Kai faitau faka‵lei eiloa koe ki lōmiga ‵fou o Te Faleleoleo Maluga? Onoono aka, me e mafai o tali mai ne koe a fesili konei:

I te fesoasoani atu ki olotou tama‵liki i te feitu faka-te-agaga, kaia e ‵tau ei o iloilo aka ne mātua kolā e olo atu ki nisi fenua a te mataupu e uiga ki ‵gana?

Kāti ka tauloto a tama‵liki ki te ‵gana i te akoga mo te koga e ‵nofo latou i ei. E mafai o aoga ke iloa ne se tamaliki a ‵gana e uke atu. E ‵tau o mafau‵fau a mātua ki te ‵toe koga ‵lei e malamalama faka‵lei ei a talavou i te munatonu kae gasolo atu ki mua i te feitu faka-te-agaga, faitalia me ko te kau atu ki se fakapotopotoga telā e fakaaoga i ei a te ‵gana o te fenua io me ko te fakapotopotoga telā e fakaaoga i ei a te ‵gana a tino kolā ne olo atu ki te fenua tenā. E fakamuamua ne mātua Kelisiano a te ‵lei o olotou tama‵liki i te feitu faka-te-agaga i lō mea kolā e ‵lei ki a latou.—w17.05, itu. 9-11.

I te taimi ne fesili atu ei a Iesu ki a Petelu: “E a, e sili atu tou alofa ki a au i lō mea konei?” se a te mea ne fakauiga ki ei a “mea konei”? (Ioa. 21:15)

E foliga mai me ne fakasino atu a Iesu ki ika kolā e tafola atu i ana tafa mo/io me ko te pisinisi faiika. Mai tua o te mate o Iesu, ne toe foki atu a Petelu ki tena galuega mua—faiika. E ‵tau o fuafua faka‵lei aka ne Kelisiano i olotou loto a te tulaga o se galuega ‵togi.—w17.05, itu. 22-23.

Kaia ne fakamolemole atu ei a Apelaamo ki tena avaga ke fai atu me i a ia ko tena tuagane? (Kene. 12:10-13)

A te ‵tonuga loa, a Sala ko te āfa tuagane o Apelaamo. Kafai e fai atu a Sala me i a ia ko tena avaga, e mafai eiloa o tamate a Apelaamo kae e se mafai o maua mai a te fanau telā ne folafola atu ne te Atua ki a ia.—wp17.3-E, itu. 14-15.

Ne a manatu ‵tonu e ‵tau o pokotia ei a te kilokiloga a se Kelisiano ki te tausiga o se fana mō puipui ei a ia mai i nisi tino?

Konei nisi manatu: E faka‵malu ne te kilokiloga a te Atua a te ola. Ne seki fakamalosi atu a Iesu ki ana soko ke ave ne pelu mō olotou puipui. (Luka 22:36, 38) E ‵tau o fai ‵tou pelu mo mea fakamalū laukele. E sili atu te tāua o te ola i lō mea faka-te-foitino. E āva tatou ki te loto lagona o nisi tino, kae e ma‵nako tatou ke fai mo fakaakoakoga ‵lei. (2 Koli. 4:2)—w17.07, itu. 31-32.

Kaia e ‵kese ei a tala a Mataio mo Luka e uiga ki te kamataga o te olaga o Iesu?

E faipati malosi a Mataio e uiga ki a Iosefa, e pelā mo tena kilokiloga ki te faitama o Malia mo fekau mai te Atua ke ‵tele ki Aikupito kae toe ‵foki fakamuli atu. A Luka ne faipati malosi e uiga ki a Malia; e pelā mo tena asiga ki a Elisapeta mo tena kilokiloga i te taimi ne nofo atu ei a te tamaliki ko Iesu i te faletapu.—w17.08, itu. 32.

Ne a nisi mea faiga‵ta ne tumau i ei te Tusi Tapu?

Ne mafuli‵fuli sāle a te uiga o pati mo tugapati kolā ne fakaaoga i te Tusi Tapu. Ne pokotia a te ‵gana masani i atiakaga i mea tau politiki. E isi ne ‵tekeatuga ki te ‵fuliga o te Tusi Tapu ki ‵gana masani.—w17.09, itu. 19-21.

Se a te ‵toe vaega sili o te alofa?

Kafai e fakavae ki akoakoga fakavae, a te a·gaʹpe ko te ‵toe vaega sili o te alofa. E aofia i ei a lagonaga atafai mo te alofa. Kae e fakaata mai i ei a akoakoga fakavae ma‵luga, e pelā mo faifaiga sē kaima‵nako mō te ‵lei o nisi tino.—w17.10, itu. 7.