1-2. Fakamatala mai te auala e mafai ei o sili atu te tāua o akoakoga fakavae i te Tusi Tapu ki a tatou māfai ko ‵fuli ‵tou fakanofonofoga.

 I TE aso o te lā fakaipoipoga, e fakalogo‵logo faka‵lei te tamataene taulekaleka mo te tamafine tinogali kolā ka fakaipoipo ki se lāuga mai te Tusi Tapu e uiga ki te olaga avaga. E se ‵fou ki a lāua a akoakoga fakavae i ei. Kae mai te aso tenei o fano ki mua, ka sili atu i te tāua o fakamatalaga konā ki a lāua. Kaia? Me ka fakagalue ne lāua a mea konā e pelā me se tauavaga.

² E penā foki eiloa māfai ko fai se tauavaga Kelisiano mo fai ne mātua. I tausaga ko ‵teka, kāti ne fakalogo‵logo faeloa lāua ki lāuga e uke e uiga ki te putiakaga o tama‵liki. Kae nei la, ko sili atu i te tāua o akoakoga fakavae konā ki a lāua. Ko pili o maua se tamaliki telā ka puti aka eiloa ne lāua. Mā‵faga o tiute gali! E tonu, e mafai ne ‵tou fakanofonofoga ‵fou o ‵fuli a ‵tou kilokiloga ki nisi akoakoga fakavae i te Tusi Tapu. Tenā se pogai e tasi e fai‵tau ei a tino tapuaki a Ieova ki te Tusi Tapu, kae e ‵tusa mo te fakatonuga ne fai atu ki tupu o Isalaelu, e mafau‵fau ‵loto latou ki ei “i aso katoa” o olotou olaga.—Teu. 17:19.

3. Ne a mea ka sau‵tala tatou ki ei i te mataupu tenei?

³ Mātua, ko maua ne koutou se tauliaga sili e tasi e pelā me se Kelisiano, ke akoako otou tama‵liki e uiga ki a Ieova. Kae e uke atu a mea e manako koe o fai i tafa o te fakamatala atu fua a mea e uiga ki te ‵tou Atua. E manako koe o fesoasoani ki au tama‵liki ke a‵lofa malosi ki a ia. Ne a au mea e mafai o fai ke ati aka i au tama‵liki a te alofa ki a Ieova? Ka sau‵tala tatou i te mataupu tenei ki akoakoga fakavae e fa mai te Tusi Tapu kolā  ka fesoasoani atu ki a koutou e mātua. (2 Timo. 3:16) Ka onoono foki tatou ki auala ne maua ei ne nisi mātua Kelisiano a mea aoga i te taimi ne fakagalue aka ei ne latou a pati fakatonutonu i te Tusi Tapu.

4. Se a te akoakoga fakavae e tasi e mafai o aoga ki mātua ke ati aka i olotou tama‵liki a te alofa ki a Ieova? (Iakopo 1:5)

⁴ Akoakoga fakavae 1: ‵Sala ki te takitakiga a Ieova. Fakamolemole ki a Ieova mō te poto ke fesoasoani atu koe o ati aka i au tama‵liki a te alofa ki a ia. (Faitau te Iakopo 1:5.) A ia ko te ‵toe Tino ‵lei ke tuku mai ne ia a manatu fakatonutonu. E isi eiloa ne nai pogai ke tali‵tonu ki a ia. Ke mafau‵fau tatou ki pogai e lua. Muamua la, e maua ne Ieova te ‵toe atamai lasi e pelā me se mātua. (Sala. 36:9) Kae ko te lua, e maua faeloa a mea aoga mai i manatu fakatonutonu ‵poto e tuku mai ne ia.—Isa. 48:17.

5. (a) Ne a mea ne fakatoka ne te fakapotopotoga a Ieova ke fesoasoani ki mātua? (e) E ‵tusa mo te vitio, ne a au mea ne tauloto mai te auala ne puti aka ne te taina mo te tuagane ko Amorim lā tama‵liki?

⁵ E auala i tena Muna mo tena fakapotopotoga, e tuku mai ne Ieova a meakai faka-te-agaga e lava kae ‵toe kolā e fakavae ki te Tusi Tapu ke fesoasoani atu i te putiakaga o au tama‵liki ke a‵lofa ki a Ieova. (Mata. 24:45) E pelā mo te fakasologa o mataupu ko te “Help for the Family,” kolā ne ‵sae mai i te mekesini ko te Awake! i tausaga ko ‵teka kae ko maua foki i te ‵tou fakatuatusi i te neti, e mafai o maua ne koe i ei a manatu fakatonutonu aoga e uke. E uke foki a vitio i te jw.org kolā e aofia i ei a fakasau‵talaga mo ata fakaasi mō mātua ke fakaaoga a manatu o Ieova i te putiakaga o olotou tama‵liki. *—Faata. 2:4-6.

6. Ne a lagonaga o se tamana e uiga ki te takitakiga ne maua ne lāua mo tena avaga mai te fakapotopotoga a Ieova?

⁶ Ne fakaasi mai ne mātua e tokouke a te lotou loto fakafetai mō te fesoasoani mai i a Ieova e auala i tena fakapotopotoga. Ne fai ‵tonu mai te tamana ko Joe, penei: “A te putiakaga o tama‵liki e tokotolu i te munatonu e sē se galuega faigofie. E ‵talo faeloa māua mo taku avaga ki a Ieova ke fesoasoani mai. Kae ne lavea ne māua me ne isi faeloa se mataupu io me se vitio e maua i te taimi tonu ke  fesoasoani mai ki te fakalavelave ko fepaki mo māua. Ne fakalago‵lago faeloa māua ki te takitakiga a Ieova.” Ne iloa ne Joe mo tena avaga me e fesoasoani atu eiloa a fakatokaga penā ke fakapili‵pili atu lā tama‵liki ki a Ieova.

7. Kaia e tāua ei mō mātua ke fakaoti olotou mafi ke tuku atu se fakaakoakoga ‵lei ki olotou tama‵liki? (Loma 2:21)

⁷ Akoakoga fakavae i te 2: Akoako atu e auala i au mea e fai. E kilo‵kilo faka‵lei a tama‵liki ki olotou mātua kae fakaakoako sāle atu ki a latou. E tonu, e seai se mātua e ‵lei katoatoa. (Loma 3:23) Tela la, e fakaoti ne mātua ‵poto olotou mafi ke tuku atu se fakaakoakoga ‵lei ki olotou tama‵liki. (Faitau te Loma 2:21.) Ne fai mai se tamana e tokotasi e uiga ki tama‵liki: “E fai latou e pelā me ne omomi kolā e ‵miti ne latou so se mea.” Ne toe fai mai a ia: “Ka fai mai eiloa ne latou māfai ko se fetaui ‵tou mea e fai mo mea e akoako atu ne tatou ki a latou.” Tela la, kafai e ma‵nako tatou ke a‵lofa ‵tou tamaliki ki a Ieova, e ‵tau o sili atu te malosi mo te lavea ‵lei atu foki a te ‵tou a‵lofa ki a ia.

8-9. Ne a au mea ne tauloto mai i pati a Andrew mo Emma?

⁸ E uke auala e mafai ei ne mātua o akoako olotou tama‵liki ke a‵lofa ki a Ieova. Ke mafaufau ki pati ne fai mai ne te taina ko Andrew telā ko 17 ana tausaga: “Ne faka‵mafa faeloa mai ne oku mātua a te tāua o ‵talo. E ‵talo faeloa māua mo toku tamana i po katoa, faitalia foki loa me ko oti ne fai ne au taku ‵talo. E fakamasaua mai faeloa penei oku mātua ki a māua mo toku tuagane: ‘E mafai o fai‵pati koulua ki a Ieova i so se taimi e ma‵nako koulua ki ei.’ Ne aoga malosi ki a au a te manatu tenā e uiga ki te tāua o ‵talo, me nei la ko oko eiloa i te faigofie ke ‵talo atu au ki a Ieova kae kilo atu ki a ia e pelā me se Tamana alofa.” Mātua, sa manatu māmā ki te lasi o te fakamalosi atu o tou alofa ki a Ieova ki au tama‵liki.

⁹ Ke mafaufau foki ki te tala o Emma. I te taimi ne tiaki ne tena tamana te lotou kāiga, ne ‵tau o ‵togi ne tena mātua a kaitalafu e uke a tou tagata. Ne fai mai a Emma: “E uke taimi ne seai ne tupe a toku mātua, kae e faipati faeloa a ia ki te auala e tausi kae fakatoka ne Ieova a mea mō ana tavini. Ne lavea eiloa ne au tena loto talitonu ki ei i te auala ne ola ei a ia. Ne fai eiloa ne toku mātua a mea ne akoako mai ne ia ki a au.” Se a te akoakoga? E māfai ne mātua o tuku atu se fakaakoakoga ‵lei faitalia foki loa a tulaga faiga‵ta.—Kala. 6:9.

10. Ne a avanoaga ne maua ne mātua Isalaelu e tokouke ke sau‵tala mo olotou tama‵liki? (Teutelonome 6:6, 7)

¹⁰ Akoakoga fakavae i te 3: Sau‵tala faeloa mo au tama‵liki. Ne fakatonu atu a Ieova ki tino Isalaelu mua ke akoako faeloa olotou tama‵liki e uiga ki a ia. (Faitau te Teutelonome 6:6, 7.) Ne maua ne mātua konā a avanoaga e uke i te aso ke sau‵tala mo olotou tama‵liki kae ati aka i a latou a te alofa ki a Ieova mai olotou loto eiloa. E pelā mo se tamaliki tagata Isalaelu, e mafai o uke ana taimi e fakaaoga ke fesoasoani ki tena tamana i te ‵tokiga o lakau io me ko te ‵katiga o fuataga. E mafai o fakaaoga ne tena tuagane a taimi e uke i te aso o fesoasoani ki tena mātua i te suisui, ‵laga, mo nisi galuega i te fale. I te taimi e ga‵lue fakatasi ei a mātua mo tama‵liki, e mafai o sau‵tala latou ki mea tāua kese‵kese e uke. E pelā me se mea e tasi, e mafai o sau‵tala latou ki uiga ‵gali o Ieova kae mafau‵fau ki auala ne fesoasoani atu a ia ki te lotou kāiga.

11. Se a te avanoaga e tasi telā e mafai ei ne mātua Kelisiano o sau‵tala mo olotou tama‵liki?

¹¹ Ko ‵kese te olaga i aso nei. I fenua e uke, ko se uke a avanoaga e maua ne mātua mo tama‵liki i te aso. Kāti e ga‵lue a mātua, kae ‵nofo atu a tama‵liki i te akoga. Ona ko te mea tenā, e ‵sala a mātua ki se taimi ke mafai o sau‵tala mo olotou tama‵liki. (Efe. 5:15, 16; Fili. 1:10) A  tapuakiga a kāiga se avanoaga e tasi ke fai penā. Ne fai mai te taina talavou ko Alexander, penei: “E fai faeloa ne toku tamana a fakatokaga mō tapuakiga a kāiga, kae e se talia ne ia so se mea ke fakalavelave mai ki te taimi tenei e ‵kau fakatasi ei matou. Kafai ko oti te sukesukega, ko sau‵tala fua ei matou.”

12. Se a te mea e ‵tau o masaua ne te ulu o se kāiga i taimi o tapuakiga a kāiga?

¹² Kafai koe se ulu o te kāiga, ne a au mea e mafai o fai ke fia‵fia au tama‵liki ki tapuakiga a kāiga? Ko oko eiloa i te gali māfai e suke‵suke fakatasi koutou mo otou tama‵liki ki te ‵tou tusi fou ko te Ke Ola ki te Se-Gata-Mai! A te sukesuke ki ei e ‵tala mai ei avanoaga ‵gali ke sau‵tala mo latou. E manako koe ke fakaasi mai ne au tama‵liki olotou lagonaga mo mea e manava‵se ki ei, tela la, sa fakaaoga te taimi o tapuakiga a kāiga mo fai se taimi ke polopoloki io me kotekote latou. Kae taumafai ke mo a ma kaitaua koe māfai e fakaasi mai ne tau tamaliki se kilokiloga telā e se fetaui mo akoakoga fakavae i te Tusi Tapu. I lō te fai penā, ke loto fakafetai me e fakaasi ‵tonu mai olotou lagonaga kae fakamalosi atu ke mo a eiloa ma ma‵taku latou. E mafai o fesoasoani tonu atu koe ki au tama‵liki māfai fua e iloa ‵lei ne koe olotou lagonaga.

13. Ne a nisi avanoaga e maua ne mātua ke fesoasoani atu ki olotou tama‵liki ke fakapili‵pili ki a Ieova?

¹³ Mātua, ‵sala ki avanoaga i aso katoa ke fesoasoani ki au tama‵liki ke fakapili‵pili atu ki a Ieova. E se ‵tau o faka‵tali koe ki te taimi e fai ei olotou akoga ke akoako latou e uiga ki te ‵tou Atua alofa. Ke mafaufau ki pati a te mātua ko Lisa, penei: “E fesoasoani māua ki mā tama‵liki ke iloa ne latou a te sokoga i te va o Ieova mo mea ne faite. E pelā mo se mea e tasi, kafai ne ‵kata mā tama‵liki ki se mea ne fai ne te motou kuli, e faka‵mafa atu ne māua te manatu me i te ‵tou Mafuaga e fai faka‵kata foki kae fiafia ki te olaga, e pelā eiloa mo tatou.”

14. Kaia e tāua ei mō mātua ke fesoasoani ki olotou tama‵liki ke filifili faka‵lei olotou taugasoa? (Faataoto 13:20)

¹⁴ Akoakoga fakavae i te 4: Fesoasoani ki au tama‵liki ke maua a taugasoa ‵lei. E fakaasi manino mai i te Muna a te Atua me e mafai o pokotia tatou i ‵tou taugasoa—i se auala ‵lei io me i se auala sē ‵lei. (Faitau te Faataoto 13:20.) Mātua, e mata, e iloa ne koe a  taugasoa o au tama‵liki? E mata, ko oti ne fetaui io me sau‵tala koe mo latou? Ne a au mea e mafai o fai ke fesoasoani atu ki au tama‵liki ke fai taugasoa mo tino kolā e a‵lofa ki a Ieova? (1 Koli. 15:33) E mafai o fesoasoani koe ki a latou ke fai a filifiliga ‵poto mai te ‵kami mai a tino kolā e ma‵losi faka-te-agaga ke ‵kau atu ki polokalame a te otou kāiga.—Sala. 119:63.

15. Ne a mea e mafai o fai ne mātua ke fesoasoani ki olotou tama‵liki ke maua a taugasoa ‵lei?

¹⁵ Ke mafaufau ki te tala o te tamana ko Tony. Ne fakamatala mai ne ia a mea ne fai ne lāua mo tena avaga ke fesoasoani ki lā tama‵liki ke maua a taugasoa ‵lei: “I tausaga e uke, ne ‵kami ne māua mo taku avaga ki te motou fale a taina mo tuagane mai tupulaga mo telega kese‵kese. E ‵kai fakatasi matou kae ‵kau mai ki te motou tapuakiga a kāiga. A te mea tenei se auala gali e tasi ke fakamasani mo tino kolā e a‵lofa kae tavini atu ki a Ieova mo te fia‵fia. Se fakamanuiaga eiloa mō matou ke mafai o ‵nofo fakatasi mo ovasia o te seketi, misionale mo nisi tino i te motou fale. A olotou tala, te lotou loto finafinau, mo te lotou ga‵lue malosi, ne fesoasoani eiloa ki mā tama‵liki i se auala lasi ‵ki ke fakapili‵pili atu ki a Ieova.” Mātua, ke na tumau eiloa te otou fesoasoani ki otou tama‵liki ke maua ne latou a taugasoa ‵lei.

16. E a māfai ko fai atu sau tamaliki me ko se fia tavini atu a ia ki a Ieova?

¹⁶ Kae e a māfai ko fai atu sau tamaliki me ko se fia tavini atu a ia ki a Ieova, faitalia au taumafaiga e uke ne fai? Ke mo a ma fakaiku aka me ko seai se aoga o au taumafaiga katoa e pelā me se mātua. Ko oti ne tuku mai ne Ieova ki a tatou katoa—e aofia i ei ‵tou tama‵liki—a te meaalofa ko te saolotoga ke fai ‵tou filifiliga ke tavini io me ke se tavini atu ki te Atua. Kafai ne fakaiku aka ne tau tamaliki ke fulitua atu ki a Ieova, ke mo a ma ‵fiu vave kae galo i a koe te fakamoemoega me ka toe foki mai eiloa a ia i se aso e tasi. Masaua te tala fakatusa e uiga ki te tamaliki ne galo. (Luka 15:11-19, 22-24) Ne ‵mao ‵ki a te tamataene tenā mai te auala o te amiotonu, kae ne toe foki fakamuli mai eiloa a ia. Kāti ka fai mai a nisi tino, “A te mea tenā se tala fakatusa fua. E mata, e mafai eiloa o tupu se mea penā?” Ao, e mafai eiloa! Tenā eiloa te mea ne tupu ki te tamataene ko Elie.

17. E fakamalosi atu pefea te tala o Elie ki a koe?

 ¹⁷ Ne fai mai a Elie e uiga ki ana mātua: “Ne fai ne lāua te ‵toe mea e mafai o fai ke ati aka toku alofa ki a Ieova mo tena Muna, ko te Tusi Tapu. Kae i tausaga o toku olaga tamaliki talavou, ne kamata o ‵teke atu au.” Ne kamata o ola a Elie i se olaga magalua, kae ‵teke atu ki taumafaiga katoa a ana mātua ke fesoasoani atu ki a ia i te feitu faka-te-agaga. I te taimi ko se nofo a ia i te fale, ne aofia tou tagata i amioga ma‵sei. Kae ui ei, ne sau‵tala a ia i nisi taimi mo sena taugasoa ki mea faka-te-Tusi Tapu. Ne fai mai a Elie: “Ko te momea aka o toku faipati e uiga ki a Ieova ki toku taugasoa, ko te momea aka foki o toku mafaufau ki a Ieova. Ne kamata malielie o ola aka a fuaga o muna‵tonu i te Tusi Tapu kolā ko ‵mate i toku loto—ko fuaga kolā ne taumafai malosi oku mātua ke ‵toki.” Fakamuli loa, ne toe foki mai a Elie ki te munatonu. * Mafaufau la ki te fia‵fia o ana mātua me ne taumafai lāua o akoako atu tou tagata ke alofa ki a Ieova i te taimi koi foliki ei a ia!—2 Timo. 3:14, 15.

18. E pefea ou lagonaga ki mātua kolā e ga‵lue malosi o akoako olotou tama‵liki ke a‵lofa ki a Ieova?

¹⁸ Mātua, ko oti eiloa ne tuku atu ki a koutou se tauliaga gali ‵ki, ke puti aka se kautama ‵fou o tino tapuaki ki a Ieova. (Sala. 78:4-6) A te mea tenā e sē se galuega faigofie, kae e fakamālō atu eiloa matou mo otou taumafaiga e uke ke fesoasoani ki otou tama‵liki! Kafai e tumau koutou i te fakaoti otou mafi o fesoasoani ki otou tama‵liki ke a‵lofa ki a Ieova kae puti aka latou i ana polopolokiga mo fakatakitakiga, e mautinoa eiloa me ka fiafia te ‵tou Tamana alofa faka-te-lagi.—Efe. 6:4.