“E pefea te leva, e Ieova, e ‵tau ei mo au o tagi atu mō se fesoasoani, kae e se lagona ne koe? E pefea te leva e ‵tau ei mo au o fakamolemole atu mō se fesoasoani ona ko fakasauaga, kae e se saga mai koe?” (Sapakuka 1:2, 3) Konei a pati a Sapakuka, se tagata ‵lei telā ne maua ne ia te taliaga a te Atua. E mata, ne fakaasi mai ne ia te sē lava o tena fakatuanaki mai tena fakamolemole tenei? E se penā eiloa! Ne fakatalitonu atu ne te Atua ki a Sapakuka me ka fakaseai ne ia a logo‵maega i Tena taimi tonu.—Sapakuka 2:2, 3.

Kafai koe io me se tino e pili koe ki ei e logo‵mae, e faigofie ke fakaiku aka me i te Atua e tuai o gasuesue o fai se mea i te taimi nei. Kae e fakatalitonu mai te Tusi Tapu ki a tatou, penei: “A Ieova e se tuai e uiga ki ana folafolaga, e pelā mo te manatu o nisi tino me e tuai, kae ko ia e kufaki ona ko koutou me e se manako a ia ke fakaseai se tino e tokotasi kae e manako ke sala‵mo a tino katoa.”—2 Petelu 3:9.

Ko pili ‵ki eiloa! Ne fakaasi mai ne Iesu me ka isi se kautama mautinoa ka molimau ne latou a tulaga kolā e fakamailoga ki ei a aso fakaoti o te “olaga tenei.” (Mataio 24:3-42) A te fakataunuga o te valoaga a Iesu i ‵tou aso nei se fakaasiga me ko pili fua o saga mai a Ieova ki fakalavelave o tino. *

Kae ka fakaseai atu pefea ne te Atua a logo‵maega katoa? I te taimi ne nofo ei a Iesu i te lalolagi, ne fakaasi mai ne ia te malosi o te Atua ke fakafeoloolo aka a logo‵maega o tino. Mafaufau ki nai fakaakoakoga konei.

Fakalavelave ‵Tupu o te Natula: I te taimi ne ma‵laga atu ei a Iesu mo ana apositolo i te Tai o Kalilaia, ne fai ne se kaumatagi lasi ke tai pulu te lotou pōti. Kae ne fakaasi atu ne Iesu me e mafai ne ia mo tena Tamana o pule faka‵lei atu ki mea o te natula. (Kolose 1:15, 16) Ne fai atu fua a Iesu, penei: “Malū! Filemu!” Se a te ikuga? “Ne mate te matagi kae malū palapala te tai.”—Maleko 4:35-39.

Masaki: Ne lauiloa a Iesu i tena poto ke faka‵lei aka a tino ‵kivi mo tino vae ma‵sei, e penā foki a tino kolā ne logo‵mae mai te masaki ko te pole, io me ko so se vaegā famai. “Ne faka‵lei ne ia a tino katoa kolā ne tigaina.”—Mataio 4:23, 24; 8:16; 11:2-5.

Oge Mea‵kai: Ne fakaaoga ne Iesu a te malosi telā ne tuku atu ne tena Tamana ke toe fakaopoopo atu ne ia a te aofaki o mea‵kai. Ne tusi i te Tusi Tapu me ne fagai fakalua ne ia se fia afe o tino i te taimi ne fai ei tena galuega talai.—Mataio 14:14-21; 15:32-38.

Mate: A te ‵mana o Ieova ke toe faka‵tu aka a tino ‵mate ne lavea faka‵lei atu mai toe‵tuga e tolu ne fai ne Iesu kolā ne fakamau i te Tusi Tapu. E tasi mai i ei ko te ‵toe fakatuakaga ne ia ki te ola a te tino telā ne mate mō aso e fa.—Maleko 5:35-42; Luka 7:11-16; Ioane 11:3-44.