KO LEVA ne fai a taulaga mo fai se vaega tāua o te tapuakiga tonu. Ne tuku atu ne te kau Isalaelu a taulaga manu, kae ne lauiloa faeloa a Kelisiano mō olotou “taulaga o vikiga.” Kae e isi aka foki ne taulaga kolā e fiafia ki ei a te Atua. (Epe. 13:15, 16) E maua eiloa mai i taulaga konei a te fiafia mo fakamanuiaga, e pelā mo mea e fakaasi mai i fakaakoakoga konei.

A Hana, se tavini fakamaoni mua, telā ne manako malosi ki se tamaliki tagata kae ne seki fanafanau a ia. I tena ‵talo, ne tauto atu tou fafine ki a Ieova me kafai e fanau mai ne ia se tamaliki tagata, “ka toe tuku atu eiloa ne [ia] ki a koe [Ieova] i tena olaga kātoa.” (1 Samu. 1:10, 11) E seki leva, kae ne faitama a Hana, kae ne fanau mai ne ia se tamaliki tagata telā ne fakaigoa ki a Samuelu. I te taimi ko se ū ei a Samuelu, ne avatu ne ia tou tagata ki te faleie tapu, e pelā eiloa mo tena tautoga. Ne fakamanuia ne Ieova a Hana mō tena uiga sē kaiū. Ne taulia eiloa tou fafine ke toe maua a nisi tamaliki e tokolima, kae ne fai a Samuelu mo fai se pelofeta mo se tino tusitala o te Tusi Tapu.—1 Samu. 2:21.

E pelā mo Hana mo Samuelu, e maua foki ne Kelisiano i aso nei a te tauliaga ke fakaaoga olotou olaga i te taviniga tukugina atu ki te lotou Mafuaga. Ne folafola mai ne Iesu me i so se mea faigata e fai ne tatou ke tapuaki atu ki a Ieova ka lasi eiloa te taui e maua mai i ei.—Male. 10:28-30.

I te senitenali muamua, ne lauiloa eiloa a te fafine Kelisiano e igoa ki a Tokasi mō ana “galuega ‵lei e uke kae tufa atu foki a meaalofa e uke”—taulaga kolā ne fai ne ia ke fesoasoani atu ki nisi tino. Kae se mea fakafanoanoa me ne ‘masaki kae mate’ tou fafine, telā ne maua ei ne te fakapotopotoga a te loto mafatia. I te taimi ne ‵logo ei a soko me ne nofo atu a Petelu i te kogā koga tenā ne fakamalosi atu latou ki a ia ke fanatu. Mafaufau ki te lotou fia‵fia i te taimi ne toe fakatu aka ei ne Petelu a Tokasi mai te mate—ko te toetuga muamua ke fakamau ki lalo telā ne fai ne se apositolo! (Galu. 9:36-41) Ne seki puli eiloa i te Atua a taulaga a Tokasi. (Epe. 6:10) Ne tausi eiloa ana faifaiga kaimalie i te Muna a te Atua e pelā me se fakaakoakoga ‵lei ke tau‵tali atu tatou ki ei.

Ne tuku mai foki ne te apositolo ko Paulo se fakaakoakoga tafasili i te ‵lei o se tino telā ne fakamāumāu ana taimi mo ana mea katoa mo te kaimalie. Ne fai atu a Paulo i tena tusi ki taina Kelisiano i Kolinito: “Kae e pelā mo au, e fiafia malosi au o fakaaoga aku mea katoa mo toku malosi kātoa mō koutou.” (2 Koli. 12:15) Ne iloa ne Paulo mai i mea ne ‵tupu ki a ia me kafai e fai ne tatou a mea faiga‵ta mō nisi tino, e se maua fua ne tatou te lotomalie tonu kae penā foki te fakamanuiaga mo te taliaga a Ieova, telā e sili atu te tāua.—Galu. 20:24, 35.

E manino ‵lei i ei, me e fiafia a Ieova māfai e fakaaoga ne tatou ‵tou taimi mo te malosi ke fai a manakoga o te Malo kae fesoasoani atu ki taina tali‵tonu. Kae e mata, e isi aka foki ne auala kolā e mafai o fesoasoani atu tatou ki te galuega talai o te Malo? Ao! I tafa o ‵tou galuega a‵lofa, e mafai o fakaaloalo atu tatou ki te Atua e auala i ‵tou meaalofa tupe. E fakaaoga eiloa ke fakalauefa atu te galuega talai i te lalolagi kātoa, telā e aofia i ei a te ‵lago atu ki misionale mo nisi tavini i te taviniga tumau fakapito. E se gata i ei, a te fakatokaga mo te ‵fuliga o tusi mo vitio, te fesoasoani atu ki galuega fesoasoani mō fakalavelave ‵tupu, mo te faitega o Fale Tapuaki ‵fou kolā e ‵togi ki meaalofa tupe. E mafai eiloa o tali‵tonu tatou me ‘ka fakamanuia a te tino kaimalie.’ E sili atu i ei, kafai ko tuku atu ‵tou mea tāua ki a Ieova, e fakaaloalo atu eiloa tatou ki a ia.—Faata. 3:9; 22:9.