TINO

Pati i te Tusi Tapu: A te Atua “ne seki faite fua ne ia [te lalolagi] ke se aoga, kae ne faite ke ‵nofo i ei a tino.”—ISAIA 45:18.

PANETA KO TE LALOLAGI

Pati i te Tusi Tapu: “E fanatu se kautama, kae vau te suā kautama, kae ko te lalolagi e tumau eiloa ki te se-gata-mai.”—FAILAUGA 1:4.

TENA UIGA: E ‵tusa mo te Tusi Tapu, ka se fakaseai atu te lalolagi, kae ka isi faeloa ne tino e ‵nofo i ei. Tela la, se a te mea e fakauiga ki ei me ka fakaseai atu te lalolagi?

MAFAUFAU KI TE MEA TENEI: E fakatusa ne te Tusi Tapu a te fakaseaiga o te lalolagi tenei ki mea ne ‵tupu i aso o Noa. I te taimi tenā ne “‵fonu eiloa a te lalolagi i amioga fakasaua.” (Kenese 6:13) Kae ne amiotonu eiloa a Noa. Tenā, ne faka‵sao ei ne te Atua a Noa mo tena kāiga, kae fakaseai ne ia a tino ma‵sei i te lolo. Ne fai mai te Tusi Tapu e uiga ki mea ne ‵tupu i te taimi tenā: “Ne fakamaseigina a te lalolagi i te taimi tenā i te lofiaga i te vai.” (2 Petelu 3:6) Tenā te lalolagi ne fakaseai atu. Kae ne a mea ne fakaseai atu? E se ko te lalolagi, kae ko tino ma‵sei i te lalolagi. Tela la, kafai e faipati a te Tusi Tapu e uiga ki te fakaseaiga o te lalolagi, e se fakasino atu ki te fakaseaiga o te paneta. I lō te fai penā, e fakasino atu ki te fakaseaiga o tino ma‵sei i te lalolagi, mo te lotou vaegā olaga.

FAKALAVELAVE MO AMIOGA MA‵SEI

Pati i te Tusi Tapu: “E se leva nei, kae ka ‵galo atu a tino amio ma‵sei; ka salasala koe ki a latou i te koga ne ‵nofo i ei, kae ka ‵galo latou i ei. Kae ko tino agamalu ka fai mō latou te lalolagi, kae ka maua ne latou te fiafiaga sili ona ko te lasi o te filemu.”—SALAMO 37:10, 11.

TENA UIGA: A te Lolo i aso o Noa, ne seki fakaseai kae fakagata katoatoa atu i ei a mea ma‵sei. Mai tua o te Lolo, ne toe fakamasei ne tino amio ma‵sei a te olaga. Ko pili fua o fakaseai atu ne te Atua a amioga ma‵sei. E pelā mo pati a te faisalamo: “Ka ‵galo atu a tino amio ma‵sei.” Ka fakaseai atu ne te Atua a amioga ma‵sei e auala i tena Malo—se pulega mai i te lagi telā e pule atu ki tino amio‵tonu i te lalolagi.

MAFAUFAU KI TE MEA TENEI: E mata, ka talia ne latou kolā e pule nei ki te lalolagi a te pulega a te Malo o te Atua? E fai mai te Tusi Tapu me ka se talia ne latou. Ka ‵teke atu latou mo te va‵lea. (Salamo 2:2) Ne a mea ka iku mai i ei? Ka sui ne te Malo o te Atua a malo katoa o tāgata kae “ka tumau eiloa a te malo tenā ki te se-gata-mai.” (Tanielu 2:44) Kae kaia ko ‵tau ei o fakaseai atu a pulega a tāgata?

Pati i te Tusi Tapu: “E seai se pule a te tagata ke fakatonutonu ne ia tena auala.”—IELEMIA 10:23.

TENA UIGA: Ne seki faite a tino ke pule atu ki a latou eiloa. E se iloa ne latou o pule atu ki nisi tino kae faka‵lei aka olotou fakalavelave.

MAFAUFAU KI TE MEA TENEI: E fai mai te Britannica Academic me e foliga mai me e se mafai ne malo takitasi o “fakaseai atu a fili o te iunivesi ko te mativa, fiakai, masaki, fakalavelave o te natula, mo taua io me ko nisi amioga fakasaua.” Ne toe fai mai: “A nisi tino . . . e tali‵tonu me e ‵tau o isi se malo mō te lalolagi kātoa telā e mafai o faka‵lei ne ia a mea ma‵sei konā.” Kae kafai foki loa e ‵kau fakatasi a pulega katoa a tāgata, koi pule atu eiloa a tāgata sē ‵lei katoatoa, kolā e se mafai o faka‵lei ne latou a fakalavelave ne taku mai i luga. Ko te Malo fua o te Atua e mafai o faka‵lei kae fakagata katoatoa atu a fakalavelave i te lalolagi kātoa.

Tela la, e ‵tusa mo te Tusi Tapu a te fakaseaiga o te lalolagi—ko te olaga masei tenei—e sē se mea e ‵tau o ma‵taku ki ei a tino ‵lei. Kae se mea e olioli malosi latou ki ei, me i te lalolagi masei tenei ko pili o sui ne te lalolagi fou kae gali a te Atua!

Ka ‵tupu mafea a mea katoa konei? Ka fakamatala mai i te suā mataupu a te tali mai te Tusi Tapu.