1. Se a te fakaikuga tāua e ‵tau o fai ne tino katoa?

 A TINO i aso nei e ‵tau o fai ne latou se fakaikuga tāua. E mata, ka ‵lago atu latou ki a Ieova te Atua e pelā me ko te Pule tonu i te iunivesi, io me ka ‵lago katoatoa atu ki tena fili matagā, ko Satani te Tiapolo? E seai se tino e mafai o tu i te kogāloto. A te fakaikuga e fai ne latou ka iloa aka ei me e talia io me se talia ke ola latou ki te se-gata-mai. (Mata. 25:31-33, 46) I te taimi o te “fakalavelave lasi,” ka fakamailoga latou ki te faka‵saoga io me ki te fakaseaiga.—Faka. 7:14; 14:9-11; Eseki. 9:4, 6.

2. (a) Se a te mea e fakamalosi mai i te Epelu 10:35-39 ke fai ne tatou? (e) E fesoasoani mai pefea te tusi o Fakaasiga ki a tatou?

² Faitau te Epelu 10:35-39. Kafai ne filifili koe ke ‵lago atu ki te pulega a Ieova, ne fai eiloa ne koe se fakaikuga poto. Nei la, ko manako malosi koe ke fesoasoani atu ki nisi tino ke fai foki te fakaikuga tenā. Ke fai penā, e mafai o fakaaoga ne koe a fakamatalaga i te tusi o Fakaasiga ke fesoasoani atu ki a latou. A te tusi fakaofoofogia tenā e fakaasi mai i ei a mea kolā ka ‵tupu ki tino kolā e ‵teke ki a Ieova, kae e fakaasi mai foki i ei a fakamanuiaga ka maua ne tino kolā e ‵lago atu ki tena pulega. Se mea ‵lei eiloa ke mafau‵fau tatou ki muna‵tonu tāua konā. A te fai penā ka fakamalosi aka ei te ‵tou fakaikuga ke tumau i te tavini atu ki a Ieova. E se gata i ei, e mafai foki o fakaaoga ne tatou a ‵tou mea ne tauloto ke fesoasoani atu ki nisi tino ke fai ne latou te fakaikuga tonu kae ke ‵piki ‵mau ki ei.

3. Ne a mea ka mafau‵fau tatou ki ei i te mataupu tenei?

³ I te mataupu tenei, ka mafau‵fau tatou ki fesili konei: Ne a mea ka ‵tupu ki tino kolā e ‵lago atu ki te pulega a te Atua? I  te suā feitu, ne a mea ka ‵tupu ki tino kolā e filifili aka ke ‵lago atu ki te manu fekai lanu ‵kula telā e fakamatala mai i te tusi o Fakaasiga?

4. Se a te potukau ne lavea ne te apositolo ko Ioane e ‵nofo fakatasi mo Iesu i te lagi?

⁴ Ne lavea ne te apositolo ko Ioane i se fakaasiga a potukau e lua kolā e ‵lago atu ki te pulega a Ieova kae maua ne latou a te fakamanuiaga ko te ola se-gata-mai. A te potukau muamua e toko 144,000. (Faka. 7:4) Ne puke latou mai te lalolagi ke aofia i se Malo fakatasi mo Iesu i te lagi. Ka pule fakatasi mai latou mo ia ki te lalolagi. (Faka. 5:9, 10; 14:3, 4) I te fakaasiga, ne lavea ne Ioane a latou e ‵tu fakatasi mai mo Iesu i te Mauga o Siona i te lagi.—Faka. 14:1.

5. Ne a mea ko pili o ‵tupu ki te ‵toega o te toko 144,000?

⁵ Ke oko mai ki aso nei, e lau i afe a tino ko oti ne filifili aka ke aofia i te toko 144,000. (Luka 12:32; Loma 8:17) Kae ne fai atu ki a Ioane me ka isi se ‵toega io me se aofaki foliki fua o latou ka ola i te lalolagi i aso fakaoti. A latou kolā e “‵toe mai” ka maua te lotou “fakamailoga” fakaoti, telā ko te taliaga a Ieova mai mua malie eiloa o kamata te fakalavelave lasi. (Faka. 7:2, 3; 12:17) Kae i se taimi i loto i te fakalavelave lasi, a te ‵toega konei ka avaka ki te lagi ke ‵kau fakatasi mo nisi tino o te toko 144,000, kolā ko oti ne ‵mate mo te fakamaoni. Tenā ko pule fakatasi mai ei latou mo Iesu i te Malo o te Atua.—Mata. 24:31; Faka. 5:9, 10.

6-7. (a) Se a te suā potukau ne lavea ne Ioane kae ne a mea e tauloto ne tatou e uiga ki a latou? (e) Kaia e ‵tau ei o fia‵fia malosi te ‵toega mo te “vaitino e tokouke” ki te Fakaasiga mataupu 7?

⁶ I te otiga ne lavea ne ia te potukau i te lagi, ne lavea ne Ioane “se vaitino e tokouke.” E ‵kese mo te toko 144,000, e se mafai o lau a te potukau tenei. (Faka. 7:9, 10) Ne a mea e iloa ne tatou e uiga ki a latou? Ne fai atu penei ki a Ioane: “Konei a tino ne ‵sao i te fakalavelave lasi, kae ne ‵ta ne latou olotou gatu ‵loa kae faka‵kena ki te toto o te Tamā Mamoe.” (Faka. 7:14) Kafai ko oti ne ‵sao atu latou i te fakalavelave lasi, a te “vaitino e tokouke” konei ka ola i te lalolagi kae maua a fakamanuiaga fakaofoofogia e uke.—Sala. 37:9-11, 27-29; Faata. 2:21, 22; Faka. 7:16, 17.

⁷ Faitalia me ne filifili tatou ke olo ki te lagi io me e ola i te lalolagi nei, e mata, e lavea ne tatou a te ‵tou aofia i te fakamatalaga tenei i te Fakaasiga mataupu 7? E ‵tau eiloa. Se taimi fakafiafia eiloa tenā mō te avā potukau o tavini a te Atua! Ka sili atu te ‵tou fia‵fia me ne filifili ne tatou ke ‵lago atu ki te pulega a Ieova. Ne a nisi mea e fai mai i te tusi o Fakaasiga e uiga ki te fakalavelave lasi?—Mata. 24:21.

8. Ka kamata pefea te fakalavelave lasi, kae ka ‵saga atu pefea te tokoukega o tino ki ei?

⁸ E pelā mo mea ne fakamatala mai i te mataupu mai mua, a malo fakapolitiki o te lalolagi nei ko pili o taua atu ki Papelonia te Sili, ko te emupaea o lotu ‵se i te lalolagi kātoa. (Faka. 17:16, 17) A te taua tenei ka fakamailoga ki ei te kamataga o te fakalavelave lasi. E mata, ka fai i ei ke tokouke a tino ‵fou e fakaiku aka ke tapuaki atu ki a Ieova? Ikai. E ‵kese mai i ei, e fakaasi mai i te Fakaasiga mataupu 6, me i te taimi faigata tenā, a tino kolā e se tavini atu ki a Ieova ka ‵sala ki se puipuiga mai i malo fakapolitiki mo fakapotopotoga faipisinisi o te lalolagi nei kolā e faka‵tusa ki mauga. Ona ko te mea ne seki ‵lago atu a tino konā ki te Malo o te Atua, ka kilo  atu a Ieova ki a latou e pelā me ne tino ‵teke.—Luka 11:23; Faka. 6:15-17.

9. Ka tu ‵kese pefea a tino o Ieova i te taimi o te fakalavelave lasi, kae ne a mea ka iku mai i ei?

⁹ E tonu, ka tu ‵kese eiloa a tavini fakamaoni a Ieova i te taimi faigata tenā o te fakalavelave lasi. Ko te lotou potukau fua i te lalolagi koi tavini atu eiloa ki a Ieova te Atua kae ita fitifiti ma ‵lago atu ki “te manu fekai.” (Faka. 13:14-17) A te lotou ‵tu mautakitaki, ka fai ei ke kaitaua malosi a tino kolā e ‵teke ki a Ieova. Ona ko te mea tenā, ka taua atu a atufenua ‵kau fakatasi ki tino o te Atua i koga katoa i te lalolagi. A te faifaiga o te kaitaua tenei e fakamatala mai i pati fakapelofeta e pelā me ko te taua a Koka mai Makoka.—Eseki. 38:14-16.

10. E ‵tusa mo te Fakaasiga 19:19-21, ka saga atu pefea a Ieova ki te taua telā ka fai ki ana tino?

¹⁰ Ka saga atu pefea a Ieova ki te taua matagā tenei? E fai mai a ia ki a tatou: “Ka oso aka ei toku kaitaua lasi.” (Eseki. 38:18, 21-23) E fakamatala mai i te Fakaasiga mataupu 19 a te suā mea telā ka tupu. E uga mai ne Ieova Tena Tama ke puipui ana tino kae fakatakavale ana fili. I te taua tenei, ka ‵kau atu ki a Iesu a “kautau o te lagi”—ko agelu fakamaoni fakatasi mo te toko 144,000. (Faka. 17:14; 19:11-15) Se a te ikuga o te taua tenei? Ko te fakaseaiga katoatoa o tino mo fakapotopotoga katoa kolā e ‵teke atu ki a Ieova!—Faitau te Fakaasiga 19:19-21.

11. Se a te fakaotiga fakafiafia o te tusi o Fakaasiga?

¹¹ Fakaataata i tou mafaufau a lagonaga o tino fakamaoni i te lalolagi māfai ko ‵sao atu i te fakaseaiga katoatoa o fili o te Atua! Se taimi fakafiafia eiloa tenā! E tiga eiloa ka lagona atu se leo maluga o te fiafia i te lagi māfai ko oti ne fakaseai a Papelonia te Sili, kae isi foki se mea telā ka maua i ei a te fiafia telā e sili fakafia atu. (Faka. 19:1-3) Se fakaotiga fakafiafia eiloa o te tusi o Fakaasiga—“te fakaipoipoga a te Tamā Mamoe.”—Faka. 19:6-9.

12. E ‵tusa mo te Fakaasiga 21:1, 2, ka fai mafea a te fakaipoipoga a te Tamā Mamoe?

¹² Ko te taimi fea ka fai ei te fakaipoipoga? Ka ‵nofo atu i te lagi a te toko 144,000 mai mua malie eiloa o te taua i a Amaketo. Kae e se tenā te taimi ka fai ei te fakaipoipoga a te Tamā Mamoe. (Faitau te Fakaasiga 21:1, 2.) A te fakaipoipoga a te Tamā Mamoe ka fai mai tua o te taua i a Amaketo kae fakaseai atu a fili katoa o te Atua.—Sala. 45:3, 4, 13-17.

13. Se a te aoga o te fakaipoipoga a te Tamā Mamoe mō latou kolā e aofia i ei?

¹³ Se a te aoga o te fakaipoipoga a te Tamā Mamoe mō latou kolā e aofia i ei? E pelā eiloa mo te fakaipoipoga masani, e ‵kau fakatasi i ei a te tagata mo te fafine, e penā foki a te fakaipoipoga fakatusa tenei, ko ‵kau fakatasi ei a te Tupu, telā ko Iesu Keliso mo te “tamafine telā ka fakaipoipo” a ia ki ei, ko te toko 144,000. A te fakaotiga fakafiafia tenā ko te fakasopoga o te malo fou telā ka pule mai ki te lalolagi mō se 1,000 tausaga.—Faka. 20:6.

14-15. Se a te mea ne fakatusa ki ei a te toko 144,000 i te Fakaasiga mataupu 21? (Onoono ki te ata i te ‵kava.)

¹⁴ I te Fakaasiga mataupu 21, e fakatusa i ei a te toko 144,000 ki se matugā fa‵kai gali telā e taku ko “Ielusalema Fou.” (Faka. 21:2, 9) A te fa‵kai tenei e 12 a fatu fakavae i ei kolā e tusi i ei a “igoa e 12 o apositolo e toko 12 a te Tamā Mamoe.” Kaia ne saga tonu atu ei a Ioane ki te mea tenei? Me ne lavea ne ia tena igoa e tusi i luga i se fatu e tasi i konā. Ma‵faga o tauliaga gali!—Faka. 21:10-14; Efe. 2:20.

 ¹⁵ E seai se isi fa‵kai e ‵pau mo te fa‵kai fakatusa tenei. E isi sena auala lasi telā e faite ki te tinā aulo, mo mataloa e 12 e faite ki penina, mo ‵pui mo fakavae kolā e teuteu ki fatu tāua—kae paleni ‵lei katoatoa te auala ne fua aka i ei. (Faka. 21:15-21) Kae koi isi eiloa se mea e galo! Onoono ki pati ne toe fai mai ne Ioane: “Ne seki matea ne au se faletapu i loto i ei, me i a Ieova te Atua Malosi Katoatoa ko tena faletapu, e pelā foki mo te Tamā Mamoe. Kae ko te fakai e se manako ki te la io me ko te masina ke maina atu ki luga i ei, me i te ‵malu o te Atua e maina ki luga i ei, kae ko tena moli ko te Tamā Mamoe.” (Faka. 21:22, 23) A tino kolā e aofia i te Ielusalema Fou, ka ‵nofo fakatasi mo Ieova. (Epe. 7:27; Faka. 22:3, 4) Tela la, a Ieova mo Iesu e fai pelā me ne faletapu i te fa‵kai tenā.

16. Ne a mea ka ‵tupu ki tino i te Pulega a te Malo o te Atua i te Afe Tausaga?

¹⁶ Se mea fakafiafia eiloa ki te kau fakaekegina māfai ko mafau‵fau ‵loto ki te fa‵kai tenei. Kae ko latou kolā e fakamoe‵moe o ola i te lalolagi e maua foki ne latou se pogai ‵tau ke fia‵fia ki te fa‵kai tenei. I te taimi o te Pulega a te Malo o te Atua i te Afe Tausaga, ka aumai ne te Ielusalema Fou a fakamanuiaga e uke ki te lalolagi. E lavea ne Ioane a fakamanuiaga konei e ‵tafe mai e pelā mo te “vaitafe o te vai o te ola.” Kae i feitu e lua o te vaitafe ko “lakau o te ola” kolā e aoga olotou lau “mo faka‵lei a ma‵saki o atufenua.” (Faka. 22:1, 2) Tenā ko maua ei ne tino katoa a mea aoga mai i fakatokaga konā. Kae ka gasolo malielie atu eiloa o ‵lei katoatoa a tino faka‵logo katoa. Ka se toe ai ne masaki, logo‵maega mo loimata o te fanoanoa.—Faka. 21:3-5.

17. E ‵tusa mo te Fakaasiga 20:11-13, ko oi ka maua ne latou a mea aoga i te Pulega i te Afe Tausaga?

¹⁷ Ko oi ka maua ne latou a mea aoga mai i fakatokaga ‵gali konei? Muamua la, ko te vaitino e tokouke kolā ne ‵sao atu i Amaketo fakatasi mo olotou tama‵liki kolā kāti ka fa‵nau i te lalolagi fou. Kae e tauto mai foki a te Fakaasiga mataupu 20 me ka toe faka‵tu aka a tino ‵mate. (Faitau te Fakaasiga 20:11-13.) A tino “amio‵tonu” kolā ko leva ne ‵mate fakatasi mo “tino sē amio‵tonu”—kolā ne seki lasi te lotou iloa e uiga ki a Ieova—ka toe faka‵tu aka katoa ke ola i te lalolagi nei. (Galu. 24:15; Ioa. 5:28, 29) E mata, e fakauiga i ei me ka toe faka‵tu aka a tino katoa ke ola i te lalolagi i  loto i te Pulega i te Afe Tausaga? Ikai. A tino kolā ne ‵teke atu mo te amio ma‵sei ki te avanoaga ke tavini ki a Ieova a koi tuai o ‵mate atu, ka se toe faka‵tu aka. Ne maua ne latou se avanoaga kae ne fakamaoni mai eiloa ne latou me e se ‵tau o ola latou i te lalolagi Palataiso.—Mata. 25:46; 2 Tesa. 1:9; Faka. 17:8; 20:15.

18. Ka pefea te tulaga i te lalolagi i te fakaotiga o te 1,000 tausaga?

¹⁸ I te fakaotiga o te 1,000 tausaga, a tino katoa kolā e ola i te lalolagi ka ‵lei katoatoa. Ka seai se tino ola i te taimi tenā e pokotia i te agasala telā ne māfua mai i a Atamu. (Loma 5:12) Ka fakaseai katoatoa atu a te malaia ne maua mai te agasala a Atamu. I te auala tenā, ka toe “ola mai” ei a latou kolā i te lalolagi e pelā me ne tino ‵lei katoatoa i te fakaotiga o te 1,000 tausaga.—Faka. 20:5.

19. Kaia e ‵tau ei o fai te ‵toe tofotofoga?

¹⁹ E iloa ne tatou me ne ‵teke atu a Iesu ki taumafaiga a Satani ke gutugutulua a ia. Ne tumau a ia i te fakamaoni faitalia a tofotofoga. Kae e mata, ka loto fia‵fia a tino ‵lei katoatoa o fai penā māfai ko tuku atu te avanoaga ki a Satani ke tofotofo aka latou? Ka tali aka eiloa ne tino taki tokotasi a te fesili tenei māfai ko ‵tala mai a Satani mai te lua ‵poko i te fakaotiga o te 1,000 tausaga. (Faka. 20:7) A latou kolā e tumau i te fakamaoni i te ‵toe tofotofoga tenei, ka maua ne latou te ola se-gata-mai kae tenā eiloa te taimi ka maua ei ne latou a te saolotoga tonu. (Loma 8:21) A latou kolā e ‵teke atu ka fakaseai atu ki te se-gata-mai fakatasi mo te Tiapolo mo ana temoni.—Faka. 20:8-10.

20. Ne a ou lagonaga e uiga ki valoaga ‵gali kolā e maua i te tusi o Fakaasiga?

²⁰ E pefea ou lagonaga i te otiga ne mafaufau koe ki te tusi o Fakaasiga? E a, e fiafia koe ke lavea atu me ko ola eiloa koe i te taimi e fakataunu ei a valoaga fakafia‵fia konei? E mata, e se fakamalosi atu ke ‵kami mai ne koe a nisi tino ke ‵kau ki te tapuakiga ‵ma a te ‵tou Atua? (Faka. 22:17) I te taimi ne fakamalosi aka ei a ‵tou mafaufau mo ‵tou loto ne mea fakaofoofogia kolā ka ‵tupu i aso mai mua, ko ma‵nako eiloa tatou ke fai atu a pati kolā ne fai atu ne te apositolo ko Ioane: “Amene! Vau, e te Aliki ko Iesu.”—Faka. 22:20.