“I te aso telā e kai ei koe ki [te lakau],” ko muna a te Atua ki a Atamu, “a koe ka mate eiloa.” (Kenese 2:17) E seai se aoga o te fakatonuga tenā moi ne fai Atamu e gasolo aka o matua kae mate atu. Ne iloa ne Atamu me moi ne seki kai a ia ki te lakau, penei e se mate a ia.

Ne seki ‵tau fua o ‵kai a Atamu mo eva ki te lakau ke tumau i te ola—me ne ‵fonu te fatoaga i lakau kaina. (Kenese 2:9) Moi ne sē ‵kai ki te lakau, penei ko fakaasi mai ne lāua a te lā faka‵logo ki te Tino telā ne tuku atu ne ia te ola ki a lāua. Ka fakaasi mai foki i ei me e malamalama lāua i te aiā o te Atua ke takitaki lā auala.

Ke malamalama i te pogai ne ‵mate ei a Atamu mo Eva, e ‵tau o iloilo aka ne tatou se sau‵talaga telā ne pokotia i ei a tatou katoa. Ne fakaaoga ne Satani te Tiapolo se gata ke fai atu se loi matagā. E fai mai te Tusi Tapu: “Mai manu katoa o te vao ne faite ne Ieova te Atua, a te manu ko te gata ko ia loa ko fakaeteete. Kae ne fai atu ki te fafine: ‘E tonu eiloa i te Atua ne fai atu ke mo a ma ‵kai koulua ki so se lakau i te fatoaga?’”—Kenese 3:1.

Ne tali atu a Eva: “E mafai ne māua o ‵kai ki te fuaga o so se lakau i te fatoaga. Kae ne fai mai te Atua e uiga ki te fuaga o te lakau telā e tu i te kogaloto o te fatoaga: ‘E se ‵tau mo koulua o ‵kai ki ei, ikai, e se ‵tau mo koulua o pa‵tele ki ei; i a koulua ma ‵mate.’” Kae ne fai atu te gata ki te fafine: “A koulua ka se ‵mate eiloa. E iloa ne te Atua, me i te aso eiloa telā e ‵kai ei koulua ki ei, ka ‵pula oulua mata kae ka ‵pau koulua mo te Atua, ka iloa foki ei ne koulua te mea ‵lei mo te mea masei.” Tela la, ne fai atu a Satani me i a Ieova se tino loi telā e taofi ne ia se mea ‵lei mai ‵tou mātua muamua.—Kenese 3:2-5.

Ne talitonu a Eva ki mea ne lagona ne ia. Ne kilokilo atu ana mata ki te lakau. Ko oko eiloa i te gali, kae ne manako ki ei! Ne ‵kapa atu tena lima kae puke ne ia se fuagalakau, kae kamata o kai ki ei. Kae ne fai mai te Tusi Tapu: “Mai tua ifo i ei, ne avatu foki ne ia ne mu mea ki tena avaga i te taimi ne ‵nofo tasi ei lāua, kae ne kamata o kai a ia ki ei.”—Kenese 3:6.

Ko oko eiloa i te fakafanoanoa ki te Atua ke lavea atu ana tamaliki pele ko sē faka‵logo atu ki a ia mo te loto kātoa! Ne a mea ne fai ne ia? Ne fai atu a Ieova ki a Atamu: “Ka . . . toe foki ei koe ki te laukele, telā ne faite mai ei koe. Me i a koe se ‵pefu kae ka toe foki eiloa koe ki te ‵pefu.” (Kenese 3:17-19) Ona ko te mea tenei, “e ‵tusa mo te 930 tausaga o te olaga kātoa o Atamu, mate ei a ia.” (Kenese 5:5) A Atamu ne seki fano ki te lagi io me ola i se koga e ‵nofo i ei a agaga. Ne fatoa ola mai a ia i te taimi ne faite ei a ia ne Ieova mai te ‵pefu o te laukele. Tela la i te taimi ne mate ei a ia, ne ‵pau eiloa a ia mo te ‵pefu telā ne faite mai ei a ia. Ne galo atu ei tena ola. Mafaga o mea fakafanoanoa!

Ona ko te lā sē faka‵logo mo te iloa tonu, ne galo atu i a Atamu mo Eva a te tulaga ‵lei katoatoa mo te fakamoemoega  ke ola ki te se-gata-mai. Ne fakafesagai lāua mo se ‵fuliga i te feitu faka-te-foitino; ne kamata o maua ne lāua se tulaga sē ‵lei katoatoa kae agasala. Kae ne seki pokotia fua lāua i te lā sē faka‵logo. Ne togi atu ne lāua te lā tulaga agasala ki lā fanau. E fai mai te Loma 5:12: “E auala i te tagata fua e tokotasi [ko Atamu] ne oko mai ei te agasala ki te lalolagi, mo te mate e auala i te agasala tenā, i te auala tenā ne maua ei ne tino katoa te mate i te mea ko agasala a latou katoa.”

E fakamatala mai i te Tusi Tapu a te agasala mo te mate e pelā me se “mea ufi telā e ‵laga i luga i atufenua katoa.” (Isaia 25:7) A te mea ufi tenei telā e ‵laga i luga i tino e pelā me se ea poisini telā e se mafai o ‵sao mai i ei. E tonu, ko Atamu ne pogai mai i ei te “‵mate o tino katoa.” (1 Kolinito 15:22) Kae tenei la te fesili e mafai o sae aka, telā ne fakafesili ne te apositolo ko Paulo: “Ko oi ka fakasao ne ia au mai te foitino telā e takitaki ne ia au ki te mate tenei?” E mata, e mafai ne se tino o fai te mea tenei?—Loma 7:24.