I TAUSAGA mai te 1910 ne olo atu oku mātua ki Kanata mai Tbilisi, i Georgia, kae ‵nofo atu i se tamā fale i se koga tausi manu telā e pili ki Pelly , Saskatchewan, i te feitu ki togala o Kanata. Ne fanau au i te 1928, te toekimuli o tamaliki e tokoono. Ne mate toku tamana i te ono masina a koi tuai o fanau au, kae ne mate toku mātua i te taimi koi pepe ei au. E seki leva kae mate toku tuagane matua eiloa, ko Lucy, i te taimi ko 17 ei ana tausaga. Mai konā, ne tausi ei matou tamaliki ne te motou fakatamana.

I te aso e tasi i te taimi koi foliki ei au, ne lavea ne toku kāiga me ne futifuti ne au a te felo o te solofanua tagata. Ona ko te ma‵taku i a au ma tapa ne te solofanua, ne paka‵laga mai latou ki a au ke se fai penā—kae ne seki saga atu au ki a latou. Ne ‵fuli toku tua ki a latou, kae ne seki lagona ne au te lotou paka‵laga mai. Se mea fakafiafia me ne seki pakia au, kae tenā loa te aso ne iloa ei ne toku kāiga me i a au e ‵tuli.

Ne fakamalosi mai se taugasoa o te kāiga ke avatu au o fakaa‵koga mo nisi tamaliki ‵tuli, telā ne fakatoka ei ne toku fakatamana ko Nick ke kau atu au ki te akoga mō tino ‵tuli telā ne tu i Saskatoon, Saskatchewan. Ne fanatu au ki se koga telā e nofo ki nai itula te ‵mao mai toku kāiga, kae ona ko te mea ko lima fua oku tausaga, ne mataku malosi au. Ne mafai fua o asi atu ki toku kāiga i aso malō‵lo mo taimi ko malō‵lo ei a akoga. Fakamuli ifo, ne tauloto au ki te ‵gana fai tāga kae se mea gali ke ta‵fao fakatasi mo nisi tama‵liki.

I te 1939, toku tuagane matua eiloa koi ola ko Marion, ne avaga mo Bill Danylchuck, kae ne puke ne lāua māua mo toku tuagane ko Frances ke tausi ne lāua. Ko lāua muamua eiloa i toku kāiga ke fesokotaki mo Molimau a Ieova. I taimi malō‵lo o taku akoga, ne fakaasi mai ne lāua a mea ne tauloto ne lāua i te ‵toe  mea e mafai o fai ne lāua. A te ‵tonuga loa, e se faigofie a te fesokotaki mo lāua, me e se iloa ne lāua a te ‵gana fai tāga. Kae ne lavea fakamuli ne lāua me ne fiafia tonu au ki mea faka-te-agaga. Ne malamalama au me e isi se sokoga i te va o mea e fai ne lāua mo pati i te Tusi Tapu, telā ne olo tasi matou i te taimi ne olo atu ei lāua o talai. E seki leva kae ne fia papatiso au, telā i te po 5 o Setema i te 1941, ne papatiso ei ne Bill a au i se tulamu fiti telā ne faka‵fonu ki vai mai i se vaikeli. Ne ‵moko ‵ki eiloa a te vai!

I te 1946, i te taimi ne foki atu au ki te fale i te malō‵loga o akoga, ne kau atu au ki se fono i Cleveland, Ohio, i Amelika. I te aso muamua o te fono, ne fakatau fesoasoani oku tuagane i te tusitusiga o fakamatalaga ko te mea ke mafai o tautali atu au ki te polokalame. Kae i te lua o aso, ne fiafia au me ne isi foki se potukau o tino ‵tuli telā e isi se tino ‵fuli ne ia i te ‵gana fai tāga. Ne mafai ei ne au o malamalama i te polokalame, kae se mea gali ‵ki ke fatoa malamalama faka‵lei au i muna‵tonu i te Tusi Tapu!

I te taimi tenā, ne fatoa oti te Taua i te Lua a te Lalolagi kae koi malosi eiloa a te uiga loto fenua. Ne foki atu au mai te fono mo te loto ‵mautakitaki ke puke ‵mau au ki toku fakatuanaki i te akoga. Telā ne seki toe saluti atu ki te fuka kae usu a te vii o te atufenua. Ne seki toe kau atu foki au ki fakamanatuga o aso malō‵lo mo lotu kolā ne ‵tau eiloa o ‵kau ki ei. Ne seki fia‵fia a tino ga‵lue i te akoga kae ne taumafai latou o faimalo kae fakaaoga a fakamatalaga ‵loi ko te mea ke ‵fuli toku mafaufau. Ne fai ne te mea tenei ke fakatau kinau a tamaliki i taku vasega, kae ne maua ei ne au a avanoaga ke tuku atu se molimau ‵lei. A tamaliki i taku vasega e pelā mo Larry Androsoff , Norman Dittrick, mo Emil Schneider ne talia fakamuli ne latou te munatonu, kae ko tavini atu eiloa nei ki a Ieova mo te fakamaoni.

I te taimi e asi atu ei au ki nisi fa‵kai, ne taumafai faeloa au ke talai atu ki tino ‵tuli. E pelā mo Montreal, e isi se potukau o tino ‵tuli i ei, ne talai atu au ki a Eddie Taeger, se talavou telā ne aofia i se potukau masei. Ke oko eiloa ki te taimi ne mate ei i te tausaga ko teka, ne kau atu a ia ki te fakapotoptoga i te ‵gana fai tāga i Laval, Quebec. Ne fetaui foki au mo se tamataene ko Juan Ardanez telā ne fai pelā mo tino Pelea kolā ne sukesuke malosi ke fakatalitonu aka te ‵tonu o te fekau i te Tusi Tapu. (Galu. 17:10, 11) Ne kau mai foki a ia ki te munatonu kae ne tavini atu eiloa a ia mo te fakamaoni e pelā me se toeaina i Ottawa, Ontario, ke oko ki te taimi ne mate ei a ia.

I te 1950, ne fanatu au ki Vancouver. E tiga eiloa ne fiafia malosi au ke talai atu ki tino ‵tuli, ne seki mafai o puli i a au a te tala e uiga ki se fafine sē ‵tuli e igoa ki a Chris Spicer telā ne talai atu au ki ei i te auala. Ne talia ne ia se feagaiga mō mekesini kae ne manako ke fetaui māua mo tena avaga ko Gary. Tela la, ne asi atu au ki te lā fale, kae ne sau‵tala matou mō se taimi leva  ‵ki e auala i te tusitusi. Tenā eiloa te ‵toe taimi ne fetaui ei matou ke oko ki nai tausaga mai tua ifo, i te taimi ne lavea ne lāua a au i se vaitino i se fono i Toronto, Ontario kae ne poi malosi au i ei. Tenā eiloa te aso ne papatiso ei a Gary. Ne fakamasaua mai ne te tala gali tenā a te tāua o te tumau i te talai atu me e se iloa ne tatou me tefea te koga io me ko te taimi fea foki ka ‵mautakitaki a aka o te munatonu.

Fakamuli ifo, ne toe foki atu au ki Saskatoon. I konā, ne fetaui māua mo se mātua telā ne fakamolemole mai ke sukesuke aka au mo ana masaga fa‵fine e tokolua kolā e ‵tuli ki te Tusi Tapu, ko Jean and Joan Rothenberger, telā ne akoga i te akoga foki mō tino ‵tuli telā ne kau au ki ei. E seki leva, ne fakaasi atu ne tamaliki fafine a mea ne tauloto ne lāua ki tamaliki o te lā vasega. Fakamuli loa, e tokolima mai i te lā vasega ne fai mo Molimau a Ieova. E tokotasi mai i ei ko Eunice Colin. Ne fetaui muamua māua mo Eunice i te akoga tenā mō tino ‵tuli i te taimi ko oko atu ei au ki vasega ma‵luga. I te taimi tenā, ne tuku mai ne ia se lole kae fakamolemole mai me e mafai o fai māua mo taugasoa. Ne fai tou fafine mo fai se vaega tāua ‵ki o toku olaga—ne fai mo fai taku avaga!

I te taimi ne iloa ei ne te mātua o Eunice me ko sukesuke tou fafine ki te Tusi Tapu, ne fai atu a ia ki te pule faiakoga ke taumafai o faka‵tuka atu ki a ia. Ne fakama‵sei ne ia ana tusi sukesuke. Kae ne fakaiku aka ne Eunice ke tumau eiloa tena saga tonu atu ki a Ieova. I te taimi ne manako ei tou fafine ke papatiso, ne fai atu ana mātua, “Fai mo Molimau a Ieova, kae ka fano koe keatea mai te fale!” I te taimi ko 17 ei ana tausaga, ne tiaki ne Eunice te lotou fale, kae ne tali mo te atafai ne se kāiga Molimau i te fakapotopotoga a tou fafine. Ne tumau eiloa tena akoga kae papatiso fakamuli ifo. I te taimi ne avaga ei māua i te 1960, ne seki ‵kau mai ana mātua ki te ma avaga. Kae i te ‵tekaatuga o tausaga, ne kamata o āva mai lāua ki a māua ona ko ma talitonuga mo te auala ne puti aka ei ne māua ma tamaliki.

E pelā me ne mātua ‵tuli, ne puti aka ne māua mā tamaliki sē ‵tuli e tokofitu. Ne faigata eiloa te mea tenei, kae ne fakamautinoa aka ne māua ke fakaakoako latou ki te ‵gana fai tāga ko te mea ke mafai o fesokotaki faka‵lei matou kae akoako atu te munatonu ki a latou. Ne fesoasoani malosi mai foki a taina mo tuagane i te fakapotopotoga. E pelā mo se mātua e tokotasi, ne tusi mai ne ia ki a māua se tamā fekau ke fakailoa mai me ne fai atu ne se tamaliki e tokotasi a pati ma‵sei i te Fale Tapuaki. Ne mafai ei ne māua o ‵saga fakavave atu ki te mea tenā. E tokofa ma tamaliki tagata, ko James, Jerry, Nicholas, mo Steven, ko tavini atu nei mo te fakamaoni ki a Ieova mo olotou avaga mo kāiga. E tavini atu ma tamaliki tagata e tokofa e pelā me ne toeaina. I tafa i ei, a Nicholas mo tena avaga, ko Deborah, e fesoasoani atu i te ‵fuliga o tusi ki te ‵gana fai tāga i te ofisa lagolago i Peletania kae ko Steven mo tena avaga, ko Shannan, e aofia i te tīmu fulitusi i te ‵gana fai tāga i te ofisa lagolago i Amelika.

I te masina mai mua o te katoaga o te 40 tausaga o te ma fakaipoipoga, ne galo atu ei a Eunice i te masaki ko te kenisa. Ne mafi ‵ki tou fafine i te taimi faigata tenā. Ne tumau tena malosi ona ko tena fakatuanaki ki te ‵toetuga. E olioli malosi eiloa au ki te aso telā ka toe fetaui ei māua.

I a Fepuali i te 2012, ne siga au kae fati toku kauaga, kae ne kamata o iloa faka‵lei atu me ko manakogina ne au se fesoasoani. Tela la, ne fanatu au o ‵nofo mo taku tama tagata e tokotasi mo tena avaga. Ko ‵kau atu nei matou ki te Fakapotopotoga i te ‵Gana Fai Tāga ko Calgary, telā koi tavini atu eiloa au i ei e pelā me se toeaina. A te ‵tonuga loa, tenei eiloa te taimi muamua ne kau atu ei au ki se fakapotopotoga i te ‵gana fai tāga. Mafaufau la ki ei! I te kau atu ki se fakapotopotoga i te ‵gana Peletania i tausaga katoa konā—talu mai te 1946—ne maua pefea ne au te malosi i te feitu faka-te-agaga? Ne ola eiloa a Ieova e ‵tusa mo tena tautoga me ka tausi ne ia a tamaliki e seai ne olotou tamana. (Sala. 10:14) E loto fiafia au ki taumafaiga a latou katoa kolā ne tusitusi ne latou a fakamatalaga, tauloto ki te ‵gana fai tāga, kae fesoasoani mai o ‵fuli a fakamatalaga ki te ‵toe mea e mafai ne latou o fai.

E tonu, e isi ne taimi ne ‵segi malosi kae fia fakagata toku taumafai atu ona ko te mea ne seki mafai o malamalama au i mea kolā ne fai mai io me mafaufau i nisi e se malamalama i manakoga o tino ‵tuli. Kae i taimi penā, ne mafaufau au ki pati a Petelu ki a Iesu: “Te Aliki, ko oi te tino ka olo matou ki ei? A muna o te ola se-gata-mai konā e nofo mo koe.” (Ioa. 6:66-68) E pelā eiloa mo nisi taina mo tuagane ‵tuli mai toku kautama, ko oti ne fakamasani au ki te kufaki. Ne tauloto au ke faka‵tali ki a Ieova mo tena fakapotopotoga, kae ne uke eiloa a mea aoga ne maua ne au mai i ei! Nei la, ko maua ne au a mea‵kai faka-te-agaga e uke i taku ‵gana eiloa, kae ko mafai foki o kau atu nei au ki fakatasiga mo fono i te ‵Gana Fai Tāga faka-Amelika. Ne maua eiloa ne au se olaga fakafiafia kae gali i te tavini atu ki a Ieova, te ‵tou Atua sili.