E manako a Ieova ko tino tokolua kolā e avaga ke fia‵fia, kae ke maua ne lāua se fesokotakiga ‵pili kae tumau. (Mata. 19:4-6) Kafai koe e fia avaga, e maua ne koe i fea se avaga ‵lei? A Ieova te ‵tou Mafuaga, e iloa ‵lei ne ia a te auala ke mafai o iku manuia te famau kae avaga. Tela la, kafai e fakagalue ne koe a fakatakitakiga ne tuku mai ne ia, ka maua eiloa ne koe te fiafia. Ke mafaufau ki nisi fakatakitakiga.

Te mea muamua, e ‵tau o malama‵lama tatou i te mea tenei: “A te loto e sili atu tena faitogafiti i lō so se isi mea aka kae fakamataku.” (Iele. 17:9) Kafai se tokolua ko kamata o fai famau kae ma‵nako ke fai te lā avaga, ka kamata foki o ati aka ne lāua ne lagonaga fia‵fai kolā e malosi ‵ki. Kae ka fai ei ke faigata o fai ne lāua se fakaikuga poto. Kafai e fai se fakaikuga ke avaga ona fua ko lagonaga, e masani sāle o iku atu ki ikuga fakafanoanoa. (Faata. 28:26) Tela la, e sē se mea poto ke fakaasi atu a lagonaga ‵loto māfai koi kamata te famau io me fai ne lā tautoga mai mua o iloa ‵lei ne te suā tino a te suā tino.

E fai mai te Faataoto 22:3 penei: “A te tino atamai e lavea ne ia te mea fakamataku kae ‵muni, kae ko tino e se lasi te lotou iloa e olo ‵tonu atu eiloa, ko puapuaga ei i ikuga o mea konā.” Se a te mea fakamataku māfai e ‵sala ki se famau ki luga i te itaneti? Se mea fakafanoanoa me ko oti ne logo‵mae a nisi tino i te fai famau i luga i te itaneti, kae fakamuli ifo ko iloa ne latou i a latou e fakaloiloi fua ne tino konā. E se gata i ei, ko oti ne ‵fuli ne nisi tino a olotou igoa ke fakaloiloi ne latou a nisi tino ke kaisoa ne latou a sene a nisi tino. Kae i nisi taimi a tino konei e fakaloiloi sāle i a latou ne Molimau.

Mafaufau ki te suā mea fakamataku tenei. E isi ne polokalame fai famau i te itaneti e fakagalue ne latou te numela io me ko fuainumela ke fakaasi mai a tino kolā e ‵tau o fai ke fia‵fai. Kae seai loa ne fakamaoniga ne fai mai i vaegā auala penā ne iku atu ki te ‵lei. E mata se mea poto ke talitonu ki se numela telā ne faite fua ne se tagata, ke iku manuia i ei se mea tāua ‵ki pelā mo te avaga? A mea tau numela konā e se mafai eiloa o faka‵tusa ki te aoga o fakatakitakiga i te Tusi Tapu ?—Faata. 1:7; 3:5-7.

E fai mai se fakatakitakiga i te Faataoto 14:15 penei: “A te tino e se lava te faka‵tau e talitonu ki so se pati, kae ko te tino atamai e mafaufau ‵loto ki ana kalafaga takitasi.” Mai mua o fakaiku  aka me tenā eiloa te tino tonu ka avaga koe ki ei, e ‵tau o iloa ‵lei muamua ne koe te tino tenā. Kae tai faigata loa ke fai penā māfai e fai famau i luga i te itaneti. E tiga eiloa ko lavea ne koulua a fakamatalaga e uiga ki suā tino kae sau‵tala sāle i te itaneti, e mata, e mafai o fai atu koe me ko iloa ‵lei ne koe te tino tenā? A nisi tino kolā ne mafau‵fau me ko maua ne latou te tino tonu telā e alofa a ia ki ei, ne poi ‵ki i te iloaga ne ia a mea ‵tonu e uiga ki te tino tenā i te taimi ne fetaui i ei.

Ne fai mai te faisalamo: “E se ‵kau fakatasi au mo tāgata kolā e uiga fakaloiloi, kae ‵kalo kea‵tea au mai i a latou kolā e ‵funa olotou uiga ‵tonu.” (Sala. 26:4) E mafau‵fau a nisi tino me se mea masani ke fakaloiloi a fakamatalaga e uiga ki a latou mo olotou ata ko latou ke tino ‵gali. E ‵funa ne latou a mea ‵tonu e uiga ki a latou māfai ko sau‵tala i luga i te itaneti. Kafai foki loa e fai mai se tino i a ia se Molimau, e mata a ia se Kelisiano papatiso? E mata, e matua i te feitu faka-te-agaga? E mata, e ‵pili tena fesokotakiga mo Ieova? E mata, e ‵lei olotou uiga i olotou fakapotopotoga? Io me e se ‵lei olotou fakaakoakoga io me taku me ne “taugasoa ma‵sei”? (1 Koli. 15:33; 2 Timo. 2:20, 21) E mata, e ‵lei ma avaga latou e ‵tusa mo fakatakitakiga i te Tusi Tapu? E ‵tau o iloa ne koe a tali ki mea konei, kae tai faigata ke iloa ne koe māfai e se fesili atu koe ki nisi Molimau kolā e iloa ‵lei ne latou a ia. (Faata. 15:22) Kae ko tavini fakamaoni a Ieova e se mafai o mafau‵fau ke “se paleni” latou mai te ‵kau fakatasi mo se tino sē talitonu.—2 Koli. 6:14; 1 Koli. 7:39.

Ona ko te fakamataku o te fai famau i luga i te itaneti, e isi ne nisi auala ‵lei e mafai o maua i ei se tino telā e mafai o fai famau ki ei kae iku atu ki se avaga fiafia. Ne a avanoaga e mafai o fetaui i ei mo te tino telā ka fai pelā me se avaga ‵lei? I taimi koi saoloto i ei a maopoopoga, e mafai ne Molimau a Ieova o fetaui mo nisi tino i fakatasiga a te fakapotopotoga, fono, fono ‵lasi, mo nisi maopoopoga.

Kae i te taimi tenei ko se talia o maopopopo i koga e tokouke a tino, pelā mo te famai tenei ko te COVID-19, e fakaaoga ne tatou a tivaisi ke ‵kau atu ki fakatasiga a te fakapotopotoga kolā e mafai o maua i ei a avanoaga ke fakamasani mo Molimau kolā seki a‵vaga. E mafai foki o lavea ne koe a te auala e fai ei olotou tōfiga mo tali i fakatasiga. (1 Timo. 6:11, 12) E mafai foki o faipati ki ei māfai ko oti te fakatasiga. I taimi e fai ei a maopoopoga a Molimau a Ieova i te itaneti i olotou potukau, e mafai o lavea ne koe a te auala e fesokotaki atu ei a te tino telā e fiafai koe ki ei mo nisi tino, kae ka mafai foki o lavea ne koe ana uiga ‵tonu. (1 Pe. 3:4) Kafai ko masani faka‵lei koulua, e mafai o fakamautinoa ne koe me ‵pau lua fakamoemoega mo lua uiga, kae ka mafai o fai koulua pelā me se tauavaga ‵lei.

Kafai a tino taka e ‵sala ki se avaga ‵lei i auala kolā e fetaui ‵lei mo fakatakitakiga i te Tusi Tapu, e mautinoa eiloa me ka fakamaoni mai ne latou a te ‵tonu o pati konei i te faataoto: “A te tino e maua ne ia se avaga fafine ‵lei [io me se avaga tagata] ko maua ne ia se mea ‵lei, kae e maua ne tou tagata [io me ko tou fafine] te taliaga a Ieova.”—Faata. 18:22.