1. Kaia ko se ma‵nako ei a nisi tino o fai olotou sukesukega?

E MANAKOGINA eiloa a taumafaiga e uke ke maua a tupe mō ola i aso nei. E tokouke a ‵tou taina e ga‵lue ovataimi ke maua a mea mō tausi olotou kāiga. Kae tokouke foki i a latou e fakamāumāu se fia itula i aso katoa ke faima‵laga ki olotou koga ga‵lue kae penā foki ma malō‵lō latou. E tokouke a tino e tausi atu ki olotou kāiga mai te ga‵lue i galuega ‵mafa. Tela la, i te fakaotiga o te aso, ko fi‵ta ‵ki a taina mo tuagane konei! Ko seai se malosi ke fai olotou sukesukega.

2. Ko te taimi fea e fai ei ne koe au sukesukega?

² A te ‵tonuga loa, e ‵tau mo tatou o fakaavanoa se taimi ke fai a sukesukega—ke sukesuke malosi—ki te Muna a te Atua mo ‵tou tusi faka-Kelisiano. A te ‵tou fesokotakiga mo Ieova mo te ‵tou ola ki te se-gata-mai e fakalagolago eiloa ki ei! (1 Timo. 4:15) Nisi tino e ala vave i aso katoa o fai olotou sukesukega i te taimi e se logoa ei te fale kae seki uke a mea ke mafaufau ki ei. E fakaavanoa ne nisi tino ne nai minute fua i te fakaotiga o te aso ke sukesuke kae mafaufau ‵loto ki mea‵kai faka-te-agaga.

3-4. Ne a fakama‵fuliga ne fai ki te aofaki o tusi kolā e ‵lomi, kae kaia?

³ E mautinoa me lotomalie katoatoa koe me se mea tāua ke fakaavanoa a taimi ke fai a sukesukega. Kae ne a mea e ‵tau o suke‵suke tatou ki ei? Kāti e fai mai koe, ‘Ko tō uke a mea e ‵tau o fai‵tau ki ei. E faigata ki a au ke faitau a mea katoa.’ Nisi tino e mafai ne latou o faitau kae onoono ki fakatokaga faka-te-agaga katoa, kae e tokouke ‵tou taina e taumafai o ‵sala taimi ke fai penā. E iloa ‵lei ne te Potukau Pule a te mea tenei. Ona ko te pogai tenā, ko oti ne tuku mai a nisi fakatakitakiga fakamuli nei ke fakamu‵tana te aofaki o tusi ‵lomi mo tusi i te itaneti.

 ⁴ E pelā me se fakaakoakoga, ko se toe ‵lomi ne tatou a te Yearbook of Jehovah’s Witnesses, me i te ukega o tala fakamalosi loto ko maua katoa i te jw.org^® e pelā foki mo polokalama o te Leo Fakasalalau o te JW^® i masina katoa. A te lōmiga o te Faleleoleo Maluga mō tino katoa mo te Ala Mai! ko ‵lomi fua fakatolu taimi i te tausaga. A fakama‵fuliga konei ne seki fai ko te mea ke lava a taimi ke fai a nisi mea aka. Ne fakatoka eiloa ko te mea ke mafai o ‵saga tonu tatou ki “mea kolā e sili atu i te tāua.” (Fili. 1:10) Ke sau‵tala nei tatou ki te auala ke iloa ne koe o filifili aka a mea e ‵tau o fakamuamua, mo te auala ke maua katoatoa ne koe a mea aoga mai au sukesukega totino ki te Tusi Tapu.

5-6. Ne a tusi e ‵tau o suke‵suke faka‵lei tatou ki ei?

⁵ Ne a mea e ‵tau o fakamuamua ne tatou? E ‵tau eiloa mo tatou o suke‵suke ki te Muna a te Atua i aso katoa. Nei la, a te aofaki o mataupu kolā e aofia i te faitauga a te fakapotopotoga ki te Tusi Tapu i te vaiaso, ko oti ne fakamu‵tana ifo ko te mea ke uke a taimi ke mafaufau ‵loto ki mea ne fai‵tau tatou ki ei, kae ke fai a sukesukega tai uke atu. E se taumafai fua tatou ke fai‵tau ke oti a tusi fai‵tau o te vaiaso, kae taumafai ke ‵goto tonu ki ‵tou loto a te fekau mai te Tusi Tapu kae ke fakapili‵pili malosi atu tatou ki a Ieova.—Sala. 19:14.

⁶ Ne a foki a nisi mea e ‵tau o suke‵suke faka‵lei tatou ki ei? E tonu, e ma‵nako tatou o fakatoka mō te Sukesukega ki te Faleleoleo Maluga mo te Sukesukega a te Fakapotopotoga ki te Tusi Tapu e pelā foki mo nisi mataupu kolā e aofia i te fakatasiga i te vaiaso. E ‵tau foki o fai‵tau tatou ki lōmiga takitasi o Te Faleleoleo Maluga mo te Ala Mai!

7. E mata, e ‵tau o loto vāi‵vai tatou māfai e se mafai o fai‵tau io me onoono tatou ki tusi i ‵tou fakatuatusi i te itaneti mo te Leo Fakasalalau?

⁷ Kāti ka fai mai koe, ‘e tonu, kae pefea la te lafu mataupu mo vitio kolā e maua i ‵tou fakatuatusi ko te jw.org, pelā foki mo te Leo Fakasalalau o te JW? E uke ‵ki eiloa!’ Ke fai se fakatusaga: Ne fakatoka ne se fale‵kai a mea‵kai ‵gali e uke kae tuku mai ki tua ke ‵kai ki ei a tino. E se mafai ne tino ‵kai o tami ki mea‵kai katoa kolā ne fakatoka. Tela la, e ‵kai fua latou ki nai mea‵kai. I se auala tai ‵pau, kafai e se mafai ne koe o faitau a mea katoa kolā ne fakatoka mai, ke sa loto vāivāi. Faitau io me onoono fua ki mea e mafai o onoono koe ki ei. Ke sau‵tala nei tatou ki mea kolā e ‵tau o fai i ‵tou sukesukega mo te auala ke maua ei ne tatou a mea aoga mai i ei.

8. Ne a mea e mafai ne koe o fai māfai ko sukesuke ki Te Faleleoleo Maluga, kae ka aoga pefea a te mea tenā ki a koe?

⁸ A te sukesuke ko te faitau faka‵lei kae saga tonu atu ki au mea e faitau. E se ‵tau fua o faitau fakavave koe ki mataupu kae māka a tali. Kafai e fakatoka koe mō te Sukesukega ki te Faleleoleo Maluga, ke faitau muamua ki te fakatoe‵toega o manatu tāua i te kamataga o te mataupu. Ka oti, ko faitau kae mafaufau ‵loto ki te matua o te mataupu, penā foki mo ulutala fo‵liki mo fesili i te pokisi. Ko faitau faka‵lei ei koe ki te mataupu kātoa. Ke mafaufau ‵loto ki te fuaiupu fakavae, e masani ko te fuaiupu muamua o palakalafa takitasi. E masani o fakaasi mai i te fuaiupu tenā a te manatu telā ka fakamatala mai i te palakalafa. I te taimi e faitau ei koe ki te mataupu kātoa, mafaufau ki te auala e soko i ei a palakalafa takitasi ki te ulutala foliki mo te matua o te mataupu kātoa. Tusi ki lalo so se pati io me se manatu fou telā e se malamalama koe i ei, ko te mea ke fai ne au sukesukega ki ei.

9. (a) Kaia e ‵tau ei o ‵saga tonu tatou ki tusi fai‵tau māfai ko suke‵suke ki Te Faleleoleo Maluga, kae fai pefea te mea tenā? (e) E pelā mo te mea ne fakamatala mai i te Iosua 1:8, ne a mea e ‵tau o fai ne tatou i tafa o te fai‵tau ki tusi fai‵tau?

 ⁹ A te Sukesukega ki te Faleleoleo Maluga, ko te sukesuke eiloa ki te Tusi Tapu. Tela la, saga tonu ki tusi fai‵tau, maise ko tusi kolā ka faitau i te taimi e suke‵suke ei te fakapotopotoga ki ei. Onono ki pati tāua io me ko fuaiupu i tusi fai‵tau kolā e ‵lago atu ki te manatu telā e sae mai i te palakalafa. E se gata i ei, fakaavanoa a taimi ke mafaufau ‵loto ki tusi fai‵tau kolā ne faitau ne koe mo te auala e mafai ei o fakagalue ne koe i tou olaga.—Faitau te Iosua 1:8.

10. E ‵tusa mo pati i te Epelu 5:14, kaia e ‵tau ei o fakamāumāu ne mātua a taimi i tapuakiga a kāiga ke akoako olotou tama‵liki ke iloa o fai olotou sukesukega?

¹⁰ E pelā mo te masani, e ma‵nako a mātua ke fai a Tapuakiga a Kāiga i vaiaso e pelā me se mea fakafiafia ki tama‵liki. Kae e tiga eiloa e ‵tau o fakatoka faeloa ne mātua se mea mō te tapuakiga a kāiga, e se ‵tau o mafau‵fau a lāua me ‵tau faeloa o isi se mea fakapito e fai ne latou i vaiaso takitasi. E tiga eiloa e mafai o onoono te kāiga i te taimi o te Tapuakiga a Kāiga ki te polokalame o te Leo Fakasalalau o te JW io me ga‵lue ki se polotieki, pelā mo te faitega o te vaka o Noa, e tāua foki ke akoako a tama‵liki ke iloa ne latou o fai a sukesukega. E ‵tau o tauloto ke iloa ne latou o fakatoka mō fakatasiga a te fakapotopotoga, io me ke iloa o fai a sukesukega ki se mataupu telā ne fakasae aka i te akoga. (Faitau te Epelu 5:14.) Kafai e fakaaoga ne latou a taimi i te fale ke sukesuke ki mataupu faka-te-Tusi Tapu, ka mafai o toka ‵lei latou ki mataupu kolā ka fai i fakatasiga, fono o te fenua, mo fono o atufenua, kolā e se aofia faeloa i ei a vitio. E tonu, a te leva o sukesukega takitasi e faka‵na loa ki te matua mo te mea e mafai ne te tamaliki o tauloto.

11. Kaia e tāua ei ke akoako ne tatou a ‵tou a‵koga faka-te-Tusi Tapu ki te auala ke fai ei a sukesukega aoga i a latou eiloa?

¹¹ E ‵tau foki o iloa ne ‵tou a‵koga faka-te-Tusi Tapu o fai a sukesukega totino. Kafai latou koi ‵fou, e fia‵fia tatou ke lavea atu latou e māka olotou tali ke fakatoka latou ki te lotou akoga io me ki fakatasiga a te fakapotopotoga. Kae e ‵tau o akoako ne tatou a ‵tou a‵koga faka-te-Tusi Tapu ke iloa ne latou o fai a sukesukega kae ke fai foki olotou sukesukega totino. I te auala tenā, kafai ko ‵sae aka a fakalavelave, i lō te ‵saga fakavave atu ki nisi tino i te fakapotopotoga mō se fesoasoani, ka iloa ne latou te auala ke maua a fesoasoani aoga mō latou eiloa mai te faiga o sukesukega ki ‵tou tusi.

12. Ne a pogai e fai ei ne tatou a sukesukega?

¹² Kafai koe se tino e se fiafia o sukesuke, e mafai o mafaufau koe me ka se mafai loa o fiafia koe o fai au sukesukega. Kae e mafai loa ne koe. Kamata ki te faiga o sukesukega i se taimi toetoe, kae fakamuli loa ko momea aka te uke o ou taimi. Masaua te pogai e fai ei au sukesukega. E tonu, a te pogai tāua ko te mea ke fakapili‵pili atu tatou ki a Ieova. A te suā pogai telā e mafai o galue fakavave ki ei ko te tali aka o se fesili ne fai mai ne se tino, io me fai ne sukesukega ki se fakalavelave e fepaki mo tatou.

13. (a) Fakamatala mai a auala kolā e mafai o ‵pulu ne se tamaliki akoga ana talitonuga i te akoga. (e) E fakagalue aka pefea ne koe a pati fakatonutonu i te Kolose 4:6?

¹³ E pelā me se fakaakoakoga, e mata, a koe se tamaliki akoga? Kāti e fakamanatu ne tama‵liki katoa i tau vasega olotou aso fanau. E manako koe ke fakaasi atu ki a latou a pogai mai te Tusi Tapu e se kau ei koe ki olotou aso fanau, kae kāti e se toka koe o fai te mea tenā. Tela la, e manakogina ke fai au sukesukega! E lua pogai e aoga ei te mea tenei: (1) ke fakamalosi aka tou loto talitonu me i te Atua e se fiafia ki te fakamanatuga o aso fanau, kae ko te (2) ke momea aka tou atamai i te fakamatalaatuga o te munatonu. (Mata. 14:6-11; 1 Pe. 3:15) Kāti e mafai o fesili ifo muamua koe penei, ‘Ne a pogai ka fai mai ne tama‵liki i taku vasega me ‵tau o fakamanatu a aso fanau?’ Ka oti, ko fakaaoga ei ‵tou tusi, ke fai a sukesukega maea. Ke ‵pulu ne koe ou talitonuga e sē se mea faigata e pelā mo te mea e mafaufau koe ki ei. E fakamanatu ne te tokoukega o tino a aso fanau ona ko te mea e fai ne tino katoa te mea tenā. Kae kafai e fakaasi atu ne koe ki a latou se manatu fua e tasi io me lua, e mafai eiloa o tuku atu ne koe se tali fakamalie loto ki te tino telā e fia tauloto ki te munatonu.—Faitau te Kolose 4:6.

14-16. (a) E mafai pefea o iloa faka‵lei ne koe a tusi i te Tusi Tapu kolā e se masani koe ki ei? (e) Fakamatala mai te auala e mafai ei o fesoasoani atu a tusi fai‵tau ke malamalama faka‵lei koe i mea e uiga ki te tusi ko Amosa. (Onoono foki ki te pokisi “ Fai a Tino i te Tusi Tapu e Pelā me ne Tino ‵Tonu ki a Koe!”)

¹⁴ Ke mafaufau me i te suā fakatasiga a te fakapotopotoga, ka fai‵tau kae sau‵tala eiloa tatou ki tusitusiga a se pelofeta foliki, kāti se tusi telā e se masani koe ki ei. A te mea muamua e ‵tau o fai, ko te momea aka tou manakoga ke iloa ne koe a mea ne tusi ne te pelofeta tenei. Ka fai pefea ne koe te mea tenā?

¹⁵ Muamua la, ke fesili ifo ki a koe eiloa: ‘Ne a mea e iloa ne au e uiga ki te tino ne tusi ne ia te tusi tenei? Ko oi a ia, ne nofo a ia i fea, kae se a tena galuega?’ Kafai ko uke a mea e iloa ne tatou e uiga ki te tino tusitala tenei, ka malamalama tatou i te pogai ne fakaaoga ei ne ia a tugapati io me ko vaegā tala fakatusa i loto i tena tusi. I te taimi e faitau ei koe ki te Tusi Tapu, ‵sala ki fuaiupu kolā e fakamatala mai i ei a uiga o te tino tusitala tenā.

¹⁶ Ka oti, ko ‵sala ei ne koe me ko te taimi fea ne tusi ei a te tusi tenā. E mafai o fai ne koe a te mea tenā māfai e onoono ki “Igoa o Tusi o te Tusi Tapu” i itulau ki tua o te Tusi Tapu o te Lalolagi Fou. E se gata i ei, e mafai o sukesuke koe ki te tiāti e uiga ki pelofeta mo tupu i te Mataupu Fakaopoopo A6. Kafai a te tusi o te Tusi Tapu tenā se tusi o valoaga, se mea gali ke iloa ne koe te vaegā olaga ne ola ei a tino i te taimi ne tusi ei a te tusi tenā. Ne a amioga ma‵sei io me ko faifaiga ne ma‵nako a pelofeta ke fakatonutonu aka ne latou? Ko oi a tino ne ola fakatasi mo latou i te vaitaimi tenā? Ke malamalama faka‵lei i te tulaga i taimi konā, e mafai o onoono koe ki nisi tusi aka i loto i te Tusi Tapu. E pelā me se fakaakoakoga, ke malamalama faka‵lei i mea ne ‵tupu i te taimi ne ola ei te pelofeta ko Amosa, ka maua ne koe a mea aoga māfai e  faitau ki fuaiupu i te tusi ko te 2 Tupu mo te 2 Nofoaiga Tupu, kolā e fakaasi mai i tusi siki fakaopoopo o te Amosa 1:1. E se gata i ei, e mafai o toe onoono koe ki tusi ne tusi ne Hosea, telā kāti ne ola fakatasi mo Amosa. Ka fesoasoani atu eiloa a fakamatalaga konā ke malamalama faka‵lei koe i te vaitaimi ne ola ei te pelofeta ko Amosa.—2 Tupu 14:25-28; 2 Nofo. 26:1-15; Ho. 1:1-11; Amo. 1:1.

17-18. Mai te fakaaogaga o fakaakoakoga i te palakalafa io me se fakaakoakoga totino a koe, fakaasi mai te auala e fai ei a te saga tonu ki fakamatalaga kolā e mafaufau koe me e se tāua malosi, e pelā me se auala e fai ei ke fakafiafia te faiga o sukesukega.

¹⁷ Se mea ‵lei ke faitau ki te Tusi Tapu mo te manakoga ke tauloto ki mea e uke. Mafaufau i a koe e faitau ki te mataupu e 12 o te tusi ko Sakalia, telā e ‵valo mai i ei a te mate o te Mesia. (Saka. 12:10) Kafai ko oko koe ki te fuaiupu e 12, e fakaasi mai i ei me i “te kāiga o Natano” ka fanoa‵noa malosi ona ko te mate o te Mesia. I lō te faitau fakavave fua ki te fakamatalaga tenā, e mafai o mānava malie koe kae fesili ifo: ‘Se a te sokoga o te kāiga o Natano mo te Mesia? E mata, e isi se auala ke maua a fakamatalaga tai uke atu?’ Ke fai ne sukesukega ‵loto ki ei. E isi se tusi siki fakaopoopo telā e fakasino atu ki te 2 Samuelu 5:13, 14, telā e fai mai ei me i a Natano se tokotasi o tamaliki a te Tupu ko Tavita. A te suā tusi siki fakaopoopo, ko te Luka 3:23, 31, e fakaasi mai ei me i a Iesu ne vau mai te gafa o Natano e auala i a Malia. (Onoono ki Tali ki Fesili Mai te Tusi mō Fakatasiga ko te ‵Tou Olaga Kelisiano mo te Galuega Talai, i a Iuni 2018, itu. 6 Ko oi te tamana o Iosefa?) Ka ofo eiloa koe! Ko iloa ne koe me ne ‵valo mai i a Iesu ka vau mai te gafa o Tavita. (Mata. 22:42) Kae ko Tavita e toko 20 tupu ana tama‵liki tāgata. Se mea fakaofoofogia me fakaasi fakapito mai ne Sakalia a te kāiga o Natano me ka fanoa‵noa malosi i te mate o Iesu?

 ¹⁸ Mafaufau ki te suā fakaakoakoga. I te mataupu muamua o te Luka, e fai‵tau tatou me ne asi atu te agelu ko Kapilielu ki a Malia kae fakailoa atu me ka fanau mai ne tou fafine se tamaliki: “A ia tenei ka fai mo fai se tino sili kae ka taku a ia ko te Tama a te Atua Tafasili i te Maluga, kae ka tuku atu ne Ieova te Atua ki a ia te nofogaaliki o Tavita, tena tamana, kae ka pule a ia e pelā me se Tupu i te kāiga o Iakopo ki te se-gata-mai.” (Luka 1:32, 33) Kāti e masani ‵lei tatou ki te vaega muamua o te fekau a Kapilielu, me ka taku a Iesu ko te “Tama a te Atua Tafasili i te Maluga.” Kae ne ‵valo mai foki a Kapilielu me ka “pule a [Iesu] e pelā me se Tupu.” Kāti ka mafau‵fau tatou me se a te uiga o pati a Kapilielu konā ki a Malia. E mata, ne mafaufau tou fafine me ne fakauiga a Kapilielu me ka sui ne Iesu a te Tupu ko Helota—io me se tokotasi o ana sui e pelā me ko te pule o Isalaelu? Kafai e fai a Iesu mo fai te tupu, ko tena uiga ka fai a Malia mo fai te mātua o te tupu, kae ka ‵nofo te lotou kāiga i se palesi o te tupu. Kae e seai eiloa se fakamatalaga me ne fai atu ne Malia se mea penei ki a Kapilielu; e seki fai‵tau foki tatou e uiga ki se fakamolemole a Malia ke maua ne ia se tulaga fakaaloalo i te Malo, e pelā mo te mea ne ma‵nako ki ei a soko e tokolua o Iesu. (Mata. 20:20-23) E fakamaoni faka‵lei mai i te fakamatalaga tenei, me i a Malia se fafine e lasi tena loto maulalo!

19-20. E pelā mo mea ne fakamatala mai i te Iakopo 1:22-25 mo te 4:8, ne a pogai e fai ei ne tatou a ‵tou sukesukega?

¹⁹ Ke masaua ne tatou me i te pogai tāua e suke‵suke ei tatou ki te Muna a te Atua mo ‵tou tusi faka-Kelisiano, ko te mea ke fakapili‵pili atu tatou ki a Ieova. E ma‵nako foki tatou ke lavea faka‵lei ne tatou a ‵tou “foliga” ‵tonu io me ko tatou ne vaegā tino pefea, mo ‵fuliga kolā e manakogina ke fai ko te mea ke fakafiafia atu ei ki te Atua. (Faitau te Iakopo 1:22-25; 4:8.) I taimi katoa e fai ei ‵tou sukesukega, e ‵tau o akai atu tatou ki a Ieova ki te fesoasoani o tena agaga tapu. E ‵tau o fakamolemole atu tatou ki a ia ke fesoasoani mai ke maua ne tatou a mea aoga mai te mataupu e sukesuke ki ei mo te auala e mafai ei o fai ne tatou a ‵fuliga.

²⁰ Ke na fai tatou katoa e pelā mo te tagata o te Atua telā ne fakamatala mai ne te faisalamo: “E fiafia a ia ki te tulafono a Ieova, kae e faitau a ia ki Tena tulafono i se leo malalo i te ao mo te po. . . . Kae ko mea katoa e fai ne ia ka manuia eiloa.”—Sala. 1:2, 3.