E mata, e mafai o ola ‵lei a mea i te lalolagi māfai e seai se la? E se mafai o ola ‵lei a lakau, pulalakau, fuagalakau mo fuaga e aunoa mo te la. E fai foki ne te la ke ‵miti ne aka o lakau a vai mai te laukele, olo aka ki luga i olotou lau, ko ‵fuli ei ki te ea pelā me se afusaga.

A te vaiua se meaalofa tāua mai i te Atua telā e fai ei ke ‵fua mai i te laukele a mea‵kai mo ‵tou ‵kai. E tuku mai ne te Atua ki a tatou a vaiua mai te lagi mo taukai o lakau, ke maua ‵tou mea‵kai kae fai ei ke fia‵fia ‵tou loto.

E manava‵se a tamana e tokouke ke lava a mea‵kai mo gatu o te kāiga. Onoono ki pati a te Tusi Tapu: “Onoono faka‵lei ki manu eva i te lagi, e se ‵toki fuaga io me tau fuataga io me fakaputu meakai ki olotou fale koloa, kae e fagai eiloa latou ne te otou Tamana i te lagi. E a, e se sili atu te tāua o koutou i lō latou?”—Mataio 6:25, 26.

“Ke mafaufau faka‵lei ki te auala e ola ei a pulalakau o te vao, . . . ; kae e fai atu au ki a koutou ke oko foki eiloa ki [te Tupu ko] Solomona i tena ‵malu katoatoa ne seki pei eiloa ki se gatu gali e penei mo se pulalakau e tasi i pulalakau konei. Tela la, kafai tenei te auala ne fakalavalava ei ne te Atua a lakau o te vao . . . , ka se sili atu la te fakalavalava ne ia o koutou konā e fo‵liki otou fakatuanaki?”—Mataio 6:28-30.

Ona ko te mea e mafai o aumai ne te Atua a ‵tou mea‵kai mo gatu, e mautinoa eiloa me e mafai o fesoasoani mai a ia ke maua ne tatou a nisi mea tāua i te olaga. Kafai e fai ne tatou te loto o te Atua, e mafai eiloa o fakamanuia ne ia a ‵tou taumafaiga ke ‵toki a lakau mo ‵tou ‵kai io me fesoasoani mai ke maua ne ‵tou galuega ke mafai o ‵togi a ‵tou mea‵kai.—Mataio 6:32, 33.

E tonu, e isi ne pogai ‵lei ke a‵lofa tatou ki te Atua māfai e mafaufau ‵loto tatou ki te la, te vaiua, manu eva mo pulalakau. Ka sau‵tala tatou i te suā mataupu ki te auala e fesokotaki mai ei te ‵tou Mafuaga ki tino.