E mata, e Fai Tau Galuega Talai Pelā mo te ‵Sau o te Vaveao?
A TE ‵tou galuega talai e tāua kae aoga. Kae e se ko tino katoa e talai tatou ki ei e fia‵fia mai. Kafai foki loa e fakaasi mai ne tino a te fiafia ki te fekau mai te Tusi Tapu, e se mafai o lavea faeloa ne latou a te tāua ke sukesuke ki te Muna a te Atua.
Tenā eiloa te mea ne tupu ki a Gavin, telā ne kamata o kau atu ki fakatasiga; kae ne seki manako a ia ke fai tena akoga faka-te-Tusi Tapu. Ne fai mai a ia: “E se uke aku mea e iloa i te Tusi Tapu, kae ko au e se manako o fakaasi atu a toku vāivāiga tenā. Au ne mataku i a au ma fakaloiloigina, kae mataku foki au me ko te lasi o toku iloaga, ko te uke foki o aku mea e ‵tau o fai.” Se a tau fakatau e mata, ko se mafai eiloa o iku manuia a taumafaiga a Gavin? Ikai, mafaufau ki ikuga ‵lei mai akoakoga i te Tusi Tapu kolā e mafai o aoga ki se tino. Ne fai atu a Ieova ki ana tino mua: “Aku pati ka moti‵moti ifo e pelā me se motiga vai mai te sau o te vaveao, e pelā me se afuga vaiua ki luga i mouku.” (Teu. 31:19, 30; 32:2, NW) A te aoga o te ‵sau o te vaveao e fakaasi faka‵lei mai i ei te auala e mafai o fesoasoani atu tatou i se auala ma‵goi ki vaegā tino kese‵kese katoa i te galuega talai.—1 Timo. 2:3, 4.
E FAI PEFEA TE GALUEGA TALAI E PELĀ MO TE ‵SAU O TE VAVEAO?
A te ‵sau o te vaveao e agi ‵moko. A te ‵sau o te vaveao e fakaputuputu malielie ne ia a motigā vai kolā e maua mai i te ea ‵moko. I se auala tai ‵pau, a pati a Ieova ne fai pelā ‘me ne motigā vai mai te ‵sau o te vaveao,’ me ne faipati atu a ia mo te atafai, te agamalu, kae amanaia ne ia ana tino. E fakaakoako eiloa tatou ki a ia māfai e fakaasi atu ne tatou a te āva ki kilokiloga a nisi tino. E fakamalosi ne tatou a tino ke fakaasi mai olotou manatu kae ke fai foki ne latou a olotou fakaikuga. Kafai e fakaasi atu ne tatou a te amanaia tonu ka taliagofie ‵tou pati kae magoi ‵ki eiloa te ‵tou galuega talai.
A te ‵sau o te vaveao e aumai ne ia te malosi fou. Ka maua ne tino a te malosi fou māfai e fakaasi atu ne tatou a te ‵toe auala ‵lei ke ati aka ei te lotou fia‵fia. A Gavin, telā ne fakamatala mai muamua, ne seki faimalōgina ke fai sena akoga faka-te-Tusi Tapu. I lō te fai penā, ne fakaaoga ne Chris telā ne talai muamua ki ei a auala kese‵kese ko te mea ke momea aka te fiafia o Gavin o sau‵tala ki mea faka-te-Tusi Tapu. Ne fakamatala atu ne Chris ki a Gavin me isi se fekau tāua e maua i loto i te Tusi Tapu, kae ka fesoasoani atu te fekau tenā ke malamalama ‵ lei a ia i te pogai e kau atu ei a ia ki fakatasiga. E se gata i ei, ne fakaasi atu ne Chris me ne fakatalitonu aka ne ia te ‵tonu o te Tusi Tapu e auala i valoaga kolā e maua i loto i ei. Tela la, ne iku atu loa te faiga tenei ki sau‵talaga e uke e uiga ki te fakataunuga o valoaga. Ne maua eiloa ne Gavin a te malosi fou mai sau‵talaga konei kae fakamuli ifo, ne talia ne ia ke fai tena akoga faka-te-Tusi Tapu.
A te ‵sau o te vaveao e aoga ki te ola. I Isalaelu, kafai ko oko ki masina kolā e se ‵to i ei a te vaiua, a te laukele e malō ‵ki eiloa. Tela la, e aunoa mo te ‵sau o te vaveao, e mafai eiloa o mage‵mage kae ‵mate atu a lakau. Ne ‵valo mai a Ieova me e isi foki se taulā faka-te-agaga i aso nei. (Amo. 8:11) Kae ne tauto mai a ia me ka fai a tino talai fakaekegina e pelā me “se ‵sau fou telā ne aumai ne te Aliki [Ieova]” i te taimi e folafola atu ei ne latou a te fekau o te Malo, fakatasi mo te ‵lago atu a olotou taugasoa ko “nisi mamoe.” (Mika 5:7; Ioa. 10:16) E mata, e fakatāua ne tatou a te fekau o te tala ‵lei o te Malo e pelā me se vaega o te fakatokaga a Ieova ke maua ei te ola ‵lei i te feitu faka-te-agaga?
A te ‵sau o te vaveao se fakamanuiaga mai i a Ieova. (Teu. 33:13) E mafai o fai a te ‵tou galuega talai e pelā me se fakamanuiaga ki a latou kolā etalia ne latou. Ne maua ne Gavin se fakamanuiaga penā. E auala i tena akoga faka-te-Tusi Tapu, ne maua ne ia a tali ki ana fesili katoa. Ne gasolo fakavave eiloa a ia ki mua kae papatiso, kae nei la, ko ‵kau katoatoa atu a ia mo tena avaga ko Joyce ki te talaiatuga o te tala ‵lei o te Malo.
Ko ‵fonu eiloa te lalolagi kātoa i Molimau a Ieova kolā e fakasalalau atu ne latou a te fekau o te Malo
TE TĀUA O TAU GALUEGA TALAI
A te mafaufau e uiga ki te ‵sau o te vaveao e mafai foki o fakamalosi mai ki a tatou ke fakatāua ‵tou galuega talai. I te auala fea? E mu‵tana fua a vai e maua mai i ‵motiga vaiua, kae ko te fia miliona o ‵motiga vaiua mai te ‵sau o te vaveao e fakasiusiu ne ia te lalolagi. I se auala tai ‵pau, e mafai o ‵kilo atu tatou taki tokotasi ki ‵tou mea e fai i te galuega talai e pelā fua me mu‵tana ki a tatou. Kae ko taumafaiga katoa kolā e fai ne te fia miliona o ‵tou taina i te lalolagi kātoa, ko mafai eiloa o oko atu a te tala ‵lei “ki atufenua katoa.” (Mata. 24:14) E mata, e fai te ‵tou galuega talai e pelā me se fakamanuiaga mai i a Ieova ki nisi tino? Ao, ka fai eiloa te fekau telā e talai atu ne tatou e pelā me se ‵sau o te vaveao telā e agi ‵moko, e maua i ei te malosi fou kae e aoga ki te ola!