“I te taimi ne ‵tipi ei toku kenisa, ne mataku ‵ki eiloa au,” ko pati a Pamela. “Kae i te taimi ne ‵talo ei au ki a Ieova te Atua, ne maua ne au se lagonaga tokagamalie kae ne mafai o kufaki i toku masaki e aunoa mo te mataku. Koi logo‵mae eiloa au i toku masaki, kae fesoasoani mai te ‵talo ke fakatumau ne au se kilokiloga ‵lei. Kafai e ‵sili mai a tino me e a au, e fai atu au ‘Au e se malosi, kae koi fiafia eiloa au!’”

E tonu, e se ‵tau o faka‵tali tatou ki te taimi ko ma‵saki, ko ‵talo atu ei. A tatou katoa e fe‵paki mo mea faiga‵ta i se auala lasi io me foliki, kae mafau‵fau faeloa tatou me e manakogina ne tatou se fesoasoani ke kufaki i ei. E mata, e mafai o fesoasoani mai a ‵talo?

E fai mai te Tusi Tapu: “‵Pei atu tau amoga ki a Ieova, kae ka tausi ne ia koe. Ka se talia eiloa ne ia se tino amiotonu ke siga.” (Salamo 55:22) Ko oko eiloa i te fakamafanafana loto a te manatu tenā! Tela la, e mafai pefea o fesoasoani atu te ‵talo ki a koe? Kafai e ‵talo atu koe ki te Atua i te auala tonu, ka tuku mai ne ia te fesoasoani telā e manakogina ke mafai ne koe o fakafesagai atu ki ou fakalavelave.—Ke onoono ki te pokisi “ Auala e Mafai o Fesoasoani Atu a ‵Talo ki a Koe.”