1-2. Se a te pogai e tasi e ‵tau ei o fia‵fia tatou ki te tusi o Fakaasiga?

 KAI tuku atu eiloa ne se isi tino ana ata ke onoono koe ki ei? I te taimi e onoono koe ki ata konā, e lavea ne koe a ata o tino kolā e se iloa ne koe. Kae e tasi loa te ata ne leva ‵ki te taimi ne onoono koe ki ei. Kaia? Me e isi sou ata i ei. I te taimi e onoono koe ki ei, e taumafai koe o mafaufau me anafea ne pei ei te ata tenā kae i fea foki. Kae e taumafai foki koe o mate aka me ko oi a nisi tino i te ata. E tāua eiloa te ata tenā ki a koe.

² E fai eiloa te tusi o Fakaasiga e pelā mo te ata tenā. Kaia? Ona ko pogai e lua. Muamua, ne tusi eiloa a te tusi tenei i te Tusi Tapu mō tatou. I tena fuaiupu muamua, e fai‵tau tatou: “Se fakaasiga mai i a Iesu Keliso, telā ne tuku atu ne te Atua ki a ia, ke fakaasi atu ki ana tavini a mea kolā ko pili o ‵tupu.” (Faka. 1:1) Tela la, a mea e tusi i te tusi tenei, e seki tusi mō tino katoa kae mō tatou, tavini tukugina atu a te Atua. E pelā mo tino o te Atua, e se ‵tau o ‵poi tatou ke iloa atu me ko aofia tatou i te fakataunuga o valoaga i te tusi fakaofoofogia tenei. I nisi tugapati, ko lavea atu me e aofia foki tatou “i loto i te ata” tenā.

3-4. E ‵tusa mo te tusi o Fakaasiga, ka fakataunu mafea a valoaga i ei, kae se a te mea e fakamalosi mai i ei ke fai ne tatou taki tokotasi?

³ A te lua o pogai, ko te taimi ka fakataunu ei a valoaga konei. Ne fakaasi mai ne te apositolo ko Ioane telā ko matua ‵ki, a te taimi tenā i ana pati konei: “Mai i te fakamalosiga a te agaga ne oko atu ei au ki te aso o te Aliki.” (Faka. 1:10) I te taimi ne tusi ei ne Ioane a pati konā, kāti ko te 96 T.A., kae ko “te aso o te Aliki” koi ‵mao ‵ki eiloa. (Mata. 25:14, 19; Luka 19:12) Kae e ‵tusa mo valoaga i te Tusi Tapu, ne kamata te aso  tenā i te 1914 i te taimi ne fakasopo ei a Iesu mo fai te Tupu i te lagi. Mai te taimi tenā o vau ki mua, ne kamata o fakataunu i ei a valoaga i te Fakaasiga, telā e aofia i ei a tino o te Atua. E tonu, ko ola eiloa tatou i “te aso o te Aliki”!

⁴ Ona ko te mea ko ola tatou i te taimi fakafiafia tenei, ko tatou eiloa e ‵tau o ‵saga faka‵lei atu ki pati fakatonutonu a‵lofa kolā ne tusi i te Fakaasiga 1:3: “E fiafia te tino telā e faitau ki luga mo latou kolā e lagona ne latou a pati i te valoaga tenei kae e faka‵logo ki mea kolā ne tusi i ei, me ko pili o oko mai te taimi ne fuafuagina.” E tonu, e ‵tau eiloa mo tatou o ‘fai‵tau ki luga,’ ko te mea ke “lagona ne [tatou] a pati i te valoaga tenei,” kae ke “faka‵logo” ki ei. Ne a la nisi pati i ei kolā e ‵tau o faka‵logo tatou ki ei?

5. E fakaasi mai pefea i te tusi o Fakaasiga a te tāua ke fakamautinoa aka me e talia ne Ieova a te ‵tou tapuakiga?

⁵ Mai i te mataupu muamua eiloa o te Fakaasiga, ne tauloto ne tatou me e iloa ‵lei ne Iesu a mea e ‵tupu i fakapotopotoga o ana tino. (Faka. 1:12-16, 20; 2:1) Ne fakaasi mai ne Iesu a te iloa ‵lei ne ia a mea konei e auala i ana tusi ki fakapotopotoga e fitu i Asia Foliki. Ne tuku atu ne ia i fekau konā a fakatonuga likiliki ke fesoasoani atu ki Kelisiano i te senitenali muamua ke fakamautinoa aka me e talia ne Ieova te lotou tapuakiga. E se gata i ei, a pati i fekau konā, e aoga eiloa ki tino katoa o te Atua i aso nei. Se a te akoakoga mō tatou? A te ‵tou Takitaki ko Keliso Iesu, e iloa ‵lei ne ia te ‵tou tulaga faka-te-agaga. E ‵nofo tatou mai lalo i te puipuiga a Iesu; e seai se mea e se lavea ne ia. E iloa ne ia a mea e ‵tau o fai ne tatou ko te mea ke tumau tatou i te talia ne Ieova. Ne a fakatonuga ne tuku mai ne ia kolā e ‵tau o faka‵logo tatou ki ei i aso nei?

6. (a) E ‵tusa mo te Fakaasiga 2:3, 4, se a te fakalavelave tāua ne fakaasi mai ne Iesu i tena fekau ki te fakapotopotoga i Efeso? (e) Se a te akoakoga e tauloto ne tatou mai i ei?

⁶ Faitau te Fakaasiga 2:3, 4. Ke mo a ma galo a te alofa telā ne maua muamua ne koe mō Ieova. E fakaasi mai i te fekau a Iesu i te fakapotopotoga i Efeso me ne kufaki latou kae ne tumau latou i te tavini atu ki a Ieova e aunoa mo te ‵fiu, faitalia a tulaga faiga‵ta kese‵kese. Kae ko galo i a latou a te alofa telā ne maua muamua ne latou. E manakogina ke toe fakamalosi aka ne latou te alofa tenā i te mea ma se talia te lotou tapuakiga. E penā foki i aso nei, e se ‵tau fua mo tatou o kufaki. E ‵tau o kufaki tatou mō pogai ‵tau. A te ‵tou Atua e se saga mai fua ki mea e fai ne tatou kae ki te pogai foki e fai ei ne tatou a mea konā. E tāua ‵ki a pogai konā me e manako a ia ke fakavae te ‵tou tapuakiga ki te lasi o ‵tou a‵lofa mo te ‵tou loto fakafetai ki a ia.—Faata. 16:2; Male. 12:29, 30.

7. (a) E ‵tusa mo te Fakaasiga 3:1-3, se a te fakalavelave ne lavea ne Iesu i tino i Salataisa? (e) Se a te mea e ‵tau o fai ne tatou?

⁷ Faitau te Fakaasiga 3:1-3. E ‵tau mo tatou o tumau i te ala kae matapula‵pula. Ne ‵kese te fakalavelave o tino i te fakapotopotoga i Salataisa. E tiga eiloa ne ma‵losi latou i te feitu faka-te-agaga i aso mua kae ko se fai nei latou penā i te lotou taviniga ki te Atua. Tela la ne fai atu a Iesu ke “ala mai” latou. Se a te akoakoga tāua mō tatou? E tonu, ka se mafai o puli i a Ieova a ‵tou galuega. (Epe. 6:10) Kae e se ‵tau mo tatou o fakalago‵lago katoatoa ki mea ne fai ne tatou i aso mua i te taviniga ki a Ieova. E tiga eiloa ko se uke ‵tou mea e mafai o fai i aso nei e pelā mo aso mua, kae e ‵tau mo  tatou o fakalave‵lave malosi i te “galuega e fai mō te Aliki,” kae ke tumau i te ala mo te matapula‵pula ke oko eiloa ki te gataga.—1 Koli. 15:58; Mata. 24:13; Male. 13:33.

8. E ‵tusa mo te Fakaasiga 3:15-17, se a te akoakoga e maua ne tatou mai i pati kolā ne fai atu ki taina i Laotikaia?

⁸ Faitau te Fakaasiga 3:15-17. E ‵tau o fai te ‵tou tapuakiga i te loto finafinau mo te loto kātoa. E ‵kese foki te fakalavelave ne fakaasi atu ne Iesu i tena fekau ki tino i Laotikaia. Ne “mafanafana” te lotou tapuakiga ona ko te sē ‵saga tonu atu latou. Ne fai atu a Iesu me ko maua ne latou se tulaga “fanoanoa kae fakaalofa.” E manakogina ke fakamalosi aka te lotou loto finafinau mō Ieova mo tena tapuakiga. (Faka. 3:19) Se a te akoakoga mō tatou? Kafai ko galo atu te ‵tou loto finafinau, e ‵tau o toe fakamalosi aka te ‵tou loto fakafetai mō koloa faka-te-agaga ko maua ne tatou. (Faka. 3:18) Ke mo a eiloa ma talia ne tatou a te ‵tou olaga gali ke fakalavelave mai ki a tatou telā ko fakatulaga lua ei a polokalame faka-te-agaga.

9. E ‵tusa mo fekau a Iesu ki Kelisiano i Pelekamo mo Tuatila, se a te mea fakamataku e ‵tau o ‵kalo keatea tatou mai i ei?

⁹ E ‵tau mo tatou o ‵teke atu a akoakoga a aposetate. Ne polopoloki ‵mafa ne Iesu a nisi tino i Pelekamo ona ko mavae‵vaega ne fakamāfua aka ne latou. (Faka. 2:14-16) Ne fakamālō atu a ia ki tino i Tuatila kolā ne ‵kalo keatea mai i “mea ‵loto a Satani,” kae fakamalosi atu foki ki a latou ke “puke ‵mau” ki te munatonu. (Faka. 2:24-26) Ne ‵tau o sala‵mō a Kelisiano vāi‵vai kolā ne talia kae tau‵tali atu ki akoakoga ‵se. Kae e pefea tatou i aso nei? E ‵tau o ‵teke atu tatou ki so se akoakoga telā e se fetaui mo mafaufauga o Ieova. A aposetate e mafai o “foliga mai me e fakamaoni latou ki te Atua,” kae lavea atu me e “fakafiti ne latou tena ‵mana.” (2 Timo. 3:5) E faigofie ke iloa kae ‵teke atu ki akoakoga ‵se māfai e fai tatou pelā mo tino kolā e suke‵suke malosi ki te Muna a te Atua.—2 Timo. 3:14-17; Iuta 3, 4.

10. Se a te suā akoakoga e tauloto ne tatou mai i pati a Iesu ki fakapotopotoga i Pelekamo mo Tuatila?

¹⁰ Ke mo a ma aofia io me talia so se vaegā amioga masei. E isi foki se fakalavelave i Pelekamo mo Tuatila. Ne taku fakamasei ne Iesu a nisi tino i fakapotopotoga konā me ne seki ‵teke atu latou ki amioga ma‵sei. (Faka. 2:14, 20) Se a te akoakoga mō tatou? Ke mo a eiloa ma fakamoe‵moe tatou me ka talia ne Ieova so se amioga masei telā ne fai ne tatou, faitalia  te leva o te ‵tou taviniga ki a ia kae maua foki ne tatou a tauliaga e uke i te taimi nei. (1 Samu. 15:22; 1 Pe. 2:16) E manako a ia ke ‵piki ‵mau tatou ki ana tulaga ma‵luga i mea tau amioga, faitalia te gasolo aka o ma‵sei a amioga i te lalolagi nei.—Efe. 6:11-13.

11. Ne a mea ko oti ne tauloto ne tatou? (Onoono foki ki te pokisi “ Akoakoga mō Tatou i Aso Nei.”)

¹¹ Ne a mea ko oti ne tauloto ne tatou? Ko oti ne lavea ne tatou a te tāua ke talia ne Ieova te ‵tou tapuakiga. Kafai e fai ne tatou se mea telā ka se talia ei te ‵tou tapuakiga, e ‵tau o ga‵sue fakavave tatou o faka‵tonu aka te mea tenā. (Faka. 2:5, 16; 3:3, 16) Kae e isi foki se mea ne fai mai ne Iesu i ana fekau ki fakapotopotoga konā. Se a te mea tenā?

12. Ne a muna a Iesu ki taina i Semulana mo Filatelafia kolā e aoga ki a tatou i aso nei? (Fakaasiga 2:10)

¹² Ke mafau‵fau nei tatou ki fekau a Iesu ki fakapotopotoga i Semulana mo Filatelafia. Ne fai atu a ia ki Kelisiano i konā ke mo a ma ma‵taku i logo‵maega e māfua mai i fakasauaga, me ka maua eiloa ne latou te taui ona ko te lotou fakamaoni. (Faitau te Fakaasiga 2:10; 3:10) Se a te akoakoga mō tatou i aso nei? E ‵tau o fakamoe‵moe tatou ke fe‵paki mo fakasauaga kae ke toka o kufaki i ei. (Mata. 24:9, 13; 2 Koli. 12:10) Kaia e tāua ei te fakamasauaga tenei?

13-14. Ne pokotia pefea a tino o te Atua i mea ‵tupu kolā ne fakamatala mai i te Fakaasiga mataupu 12?

¹³ E fai mai te tusi o Fakaasiga me i tino o te Atua ka fakasauagina i ‵tou aso nei—i “te aso o te Aliki.” E fakaasi mai i te Fakaasiga mataupu e 12 e uiga ki se taua i te lagi telā ne tupu mai tua eiloa o te fakatuakaga o te Malo o te Atua. E taua atu a Mikaele—ko Iesu Keliso telā ne fakamaluga aka—mo tena kautau ki a Satani mo ana temoni. (Faka. 12:7, 8) Kae ne fakatakavale i ei a fili o te Atua konā kae ‵pei ifo ki te lalolagi, maua i ei ne tino i te lalolagi a logo‵maega e uke. (Faka. 12:9, 12) Kae ne pokotia pefea a tino o te Atua i te mea tenā?

¹⁴ Ne toe fai mai te Fakaasiga e uiga ki mea ne fai ne Satani. Ko se toe mafai o foki atu a ia ki te lagi, kae ona ko te kaitaua ko saga atu a ia ki tino fakaekegina, ko sui o te Malo o te Atua i te lalolagi nei kolā “e ga‵lue i te molimau atu e uiga ki a Iesu.” (Faka. 12:17; 2 Koli. 5:20; Efe. 6:19, 20) Ne fakataunu pefea te valoaga tenei?

15. Ko oi e fakasino atu ki ei a “molimau e tokolua” kolā e taku mai i te Fakaasiga mataupu 11, kae ne a mea ne ‵tupu ki a lāua?

¹⁵ Ne taua atu a Satani ki taina fakaekegina kolā e fai ne latou te takitakiga i te galuega talai o te Malo. E aofia i a latou konei ko “molimau [fakatusa] e tokolua” kolā e fai mai me  ne tamate. * (Faka. 11:3, 7-11) I te 1918, ne fakasala a taina tofia e tokovalu ona ko ‵losiga ‵se, kae ne ‵pei latou ki te falepuipui mō se taimi leva ‵ki. Mai i te kilokiloga a se tagata, e foliga mai me i te galuega a tino fakaekegina konei ko oti ne fakagata io me “tamate.”

16. Ne a mea fakaofoofogia ne ‵tupu i te 1919, kae ne a mea ne fai faeloa ne Satani talu mai te taimi tenā?

¹⁶ E fai mai foki te valoaga i te Fakaasiga mataupu 11 me i “molimau e tokolua” konā ka toe ola aka mai tua o se taimi toetoe. E fakaofoofogia te fakataunuga o te valoaga tenā i te tausaga mai tua ifo o te lotou ‵peiga ki te falepuipui. I te kamataga o te 1919, ne fakasaoloto a taina fakaekegina konei mai te falepuipui kae fakamuli ifo ne fakaseai te lotou sala. Ne ‵foki fakavave atu a taina konei o fai te galuega—ko te galuega a te Malo. Kae ne seki gata eiloa a taumafaiga a Satani o taua atu ki tino o te Atua. Talu mai te taimi tenā ne fakamafua ne Satani “se vaitafe” o fakasauaga ki tino katoa o te Atua. (Faka. 12:15) E tonu, “tenei te taimi e manakogina ei ke maua . . . te kufaki mo te fakatuanaki” ne tatou taki tokotasi.—Faka. 13:10.

17. Se a te fesoasoani seki fakamoemoegina ne maua ne tino o te Atua, faitalia a ‵tekeatuga a Satani ki a latou?

¹⁷ Ne fai mai te Fakaasiga mataupu 12 me ka maua ne tino o te Atua se fesoasoani mai i se koga e seki fakamoemoegina. E fai eiloa pelā me ne folo ne “te lalolagi” a “te vaitafe” o fakasauaga. (Faka. 12:16) Kae tenei eiloa te mea ne tupu. I nisi taimi, ne fesoasoani atu eiloa a nisi vaega mautinoa o te lalolagi a Satani e pelā mo fono fakamasino ki tino o te Atua. E uke a taimi ne manumalo a tino o Ieova i fono fakamasino kae maua i ei ne latou se tamā saolotoga. Ne fakaaoga pefea ne latou te saolotoga tenei? Ne fakaaoga katoatoa ne latou so se avanoaga ke fai te galuega a Ieova telā ne tuku atu ki a latou. (1 Koli. 16:9) Ne a mea e aofia i te galuega tenei?

18. Se a te galuega tāua e fai ne tatou i aso fakaoti konei?

¹⁸ Ne ‵valo mai a Iesu me i ana tino ka folafola atu ne latou te “tala ‵lei o te Malo [o te Atua]” ki te lalolagi kātoa a koi tuai o oko mai te gataga. (Mata. 24:14) Mai te faiga penā, e maua ne latou te fesoasoani o se agelu, io me se potukau o agelu kolā e fakamatala mai me e isi se lotou “tala ‵lei se-gata-mai e folafola  atu ki a latou kolā e ‵nofo i te lalolagi, ki atufenua mo matakāiga mo ‵gana mo tino katoa.”—Faka. 14:6.

19. Se a te suā fekau e ‵tau o talai atu ne tino kolā e a‵lofa ki a Ieova?

¹⁹ A te tala ‵lei o te Malo e se ko te fekau fua telā e folafola atu ne tino o te Atua. E ‵tau foki o ‵lago atu latou ki te galuega a agelu kolā e fakamatala mai i te Fakaasiga mataupu 8 ke oko ki te 10. E faka‵pula atu ne agelu konei se fakasologa o mea faiga‵ta ka fe‵paki mo latou kolā e ‵teke ki te Malo o te Atua. Tela la, e folafola atu eiloa ne Molimau a Ieova se fekau o te fakamasinoga, telā e ‵pau mo te “vaiua fatu mo te afi,” e fakaasi mai i ei te fakamasinoga a te Atua ki luga i vaega kese‵kese o te lalolagi masei a Satani. (Faka. 8:7, 13) E ‵tau o iloa ne tino me ko pili mai te gataga, ko te mea ke fai ne latou a ‵fuliga ‵lasi ki olotou olaga kae ke ‵sao atu i te aso o te kaitaua o Ieova. (Sefa. 2:2, 3) Kae e ‵mafa ‵ki eiloa te fekau tenei. E manakogina ne tatou te loto malosi ke folafola atu te fekau tenei. I te taimi o te fakalavelave lasi, ka gasolo o ‵mafa a te fekau fakaoti o te fakamasinoga.—Faka. 16:21.

20. Ne a mea ka sau‵tala tatou ki ei i te avā mataupu kolā ka ‵soko mai?

²⁰ E ‵tau eiloa mo tatou o faka‵logo ki “pati i te valoaga tenei” me e aofia tatou i te fakataunuga o mea kolā e fai‵tau ne tatou i te tusi o Fakaasiga. (Faka. 1:3) Kae e mafai pefea ne tatou o fa‵ki mo te fakamaoni a fakasauaga kae tumau i te faiga o ‵tou tiute ko te folafolaatuga mo te loto ‵toa a fekau konei? E lua a mea ka fakamalosi mai ki a tatou: tasi, ko mea e fakaasi mai i te tusi o Fakaasiga e uiga ki fili o te Atua mo te lua, ko fakamanuiaga i aso mai mua kolā ka maua ne tatou māfai e tumau i te fakamaoni. Ka sau‵tala tatou ki mea konā i te avā mataupu kolā ka ‵soko mai.