1-3. (a) E fakaasi atu pefea ne Kelisiano a te ma‵nako malosi o latou ke ‵kau atu ki fakatasiga? (Ke onoono ki te ata i te kamataga.) (e) Ne a mea ka sau‵tala tatou ki ei i te mataupu tenei?

I TE taimi ko 17 fua i ei a tausaga o Corinna, ne puke fakapagota tena mātua kae ‵pei atu ki se falepuipui lasi e tasi. Fakamuli, ne ave fakapagota a Corinna ki Siberia, se fa‵kai e nofo ki te fia afe o maila te ‵mao mai tena fale. Ne fai a ia e pelā me se pologa, kae i nisi taimi, ne faimalō tou fafine ke galue i tua i te koga ‵moko e aunoa mo ne gatu ‵moko e pei ki ei. Faitalia a tulaga fakalogo‵mae konā, ne fakaiku aka eiloa ne Corinna mo te suā tuagane ke ‵kau atu faeloa laua ki fakatasiga a te fakapotopotoga.

² Ne fai mai a Corinna penei: “Ne tiakina sale ne māua te mā koga ga‵lue i te afiafi po kae sa‵sale atu ki se koga telā e ‵tele i ei a tuleni telā e nofo ki se 25 kilomita te ‵mao. E tiakina sale ne tuleni a te koga tenā i te lua i te vaveao, kae e ono itula e tele atu ei te tuleni ke oko atu ki te koga telā e ‵tu i ei māua, kae toe sa‵sale atu i se 10 kilomita ki te koga telā e fai ei te fakatasiga.” E mata, ne aoga eiloa a te malaga tenā? E fai mai a Corinna, penei: “I te fakatasiga, ne suke‵suke matou ki Te Faleleoleo Maluga kae usu a pese o te Malo. Ko oko eiloa i fakamalosi loto mai o fakatokaga konei ki a māua.” E tiga eiloa ne seki ‵foki atu lāua ki te galuega i aso e tolu mai tua ifo, ne seki iloa lele eiloa ne te pule o te fatoaga me i a Corinna mo tena taugasoa ne olo ki se koga.

 ³ E fakatāua faeloa ne tino o te Atua a vaegā maopoopoga penei. Mai tua ifo malie o te fakatuga o te fakapotopotoga Kelisiano, ne kamata ei a soko o Iesu o “maopoopo fakatasi faeloa . . . i te faletapu.” (Galu. 2: 46) E fiafia foki koe ke kau atu ki fakatasiga a te fakapotopotoga kolā e fai faeloa. E tiga te feitu tenā, e fe‵paki a Kelisiano katoa mo mea faiga‵ta. E fakafaigata ne galuega ‵togi mo te seai ne taimi ona ko te uke o mea e fai a te kau atu ki fakatasiga. Se a te mea ka fakamalosi aka ne ia tatou ke fakafesagai atu ki tulaga faiga‵ta penā kae ke fakatumau loa se fakatokaga ‵lei e uiga ki te ‵kau faeloa ki fakatasiga? ^[1] E mafai pefea o fesoasoani atu tatou ki ‵tou akoga faka-te-Tusi Tapu mo nisi tino ke lavea ne latou a te tāua o te ‵kau atu ki fakatasiga? I te mataupu tenei, ka onoono eiloa tatou ki pogai e valu e ‵kau fakatasi ei tatou o fai ‵tou tapuakiga. E mafai o vaevae ne tatou a pogai konei e valu ki vaega e tolu: te auala e aoga ei ki a tatou, te auala e aoga ei ki nisi tino, mo lagonaga o Ieova māfai e ‵kau atu tatou ki fakatasiga. ^[2]

4. E fesoasoani mai pefea a ‵tou fakatasiga ke tauloto tatou ki mea e uiga ki a Ieova?

⁴ E akoakogina tatou i taimi o fakatasiga. A fakatasiga takitasi a te fakapotopotoga e fesoasoani mai ke tauloto tatou e uiga ki te ‵tou Atua ko Ieova. E pelā me se fakaakoakoga, taimi nei e suke‵suke ei tatou ki te tusi ko te Ke Tumau i te Alofa o te Atua i te sukesukega a te Fakapotopotoga ki te Tusi Tapu, e mata, e se otia ‵tou loto i te suke‵suke ki uiga ‵gali o te Atua fakatasi mo tali ‵gali mai taina mo tuagane kolā e fakamalosi aka ei ‵tou alofa ki ‵tou Tamana faka-te-lagi? E momea aka foki ‵tou iloaga e uiga ki te Muna a te Atua e auala i te fakalogo‵logo faka‵lei ki lāuga, fakaasiga mo te faitauga ki te Tusi Tapu. (Nee. 8:8) E pelā mo se mea e tasi, ke mafau‵fau ki taemani faka-te-agaga kolā e maua ne tatou i vaiaso takitasi i te taimi e fakatoka io me fakalogologo koe ki mea tāua mai te faitauga ki te Tusi Tapu!

5. E fesoasoani atu pefea a fakatasiga ke fakagalue ne koe a mea kolā ne tauloto ne koe mai te Tusi Tapu kae ke momea aka te ‵lei o te auala e talai ei koe?

⁵ E akoako tatou i taimi o fakatasiga ke iloa o fakagalue a fakatakitakiga fakavae mai te Tusi Tapu i vaega katoa o ‵tou olaga. (1 Tesa. 4:9, 10) E pelā me se fakaakoakoga, a te Sukesukega ki Te Faleleoleo Maluga e fetaui ‵lei mo manakoga o tino o te Atua. E mata, e fakamalosi koe ne te Sukesukega ki Te Faleleoleo Maluga ke toe iloilo aka ou fakamoemoega, fakamagalo a nisi taina Kelisiano mo te momea aka te ‵lei o te faiga o au ‵talo? E akoako tatou ki te faiga o te galuega talai ne te fakatasiga i te galoto o te vaiaso. E tauloto tatou ke iloa o talai atu te tala ‵lei mo te auala ke akoako atu a fakatakitakiga faka-te-Tusi Tapu i se auala magoi.—Mata. 28:19, 20.

6. I te auala fea e fakamalosi kae fesoasoani mai ‵tou fakatasiga ke tumau tatou i te ma‵losi?

⁶ A fakatasiga e fakamalosi aka ei tatou. A te tulaga o te lalolagi i aso nei e mafai o fakavāivāi ne ia tatou i te feitu faka-te-mafaufau, lagonaga mo te feitu faka-te-agaga. E ‵kese mai ei, a fakatasiga Kelisiano e fakamalosi aka ei tatou. (Faitau te Galuega 15:30-32.) I te ukega o ‵tou fakatasiga, e fakafoki‵foki faeloa i ei a te fakataunuga o valoaga i te Tusi Tapu. E fakamalosi aka ei ‵tou loto tali‵tonu ki tautoga a Ieova i aso mai mua ka fakataunu eiloa. E se fakamalosi fua tatou ne latou kolā e fai‵pati mai mua i te tulaga, kae e fakamalosi foki tatou ne tali mo pese kolā e fai ne ‵tou taina mo olotou loto kātoa. (1 Koli. 14:26) Kafai foki e sau‵tala fakatasi tatou mo taina mo tuagane mai mua io me mai tua o fakatasiga, e maua ne tatou se lagonaga fiafia me i a tatou e pelā me se kāiga telā e fakatau atafai kae fakatau fakamalosi te suā tino ki te suā tino.—1 Koli. 16:17, 18.

7. Kaia e tāua ei ke ‵kau faeloa ki fakatasiga?

⁷ E fakamalosi aka tatou ne te agaga tapu i taimi o fakatasiga. Ne fai mai penei a Iesu Keliso: “Ke na fakalogo la te tino telā e isi ne ana taliga ki muna a te agaga ki fakapotopotoga.” (Faka. 2:7) E tonu, ne takitaki ne Iesu a te fakapotopotoga Kelisiano e auala i te agaga tapu. E manakogina  ne tatou te agaga tapu ke fesoasoani mai ke mafai o ‵teke atu ne tatou a tofotofoga, fakamalosi kae fakatoka tatou mō te galuega talai kae ke fai foki ne tatou a fakaikuga ‵lei. E mata, e tāua ke fakaaoga faka‵lei ne tatou a fakatokaga penei—e aofia i ei a fakatasiga a te fakapotopotoga—ko te mea ke maua ne tatou a te agaga tapu o Ieova?

8. Kafai e lavea ne ‵tou taina a tatou i fakatasiga kae fakalogo‵logo ki ‵tou tali mo te usuga o pese, i te auala fea e fesoasoani atu ei a mea konei ki a latou? (Ke onoono ki te pokisi “E Maua Faeloa ne ia se Lagonaga Fiafia Mai Tua o te Fakatasiga.”)

⁸ A te ‵kau atu o tatou ki fakatasiga e fakaasi atu ei te ‵tou a‵lofa ki ‵tou taina. Ke mafaufau faka‵lei ki fakalavelave kolā e kufaki ei a ‵tou taina mo tuagane i te fakapotopotoga. E se tioa eiloa o tusi mai penei te apositolo ko Paulo: “Ke mafaufau te suā tino ki te suā tino”! Ne fakamatala mai ne Paulo me e mafai o fakaasi atu te ‵tou a‵lofa ki ‵tou taina mai te taumafai “ke mo a ma ‵galo sale tatou i ‵tou fakatasiga.” (Epe. 10:24, 25.) A te ‵kau atu faeloa o tatou ki fakatasiga e fakaasi atu ei te ‵tou atafai ki ‵tou taina tali‵tonu e auala i te fakamāumāuga o ‵tou taimi, ‵saga tonu atu ki a latou mo te manava‵se foki ki a latou. E se gata foki i ei, a tali mo pese kolā e fai atu ne tatou mo ‵tou loto kātoa e fakamalosi aka ei ‵tou taina tali‵tonu.—Ko. 3:16.

9, 10. (a) Fakamatala mai te auala ne fesoasoani mai ei a pati a Iesu i te Ioane 10:16 ke malama‵lama tatou i te pogai e tāua ei ke ‵kau fakatasi tatou mo ‵tou taina. (e) Kafai e ‵kau atu faeloa tatou ki fakatasiga, e mafai pefea o fesoasoani atu tatou ki se tino telā ne fakaoti ne ana kāiga?

⁹ E fai ne fakatasiga ke ‵kau fakatasi tatou mo ‵tou taina tali‵tonu. (Faitau te Ioane 10:16.) Ne faka‵pau ne Iesu a ia ki te tausi mamoe, kae ko ana soko ki te lafu mamoe. Ke mafau‵fau ki te mea tenei: “Kafai e lua a mamoe e ‵nofo atu i luga i te mauga, e lua mamoe i loto i te vanu kae ko te suā mamoe e kaikai i se kogā koga, e mata, e mafai o taku ne koe a latou ki se lafu mamoe? A te ‵tonuga loa, e ‵tau mo te lafu mamoe o ‵nofo fakatasi mai lalo i te tausiga a te Tausi Mamoe. E penā foki tatou, e se mafai o tau‵tali atu tatou i te tausi mamoe māfai e ma‵nako tatou o fia fakamavae‵vae. E ‵tau o ‵kau fakatasi tatou mo nisi Kelisiano ko te mea ke mafai o taku tatou ki se “lafu mamoe” telā e tausi ne te “tausi mamoe e tasi.”

¹⁰ Kafai e ‵kau atu faeloa tatou ki fakatasiga, e fesoasoani atu eiloa tatou ki te ‵kau fakatasi o ‵tou kautaina. (Sala. 133:1) A nisi taina tali‵tonu ko oti ne fakaoti ne olotou mātua mo olotou taina mo tuagane ‵tonu. Kae ne tauto mai a Iesu me ka tuku atu ne ia ki vaegā tino penā a kāiga faka-te-agaga kolā ka a‵lofa kae atafai atu ki a latou. (Male. 10:29, 30) Kafai e kau atu faeloa koe ki fakatasiga, ka mafai eiloa o fai koe e pelā me se tamana, se mātua, se taina io me se tuagane ki tino pele konei. E mata, e se fakamalosi aka tatou ne te mea tenei ke fia ‵kau atu faeloa ki fakatasiga?

11. E fesoasoani mai pefea a te ‵kau faeloa o tatou ki fakatasiga ke tuku atu ki a Ieova a te mea telā e ‵tau o maua ne ia?

¹¹ A te ‵kau faeloa ki fakatasiga e tuku atu ei ne tatou ki a Ieova a te mea telā e ‵tau o maua ne ia. E pelā me ko te ‵tou Mafuaga, e ‵tau eiloa o maua ne Ieova a tavaega, vikiga, fakafetai mo te ‵malu. (Faitau te Fakaasiga 7:12.) I te taimi e ‵talo, usu pese kae fai‵pati e uiga ki a Ieova i ‵tou fakatasiga, ko tuku atu eiloa ne tatou ki a Ieova a te mea telā e fakatāua malosi ne ia—ko ‵tou tapuakiga. E fakatāua ne tatou a te tauliaga ke faka‵malu a te Tino telā ne fai ne ia a mea e uke mō tatou.

12. Ka pefea a lagonaga o Ieova māfai e faka‵logo tatou ki tena fakatonuga ke ‵kau ki fakatasiga?

¹² E ‵tau eiloa o faka‵logo tatou ki a Ieova. E fakatonu mai a ia ke mo a e ‵galo sale tatou i taimi o fakatasiga, maise eiloa i taimi tenei o te gataga. Kafai e loto fia‵fia tatou o faka‵logo ki te fakatonuga tenā, ka fiafia eiloa a Ieova. (1 Ioa. 3:22) E lavea kae fakatāua ne ia a taumafaiga a tatou ke ‵kau atu ki fakatasiga takitasi.—Epe. 6:10.

13, 14. I te auala fea e faka‵pilipili atu ei tatou ki a Ieova mo Iesu i taimi o fakatasiga?

¹³ A te ‵kau o tatou ki fakatasiga se fakaasiga me e ma‵nako tatou ke fakapili‵pili atu ki a Ieova mo tena Tama. I taimi o ‵tou fakatasiga, e takitaki tatou ne te ‵tou Faiakoga Sili ki tena Muna ko te Tusi Tapu. (Isa. 30:20, 21) Ke oko foki eiloa ki tino kolā e ‵kau mai ki ‵tou fakatasiga e mafai o fai mai penei: “A te Atua e nofo eiloa i a koutou!” (1 Koli. 14:23-25) E fakamanuia ne Ieova a ‵tou fakatasiga e auala i tena agaga tapu kae takitaki foki ne ia a te faiga o ana polokalame ki akoakoga mai te Tusi Tapu. I ‵tou fakatasiga, e fakalogo‵logo eiloa tatou ki te leo o Ieova kae lagona ne tatou te tausiga alofa a ia. Tela la, e fakaasi atu ei me e ma‵nako tatou o fakapili‵pili atu ki a ia.

¹⁴ Ne fai mai a Iesu: “I so se koga e maopoopo i ei se tokolua io me se tokolu i toku igoa, e nofo foki au i konā.” (Mata. 18:20) E pelā me se fakatakitakiga fakavae, e fakagalue foki ne tatou a pati konā a Iesu ki ‵tou fakatasiga. E pelā me ko te ulu o te fakapotopotoga, a Keliso e “sasale i va” o fakapotopotoga o tino o te Atua. (Faka. 1:20–2:1) Ke mafaufau ki ei! E aofia malosi a Ieova mo Iesu i te fakamalosiakaga o tatou i taimi o fakatasiga Kelisiano. Se a tau faka‵tau, ka pefea a lagonaga o Ieova māfai e lavea ne ia tatou e ma‵nako o fakapili‵pili atu ki a ia mo tena Tama?

15. E fakaasi atu pefea i te ‵tou ‵kau atu ki fakatasiga me e ma‵nako tatou o faka‵logo ki te Atua?

¹⁵ A te ‵kau atu o tatou ki fakatasiga e fakaasi atu ei te ‵tou ‵lago malosi ki te pulega a te Atua. E tiga eiloa ne fakatonu mai a Ieova ke ‵kau tatou ki fakatasiga, kae e se faimalō ne ia tatou. (Isa. 43:23) Tela la, i a tatou eiloa te filifiliga me e ma‵nako tonu tatou o fakaasi atu te ‵poko o ‵tou alofa ki a Ieova mo ‵tou loto kātoa kae tumau i te ‵lago atu ki tena pulega io me ikai. (Loma 6:17) E pelā me se fakaakoakoga, kāti e fakamalosigina tatou ne ‵tou pule ke fakamuamua ‵tou galuega ‵togi i lō te ‵kau atu ki fakatasiga. Io me fakamatakutaku tatou ne malo kolā e ‵teke mai me ka fakasala tatou ki tupe māfai e ‵kau tatou ki fakatasiga, ‵pei ki falepuipui io me ma‵sei atu a nisi fakasalaga a latou. Io me fakamalosigina tatou ke ‵kau atu ki fakafiafiaga i lō a fakatasiga. I fakanofonofoga takitasi konei, e manakogina ke fai ne tatou se filifiliga: Ko oi te tino e ‵tau o tavini tatou ki ei? (Galu. 5:29) Kafai e filifiili ne tatou ke ‵lago atu ki te pulega a Ieova, ko fai eiloa ne tatou te loto o Ieova ke fiafia.—Faata. 27:11.

16, 17. (a) E iloa pefea ne tatou me i fakatasiga ne tāua ‵ki eiloa ki Kelisiano i te senitenali muamua? (e) Ne pefea a lagonaga o te taina ko George Gangas e uiga ki fakatasiga Kelisiano?

¹⁶ A Kelisiano i aso mua ne seki maopoopo fua i se vaitaimi toetoe mai tua o vavega fakaofoofogia kolā ne ‵tupu i te Penitekoso  33 T.A. ‘Kae ne tumau latou i te ‵saga tonu atu ki akoakoga a te kau apositolo kae maopoopo faeloa i te faletapu.’ (Galu. 2:42, 46) A te pati Eleni telā ne ‵fuli ki te “tumau eiloa latou i te ‵saga tonu atu,” e fakauiga eiloa ki te kufaki mo te lotomau  i se malaga loa telā e manakogina i ei a taumafaiga e uke. Mai lalo i te takitakiga a te kau Loma mo ‵tekemaiga mai takitaki lotu Iutaia, ne fakafaigata ei ki Kelisiano ke ‵kau atu ki fakatasiga. Kae tiga i ei, ne kufaki eiloa latou i mea konā.

¹⁷ E tokouke a tavini a Ieova i aso nei e fakaasi mai ne latou a te lasi o te lotou loto fakafetai mō fakatasiga faka-Kelisiano. A George Gangas, telā ne aofia i te Potukau Pule mō tausaga e silia atu mo te 22, ne fai mai penei: “Ki au, a te ‵kau fakatasi mo taina ko te ‵toe mea fakafiafia eiloa kae fakamalosi loto. E fiafia malosi au ma aofia i tino kolā e ‵mua atu faeloa ki fakatasiga kae ko toe tino foki kolā e fakaoti mai te Fale Tapuaki. E maua faeloa ne au te fiafia māfai e sa‵tala fakatasi mo tino o te Atua. Kafai e nofo atu au i olotou tafa, e fai eiloa pelā me ko ‵nofo fakatasi au mo toku kāiga i te palataiso faka-te-agaga.” Ne toe fai mai tou tagata: “E pelā mo te kamupasi telā e fakasino atu faeloa ki matū, e penā foki eiloa oku mafaufauga mo mo toku manakoga ke kau atu ki fakatasiga.”

18. E pefea ou lagonaga e uiga ki fakatasiga, kae se a te mea e fakaiku aka ne koe ke fai?

¹⁸ E mata, e penā foki ou lagonaga e uiga ki te ‵kau fakatasi o tapuaki atu ki a Ieova? Ke fakamautinoa aka ne koe ke kufaki kae ke lotomau i so se taumafaiga e fai ne koe ke kau atu faeloa ki fakatasiga. Kafai e penā foki ou lagonaga, ko ‵pau ei koe mo te tupu ko Tavita telā ne fai mai penei: “Te Aliki [Ieova], au e fiafia ki te fale tenā e nofo koe i ei.”—Sala. 26:8.