Kaia ko Lauiloa Malosi ei a Lagonaga Takalialia?
Kaia ko lauiloa malosi ei a lagonaga takalialia i te lalolagi? Ke iloa te pogai, e ‵tau o malamalama tatou me se a te lagonaga takalialia, pogai e kamata ei o takalia‵lia a tino, mo te auala e salalau atu ei.
Se a te Lagonaga Takalialia?
A te lagonaga takalialia ko te lasi o te sē fiafia mo te kaitaua ki se tino io me se potukau o tino. Se lagonaga kaitaua telā e se mafai o galo.
POGAI E KAMATA EI O TAKALIA‵LIA A TINO
E uke a pogai e kamata ei o fakaasi atu ne tino a te takalialia. E se takalia‵lia ki nisi tino ona ko mea e fai ne latou kae ona ko mea e uiga ki a latou. A tino kolā e takalialiagina e masani o ‵kilo atu ki ei e pelā me ne tino ma‵sei, e taumafai o fakalogo‵mae a tino, io me e se mafai o ‵fuli ki te ‵lei. E mafai o ‵kilo atu ki ei e pelā me ne tino fatauva, e fakama‵taku, io me faka‵tupu fakalavelave. A tino kolā e maua ne latou a lagonaga takalialia ki nisi tino kāti ne fakasauagina, ne logo‵mae i faifaiga sē ‵tonu, io me ko nisi faifaiga kolā ne fakamāfua aka i ei a lagonaga kaitaua.
AUALA E SALALAU ATU EI
E mafai o takalialia se tino ki nisi tino e aunoa mo te fesokotaki ‵tonu atu ki a latou. E pelā mo te mea tenei, e mafai o talia ne se tino a manatu fakailoga tino o tino kolā e āva kae pili a ia ki ei. Tenā ko faigofie ei o fakasalalau atu a lagonaga takalialia kae talia ne tino katoa i se potukau a te kilokiloga tenā.
Kafai e malamalama tatou i te auala e salalau atu a lagonaga takalialia, ko maina ei tatou i te pogai e takalia‵lia a tino e tokouke ki nisi tino. Kae ke mafai o manumalo i lagonaga takalialia i te ‵tou lalolagi nei, e ‵tau o iloa ne tatou a te koga tonu ne māfua mai ei a lagonaga takalialia. E fakaasi faka‵lei mai tena māfuaga tonu i te Tusi Tapu.
E FAKAASI MAI I TE TUSI TAPU TE MĀFUAGA TONU O LAGONAGA TAKALIALIA
A LAGONAGA TAKALIALIA NE SEKI MĀFUA MAI I TINO. Ne kamata eiloa i te taimi ne ‵teke atu ei ki te Atua se agelu i te lagi, telā ne fakaigoa fakamuli ki a Satani te Tiapolo. A te Tiapolo “se tino tatino i te kamataga” o ‵teke atu a ia. E pelā me se “tino loi kae ko te tamana foki o te loi,” ne tumau a ia i te fakamalosi aka o lagonaga takalialia mo te kaitaua. (Ioane 8:44; 1 Ioane 3:11, 12) E fakamatala mai i te Tusi Tapu me i a ia se tino masei, kaitaua kae sauā.—Iopu 2:7; Fakaasiga 12:9, 12, 17.
E FAIGOFIE O FAKAASI ATU TE TAKALIALIA NE TINO SĒ ‵LEI KATOATOA. Ne tautali atu te tagata muamua ko Atamu i te auala agasala o Satani. Ona ko te mea tenā, ne maua ei ne tino katoa te agasala mo te tulaga sē ‵lei katoatoa. (Loma 5:12) A te tama tagata matua a Atamu, ko Kaino, ne tamate ne ia tena taina tonu ko Apelu ona ko ana lagonaga takalialia. (1 Ioane 3:12) E tonu, e fakaasi atu eiloa ne tino e tokouke a te alofa mo te atafai. Kae ona ko te tulaga agasala, ko faigofie ei ki tino e tokouke ke fakaasi atu te uiga kaimanako, kaisano, mo te fakamatamata—ko uiga kolā e fakamāfua aka i ei te takalialia.—2 Timoteo 3:1-5.
TE FAKAILOGA TINO E FAKAMALOSI AKA I EI A LAGONAGA TAKALIALIA. A te lalolagi e ola tatou i ei e fakamalosi ne ia a lagonaga takalialia e auala i faifaiga mo uiga sē a‵lofa kae fakalogo‵mae. Ko lauiloa a uiga pelā mo te fakailoga tino, fakakese‵kese tino, pati sē ‵tau, amioga takafia‵toa, mo te fakamasei kope o tino ona “ko te lalolagi kātoa ko nofo mai lalo i te pule a te tino masei,” ko Satani te Tiapolo.—1 Ioane 5:19.
Kae e se fakaasi mai fua i te Tusi Tapu a te māfuaga tonu o lagonaga takalialia. E fakaasi mai foki i ei te auala ke faka‵lei aka ei.
