atua. I te taimi ne lavea ne te Atua “te ma‵sei o amioga a te tagata” i aso o Noa, “ne fanoanoa a Ieova ona ko tino kolā ne faite ne ia i te lalolagi, kae ne mafatia ei tena loto.” (Kene. 6:5, 6, ftn., 11) E mata, ne mafai o toe faka‵lei aka a te tulaga o te lalolagi i te taimi tenā? Ikai! Ko oko loa te fiafia o te Tiapolo i te laveaga ne ia me ko salalau atu a vaegā amioga fakatauavaga sē ‵tau, e aofia ei a faifaiga fakatauavaga sē ‵tau i te va o te fafine mo te tagata, penā foki te tagata ki te tagata io me ko te fafine ki te fafine! (Efe. 4:18, 19) A Satani e fiafia ‵ki eiloa māfai e fai ne tino kolā e tapuaki ki a Ieova se agasala matagā. Kafai ko gata te kufaki o Ieova, ka fakaasi atu ei ne ia tena sē fiafia ki amioga ma‵sei katoa.

14. Ne a mea e fai ne te tagata ki mea a te Atua ne faite i te lalolagi?

¹⁴ Te fakama‵seiga o ana mea katoa ne faite. E se gata fua i te ‘pule atu te tagata ki te suā tagata kae logo‵mae i ei,’ e se tausi faka‵lei foki ne ia te lalolagi mo manu kolā ne faite ne Ieova kae tuku atu ki te tausiga a te tagata. (Fai. 8:9; Kene. 1:28) E fai mai a nisi saienitisi, ona ko mea e fai ne tino, a te fia miliona o itukāiga * manu mo lakau kese‵kese ko kamata o seai i tausaga fakamuli nei. Setioa o fai mai latou me ko gasolo o masei te enivalomene! Kae e loto fakafetai tatou me ko oti ne tauto mai a Ieova me ka “fakamasei a latou kolā e fakamasei ne latou te lalolagi” kae ka ‵fuli te paneta ki te lalolagi palataiso.—Faka. 11:18; Isa. 35:1.

15-16. Se a te mea e ‵tau o fakamalosi mai ki a tatou ke kufaki fakatasi mo Ieova? Fakamatala mai.

¹⁵ Mafaufau aka la ki fakalavelave matagā katoa ne kufaki ne te ‵tou Tamana i te lagi mō se fia afe tausaga. (Onoono ki te pokisi “ Mea Kolā ne Kufaki ne Ieova.”) Ne mafai fua ne Ieova o fakaseai fakavave atu te olaga masei tenei i so se taimi. Kae ona ko tena kufaki, ko maua ei ne tatou se fakamanuiaga! Mafaufau ki te mea tenei. Kāti ne fakailoa atu ki se tagata mo tena avaga me e isi se fakalavelave ki te lā pepe telā seki fanau, kae ka faigata eiloa te olaga o te tamaliki kae ka mate foliki. Kae faitalia loa te faigata ki a lāua, ka fia‵fia eiloa lāua māfai ko fanau mai te lā pepe. Ko te lā a‵lofa ki te tamaliki e fakamalosi ei lāua ke kufaki i so se fakalavelave, ko te mea ke tuku atu ne lāua te ‵toe olaga ‵lei ki te lā tama.

¹⁶ I se auala tai ‵pau, a tama‵liki katoa a Atamu mo Eva e se ‵lei katoatoa māfai ko fa‵nau  mai ki te lalolagi nei. Kae ko Ieova e alofa kae atafai ki a latou. (1 Ioa. 4:19) Kae e se pelā mo mātua i te tala fakatusa, e mafai ne Ieova o fai so se mea. Ko oti ne filifili ne ia te taimi ka faka‵lei ei ne ia a logo‵maega katoa o tino. (Mata. 24:36) E mata, e se fakamalosi aka koe ne tena alofa ke kufaki fakatasi mo ia ki te leva loa telā e manakogina?

17. Kaia e fakamalosi mai ei a fakamatalaga e uiga ki a Iesu i te Epelu 12:2, 3 ke tumau tatou i te kufaki?

¹⁷ A Ieova ko te fakaakoakoga ‵lei katoatoa o te kufaki. Ne fakaakoako a Iesu ki te kufaki o tena Tamana. E pelā me se tino faka-te-foitino, ne kufaki a Iesu i pati ‵teke, te masiasi, mo te logo‵mae i luga i te pou fakasaua. (Faitau te Epelu 12:2, 3.) E mautinoa eiloa me ne maua ne Iesu te malosi ke kufaki mai te fakaakoakoga o te kufaki o tena Tamana ko Ieova. E mafai foki o fakamalosi mai ki a tatou.

18. E fesoasoani mai pefea te 2 Petelu 3:9 ke malamalama tatou i mea ko oti ne kufaki ne Ieova?

¹⁸ Faitau te 2 Petelu 3:9. E iloa ne Ieova a te ‵toe taimi ‵lei ke fakaseai atu a te lalolagi masei tenei. Ona ko tena kufaki, ne talia ne ia ke fakamaopoopo mai se vaitino tokouke, telā e lau i miliona, kolā e tapuaki kae ‵viki atu ki a ia. E fia‵fia eiloa latou ki te leva o te taimi ne kufaki ei a Ieova ke fa‵nau latou, tauloto ke a‵lofa ki a ia, kae tuku atu a latou eiloa ki a ia. I te taimi e tuku atu ei ne Ieova te taui ki te fia miliona o tino kolā ne kufaki ki te gataga, ka mafai ei o lavea ne latou a te ‵tonu o te fakaikuga ne fai ne Ieova ke kufaki a ia!

19. Se a te mea e ‵tau o fakaiku aka ne tatou ke fai, kae se a te taui ka maua ne tatou?

¹⁹ E tauloto ne tatou te auala ke kufaki mo te fia‵fia mai i a Ieova. Faitalia loa a mea faka‵mae loto mo logo‵maega ne fai mai ne Satani, kae ko Ieova se “Atua fiafia.” (1 Timo. 1:11) E mafai foki o tumau tatou i te fia‵fia i te taimi e faka‵tali ei tatou mo te kufaki ki te taimi ka faka‵malu ei ne Ieova tena igoa, fakamaluga aka tena pulega sili, fakaseai atu a mea ma‵sei katoa, kae fakagata a fakalavelave katoa kolā e fe‵paki mo tatou i te taimi nei. Ke na fakaiku aka ke kufaki tatou kae ke maua a fakamafanafanaga mai te iloa atu me i te ‵tou Tamana faka-te-lagi e kufaki foki. Kafai e fai tatou penā, ka lavea ei ne tatou te ‵tonu o pati konei mō tatou: “E fiafia te tino telā e kufaki i tofotofoga, me kafai ko talia a ia ne te Atua ka maua ne ia te foualiki o te ola, telā ne folafola mai ne Ieova ki tino kolā e tumau i te a‵lofa ki a Ia.”—Iako. 1:12.