MAFAUFAU aka la me onoono atu koe i se vitio e uiga ki se tino takutakua, kāti se tino usuusu takutakua telā e fiafia koe ki ei. E kamata loa te ata mai tena folikiga i te taimi ne tauloto ei a ia ke iloa o fakaaoga a mea tā‵ta kae fakaakoako ke usuusu i taimi e uke. Oti aka, ko onoono koe ki te taimi e faimalaga atu ei ki fenua ‵mao o fai ana koniseti kae kamata o fai pelā me se tino takutakua i te lalolagi kātoa. E se leva, ko pei mai te taimi ko matua ei a ia ke oko atu loa ki te fakaotiga o te vitio—i te taimi ko mate ei a ia.

A te vitio tenei se tala tonu o se tino telā ko mate atu. Faitalia me i te tino tenā se tino usuusu, se saienitisi, se tino tafao, io me se tino lauiloa malosi, e ‵pau eiloa te ikuga o latou. Kāti e fai ne te tino tenā a mea ‵lei e uke, kae mafaufau aka la ki te uke o mea e mafai ne ia o fai moi se gasolo aka a ia o matua kae mate atu?

E mafai o fanoa‵noa tatou māfai e mafau‵fau ki te mea tenei, kae tenei eiloa te mea ka tupu ki a tatou. (Failauga 9:5) Faitalia a ‵tou taumafaiga e uke, e seki mafai eiloa ne tatou o ‵sao mai i ikuga o te tulaga matua mo te mate. E se gata fua i konā, e mafai o ‵kati ‵mutu a ‵tou ola māfai e tupu se fakalavelave fakafuasei io me se masaki matagā. E pelā mo te mea ne fakamatala mai i te Tusi Tapu, e fakatusa eiloa tatou ki te ‵sau o te vaveao telā e “sae mai i se taimi toetoe ko galo atu ei.”—Iakopo 4:14.

Ki nisi tino, a te olaga e foliga sē mautinoa io me sē aoga ko ala ei o maua ne latou a te kilokiloga tenei “ke na ‵kai kae inu tatou me taeao ko ‵mate ei tatou.” (1 Kolinito 15:32) Kae e ola eiloa a tino i te auala tenei me e iloa ne latou me e mafai o ‵mate latou i so se taimi kae e seai se lotou fakamoemoega mō aso mai mua. E se leva nei io me fakamuli loa—kae maise loa māfai ko fakafesagai atu latou ki se tulaga faigata i te olaga, kāti ka mafaufau a ia penei, ‘E mata, ko gata i konei a te olaga?

E tokouke a tino i aso nei ko ‵sala atu ki saienitisi ke maua mai i ei a tali. Ko oti ne maua aka ne saienitisi mo tokita a mea kolā e mafai o fai ei ke tai ola leva a tino. Kae ko nisi saienitisi ko ga‵lue ki te faiga ke tai loa atu te ola o te tino. Faitalia me se a te ikuga o olotou taumafaiga, kae ko te fesili la: Kaia e ga‵solo aka ei tatou o ma‵tua kae ‵mate atu? E mata, e isi se fakamoemoega me ka fakatakavale a te ‵tou fili ko te mate? Ka fakamatala mai i mataupu konei e ‵soko mai a fakamatalaga mo te tali ki te fesili tenei: E mata, ko gata i konei a te olaga?