1, 2. Se a te loto talitonu telā e ‵tau o maua ne tatou taki tokotasi? (Onoono ki te ata i te kamataga.)

E PELĀ mo te mea ne fakamatala mai i te mataupu mai mua atu, ne kinau atu a te Tiapolo me e fakagalue aka ne Ieova tena pulega sili i se auala sē aoga kae e ‵lei atu foki māfai e pule ifo a tino ki a latou eiloa. E mata, e tonu a Satani? Mafaufau la me e mafai o ola ki te se-gata-mai a tino kolā e pule atu ki a latou eiloa. E mata, ka ‵lei atu latou e aunoa mo te pulega a te Atua? E mata, ka fiafia atu koe māfai e tu tokotasi katoatoa koe kae maua te ola se-gata-mai?

² E seai se tino e mafai o tali atu ne ia a fesili konā mō koe. E ‵tau mo tino taki tokotasi o mafaufau faka‵lei ki te mataupu tenei. Kafai e fai penā, e ‵tau o lavea faka‵lei atu me e tonu te pulega sili a te Atua. Ko te ‵toe pulega ‵lei eiloa. Kae e ‵tau o ‵lago atu tatou ki ei mo ‵tou loto kātoa. E tuku mai eiloa i te Tusi Tapu a te fakavae mō te vaegā loto talitonu penā. Mafaufau la ki pati i te Tusi Tapu e uiga ki te ‵tonu o te pulega sili a Ieova.

3. Kaia e fai ei a Ieova mo fai te Pule Sili tonu e tokotasi?

³ A Ieova ko te Pule Sili tonu o te iunivesi me i a ia ko te Atua malosi katoatoa mo te Mafuaga. (1 Nofo. 29:11; Galu. 4:24) I te  Fakaasiga 4:11, ne lavea atu ei i se fakaasiga a te toko 144,000 o tino faka-te-lagi kolā e pule fakatasi mo Keliso, e fai atu penei: “E ‵tau eiloa o avatu ki a koe, e Ieova, te motou Atua, te vikiga, te ‵malu, mo te malosi, me ne faite ne koe a mea katoa, kae ona ko tou loto ne ola mai ei a mea konā me ne faite ne koe latou.” Ao, ona ko te mea ne faite ne Ieova a mea katoa, e ‵tau eiloa o pule katoatoa mai a ia ki tino e pelā foki mo tino faka-te-agaga.

4. Kaia e fai ei a te ‵teke atu ki te pulega sili a te Atua e pelā me ko te fakaaogaga ‵se o te saolotoga tenā?

⁴ E seai eiloa se mea ne faite ne Satani. Tela la, e seai eiloa sena saolotoga ke maua ne ia te pulega i te iunivesi. I te ‵tekeatuga ki te pulega sili a Ieova, ne fakaasi atu eiloa ne ia mo te tauavaga muamua a te fakamaualuga. (Iele. 10:23) E tonu, e pelā me ne tino ne faite mo te saolotoga, ne mafai eiloa o filifili latou ke ‵tu tokotasi mai te Atua. Kae e mata, ne tuku atu ei ki a latou a te saolotoga ke fai penā? Ikai. E fai ne te saolotoga ke mafai ne tino o fai filifiliga ‵lei e uke i aso katoa. Kae ne seki fai ne te mea tenā ke mafai ne latou o ‵teke atu ki te lotou Mafuaga mo te Pogai o te ola. E manino ‵lei me i te ‵teke atu ki a Ieova ko te fakaaogaga ‵se o te saolotoga tenā. E pelā me ne tino, a te tulaga o tatou ko te ‵nofo mai lalo i te pulega amiotonu a Ieova.

5. Kaia e mafai ei o loto tali‵tonu tatou me e ‵tonu a fakaikuga a te Atua?

⁵ A Ieova ko te Pule Sili tonu ona ko te suā pogai tenei. E fakagalue aka ne ia tena pulega mo te fai mea tonu. E folafola mai a ia: “Toku alofa e tumau, kae e fai foki ne au a te mea tonu mo te fakamasinoga tonu, konā a mea e fiafia au ki ei.” (Iele. 9:24) E se kilo atu a ia ki so se tulafono tusia telā ne fai ne tāgata sē ‵lei katoatoa e pelā me ko te fakavae ke iloa aka ei a te mea tonu mo te mea ‵lei. Ne māfua mai eiloa i a ia tena fai mea tonu telā e ‵lei katoatoa, kae e ‵tusa mo te mea tenā, ne fakatoka ei ne ia a tulafono tusia mō tino. “A tou malo e fakavae ki te amiotonu mo te fai mea tonu,” tela la, e mafai o loto tali‵tonu tatou me i ana tulafono, akoakoga fakavae, mo fakaikuga katoa e amio‵tonu. (Sala. 89:14; 119:128) E ‵kese mai i ei, faitalia a ‵losiga me e masei te pulega sili a Ieova, ne seki mafai lele eiloa ne Satani o tuku mai se lalolagi telā e tumau i ei a te fai mea tonu.

6. Se a te pogai e tasi e maua ei ne Ieova te saolotoga ke pule mai ki te lalolagi?

⁶ E se gata i ei, a Ieova ko te Pule Sili tonu me e maua ne ia te malamalama mo te poto ke tausi atu ki te iunivesi. Mafaufau ki te manatu tonu me ne fai ne te Atua tena Tama ke faka‵lei ne ia a masaki kolā e se mafai ne tokita o faka‵lei. (Mata. 4:23, 24; Male. 5:25-29) Mai te kilokiloga a Ieova, a te mea tenei e sē se vavega. E malamalama a ia i mea ne aofia i te faitega kae e mafai foki ne ia o toe faka‵lei so se mea ne fakamaseigina. E penā foki tena malosi ke toe faka‵tu mai a tino ‵mate kae taofi a fakalavelave ‵tupu o te natula.

7. E sili fakafia atu pefea te poto o Ieova i lō te poto o te lalolagi mai lalo i te pulega a Satani?

⁷ Koi ‵sala atu eiloa a te lalolagi mai lalo i te pulega a Satani ki se auala ke faka‵lei aka a kinauga a fenua mo atufenua. Ko Ieova fua e maua ne ia te poto ke fakaoko mai te filemu ki te lalolagi. (Isa. 2:3, 4; 54:13) I te taimi e tauloto ei tatou ki te iloaga mo te poto o Ieova, e ‵pau eiloa ‵tou lagonaga mo te apositolo ko Paulo, telā ne fakaosofia ke tusi mai: “Ko tafaga la te ‵poko o te maumea mo te poto mo te iloa o te Atua! Ko oko eiloa te faigata ke malamalama i ana fakamasinoga kae e se mafai o iloa ana auala!”—Loma 11:33.

8. Se a te mea ne otia tou loto i te auala e pule mai ei a Ieova?

⁸ E uke atu a mea e fai mai i te Tusi Tapu i lō te fakaasi mai fua me e ‵tau o pule mai a Ieova. E fakaasi mai foki i ei a te pogai e sili fakafia atu ei tena pulega i lō nisi tino. A te pogai e tasi me e pule mai a ia mo te alofa. A te ‵tonuga loa, e pokotia ‵tou loto i te auala e filifili ne ia ke fakagalue  aka tena pulega sili. A ia “e ‵fonu i te alofa mo te kaimalie, e tuai o ita kae lasi tena alofa mo tena fakamaoni.” (Eso. 34:6) E fakaasi atu eiloa ne te Atua i ana faifaiga ki ana tavini me e faka‵malu kae āva a ia ki a latou. E sili atu tena atafai mai ki a tatou i lō tatou eiloa. E ‵kese mai i pati a te Tiapolo, e se taofi ne Ieova so se mea ‵lei mai i ana tino tapuaki fakamaoni. Me ne tuku mai foki eiloa ne ia tena Tama pele ko te mea ke mafai o maua ne tatou a te fakamoemoega ki te ola telā e seai se gatamaiga!—Faitau te Salamo 84:11; Loma 8:32.

9. E iloa pefea ne tatou me e mafaufau foki loa a te Atua ki tino taki tokotasi?

⁹ E uke atu a mea e mafaufau ki ei a Ieova i lō te ‵lei fua o ana tino e pelā me se potukau. E fakaasi mai foki ne ia tena mafaufau tonu ki tino taki tokotasi. Mafaufau la ki te tolu o senitenali ne faka‵tu kae fakamalosi aka ne Ieova a famasino ke faka‵sao ne latou a te fenua o Isalaelu mai i tino kolā ne fakapuapuaga atu ki a latou. I te vaitaimi faigata tenā, ne seki fakatamala a ia ke lavea atu ne ia se tino telā e sē se tino Isalaelu e igoa ki a Luta. Ne ‵fuli ki te tapuakiga tonu, faitalia a mea faiga‵ta ne fe‵paki mo ia. Ne fakamanuia ne Ieova a Luta ki se avaga mo se tama tagata. Kae e se gata fua i konā. Kafai ko toetu mai a ia, ka iloa aka ei ne Luta me i tena tama se vaega o te matakāiga telā ne tau atu ki te Mesia. Kae mafaufau la ki te otia o tena loto māfai e iloa ne ia me ne fakamau tena tala i se tusi i te Tusi Tapu telā e taku foki ki tena igoa!—Luta 4:13; Mata. 1:5, 16.

10. Kaia e se faigata ei a te pulega sili a Ieova?

¹⁰ E se ‵mafa io me faigata a te auala e pule mai ei a Ieova. E tuku mai i ei a te saolotoga kae fakamalosi aka foki i ei a te fiafia. (2 Koli. 3:17) Ne fakaasi mai ne Tavita te mea tenā penei: “E nikoi a ia ne te ‵mana mo te ‵malu fakatupu, a tena Faletapu e ‵fonu i te ‵mana mo te fiafia.” (1 Nofo. 16:7, 27) E penā foki loa, ne tusi mai a te faisalamo ko Etanu: “Amutia a tino kolā e tapuaki ki a koe i pese, kolā e ola i te mainaga o tou alofa! E fia‵fia latou i aso katoa ona ko koe, kae tavae atu ki a koe ona ko tou alofa atafai.”—Sala. 89:15, 16.

11. E fakamalosi aka pefea ne tatou ‵tou loto tali‵tonu me i te pulega sili a Ieova ko te ‵toe mea ‵lei?

¹¹ A te mafaufau ‵loto faeloa ki te ‵lei o Ieova e mafai o fakamalosi aka ei a te ‵tou loto tali‵tonu me i tena pulega ko te ‵toe mea ‵lei. E fai ei ke ‵pau ‵tou lagonaga mo te faisalamo: “E sili atu te aso e tasi e fakamāumāu i tou Faletapu, i lō te afe o aso e fakamāumāu i so se koga.” (Sala. 84:10) Se a te mea e fakauiga ki ei? E pelā me ko te ‵tou Tino faite mea mo te Mafuaga, e iloa ne Ieova a mea e manakogina ne tatou ko te mea ke fia‵fia tonu tatou, kae e fakataunu faka‵lei eiloa ne ia a te manakoga tenā i se auala lasi. So se mea e manako a ia ke fai ne tatou e aoga eiloa ki a tatou kae e iku atu ki te mauaga ne tatou o te ‵toe fiafia lasi. Tenā te mea e tupu, ke oko foki loa ki taimi e aofia ei a nisi mea faiga‵ta i mea kolā e manako a ia ke fai ne tatou.—Faitau te Isaia 48:17.

12. Se a te ‵tou manakoga tāua mō te fakamalugaga o te pulega sili a Ieova?

¹² E fakaasi mai i te Tusi Tapu me mai tua o te Afe Tausaga o te Pulega a Keliso, ka filifili aka a nisi tino ke ‵teke atu ki te pulega sili a Ieova. (Faka. 20:7, 8) Ne a mea e mafai o fakamalosi aka ei latou ke fai penā? Ko te Tiapolo, telā ka fakasaoloto mai kae ka fanatu o takitaki ‵se a tino, ka fakamalosi aka eiloa ne ia a te uiga kaimanako. Ne fai faeloa ne ia te mea tenā. E mafai o taumafai a ia ke maua ne tino a te loto tali‵tonu me e isi aka foki se auala ke ola ki te se-gata-mai e aunoa mo te fakalogo ki a Ieova. E tonu, e se mafai lele eiloa o tonu te mea tenā. Kae e sili atu i ei: E mata, ka gali eiloa ki a tatou so se vaegā pati loi penā? Kafai e a‵lofa tatou ki a Ieova kae tavini atu ki a ia ona ko tena ‵lei mo tena fai foki mo fai te Pule Sili tonu o te iunivesi, ko mafai ei o fai a vaegā pati fakatiapolo penā e pelā me ne mea fakatakalialia. Ka se ma‵nako lele eiloa tatou ki se isi olaga i lō te olaga mai lalo i te pulega sili tonu kae alofa a Ieova.

13. E ‵lago atu pefea ki te Atua māfai e fakaakoako atu tatou ki a ia?

¹³ E mautinoa eiloa me e ‵tau o ‵lago atu tatou mo te loto kātoa ki te pulega sili a Ieova. E pelā mo te mea ko oti ne matea ne tatou, e ‵tau eiloa o pule mai a ia, kae ko te auala e pule mai a ia ko te ‵toe mea ‵lei. E mafai o fakamaluga aka ne tatou a te pulega sili a Ieova mai te fakatumau o te ‵tou loto fakamaoni mo te tavini atu ki te Atua mo te fakamaoni. Ne a foki a nisi auala e mafai o ‵lago atu tatou? E mafai o fai pena mai te faiga o mea e ‵tusa mo auala o Ieova. Kafai e fai ne tatou so se mea e ‵tusa mo auala o Ieova, e fakaasi atu ei ne tatou me e a‵lofa kae fakamaluga ne tatou te auala e pule mai ei a ia.—Faitau te Efeso 5:1, 2.

14. E fakaakoako atu pefea a toeaina mo ulu o kāiga ki a Ieova?

¹⁴ E tauloto ne tatou mai i ‵tou sukesukega ki te Tusi Tapu me e fakagalue eiloa ne Ieova tena pulega i se auala alofa. E ‵tusa mo te mea tenā, ka se pule mālō atu eiloa a ulu o kāiga mo toeaina kolā e fia‵fia malosi ki tena pulega sili, e pelā me e fia fakagalue aka eiloa ne latou olotou tamā pulega. I lō te fai penā, ka fakaakoako latou ki a Ieova. Ne fai eiloa a Paulo mo fai se tino telā ne fakaakoako ki te Atua mo tena Tama. (1 Koli. 11:1) Ne seki fakama ne Paulo a nisi tino io me fakamalosi atu ki a latou ke fai se mea ‵se. I lō te fai penā, ne fakatagi atu a ia ki a latou. (Loma 12:1; Efe. 4:1; File. 8-10) Tenā eiloa te faifaiga e fakaaoga ne Ieova. Tela la, e ‵tau foki o fakaaoga a te auala tenā ne tino katoa kolā e a‵lofa kae fakamaluga aka ne latou te auala e pule mai ei a ia.

15. E fakaasi atu pefea ne te ‵tou āva ki tulaga pule a te ‵tou fia‵fia ki te auala e pule mai ei a Ieova?

¹⁵ E pefea te ‵tou kilokiloga ki tulaga pule kolā ne ‵tofi aka ne te Atua? Mai te ‵tou ga‵lue fakatasi mo te āva, e ‵lago atu ei tatou ki te pulega sili a Ieova. Kafai foki loa e se malamalama io me lotoma‵lie katoatoa tatou ki se fakaikuga, ka tumau  eiloa i te fia ‵lago atu o tatou ki fakatokaga mai te Atua. E ‵kese eiloa te mea tenā mai i auala o te lalolagi, kae tenā eiloa te vaegā olaga mai lalo i te pulega a Ieova. (Efe. 5:22, 23; 6:1-3; Epe. 13:17) E maua eiloa ne tatou a mea aoga mai i ei, me e manako te Atua ki te ‵toe mea ‵lei mō tatou.

16. E fai pefea ne tino kolā e ‵lago atu ki te pulega sili a te Atua a fakaikuga totino?

¹⁶ E mafai foki o ‵lago atu tatou ki te pulega sili a te Atua mai i ‵tou fakaikuga totino. E se ko te auala o Ieova ke tuku mai ne ia se fakatonuga mautinoa mō tulaga katoa. I lō te fai penā, i te auala telā e takitaki ei ne ia tatou e fakaasi mai i ei ne ia ana mafaufauga. E pelā mo te seai o ne fakamatalaga likiliki ki vaegā gatu mō Kelisiano. I lō te fai penā, e fakaasi mai ne ia tena manakoga ke filifili ne tatou a gatu mo teuga kolā e mata ‵tau kae fetaui ‵lei mō tavini Kelisiano. (1 Timo. 2:9, 10) E manavase foki a ia ke mo a ma fakavāivāi ne tatou a nisi tino io me fakalavelave atu ki a latou ona ko ‵tou fakaikuga. (1 Koli. 10:31-33) Kafai e takitaki muamua ‵tou auala ki mafaufauga mo mea e manavase ki ei a Ieova, i lō mea kolā e ‵lei fua ki a tatou, e fakaasi atu ei ne tatou me e fia‵fia kae ‵lago atu tatou ki te auala e pule mai ei a ia.

17, 18. Ne a nisi auala e mafai o fakamaluga aka ei ne tauavaga a te pulega sili a Ieova?

¹⁷ Mafaufau ki se feitu telā e mafai o ‵lago atu a tauavaga Kelisiano ki auala o Ieova kae fakamaluga aka ei tena pulega sili. E a māfai e gasolo aka o faigata te olaga avaga i lō te mea ne fakamoemoe ki ei? Mafaufau la me e foliga mai i a tatou ko oko atu ki se tulaga fakafanoanoa. Kaia e se faka‵tali malie aka koe kae mafaufau ‵loto ki faifaiga a Ieova ki te kau Isalaelu. Ne fakasino atu a ia ki a ia eiloa e pelā me se avaga tagata ki te atufenua mua tenā. (Isa. 54:5; 62:4) Ko se faka‵tau eiloa te faigata o te “avaga” tenā! Kae ne seki ‵fiu vave a Ieova i a latou. Ne fakaasi atu faeloa ne ia te alofa fakamagalo i taimi e uke ki te atufenua mo tena alofa tumau ki tena feagaiga mo latou. (Faitau te Salamo 106:43-45.) E mata, e se tosina atu tatou ki a Ieova ona ko te vaegā alofa fakamaoni penā?

¹⁸ E penā foki loa, e fakaakoako eiloa ki a ia a tauavaga kolā e fia‵fia ki auala o Ieova. E se taumafai latou ke fakaaoga se auala telā e se fakavae ki te Tusi Tapu ke saoloto mai i se olaga avaga faigata. E iloa ne lāua me ne fakatasi ne Ieova a lāua kae e manako foki a ia ke “‵nofo fakatasi” lāua. A te pogai faka-te-Tusi Tapu fua e tasi e mafai o ‵tala te avaga kae toe avaga ko faifaiga fakatauavaga sē ‵tau. (Mata. 19:5, 6, 9) Mai te fakaaogaga faka‵lei o te lā tulaga kae taumafai ke momea aka te ‵lei, e fakamaluga aka ei ne lāua a te auala amiotonu e pule mai ei a Ieova.

19. Kafai ko fakata‵mala tatou ke fakamaluga aka a te pulega sili a te Atua, ne a mea e ‵tau o fai ne tatou?

¹⁹ Ona ko te sē ‵lei katoatoa, ka fai eiloa ne tatou i nisi taimi a mea kolā e fakafanoanoa atu ki a Ieova. E iloa ne ia kae ne fai foki ne ia a fakatokaga mo te alofa mō tatou e auala i te togiola a Keliso. Tela la, kafai ko fai ne tatou se mea ‵se i nisi feitu, e ‵tau o akai atu tatou ki a Ieova mō te fakamagaloga. (1 Ioa. 2:1, 2) I lō te fakamasei faeloa ne tatou a tatou eiloa, e ‵tau o taumafai tatou ke tauloto mai i te mea ‵se. Kafai e tumau tatou i te fakapilipili atu ki a Ieova, ka fakamagalo ne ia tatou kae ka fesoasoani mai foki ke faka‵lei ‵tou lagonaga kae ke fakafesagai atu mo te manuia ki tulaga tai ‵pau penā i aso mai mua.—Sala. 103:3.

20. Kaia e ‵lago atu nei tatou ki te pulega sili a Ieova?

²⁰ I te lalolagi fou, ka ‵nofo a tino katoa mai lalo i te pulega sili a Ieova kae tauloto ki ana auala amio‵tonu. (Isa. 11:9) Kae ko oti eiloa ne maua nei ne tatou a te vaegā akoakoga tenā. Kae ko te fakatokaga o te mataupu e uiga ki te pulega sili tenei eiloa koi fai. Tenei eiloa te taimi ke fakamaluga aka te pulega sili a te Atua e auala i ‵tou loto fakamaoni, ‵tou taviniga, mo ‵tou taumafaiga mo te loto fiafia ke fakaakoako atu ki a ia i mea katoa e fai ne tatou.