1. E tusa mo te Mataio 24:9, kaia e se ‵tau o ‵poi tatou māfai e takalialia mai te lalolagi ki a tatou?

NE FAITE ne Ieova tatou ke fakaasi atu te alofa kae ke alofagina foki. Tela la, kafai e fakalogo‵mae mai se tino, e logo‵mae kae ma‵taku foki tatou. E pelā me se fakaakoakoga, ne fai mai se tuagane e igoa ki a Georgina, telā e nofo i Eulopa penei: “I te taimi ko 14 i ei au, ne takalialia mai toku mātua me tavini au ki a Ieova. Ne fanoanoa ki au kae kamata o fakalotolotolua me ko au se tino ‵lei me ikai.” * Ne fai mai te taina e igoa ki a Danylo penei: “I te taimi ne pago ei au ne sotia, fakalogo‵mae kae fakamatakutaku au, ona ko au se tokotasi o Molimau a Ieova, au ne mataku kae ne ma foki.” E fakalogo‵mae mai a mea konā, kae se ‵poi tatou i ei. Ne ‵valo mai a Iesu me ka takalia‵lia mai te lalolagi ki a tatou.—Faitau te Mataio 24:9.

2-3. Kaia e takalia‵lia mai ei a tino ki soko o Iesu?

² E takalia‵lia te lalolagi ki soko o Iesu. Kaia? Me pelā mo Iesu, a tatou , “e se ne vaega o te lalolagi.” (Ioa. 15:17-19) Ona ko te mea tenā, e tiga eiloa e āva tatou ki malo o tāgata, e se tapuaki tatou ki ei io me ko fakatusa e sui ei latou. E tapuaki fua tatou ki a Ieova tokotasi. E fakatāua ne tatou a te aiā o te Atua ke pule atu ki tino—ko te aiā telā ne kinau atu ki ei a Satani mo ana “tama.” (Kene. 3:1-5, 15) E talai tatou ki tino me i te Malo o te Atua ko te fakamoemoega fua e tasi telā ka fakaseai ne ia a latou katoa kolā e ‵teke atu ki ei. (Tani. 2:44; Faka. 19:19-21) Te fekau tenā se tala ‵lei ki tino agamalū kae se tala masei ki tino amio ma‵sei.—Sala. 37:10, 11.

 ³ E takalia‵lia mai foki a tino ki a tatou me ola tatou e tusa mo tulaga amiotonu o te Atua. E ‵kese ‵mao eiloa mo tulaga o te lalolagi i mea tau amioga. E tokouke a tino i aso nei ko se masei ki a latou a faifaiga fakatauavaga sē ‵tau, pelā loa mo amioga ne fakaseai atu ei ne te Atua a tino i Sotoma mo Komolo! (Iuta 7) Ona ko te mea e faka‵logo tatou ki tulaga o te Tusi Tapu e uiga ki faifaiga konei, e tokouke a tino e fakatauemu mai kae taku ne latou a tatou ne tino va‵lea!—1 Pe. 4:3, 4.

4. Ne a uiga e mafai o fakamalosi tatou māfai e takalialia mai a tino ki a tatou?

⁴ Ne a mea e fesoasoani mai ke kufaki tatou māfai e takalialia mai a tino kae fakalogo‵mae mai? E ‵tau o maua ne tatou te fakatuanaki malosi me ka fesoasoani mai a Ieova ke kufaki tatou. E pelā mo se talita, e mafai ne te ‵tou fakatuanaki o “tamate . . . a matasana ‵ka a te tino masei.” (Efe. 6:16) Kae uke atu a mea e manakogina i lō fua te fakatuanaki. E ‵tau foki mo tatou o a‵lofa. Kaia? Me i te alofa “e se kaitaua vave.” E onosai kae kufaki ne ia a mea fakalogo‵mae katoa. (1 Koli. 13:4-7, 13) Ke onoono nei tatou ki te auala ka fesoasoani mai a te alofa ki a Ieova, te alofa ki ‵tou taina tali‵tonu, penā foki mo te alofa ki ‵tou fili ke kufaki tatou i te takalialia.

5. Ne fakamalosi aka pefea a Iesu ona ko tena alofa ki tena Tamana?

⁵ I te po mai mua o tamate a ia ne ana fili, ne fai atu a Iesu ki ana soko fakamaoni: “Au e alofa ki te Tamana, [tela la] e fai eiloa ne au a te fakatonuga ne tuku mai ne te Tamana ke fai ne au.” (Ioa. 14:31) Ko te alofa o Iesu ki a Ieova ne fakamalosi ei ke fakafesagai a ia ki tulaga faiga‵ta kolā ka fepaki mo ia. E mafai foki o fai tatou penā ona ko te ‵tou a‵lofa ki a Ieova.

6. E ‵tusa mo te Loma 5:3-5, e pefea a lagonaga o tavini a Ieova e uiga ki te kufaki māfai e takalia‵lia mai te lalolagi?

⁶ Ne fesoasoani atu faeloa a te alofa ki te Atua ke kufaki a tavini a Ieova i fakasauaga. E pelā mo te taimi ne fakatonu atu a te fono maluga a te kau Iutaia ki te kau apositolo ke fakagata te talai, ne fakamalosi ne te alofa ki te Atua a latou ke “faka‵logo ki te Atua e pelā me ko te pule i lō tāgata.” (Galu. 5:29; 1 Ioa. 5:3) Ko te alofa foki tenā ki te Atua ne fesoasoani atu ki ‵tou taina kolā ne fakasauagina ne malo pule ke tumau i te fakamaoni. I lō te loto vāi‵vai, e fai eiloa pelā me se tauliaga ke kufaki māfai ko takalia‵lia mai te lalolagi ki a tatou.—Galu. 5:41; faitau te Loma 5:3-5.

7. E ‵tau o pefea ‵tou faifaiga māfai ko ‵teke mai a tino o ‵tou kāiga?

⁷ Kāti a te tofotofoga lasi o tatou e vau mai tino o ‵tou kāiga ‵tonu. Kafai ko kamata o fia‵fia tatou ki te munatonu, e mafau‵fau a nisi tino o te kāiga me ko takitaki‵segina tatou. E mafai o mafau‵fau nisi tino me ko ma‵sei ‵tou ulu. (Fakatusa ki te Maleko 3:21.) E mafai foki o ‵teke mai latou e auala i fakasauaga. E se ‵tau o ‵poi tatou i vaegā ‵tekemaiga penei. Ne fai mai a Iesu: “A fili o te tagata ko tino eiloa o tena kāiga ‵tonu.” (Mata. 10:36) E tonu, faitalia me se a te kilokiloga a ‵tou kāiga ki a tatou, e se taku eiloa latou e pelā me ko ‵tou fili. E ‵kese mai ei, kafai e gasolo aka o lasi te ‵tou a‵lofa ki a Ieova, ka penā foki te ‵tou a‵lofa ki tino. (Mata. 22:37-39) Kae ka se mafai eiloa ne tatou o taofi aka a te ‵tou faka‵logo ki tulafono mo fakatakitakiga i te Tusi Tapu ko te mea fua ke fakafiafia ne tatou te suā tino.

8-9. Ne a mea ne fesoasoani atu ki se tuagane ke tu mautakitaki faitalia a ‵tekemaiga ne fepaki mo ia?

⁸ A Georgina, telā ne sae muamua mai, ne mafai o tu mautakitaki faitalia te ma‵losi o ‵tekemaiga mai tena mātua. Ne fai mai a Georgina: “Ne kamata o suke‵suke māua mo toku  mātua ki te Tusi Tapu fakatasi mo Molimau. Kae i se ono masina fakamuli ifo i te taimi ko manako au o kau ki fakatasiga, ne ‵teke malosi mai a toku mātua. Ne iloa ne au me fesokotaki sāle a ia mo aposetate, kae fakaaoga ne ia olotou fakamatalaga māfai e faipati mai ki a au. E fakamasei foki ne ia au, ‵futi oku laulu, ‵kumi toku ua, kae ‵pei kea‵tea aku tusi. I te otiga ne katoa toku 15, ne papatiso au. Ne taumafai toku mātua o taofi au mai te tavini ki a Ieova mai te ave ne ia au ke ‵nofo fakatasi mo nisi talavou kolā e fakaaoga vailakau tapu kae fai amioga ma‵sei. E faigata ke kufaki koe i ‵tekemaiga maise māfai e ‵mai i se tino telā e tau o alofa kae atafai atu ki a koe.”

⁹ Ne mafai pefea ne Georgina o kufaki? Ana muna: “I te aso ne ‵teke mai ei toku mātua ki au, ne fatoa oti eiloa ne faitau ne au te Tusi Tapu kātoa. Ko talitonu katoatoa nei au me ko maua ne au te munatonu, kae ne gasolo o ‵pili toku va mo Ieova. Ne ‵talo faeloa au ki a ia. I te taimi ne nofo ei au i te fale tenā, ne ‵kami au ne se tuagane ki tena fale, kae ne suke‵suke fakatasi māua ki te Tusi Tapu. I te taimi tenā, ne fakamalosi mai a taina mo tuagane ki a au i te Fale Tapuaki. Ne fai ne latou au e pelā me se vaegā o te lotou kāiga. Ne lavea ne au me sili atu te malosi o Ieova i lō tino kolā e ‵teke mai ki a tatou, faitalia me ko oi latou.”

10. E mafai pefea o loto tali‵tonu tatou ki a Ieova te ‵tou Atua?

¹⁰ Ne tusi mai te apositolo ko Paulo me seai se mea e mafai o “‵vae ne ia tatou kea‵tea mai te alofa o te Atua e auala i a Keliso Iesu te ‵tou Aliki.” (Loma 8:38, 39) E tiga eiloa e mafai o logo‵mae tatou mō se taimi, ka nofo mai faeloa a Ieova i ‵tou tafa o fakamafanafana kae fakamalosi tatou. Kae pelā mo te mea e fakaasi mai i te tala o Georgina, e fesoasoani mai foki a Ieova e auala i ‵tou kāiga pele faka-te-agaga.

11. Ne fesoasoani atu pefea a te alofa telā ne fakamatala mai ne Iesu i te Ioane 15:12, 13 ki ana soko? Taku mai se fakaakoakoga.

¹¹ I te po mai mua a ia o mate, ne fakamasaua atu a Iesu ki ana soko ke fakatau a‵lofa. (Faitau te Ioane 15:12, 13.) Ne iloa ne ia me i te fakamuamua o te alofa ki nisi tino ka fesoasoani atu ki a latou ke tumau i te ‵kau fakatasi kae ke kufaki māfai ko takalia‵lia mai te lalolagi. Mafaufau ki te fakaakoakoga a te fakapotopotoga i Tesalonia. Mai te taimi ne fakatu i ei ne fakasauagina a tino i ei. Kae ne fai a taina mo tuagane  i ei e pelā me ne fakaakoakoga o te fakamaoni mo te alofa. (1 Tesa. 1:3, 6, 7) Ne fakamalosi atu a Paulo ki a latou ke tumau i te fakaasi atu o te alofa kae ke “momea aka te fai ne koutou a te mea tenā.” (1 Tesa. 4:9, 10) Ne fakamalosi aka latou ne te alofa ke fakamafanafana a tino loto mafatia kae ke ‵lago ki tino vāi‵vai. (1 Tesa. 5:14) Ne tau‵tali latou i te fakatonuga a Paulo, i te lua o ana tusi telā ne tusi i se tausaga mai tua ifo me ne “gasolo aka faeloa o lasi atu. . . te otou a‵lofa te suā tino ki te suā tino.” (2 Tesa. 1:3-5) Ne fesoasoani atu te lotou a‵lofa ke mafai ne latou o kufaki a mea faiga‵ta mo fakasauaga.

12. I te taimi ne fai ei te taua, ne fakaasi atu pefea ne taina mo tuagane i se fenua e tasi a te fakatau a‵lofa?

¹² Mafaufau ki te tala o Danylo, telā ne sae muamua mai fakatasi mo tena avaga. I te taimi ne tupu ei se taua i se fakai ne ‵nofo i ei lāua, ne tumau lāua i te ‵kau atu ki fakatasiga, talai ki te ‵toe mea e mafai ne lāua, kae tuku atu meakai e maua ne lāua ki taina mo tuagane. Kae tasi te aso, ne olo atu a sotia mo olotou meatau ki a Danylo. “Ne fakatonu mai ke tiaki ne au taku talitonuga,” ko pati a Danylo. “I te taimi ne ita fitifiti ei au, ne ta ne latou au kae fakamatakutaku ne latou au kae fanafana olotou polofana ke seke mo toku ulu. Koi tuai o olo, ne fai mai latou me ka ‵foki mai latou o pukemalo taku avaga. Kae ne ‵mai fakavave a taina o puke māua o ave ki suā fakai i se tuleni. Ka se toe mafai o puli i a au a te a‵lofa o taina pele konā. I te ma okoatuga ki te suā fakai, ne tuku mai ne taina a meakai kae ne fesoasoani mai foki ke maua saku galuega mo se fale! Tenā, ne mafai ei o fai te ma fale e pelā me se koga e faka‵lafi ki ei a nisi Molimau kolā ne tele keatea mai te koga e fai ei te taua.” E fakaasi mai ne vaegā tala penā me fesoasoani mai te alofa faka-Kelisiano ke kufaki tatou māfai ko takalia‵lia mai a tino.

13. E fesoasoani mai pefea te agaga tapu ke kufaki tatou i te ‵tou taviniga ki a Ieova faitalia me takalia‵lia mai a tino ki a tatou?

¹³ Ne fai atu a Iesu ki ana soko ke a‵lofa ki olotou fili. (Mata. 5:44, 45) E mata, e faigofie ke fai penā? Ikai! Kae mafai o fai penā mai te fesoasoani o te agaga tapu o te Atua. E aofia i fuataga o te agaga tapu ko te Atua ki te alofa, te kufaki, te atafai, te agamalu mo te loto pulea. (Kala. 5:22, 23) E fesoasoani mai a uiga konei ke kufaki tatou i te takalialia. E tokouke a  tino ‵teke ko oti ne ‵fuli olotou loto ona ko te fakaasimaiga ne olotou avaga tali‵tonu, tama‵liki mo tuakoi a uiga gali konā. E tokouke foki a tino ‵teke ko oti ne fai mo fai ‵tou taina mo tuagane pele. Tela la, kafai e faigata ki a koe ke alofa ki a latou kolā e takalia‵lia ki a koe ona ko koe e tavini ki a Ieova, ‵talo mō te agaga tapu. (Luka 11:13) Kae ke talitonu katoatoa i auala o Ieova ko te ‵toe auala ‵lei faeloa.—Faata. 3:5-7.

14-15. Ne fesoasoani atu pefea te Loma 12:17-21 ki a Yasmeen ke fakaasi atu te alofa ki tena avaga faitalia tena ‵teke malosi atu ki a ia?

¹⁴ Mafaufau ki te tala o Yasmeen, telā e nofo i te Middle East. I te faiga tou fafine pelā me se Molimau a Ieova, ne mafaufau tena avaga i a ia ko oti ne fakaloiloigina kae ne taumafai tou tagata o taofi a ia mai te tavini ki a Ieova. Ne fakalogo‵mae ne tou tagata a ia kae fakamalosi atu ki ana kāiga penā foki ki se faifeau mo se tino faivailakau ke fakamatakutaku tou fafine kae ke ‵losi atu ki tou fafine mō te fakamaseiga o te lā kāiga. Ne kaitaua foki tena avaga ki taina i se fakatasiga a te fakapotopotoga! Ne fanoanoa faeloa a Yasmeen ona ko faifaiga sē atafai ne fakaasi atu ki tou fafine.

¹⁵ I te Fale Tapuaki ne maua ne Yasmeen a fakamafanafanaga mo fakamalosiga mai i ana kāiga faka-te-agaga. Ne fakamalosi atu a toeaina ke fakagalue ne tou fafine a pati e maua i te Loma 12:17-21. (Faitau) “Ne faigata ‵ki,” ko pati a Yasmeen. “Kae ne fakamolemole au ki a Ieova ke fesoasoani mai, kae ne fai ne au a te ‵toe mea e mafai o fai ke fakagalue a pati i te Tusi Tapu. Tela la, kafai ko laku valevale ne taku avaga a mea lailai i te umukuka ona ko te kaitaua, ne ‵fulu faka‵ma ne au. Kafai ko fakalogo‵mae ne ia au, ne tali atu au i te loto maulalo. Kae i te taimi ne masaki ei a ia, ne tausi ne au a ia.”

16-17. Ne a mea e tauloto ne koe mai te fakaakoakoga a Yasmeen?

¹⁶ Ne fakamanuiagina a Yasmeen me ne fakaasi atu ne ia te alofa ki tena avaga. Ne fai mai a ia: “Ne kamata o talitonu malosi taku avaga ki a au me faipati faeloa au ki te mea tonu. Ne kamata o fakalogologo mai a ia mo te āva māfai ko sau‵tala māua e uiga ki talitonuga, kae ne manako faeloa a ia o tausi te filemu i te fale. E fakamalosi faeloa ne ia au ke kau atu ki fakatasiga a te fakapotopotoga. Ne gasolosolo malielie o ‵lei te ma kāiga kae ne maua ne māua te filemu tonu. E fakamoemoe au me ka talia ne taku avaga te munatonu kae ka ‵kaufakatasi mo au i te taviniga ki a Ieova.”

¹⁷ E fakaasi mai i te tala o Yasmeen i te alofa  e “onosai i mea katoa, . . . e fakamoemoe ki mea katoa, e kufaki i mea katoa.” (1 Koli. 13:4, 7) A te takalialia e mafai o malosi kae fakalogo‵mae, kae malosi fakafia atu a te alofa. E ‵fuli ne ia a loto o tino. Kae fakafiafia ne ia te loto o Ieova. Kae faitalia te takalia‵lia mai faeloa o tino ‵teke ki a tatou, koi mafai eiloa o fia‵fia tatou. I te auala fea?

18. Kaia e mafai o fia‵fia tatou māfai e takalia‵lia mai a tino?

¹⁸ Ne fai mai a Iesu: “E fia‵fia koutou māfai e takalia‵lia a tino ki a koutou.” (Luka 6:22) E se fai ne tatou a mea ke takalia‵lia mai a tino ki a tatou. E se taumafai tatou ke fai pelā me ne matulo. Tela la, e mafai pefea o fia‵fia tatou māfai e takalialia mai a tino? Ke onoono tatou ki pogai e tolu. Muamua la, kafai e kufaki tatou, ko maua ne tatou te taliaga a te Atua. (1 Pe. 4:13, 14) Te lua, ka tāua ki a tatou te ‵tou fakatuanaki kae ka gasolo aka foki o malosi. (1 Pe. 1:7) Kae ko te ‵tolu, ka maua ne tatou te taui telā e tāua—ko te ola se-gata-mai.—Loma 2:6, 7.

19. Kaia ne fia‵fia ei te kau apositolo mai tua o te lotou ‵kiniga?

¹⁹ Mai tua malie o te toetu o Iesu, ne maua ne apositolo a te fiafia ne faipati a ia ki ei. Mai tua o te lotou ‵kiniga kae fakatonu atu ke taofi te talai atu, ne fia‵fia latou. Kaia? “Me ko taulia latou i mua o te Atua ke fakamasiasigina ona ko te igoa o Iesu.” (Galu. 5:40-42) Ne sili fakafia atu te lotou a‵lofa ki te lotou Matai i lō te lotou ma‵taku ki te takalia‵lia atu o olotou fili. Kae ne fakaasi atu ne latou te lotou a‵lofa mai te folafola atu o te tala ‵lei e “aunoa mo te ‵fiu.” E tokouke ‵tou taina i aso nei e tumau i te tavini atu mo te fakamaoni faitalia olotou tulaga faiga‵ta. E iloa ne latou me e se mafai o puli i a Ieova olotou galuega mo te lotou a‵lofa mō tena igoa.—Epe. 6:10.

20. Se a te mea ka tauloto ne tatou i te suā mataupu?

²⁰ Ka takalia‵lia a te lalolagi ki a tatou ke oko loa ki te fakaotiga o te olaga tenei. (Ioa. 15:19) Kae e se ‵tau o ma‵taku tatou. E pelā mo te mea ka lavea ne tatou i te suā mataupu, “ka fakamalosi . . . kae puipui” ne Ieova ana tino fakamaoni. (2 Tesa. 3:3) Tela la, ke na tumau tatou i te a‵lofa ki a Ieova, a‵lofa ki ‵tou taina mo tuagane, kae ke a‵lofa foki ki tou fili. Kafai e tau‵tali tatou i te manatu fesoasoani tenei, ka tumau tatou i te ‵kaufakatasi kae ma‵losi i te feitu faka-te-agaga, ka faka‵malu ne tatou a Ieova, kae ka fakamaoni atu ne tatou i te alofa e sili atu tena malosi i lō te takalialia.