Nisi tino e mafau‵fau me e mata ko oti ne mafuli te Muna tusia a te Atua io me ikai. Ne fai mai te pelofeta ko Isaia me i te Muna a te Atua e “tumau ki te se-gata-mai.” (Isaia 40:8) E mafai pefea o mautinoa i a tatou me i tautoga a te Atua ka se mafai eiloa o ma‵fuli?

E isi se malosi o te Atua ke fakatumau tena Muna kae puipui ke mo a ma fakamaseigina. I aso mua, i te ‵lomiga o ‵kopi kolā ne tusilima, ne lau faka‵lei ne tino tusitala konei a mataimanu katoa o tusitusiga tapu, ke fakamautinoa aka me e seai se mea ne fakaopoopo ki ei, ‵fuli io me tapale kea‵tea. Kae ona ko tino e se ‵lei katoatoa, e isi loa ne nisi tamā mea ‵se ne fai ne tino tusitala konā.

E lau i afe o ‵kopi o tusitusiga mua o te Tusi Tapu. Kafai e isi se ‵kopi e tasi e tai ‵kese, e mafai loa o fakapau‵pau mo nisi ‵kopi aka ke mafai o iloa aka i ei a mea ‵tonu.—Ke tauloto ki mea e ‵tai uke atu, onoono ki te mataupu “Te Auala ne Oko Mai ei te Tusi Tapu ki a Tatou?” i te jw.org.

Pelā me se fakaakoakoga, mafaufau ki tusitusiga mua kolā e taku ki te Peluga Tusi mai te Tai Mate kolā ne maua aka ne se matakāiga Alapi i ana kolā e pili ki te Tai Mate i te 1947. A tusitusiga tapu konei e aofia i vaega o te Tusi Tapu kolā ko nofo ki se 2,000 tupu tausaga te leva. Ne fakatusatusa ne tino sukesuke ‵poto a tusitusiga mua konei mo te Tusi Tapu telā ko maua ne tatou i aso nei. Ne a mea ne maua aka ne latou?

Ne fai mai a tino ‵poto konei me i fakamatalaga i te Muna a te Atua telā ko maua ne tatou i aso nei, e ‵pau eiloa mo tusitusiga mua konei. * Ko oti ne fakamaoni mai i sukesukega maea kolā ne fai ki tusitusiga mua, me i mea kolā e fai‵tau ne tatou i te Tusi Tapu ko te fekau eiloa mai i te Atua. E mafai o mautinoa i a tatou me ne puipui faka‵lei eiloa ne te Atua ke mo a e mafuli a tena fekau i Tusitusiga Tapu mō tatou i aso nei.

Tela la, ko mafai o fai‵tau tatou ki te Muna a te Atua mo te tali‵tonu katoatoa me e tonu. Mai te mafau‵fau ki ei, ke na onoono nei ki mea e mafai o tauloto ne tatou e uiga ki te Atua mai i ana pelofeta.