1. Ne a vaegā tofotofoga e mafai o fe‵paki mo tino o Ieova?

E MATA, e logo‵mae koe ona ko se tofotofoga faigata? Kāti se tino i te fakapotopotoga ne fakalogo‵mae ne ia koe. (Iako. 3:2) Io me kāti e fakatauemu atu a tino i te galuega io me ko tama‵liki i te akoga me tavini koe ki a Ieova. (1 Pe. 4:3, 4) Io me kāti e taumafai a tino o tou kāiga o taofi koe ke mo a ma kau ki fakatasiga io me faipati atu ki nisi tino e uiga ki tou fakatuanaki. (Mata. 10:35, 36) Kafai e logo‵mae ‵ki koe ona ko se tofotofoga, kāti ka mafai o ‵fiu koe. Kae e mafai o loto talitonu koe me faitalia so se tulaga faigata e fepaki mo koe, ka tuku mai ne Ieova te poto ke fakafesagai atu ki ei mo te malosi ke kufaki ne koe.

2. E ‵tusa mo te Loma 15:4, ka aoga pefea ki a tatou a te faitau ki te Muna a te Atua?

² Ne aofia ne Ieova i tena Muna a fakamatalaga likiliki ki te auala ne fakafesagai atu ei a nisi tino sē ‵lei katoatoa ki nisi tofotofoga faiga‵ta. Kaia? Ko te mea ke tauloto ne tatou a mea aoga mai i a latou. Ne fakamalosi ne Ieova a te apositolo ko Paulo ke tusi ne ia a mea konā. (Faitau te Loma 15:4.) Kafai e fai‵tau tatou ki tala konei, ka mafai o maua ne tatou se fakamafanafanaga mo se fakamoemoega. Kae ke maua ne tatou a mea aoga, e uke atu a mea e ‵tau o fai i tafa o te fai‵tau fua ki te Tusi Tapu. E ‵tau o talia ne tatou a muna i te Tusi Tapu ke ‵fuli ne ia ‵tou mafaufauga kae ke fai ei ke otia ‵tou loto. Ne a ‵tou mea e mafai o fai māfai e ‵sala atu ki te takitakiga ke fakafesagai atu ki se tulaga faigata? E mafai o fakaaoga ne tatou a auala e fa konei: (1) ‵Talo, (2) Fakaataata i tou mafaufau, (3) Mafaufau ‵loto, kae ko te (4) Fakagalue. Ke na sau‵tala nei tatou ki auala e fa konā. * Kae  ka fakaaoga ne tatou a auala konei ke maua a mea aoga mai mea ne ‵tupu i te olaga o te Tupu ko Tavita mo te apositolo ko Paulo.

3. Koi tuai o faitau koe ki te Tusi Tapu, se a te mea e ‵tau o fai ne koe, kae kaia?

³ (1) ‵Talo. Koi tuai o faitau koe ki te Tusi Tapu, fakamolemole ki a Ieova ke fesoasoani atu ke lavea ne koe a mea aoga ka maua ne koe mai tau faitauga. Pelā me se fakaakoakoga, kafai koe e manako ki manatu fakatonutonu ke fakafesagai atu ki se fakalavelave, fakamolemole ki a Ieova ke fesoasoani atu ke maua ne koe a fakatakitakiga mai tena Muna kolā ka fesoasoani atu ke fai sau fakaikuga.—Fili. 4:6, 7; Iako. 1:5.

4. Ne a mea e mafai o fesoasoani atu ki a koe ke malamalama faka‵lei i se tala i te Tusi Tapu?

⁴ (2) Fakaataata i tou mafaufau. Ne tuku mai ne Ieova ki a tatou a te atamai fakaofoofogia ke fakaataata ne tatou a mea. Ko te mea ke mafai o malamalama faka‵lei koe i se tala i te Tusi Tapu, taumafai o fakaataata a mea ne ‵tupu i te tala kae fai pelā i a koe ko te tino tenā i o ia te tala. Taumafai o fakaataata a mea kolā ne lavea ne te tino tenā kae ke maua foki ne koe a lagonaga kolā ne maua ne te tino tenā i te tala.

5. Se a te mafaufau ‵loto, kae e mafai pefea o mafaufau ‵loto koe?

⁵ (3) Mafaufau ‵loto. A te mafaufau ‵loto ko te mafaufau faka‵lei ki mea ne faitau ne koe mo te auala e aoga ei a fakamatalaga konā ki a koe kae ke ‵loto tou malamalama i se mataupu. A te faitau ki te Tusi Tapu e aunoa mo te mafaufau ‵loto, e ‵pau mo te onoono atu fua kiki mea kolā ka fai ki ei se kūka. A te mafaufau ‵loto e ‵pau mo te tuku fakatasi ne koe o mea konā ke fai te kūka, ko fatoa mafai ei o iloa ne koe te gali o te kūka. Ke fesoasoani atu ki a koe ke mafaufau ‵loto, e mafai o fesili kae tali ne koe a vaegā fesili penei: ‘Ne a mea ne fai ne te tino i te tala ke faka‵lei aka tena fakalavelave? Ne fesoasoani atu pefea a Ieova ki a ia? E fakaaoga pefea a mea ne tauloto ne au mai ei ke kufaki ne au a tofotofoga?’

6. Kaia e ‵tau ei o fakagalue ne tatou a ‵tou mea ne tauloto?

⁶ (4) Fakagalue. Ne fai mai Iesu me kafai e se fakagalue ne tatou a ‵tou mea ne tauloto, e ‵pau tatou mo te tagata telā ne faite tena fale i luga i te one. E galue malosi a ia kae māumāu fua ana taimi. Kaia? Me kafai ko poko se matagi kae tupu se lofiaga, ka siga tena fale. (Mata. 7:24-27) I se auala tai ‵pau, kafai e ‵talo tatou, fakaataata i ‵tou mafaufau, kae mafaufau ‵loto, kae e se fakagalue a mea ne tauloto ne tatou, ko seai se aoga o ‵tou taumafaiga. Kafai ko tofotofogina ‵tou fakatuanaki ne fakalavelave io me ko fakasauaga, ka se malosi eiloa. I te suā feitu, kafai e sukesuke kae fakagalue ne tatou a ‵tou mea ne tauloto, ka ‵lei a ‵tou fakaikuga e fai, ka maua ne tatou te filemu, kae ka gasolo aka o malosi a te ‵tou fakatuanaki. (Isa. 48:17, 18) Kafai e fakaaoga ne tatou a auala e fa ne fatoa oti ne sau‵tala tatou ki ei, ke onoono ki mea e mafai ne tatou o tauloto mai se mea ne tupu i te olaga o te Tupu ko Tavita.

7. Se a te tala mai te Tusi Tapu ka sau‵tala tatou ki ei?

⁷ Kai isi aka loa se taimi ne fakalogo‵mae koe ne se taugasoa io me se tino o tou kāiga? Kafai ko oti, ka aoga malosi loa ki a koe a te tala o te tamaliki tagata a te Tupu ko Tavita ko Apisaloma, telā ne fakalogo‵mae ne ia tena tamana kae taumafai o kaisoa te tulaga tupu mai i a ia.—2 Samu. 15:5-14, 31; 18:6-14.

8. Se a te mea e mafai o fai ne koe ke maua te fesoasoani o Ieova?

⁸ (1) ‵Talo. I te taimi koi mafaufau koe ki te tala, fakaasi atu ki a Ieova ou lagonaga e uiga ki faifaiga se ‵lei ne fai atu ki a koe. (Sala. 6:6-9) Fakaasi ‵tonu ki a Ieova ou lagonaga. Ko fakamolemole ei ki a Ieova ke fesoasoani atu ke  lavea ne koe a fakatakitakiga ke fakafesagai atu koe ki te tulaga faigata tenei.

9. Ne a mea ne ‵tupu i te va o Tavita mo Apisaloma?

⁹ (2) Fakaataata i tou mafaufau. Mafaufau ki mea ne ‵tupu i te tala tenei, kae fakaataata i tou mafaufau a te auala ne pokotia i ei te tupu ko Tavita. Ne galue malosi a Apisaloma te tama tagata a Tavita i tausaga e uke o fakakolekole a tino ke fia‵fia ki a ia. (2 Samu. 15:7) I te okoga ki te taimi tonu, ne uga ne Apisaloma a sipai ki te fenua kātoa o Isalaelu ke fai a tino ke talia ne latou a ia e pelā me ko te lotou pule. Ne fakakolekole foki ne ia te taugasoa pili kae se tino fakatonutonu foki a Tavita ko Aitofele, ke kau atu ki tena faifaiga ‵teke. Ne fai ne Apisaloma a ia eiloa mo fai te tupu kae taumafai o tamate a Tavita, telā kāti e masaki malosi ‵ki i te taimi tenā. (Sala. 41:1-9) Ne logo a Tavita i te togafiti tenā kae tele kea‵tea mo Ielusalema. Fakamuli ifo, ne taua a te kautau a Apisaloma mo tino kolā e fakamaoni ki a Tavita. Ne takavale te kautau ‵teke, kae ne tamate atu i ei te tama tagata a Tavita ko Apisaloma.

10. Ne a mea kāti ne mafai o fai ne te Tupu ko Tavita?

¹⁰ Ka oti, fakaataata i tou mafaufau a lagonaga o Tavita i te taimi ne ‵tupu ei a mea katoa konei ki a ia. Ne alofa a ia ki a Apisaloma kae talitonu ki a Aitofele. Kae ko ana taugasoa ‵pili konei ne fakatogafiti ne lāua a ia. Ne fakalogo‵mae malosi ne lāua a ia kae taumafai foki o tamate a ia. Ne faigofie fua ke se talitonu a Tavita ki nisi taugasoa o ia kae mafaufau me kāti ko ‵kau foki latou ki a Apisaloma. Ne mafai foki o mafaufau fua a ia ki a ia eiloa kae manako o tele kea‵tea i a ia eiloa mai te fenua tenā. Io me kāti ne mafai fua o loto vāivāi a ia. Kae seki ai loa se mea i mea konā ne fai ne Tavita. I lō te fai penā, ne manumalo a ia i te tofotofoga faigata tenei. Kaia ne mafai o fai ne ia te mea tenā?

11. Ne a mea ne fai ne Tavita i te tulaga faigata tenei?

¹¹ (3) Mafaufau ‵loto. Ne a fakatakitakiga fakavae e mafai o tauloto ne koe mai te tala tenā? Tali aka te fesili tenei, “Ne a mea ne fai ne Tavita?” Ne seki polepole a Tavita kae fai fakavave ne ia ne fakaikuga sē ‵lei. Ne seki fakatalave a ia kae mataku foki telā ko se iloa ne ia me se a tena mea ka fai. I lō te fai penā, ne ‵talo a ia ki a Ieova mō se fesoasoani. Ne fakamolemole foki a ia ki ana taugasoa ke fesoasoani atu. Kae ne gasue fakavave a ia o fakataunu a fakaikuga ne fai ne ia. E tiga eiloa ne logo‵mae malosi a ia, ne tumau loa te talitonu o Tavita ki nisi tino kae ne seki ai se loto takalialia i a ia. Ne tumau a ia i te talitonu ki a Ieova kae talitonu foki ki ana taugasoa.

12. Ne a mea ne fai ne Ieova ke fesoasoani ki a Tavita?

¹² Ne fesoasoani atu pefea a Ieova ki a Tavita? Kafai e fai au sukesukega, ka iloa ne koe me ne tuku atu ne Ieova ki a Tavita a te malosi e manakogina ke kufaki i te tofotofoga tenei. (Sala. 3: 1-8; fakamatalaga mai luga) Ne fakamanuia ne Ieova a fakaikuga ne fai ne Tavita. Kae ne fesoasoani a ia ki taugasoa fakamaoni o Tavita i te taimi ne taua atu latou ke puipui te lotou tupu.

13. E mafai pefea o fakaakoako koe ki a Tavita māfai e fakalogo‵mae malosi koe ne se tino? (Mataio 18:15-17)

¹³ (4) Fakagalue. Ke fesili ifo, ‘E mafai pefea o fakaakoako au ki a Tavita?’ E ‵tau mo koe o gasue fakavave o faka‵lei te fakalavelave. E ‵tusa mo te fakanofonofoga, e mafai o fakagalue ne koe a pati fakatonutonu a Iesu kolā e tusi i te Mataio 18 io me ko te fakatakitakiga e maua mai ei. (Faitau te Mataio 18:15-17.) Kae e se ‵tau o fai fakavave ne koe ne fakaikuga kolā e fakavae mai fua i ou lagonaga. E ‵tau mo koe o ‵talo ki a Ieova ke tuku atu te loto filemu mo te poto e manakogina ke fakafesagai atu ki te fakalavelave. Ke tumau i te talitonu ki ou taugasoa. Kae ke loto fiafia o talia so se fesoasoani telā e ofo mai ki a koe. (Faata. 17:17) Kae sili atu i ei, fakalogo ki pati fakatonutonu mai i a Ieova kolā e maua i tena Muna.—Faata. 3:5, 6.

14. Ne a tulaga faiga‵ta ka fai ei ke saga koe o faitau ki te 2 Timoteo 1:12-16; 4:6-11, 17-22?

¹⁴ E mata, e fepaki koe mo ‵tekemaiga mai tino o tou kāiga? Io me nofo koe i se fenua telā e fakatapu ei a te galuega a tino o Ieova? Kafai e penā loa, kāti ka fakamalosi atu eiloa ki a koe a te faitau ki te 2 Timoteo 1:12-16 mo te 4:6-11, 17-22. * Ne tusi ne Paulo a vaega konei o te Tusi Tapu i te taimi ne ‵pei a ia i te falepuipui.

15. Se a te mea e mafai o fakamolemole koe ki a Ieova?

¹⁵ (1) ‵Talo. Koi tuai o faitau koe ki fuaiupu konā, fakaasi atu ki a Ieova a tou fakalavelave mo ou lagonaga. Fakaasi atu ki ei ou lagonaga ‵tonu. Ko fakamolemole atu i ei ki a Ieova ke fesoasoani atu ke lavea ne koe a fakatakitakiga i tala e uiga ki tofotofoga o Paulo ke iloa ne koe o fakafesagai atu ki tou fakalavelave.

16. Ne a mea ne ‵tupu ki a Paulo?

¹⁶ (2) Fakaataata i tou mafaufau. Fakaataata i tou mafaufau i a koe ko Paulo. Ko ‵loka a ia i se falepuipui i Loma. Ne ‵pei a ia muamua ki te falepuipui, kae i te taimi nei, ko mautinoa i a ia me ka tamate a ia. Ko oti ne tiaki ne ana nisi taugasoa a ia, kae ko fi‵ta valevale tou tagata.—2 Timo. 1:15.

17. Ne a mea kāti ne mafai o fai ne Paulo?

¹⁷ Kāti ne mafai fua o mafaufau a Paulo me moi ne fai ne ia se fakaikuga fakaa‵tea i aso mua, kāti e se ‵pei a ia ki te falepuipui. E mafai foki o kaitaua a ia ki tāgata i te kogā koga i Asia kolā ne tiakina ne latou a ia, kae ka fai foki ei ke se talitonu a ia ki nisi taugasoa o ia. Kae ne seki fai ne Paulo se mea i mea konā. Kaia ne mafai ei o talitonu a ia me koi fakamaoni eiloa ana taugasoa ki a ia kae ka tuku atu ne Ieova te taui ki a ia?

18. Ne saga atu pefea a Paulo ki te tofotofoga ne fepaki mo ia?

¹⁸ (3) Mafaufau ‵loto. Tali aka te fesili tenei, “Ne a mea ne fai ne Paulo?” Tiga loa e iloa ne ia me ko pili a ia o tamate, ne seki puli i a Paulo a te mea tāua tenei—ko te avatuga o vikiga ki a Ieova. Kae ne tumau eiloa a ia i te mafaufau ki auala e mafai o fakamalosi atu a ia ki nisi tino. Ne fakalagolago a ia ki a Ieova e auala i te ‵talo faeloa. (2 Timo. 1:3) I lō te saga atu ki tino kolā ne tiaki ne latou a ia, ne lasi tena loto fakafetai ki ana taugasoa a‵lofa kolā ne fesoasoani atu mo te fakamaoni ki a ia. E se gata i ei, ne tumau loa a Paulo i te faiga o ana sukesukega ki te Muna a te Atua. (2 Timo. 3:16, 17; 4:13) Kae sili atu i ei, ne talitonu katoatoa a ia me i a Ieova mo Iesu e a‵lofa ki a ia. Ne seki tiaki ne lāua a ia kae ka avatu ne lāua te taui ‵lei ona ko tena fakamaoni.

19. Ne fesoasoani atu pefea a Ieova ki a Paulo?

¹⁹ Ne fakailoa ne Ieova ki a Paulo me ‵tau mo ia o kufaki a fakasauaga ona ko tena fai mo fai se Kelisiano. (Galu. 21:11-13) Ne fesoasoani atu pefea a Ieova ki a Paulo? Ne tali ne ia a ‵talo a Paulo kae tuku malielie atu ne ia te malosi. (2 Timo. 4:17) Ne mautinoa i a Paulo me ka maua ne ia te taui telā ne galue malosi a ia ke maua ne ia. Ne fakamalosi foki ne Ieova a taugasoa fakamaoni o Paulo ke fesoasoani atu ki a ia.

20. E mafai pefea o fakaakoako koe ki te fakatuanaki o Paulo telā e fakaasi mai i te Loma 8:38, 39?

²⁰ (4) Fakagalue. Ke fesili ifo, ‘E fakaakoako pefea au ki a Paulo?’ Pelā mo Paulo, ke fakamoe‵moe me ka fakasauagina tatou ona ko te ‵tou fakatuanaki. (Male. 10:29, 30) Ko te mea ke tumau te ‵tou fakamaoni mai lalo i tofotofoga, e ‵tau o fakalago‵lago ki a Ieova i ‵talo kae fakatumau ‵tou polokalame o sukesukega totino. Kae ‵tau faeloa o masaua ne tatou me tasi o mea tāua e ‵tau o fai ne tatou ko te avatuga o  vikiga ki a Ieova. E mafai o mautinoa i a tatou me ka se tuku tiaki ne Ieova tatou kae seai loa se mea e mafai o fai ne se tino ke taofi aka ei tena alofa ki a tatou.—Faitau te Loma 8:38, 39; Epe. 13:5, 6.

21. Ne a mea ne fesoasoani atu ki a Aya mo Hector ke manumalo i fakalavelave ne fe‵paki mo lāua?

²¹ Faitalia ‵tou fakanofonofoga, e mafai o fakamalosi mai a tala i te Tusi Tapu ki a tatou. E pelā mo Aya, se paenia i Tiapani, ne fai mai me i te tala o Iona ne fesoasoani atu ki a ia ke mo a e mataku a ia i te talai ki tino. A Hector, se talavou i Indonesia telā ana mātua e se tapuaki ki a Ieova, ne fakamalosi aka ne te tala o Luta ke tauloto e uiga ki a Ieova kae tavini atu ki a ia.

22. E maua pefea ne koe a mea aoga mai koniseti faka-te-Tusi Tapu io me ko te fakasologa o mataupu ko te “Imitate Their Faith”?

²² E maua ne koe i fea a tala i te Tusi Tapu kolā ka fakamalosi ei koe? A ‵tou vitio mo koniseti fakalogo‵logo mo te fakasologa o te mataupu ko te “Imitate Their Faith” e mafai o fesoasoani mai ke malamalama faka‵lei tatou i tala i te Tusi Tapu. * Mai mua o onoono koe ki ei, fakalogologo io me faitau ki tala konei, fakamolemole ki a Ieova ke fesoasoani atu ki a koe ke maua a manatu tāua kolā e mafai o fakagalue ne koe. Fakaataata i tou mafaufau i a koe ko te tino i o ia te tala. Mafaufau ‵loto ki mea ne fai ne tavini pele a Ieova konei mo te auala ne fesoasoani a ia ki a latou ke manumalo i tulaga faiga‵ta. Ko fakagalue ei ne koe a manatu tāua ki tou fakanofonofoga. Fakafetai ki a Ieova mo te fesoasoani ko tuku atu ne ia ki a koe. Kae fakaasi atu tou loto fakafetai ki te fesoasoani ko maua ne koe mai te ‵sala ki avanoaga ke fakamalosi kae fesoasoani atu ki nisi tino.

23. E ‵tusa mo te Isaia 41:10, 13, se a te mea ne tauto a Ieova me ka fai ne ia ki a tatou?

²³ E mafai o faigata ‵ki a te olaga i te lalolagi tenei e pule ne Satani. Kae i nisi taimi ko se iloa ne tatou me ne a mea e ‵tau o fai. (2 Timo. 3:1) Kae se ‵tau mo tatou o manava‵se io me ma‵taku. E iloa ne Ieova a mea e fe‵paki mo tatou. Kafai e ma‵nako tatou ki se fesoasoani, ne tauto mai a ia me ka puke ‵mau a ia ki a tatou i tena lima fakaatamai malosi. (Faitau te Isaia 41:10, 13.) Ona ko te ‵tou loto tali‵tonu ki tena fesoasoani, e mafai o maua ne tatou a te malosi mai te Tusi Tapu kae ke manumalo i so se tulaga faigata.