Fakatakavale a te Fili ko te Mate—I te Auala Fea?
FAITALIA eiloa te sē faka‵logo o ‵tou mātua muamua ko Atamu mo Eva, kolā ne aumai ne lāua te agasala mo te mate ki tino katoa, kae ne seki ‵fuli loa te fuafuaga a te Atua mō te kaukāiga o tino. I te Muna tusia ko te Tusi Tapu, e fakailoa mai faeloa ne te Atua me i ana fuafuaga e se mafai o ‵fuli.
-
“A tino amio‵tonu ka fai mō latou te lalolagi, kae ka ‵nofo latou i ei ki te se-gata-mai.”—Salamo 37:29.
-
“Ka fakaseai ne ia te mate ki te se-gata-mai, kae ko te Aliki Sili ko Ieova ka ‵solo ne ia a loimata mai i mata katoa.” —Isaia 25:8.
-
“Te ‵toe fili telā e ‵tau o fakaseai atu ko te mate.”—1 Kolinito 15:26.
-
“Ka se toe ai se mate, ka se toe ai foki se fanoanoa, se tagi io me se ‵mae.”—Fakaasiga 21:4.
I te auala fea ka ‘fakaseai te mate’ io me “fakaseai atu” te fili ko te mate ne te Atua? E pelā mo te mea e fakamatala mai, e fakaasi manino mai i te Tusi Tapu me ‘i tino amio‵tonu . . . ka ‵nofo i ei ki te se-gata-mai.’ Kae e fai mai foki me “e seai se tagata amiotonu i te lalolagi e fai faeloa ne ia te mea ‵lei.” (Failauga 7:20) Ke fakatakavale te mate, e mata, ka fakaseaoga ne te Atua ana tulaga amio‵tonu? E se taitai eiloa! Ka se fai eiloa a ia penā, me i te “Atua . . . e se mafai o loi.” (Tito 1:2) Kae ne a mea ka fai ne te Atua ke fakataunu i ei a tena fuafuaga alofa i te faitega o tino?
A TE ATUA “KA FAKASEAI NE IA TE MATE KI TE SE-GATA-MAI.” —ISAIA 25:8
FAKATAKAVALE TE MATE E AUALA I TE TOGIOLA
Ne fai ne Ieova te Atua se fakatokaga alofa ke fakasaoloto ei a tino mai te mate—e auala i te togiola. A te togiola ko te ‵togi telā e ‵tau o ‵togi atu ke ‵kava ne ia a fakamaseiga io me e ‵tau o fetaui ‵lei mo te mea ne fakamasei. Ona ko te mea ko agasala a tino katoa kae fakasala ki te mate, e fai ‵tonu mai te Tusi Tapu: “E seai se tino i a latou e mafai o fakasao ne ia se taina io me tuku atu ki te Atua se togiola mō ia, (a te togiola o te lotou ola ko oko eiloa i te tāua tela la, e se mafai o oko atu latou ki ei).”—Salamo 49:7, 8.
Kafai ko mate se tino sē ‵lei katoatoa, e mafai fua o ‵togi ne ia te ‵togi o ana agasala; e se mafai a ia o saoloto, io me ‵togi ne ia a agasala a te suā tino. (Loma 6:7) E manakogina ne tatou se tino ‵lei katoatoa kae sē agasala ke tuku atu tena ola, e se mō ana agasala kae mō ‵tou agasala.—Epelu 10:1-4.
Tenā eiloa te fakatokaga ne fai ne te Atua. Ne uga mai ne ia tena Tama ko Iesu, mai te lagi ke fanau e pelā me se tino ‵lei katoatoa i te lalolagi nei. (1 Petelu 2:22) Ne fai mai a Iesu i a ia ne vau ke “tuku atu foki tena ola e pelā me se togiola mō tino e tokouke.” (Maleko 10:45) Ne mate a ia ke fakatakavale ei a te fili ko te mate ko te mea ke maua ne tatou a te ola.—Ioane 3:16.
KA FAKATAKAVALE MĀFEA A TE MATE?
Ke fakataunu a valoaga i te Tusi Tapu i aso nei, ko ola nei tatou i “taimi faiga‵ta,” se fakamaoniga me ko ‵nofo atu tatou i “aso fakaoti” o te olaga masei tenei. (2 Timoteo 3:1) Ka gata atu a aso fakaoti i “te aso o te fakamasinoga mo te fakaseaiga o tino sē amioatua.” (2 Petelu 3:3, 7) Kae ko tino kolā e a‵lofa ki te Atua ka ‵sao atu i te fakaseaiga kae fakamanuiagina ki te “ola se-gata-mai.”—Mataio 25:46.
Ne vau a Iesu ke “tuku atu foki tena ola e pelā me se togiola mō tino e tokouke.” —Maleko 10:45
E lau i miliona o nisi tino ka maua ne latou a te avanoaga ke ola ki te se-gata-mai māfai ko toe faka‵tu aka latou. Ne fai ne Iesu a te toetuga i te taimi ne asi atu a ia ki te fakai o Naina. Ne mate atu te tamaliki tagata eiloa e tokotasi a te fafine ko mate tena avaga, ona ko te “alofa malosi” o Iesu ki tou fafine, ne fakatu aka ei ne ia a tena tama tagata ki te ola. (Luka 7:11-15) Ne tusi mai te apositolo ko Paulo: “E isi soku fakamoemoega mai te Atua . . . me ka toe‵tu mai a tino amio‵tonu mo tino sē amio‵tonu.” A te fakamoemoega makeke tenei se fakaasiga tu ‵kese o te alofa o te Atua ki tino.—Galuega 24:15.
E lau i piliona o tino e mafai o olioli ke ola ki te se-gata-mai. E fai mai te Tusi Tapu: “A tino amio‵tonu ka fai mō latou te lalolagi, kae ka ‵nofo latou i ei ki te se-gata-mai. (Sala. 37:29) I te taimi tenā, ka fia‵fia kae ka fakamalosigina latou ke lavea atu te fakataunuga o pati a te apositolo ko Paulo kolā ne tusi ki lalo i se 2,000 tausaga ko ‵teka: “Te mate, tefea tou manumalo? Te mate, tefea tou ū ‵kati?” (1 Kolinito 15:55) Kae ka fakatakavale atu i ei a te fili matagā ko te mate!