1. Kaia e fai ei a te papatisoga mo fai se mea tāua? (Onoono ki te ata i te kamataga.)

E LAU i afe o akoga faka-te-Tusi Tapu e papatiso i tausaga takitasi. E tokouke mai i ei ko tama‵liki—talavou tai fo‵liki mo tama‵liki ko tai ma‵tua. Kāti ne puti aka loa latou i te munatonu. E mata, a koe se tokotasi i a latou? Kafai e penā loa, e ‵tau o fakamālō atu ki a koe. A te papatisoga se mea e ‵tau o fai ne Kelisiano, kae e tāua ki te mauaga o te fakaolataga.—Mata. 28:19, 20; 1 Pe. 3:21.

2. Kaia e se ‵tau ei o mataku io me ‵kalo keatea koe mai te faiga o tau tukuatuga?

² E tiga eiloa e ‵tala mai ne te papatisoga a te mataloa ki fakamanuiaga e uke, e aofia foki i ei a tiute. E pefea la? I te aso o tou papatisoga, ne tali atu koe ao ki te fesili, “E auala i te taulaga togiola a Iesu Keliso, ko oti koe ne salamō ki au agasala katoa kae tuku katoatoa atu a koe o fai te loto o Ieova?” E fakamailoga ne tau papatisoga a tau tukuatuga. Se tautoga ‵malu ne fai ne koe ki a Ieova ke alofa ki a ia kae fakamuamua tena loto i lō so se isi mea aka. A te mea tenā se feagaiga tāua ‵ki eiloa. E mata, e ‵tau o salamō koe i ei? Ikai, e se ‵tau eiloa. A te tuku atu o koe ki lima o Ieova e se mafai  lele eiloa o ‵se. Mafaufau ki te suā feitu! A te tino telā e faka‵mao mai i a Ieova e nofo mai lalo i te pulega a Satani. E se fia saga lele mai eiloa a te Tiapolo ki tou fakaolataga. A te ‵tonuga loa, e fiafia atu a ia māfai e se maua ne koe te ola se-gata-mai mai te kau atu ki a ia i te ‵teke atu ki te pulega sili a Ieova.

3. Ne a fakamanuiaga e maua mai te tukuatuga ki a Ieova?

³ E ‵kese mai te ‵lago atu ki a Satani, mafaufau ki fakamanuiaga ko maua ne koe e pelā me se Kelisiano tukugina atu kae papatiso. Nei la, ko oti ne tuku atu tou ola ki a Ieova, e mafai o fai atu koe mo te loto talitonu telā e sili atu i lō aso mua: “A Ieova e kau i toku feitu; ka se mataku eiloa au. Ne a mea e mafai ne tino o fai ki a au?” (Sala. 118:6) E seai aka foki se isi tauliaga e sili atu i te ‵lei i te olaga nei i tafa o te kau atu ki te feitu o te Atua kae maua tena taliaga.

4, 5. (a) Se a te auala e fai ei a te tukuatuga mo fai se tiute totino? (e) Ne a tulaga faiga‵ta e se ‵fou ki talavou?

⁴ E pelā me se Kelisiano papatiso, a tou fesokotakiga mo Ieova e sē se ‘palani faka-te-kāiga,’ e pelā mo feagaiga e fai ne nisi tino ki olotou selefoni. E ‵kese mai i ei, ko maua nei ne koe te tiute mō tou fakaolataga eiloa, ke oko foki loa māfai koi ‵nofo fakatasi koe mo ou mātua. Kaia e tāua ei ke masaua te mea tenā? Me e se mafai faeloa o iloa ne koe a tulaga faiga‵ta ka fe‵paki mo koe i aso mai mua. E pelā mo koe māfai ko papatiso kae koi tai foliki, kāti ka fe‵paki koe mo lagonaga ‵fou mo fakamalosiga māfai ko oko atu io me ko seke koe mo te tulaga tai talavou. Ne fakamatala mai ne se tamaliki fafine tai talavou penei: “E se masani o se fiafia se tamaliki ke fai a ia mo fai se Molimau a Ieova ona ko te mea e se maua ne ia se tamā potu keke i se aso fanau i te akoga. Kae i nai tausaga mai tua ifo i te taimi ko gasolo o ma‵losi a manakoga fakatauavaga, e ‵tau mo ia o talitonu katoatoa me i te fakalogo ki tulafono a Ieova ko te ‵toe filifiliga ‵lei eiloa.”

⁵ E tonu, a te fakafesagai atu ki tulaga faiga‵ta e sē se mea fou ki talavou. Ke oko ki a latou kolā ne papatiso e pelā me ne tino ma‵tua e fe‵paki mo tofotofoga seki fakamoemoegina o te fakatuanaki. E mafai o aofia i vaegā tofotofoga penā a te olaga fakatauavaga, masaki, io me ko galuega ‵togi. A te ‵tonuga loa, ka fe‵paki a tino katoa, faitalia tena matua, mo tulaga kolā e manakogina ei te fakamaoni ki a Ieova.—Iako. 1:12-14.

6. (a) E ‵tau o katoatoa pefea tau tukuatuga ki a Ieova? (e) Ne a mea e mafai o tauloto ne koe mai te Filipi 4:11-13?

⁶ Ke fesoasoani atu ke tumau koe i te fakamaoni i so se fakanofonofoga, ke mo a ma puli me i tau tautoga ki a Ieova e ‵tau o katoatoa. Ko tena uiga, ne fai atu koe ki te Pule Sili o te iunivesi me ka tumau koe i te tavini atu ki a ia faitalia me e fakagata ne ou taugasoa mo ou mātua te lotou taviniga. (Sala. 27:10) I tulaga katoa penā, e mafai o ‵sala atu koe ke maua te malosi—fakatasi mo te fesoasoani o Ieova—ke ola koe e ‵tusa mo tau tukuatuga.—Faitau te Filipi 4:11-13.

7. Se a te uiga ke galue mō tou fakaolataga “mo te ma‵taku mo te pole‵pole”?

⁷ E manako a Ieova ke fai koe mo ana taugasoa. Kae ko te fakatumauga o te fesokotakiga tenā mo te galue malosi mō tou fakaolataga ka manakogina i ei a taumafaiga e uke. A te ‵tonuga loa, e fai mai te Filipi 2:12: “Ke tumau i te ga‵lue mō te otou fakaolataga mo te ma‵taku mo te pole‵pole.” E fakaasi mai i pati konā me e ‵tau o mafaufau koe ki te auala ka fakatumau aka ei tou fesokotakiga mo Ieova kae tumau i te fakamaoni ki a ia faitalia so se mea faigata. E se mafai o tō silia tou loto talitonu. Ke oko foki loa ki nisi tino kolā ko leva ne fai mo tavini a te Atua ko oti ne ‵to atu keatea. Tela la, ne a mea e mafai o fai ke tumau i te galue mō tou fakaolataga?

8. Ne a mea e aofia i te faiga o sukesukega totino, kae kaia e tāua ei?

⁸ E aofia i te fai taugasoa mo Ieova a auala e lua o fesokotakiga—fakalogologo mo te faipati. A te faiga o sukesukega totino ki te Tusi Tapu ko te auala muamua e fakalogo‵logo ei tatou ki a Ieova. E aofia i te mea tenā ko te momea aka o te iloaga mai te faitau mo te mafaufau ‵loto ki te Muna a te Atua mo tusi faka-te-Tusi Tapu. I te taimi e fai ei ne koe te mea tenā, masaua me i te sukesukega tenā ki te Tusi Tapu, e sē se faiga fua o mea a‵koga. E se ‵tau fua o fai pelā me se taulotoga o mea ke ‵mau i te mafaufau ke pāsi ei koe i se sukega i te akoga. A te faiga o sukesukega aoga e fai pelā me se malaga telā e maua kae iloa ake ei ne koe a feitu ‵fou o te uiga o Ieova. Ka fesoasoani atu te mea tenei ke fakapilipili atu koe ki te Atua, kae ka fakapilipili mai a ia ki a koe.—Iako. 4:8.

9. Ne a nisi mea faigaluega ne fesoasoani atu ki a koe i au sukesukega totino?

⁹ Ko oti eiloa ne fakatoka ne te fakapotopotoga a Ieova a nai mea faigaluega ke fesoasoani atu i te faiga ke magoi au polokalame fai sukesukega. E pelā mo te “Bible Study Activities” telā e maua i vaega o “Teenagers” i te jw.org e mafai o fesoasoani atu ke tauloto ki akoakoga tāua mai i tala i te Tusi Tapu. I luga foki i te jw.org, a te tusi fai sukesukega ko te “Ne a Mea e Akoako ‵Tonu Mai i te Tusi Tapu?” e mafai o fesoasoani atu ki te atiakaga o tou loto talitonu ki ou talitonuga. E mafai o fesoasoani atu a tusi fai sukesukega konā ke iloa ne koe o fakamatala atu ou talitonuga ki nisi tino. E mafai o maua a nisi manatu mō te faiga o sukesukega i te mataupu ko te “Young People Ask . . . How Can I Make Bible Reading Enjoyable?” i te lōmiga o te Awake! i a Apelila 2009. A te faiga o sukesukega mo te mafaufau ‵loto e tāua ‵ki ki tou fakaolataga.—Faitau te Salamo 119:105.

10. Kaia e tāua ei a te ‵talo ki se Kelisiano papatiso?

¹⁰ E tiga eiloa e fai a sukesukega totino mo fai se auala e tasi e fakalogo‵logo ei tatou ki a Ieova, a te ‵talo se auala ke fai‵pati atu ei tatou ki a ia. E se ‵tau o kilo atu se Kelisiano ki ‵talo e pelā me se faifaiga sē aoga; e se ‵tau foki o fai mo fai se ‘tiketi manuia’ ke momea aka te uke o avanoaga ke manuia i nisi taumafaiga. I lō te fai penā, a te ‵talo se fesokotakiga tonu eiloa mo te ‵tou Mafuaga. E manako a Ieova ke fakalogologo ki a koe. (Faitau te Filipi 4:6.) Kafai e oko atu ki a koe so se vaegā lagonaga manavase, e fai  mai a fakatakitakiga poto i te Tusi Tapu ke “‵pei atu tau amoga ki a Ieova.” (Sala. 55:22) E mata, e talitonu eiloa koe ki te mea tenā? E lau i te fia miliona o taina mo tuagane kolā e mafai o fakatalitonu atu ne latou me ne fesoasoani atu eiloa te mea tenā ki a latou. E mafai foki o fesoasoani atu ki a koe!

11. Kaia e ‵tau ei o fakafetai atu faeloa koe ki a Ieova?

¹¹ A te ‵talo se avanoaga ke fai ne koe a mea e uke atu i lō te akai atu fua ki a Ieova mō se fesoasoani. E fai mai te Tusi Tapu: “Ke fakaasi atu te otou loto fakafetai.” (Ko. 3:15) I nisi taimi, e lagona te fi‵ta i ‵tou fakalavelave telā e mafai ei o puli i a tatou a fakamanuiaga e uke o tatou. Kaia e se fakaiku aka ei ne koe i aso takitasi ke mafaufau ki mea e tolu kolā ne loto fakafetai koe ki ei? Ka oti, ko fakafetai atu ei koe ki a Ieova i se ‵talo mō fakamanuiaga konā. E isi se talavou tai foliki e igoa ki a Abigail, telā ne papatiso kae ko 12 ana tausaga, ne fai mai: “Ne mafaufau au me e ‵tau eiloa o fakafetai atu tatou ki a Ieova i lō so se isi tino aka i te iunivesi. E ‵tau o fakafetai atu ki a ia i so se avanoaga mō meaalofa ne tuku mai ne ia ki a tatou. Ne lagona ne au i se taimi e tasi se fakamasauaga gali ‵ki: Kafai e ala aka tatou taeao mo mea fua kolā ne fakafetai atu tatou ki a Ieova i te aso nei, ne a mea ka maua ne tatou i ei?” *

12, 13. Kaia e tāua ei ke mafaufau ki te auala ne ‵tofo aka ei koe ki te aga‵lei o Ieova?

¹² A te tupu mua ko Tavita, telā ne sao mai i tofotofoga fakafanoa‵noa e uke, ne fakaasi mai ne ia a pati konei i se pese: “‵Tofo aka kae ka lavea atu a te ‵lei o Ieova; e fiafia a te tagata telā e faka‵lafi ki a ia.” (Sala. 34:8) E fakaasi mai i te fuaiupu tenā a te tāua o mea ‵tonu ne ‵tupu ki a tatou. Kafai e faitau koe ki te Tusi Tapu mo ‵tou tusi kae kau atu ki fakatasiga Kelisiano, e lagona ne koe a tala fakamalosi loto ki te auala ne fesoasoani atu ei a te Atua ki nisi tino ke tumau i te fakamaoni. Kae i te taimi e gasolo aka ei koe i te feitu faka-te-agaga, e ‵tau o lavea ne koe a te fesoasoani o Ieova i tou olaga totino. Ne ‵tofo aka pefea koe ki te aga‵lei o Ieova?

¹³ E tasi te auala ne ‵tofo ei a Kelisiano katoa ki te aga‵lei o Ieova. Ko te ‵kamiga ke fakapilipili atu ki te Atua mo tena Tama. Ne fai mai a Iesu: “E seai se tino e mafai o vau ki a au seiloga ke aumai a ia ne te Tamana, telā ne uga mai ne ia au.” (Ioa. 6:44) E a, e mafaufau koe me e fakasino atu a pati konā ki a koe? E mafai o fai mai se talavou, ‘Ko Ieova eiloa ne aumai ne ia oku mātua, kae ne tautali atu fua au i a lāua.’ Kae i te taimi ne tuku atu ei koe ki a Ieova kae papatiso, ne fakaasi mai ne koe me ko maua nei ne koe se fesokotakiga taulia mo ia. Ko iloa tonu nei ne ia a koe. E fakatalitonu mai te Tusi Tapu ki a tatou: “Kafai e alofa se tino ki te Atua, e iloa ne te Atua a te tino tenā.” (1 Koli. 8:3) Taumafai faeloa ke fakatāua kae ke loto fakafetai koe ki tou tulaga i te fakapotopotoga a Ieova.

14, 15. E fesoasoani atu pefea te galuega talai ke fakamalosi aka tou fakatuanaki?

¹⁴ A te suā auala e mafai o ‵tofo aka koe ki te aga‵lei o Ieova ko te lagona ne koe o tena fesoasoani i te taimi e fakaasi atu ne koe ki nisi tino a mea e talitonu koe ki ei. E mafai o fai ne koe te mea tenā i te galuega talai penā foki i te akoga. E faigata ki nisi tino ke talai atu ki olotou taugasoa i te akoga. E mafai o malamalama koe i te pogai. E se iloa lele ne koe me ka pefea olotou lagonaga ki ei. Kae e mafai o sili atu te faigata māfai ko faipati atu ki se potukau o tino e tokouke i lō se tino e tokotasi i tau vasega. Ne a mea e mafai o fesoasoani atu?

¹⁵ Muamua la, mafaufau ki te pogai ne talitonu ei koe ki ou talitonuga. E mata, e maua i tau ‵gana a tusi fai sukesukega i te jw.org? Kafai e se iloa tonu ne koe, ke fakaaoga a taimi ke ‵sala atu ki ei. Ne fakatoka a  tusi konā ke fesoasoani atu ki a koe i te ‵toe mafaufau ki mea e talitonu koe ki ei, te pogai e talitonu ei koe ki ei, mo te auala e mafai ei o fakamatala atu ne koe ou talitonuga ki nisi tino. Kafai ko malosi eiloa tou loto talitonu kae ko toka faka‵lei koe, ka fakamalosi aka eiloa koe ke tuku atu se molimau mō te igoa o Ieova.—Iele. 20:8, 9.

16. Se a te mea e mafai o fesoasoani atu ke manumalo koe māfai e faigata ki a koe ke faipati atu e uiga ki ou talitonuga?

¹⁶ Kae faitalia foki loa au fakatokaga, e mafai eiloa o faigata ki a koe ke faipati atu e uiga ki ou talitonuga. Ne taku ‵tonu mai ne se tuagane telā ko 18 ana tausaga, kae ne papatiso i te taimi ko 13 ei ana tausaga, “E iloa ne au a mea e talitonu au ki ei, kae i nisi taimi e faigata ke fakamatala atu ne au.” Ne fakafesagai atu pefea tou fafine ki te fakalavelave tenei? “Ne taumafai fua au o sau‵tala atu fua pelā mo te masani,” ko ana muna. “E se ‵ma a tamaliki i taku vasega o fai‵pati ki mea e fai ne latou. E ‵tau foki o fai au penā. Tela la, ne taku atu fua ne au se mea telā ne fai ne au, e pelā mo te, ‘Ne akoako atu ne au te Tusi Tapu i te aso e tasi, kae . . . ’ Ko faka‵soko atu ei te pogai o taku tala. E tiga eiloa e se aofia tonu te Tusi Tapu i te kamataga, e masani o fia iloa ne tino a mea e fai ne au i te taimi e akoako atu ei te Tusi Tapu. I nisi taimi, e fesili mai latou e uiga ki ei. Ko te uke o taimi e fakaaoga ne au te fakamatalaga tenei, ko te momea aka foki te faigofie. Kae kafai ko oti aka, e lagona sāle ne au te fiafia lasi!”

17. E fesoasoani atu pefea tau kilokiloga ki tou fakatuanaki ke faipati atu koe ki nisi tino?

¹⁷ Kafai e fakaasi atu ne koe te āva ki nisi tino kae saga tonu atu ki a latou, e mafai eiloa o ‵saga mai latou mo te āva. “Ne mataku faeloa au me kafai e taumafai au o aofia te Tusi Tapu i se sau‵talaga, e mafai o ‵kilo mai a tino ki a au pelā me se tino loto finafinau valea.” Tenā loa te fakamatalaga a Olivia, telā ko 17 kae kolā ne papatiso i te taimi koi tai foliki ei a ia. Kae oti aka ne kamata o ‵kese tena mafaufau. I lō te mafaufau malosi ki mea e mataku a ia ki ei, ne fai mai a Olivia: “E se iloa ne talavou e tokouke a mea e uiga ki Molimau a Ieova. Ko matou fua Molimau e iloa ne latou. Tela la, e mafai o iloa aka a te lotou kilokiloga e auala i motou faifaiga. Kae e a māfai e ‵ma io me manava‵se io me faigata ke faipati atu e uiga ki te ‵tou fakatuanaki, io me punou ifo i te taimi e fai‵pati atu ei? Ko mafai ei o ‵kilo mai latou e pelā me e se fakamata‵mata matou e uiga ki te motou iloga. E mafai foki o se fia‵fia latou ona ko te sē lava o te ‵tou loto tali‵tonu. Kae kafai e fai‵pati malielie atu tatou mo te loto talitonu e uiga ki mea e tali‵tonu tatou ki ei, kae fai mo fai se vaega o ‵tou sau‵talaga masani, ka sili atu te āva mai o latou ki a tatou.”

18. Ne a mea e aofia i te galue mō tou fakaolataga?

¹⁸ E pelā mo mea ko oti ne lavea ne tatou, a te galue mō tou fakaolataga se tiute tāua ‵ki. A nisi mea e aofia i ei ko te faitau ki te Muna a te Atua kae mafaufau ‵loto ki ei, ‵talo ki a Ieova, kae mafaufau ki auala kolā ne fakamanuia ei koe ne Ieova. Kafai e fai ne koe a mea konā, ka fakamalosi aka i ei tou loto talitonu ki tou tauliaga ke fai mo taugasoa o Ieova. Ka fakamalosi aka ei koe ne te mea tenā ke faipati atu e uiga ki ou talitonuga.—Faitau te Salamo 73:28.

19. Kaia e aoga ei a taumafaiga e fai ne koe mō tou fakaolataga?

¹⁹ Ne fai mai a Iesu: “So se tino e fia tautali mai i a au, ke se toe mafaufau ki a ia eiloa, kae ke amo tena pou fakasaua kae tumau i te tautali mai i a au.” (Mata. 16:24) E manino ‵lei, me i te fai mo fai se soko—e aofia i ei a te tukuatuga mo te papatisoga—se tiute o koe e pelā me se Kelisiano. Kae e ‵tala mai i ei a te mataloa ki fakamanuiaga e uke i te taimi nei kae ke oko foki loa ki te ola se-gata-mai i te lalolagi fou a te Atua. E maua ne koe a pogai katoa, ke tumau i te galue mō tou fakaolataga!