1, 2. Ne a fesili e ‵sae aka ona ko pati a Iesu i te Mataio 24:14?

FAITALIA me e lotoma‵lie io me e ‵teke malosi mai a tino ki a tatou, e fakafiti fua ne nai tino me e lauiloa a Molimau a Ieova, ona ko te lotou galuega talai. Kāti ko oti foki ne fetaui koe mo tino i tau galuega talai kolā ne fai mai me faitalia te sē fia‵fia o latou ki ‵tou talitonuga, e āva mai latou ona ko te galuega e fai ne tatou. E pelā mo te mea e iloa ne tatou, ne ‵valo mai ne Iesu me e ‵tau o talai atu te tala ‵lei o te Malo ki te lalolagi nofoaki kātoa. (Mata. 24:14) Kae e iloa pefea ne tatou me i te galuega e fai ne tatou ko te fakataunuga o te valoaga a Iesu? E mata, e fakaasi atu ne tatou te fia ‵poto ona ko te mea ko tatou fua e fai ne tatou te galuega tenei?

² E mafau‵fau a potukau fakalotu e uke me e talai atu ne latou te Tala ‵Lei. Kae ko olotou taumafaiga e gata eiloa i a latou, i olotou lotu, io me ko polokalame fakasalalau—i televise io me ko te itaneti. E fakasino atu a nisi tino ki olotou faifaiga fesoasoani fakavolenitia io me ko olotou taumafaiga i mea tau togafiti fakatokita mo akoakoga. E mata, e fetaui ‵lei olotou faifaiga mo mea ne fakatonu atu a   Iesu ki ana soko ke fai?

3. A te fakatonuga telā ne fakamau i te Mataio 28:19, 20, ne a mea e fa e manakogina ke fai ne soko o Iesu?

 ³ E mata, e se ‵tau o ga‵lue malosi a soko o Iesu, kae faka‵tali ki tino ke olo atu ki a latou? Ikai, e se penā loa! Mai tua o tena toetuga, ne faipati atu a Iesu ki te fia selau o ana soko kae fai atu ki a latou: “Tela la, olo atu koutou ki fenua katoa o fai a tino i ei mo fai a soko, kae papatiso atu latou . . . , akoako atu latou ke faka‵logo ki mea katoa ne fakatonu atu ne au ki a koutou. Kae kiloke! Au e fakatasi faeloa mo koutou i aso katoa ke oko eiloa ki te gataga o te olaga tenei.” (Mata. 28:19, 20) Tela la, e fa a mea e manakogina ke fai ne tatou. E ‵tau mo tatou o fai a soko, papatiso latou, akoako atu latou, kae se a te mea muamua e ‵tau o fai ne tatou? Ne fai mai a Iesu: “Olo atu”! Mai te fakatonuga tenei, ne fai mai se tino poto i mea tau Tusi Tapu: “Ke ‘olo atu’ ko te galuega a tino tali‵tonu takitasi, faitalia me e ‵tau o olo atu i te auala io me ki te suā feitu o te moana.”—Mata. 10:7; Luka 10:3.

4. Ne a mea e aofia i te fai mo fai ne “tino faiika ki tino”?

⁴ E mata, ne fakasino atu a Iesu ki taumafaiga takitasi o ana soko, io me ne fakauiga a ia ki se galuega telā e fakatoka faka‵lei e pelā me se potukau ke talai atu te tala ‵lei? Ona ko te mea e se mafai ne tino katoa o olo atu “ki fenua katoa,” e manakogina i te galuega tenei a taumafaiga a tino e tokouke kolā e fakatoka faka‵lei. Ne fakaasi mai ne Iesu a te tokouke i te taimi ne ‵kami ei ne ia ana soko ke fai mo “tino faiika ki tino.” (Faitau te Mataio 4:18-22.) A te vaegā faiika telā ne fakasino atu a ia ki ei, e se ko te faiika telā e fai fua ne se tino faiika e tokotasi mai te fakaaoga o te sisi mo te poa, kae faka‵tali ke ‵lave te ika. I lō te fai penā, ne aofia i ei a te fakaaogaga o se tili—se galuega ‵mafa telā e manakogina i nisi taimi a taumafaiga ‵kau fakatasi a tino e tokouke.—Luka 5:1-11.

5. Ne a fesili e fa e ‵tau o tali aka, kae kaia?

⁵ Ke iloa aka me ko oi a tino kolā e fai ne latou a te talaiga o te tala ‵lei i aso nei e ‵tusa mo te fakataunuga o te valoaga a Iesu, e ‵tau o tali aka ne tatou a fesili e fa konei:

• Se a te fekau e ‵tau o fai atu i te galuega talai?

• Se a te lagonaga tonu e ‵tau o maua mō te faiga o te galuega tenei?

• Ne a auala e ‵tau o fakaaoga?

• E pefea te lasi mo te leva e ‵tau ei o fai te galuega talai?

A tali ki fesili konei ka fesoasoani mai ke iloa a tino kolā e fai ne latou a te galuega fakaola tenei kae ke fakamalosi aka foki ‵tou fakaikuga ke tumau eiloa mo te fakamaoni i ei.—1 Timo. 4:16.

6. Kaia e mafai ei ne koe o fai atu mo te loto talitonu me e talai atu ne Molimau a Ieova a te fekau tonu?

⁶ Faitau te Luka 4:43. Ne talai atu ne Iesu “te tala ‵lei o te Malo,” kae e fakamoemoe a ia ke fai foki penā ana soko. Se a te potukau e talai atu ne latou te fekau tenā “ki fenua katoa”? E manino ‵lei a te tali—ko Molimau a Ieova. Ke oko foki ki nisi tino ‵teke, e lavea ‵lei ne latou a te manatu tonu tenei. E pelā mo te faifeau misionale Katolika ne fai atu ki se Molimau me ne nofo atu a ia i fenua kese‵kese e uke kae ko oti ne fesili atu a ia ki Molimau i fenua takitasi me se a te fekau e talai atu ne latou. Se a te tali ne tuku atu ki a ia? Ne fai atu te faifeau: “Ne va‵lea katoa latou me e ‵pau eiloa te tali ne tuku mai ne latou: ‘Ko te tala ‵lei o te Malo.’ ” Kae i lō te “va‵lea,” ne fealofani kae tasi eiloa te manatu ne fai‵pati ki ei a Molimau konā, e pelā eiloa mo te mea e ‵tau o fai ne Kelisiano. (1 Koli. 1:10) Kae ne  fakafokifoki atu faeloa ne latou a te fekau telā e maua i Te Faleleoleo Maluga—E Folafola Atu ei te Malo o Ieova. A te mekesini tenei e maua i ‵gana e 254 kae e ‵lomi a ‵kopi toeitiiti ko kātoa te 59miliona i masina katoa, telā e fai ei mo fai te ‵toe mekesini lauiloa i te lalolagi kātoa.

7. E iloa pefea ne tatou me e se talai atu ne Fenua Kelisiano a te fekau tonu?

⁷ E se talai atu ne faifeau o Fenua Kelisiano a te Malo o te Atua. Kafai e fai‵pati latou e uiga ki te Malo o te Atua, e fakasino atu a tino e tokouke ki ei e pelā me se lagonaga io me se mea i loto o se Kelisiano. (Luka 17:21) E se fesoasoani atu latou ki tino ke malamalama me i te Malo o te Atua se pulega faka-te-lagi telā e fai a Iesu Keliso mo Pule i ei, kae ko pili o fakaseai atu ne ia a mea ma‵sei katoa mai i te lalolagi tenei. (Fa. 19:11-21) I lō te fai penā, e ‵lei atu ki a latou ke fakamasausau ki a Iesu i te Kilisimasi io me ko te Eseta. E foliga mai me e seai eiloa se lotou mea e iloa e uiga ki mea ka fai ne Iesu e pelā me ko te Pule fou o te lalolagi. Ona ko te mea e se iloa ne latou a te fekau telā e ‵tau o talai atu ne latou, e mata, e ‵poi tatou me se iloa foki ne latou a te lagonaga tonu e ‵tau o maua mō te faiga o te galuega tenei?

8. Se a te lagonaga tonu e ‵tau o maua mō te faiga o te galuega talai?

⁸ Se a te lagonaga tonu e ‵tau o maua mō te faiga o te galuega talai? E se ‵tau o fai ke taetae mai a tupe kae faite ki ei a matugā fale ‵lasi. Ne fai atu a Iesu ki ana soko: “Ne maua ne koutou a mea konei e aunoa mo se ‵togi, tuku atu foki e aunoa mo se ‵togi.” (Mata. 10:8) E se ‵tau o fai te Muna a te Atua e pelā me se pisinisi. (2 Koli. 2:17) E se ‵tau o taumafai a tino kolā e talai atu te fekau ke maua ne latou a mea aoga mai te galuega e fai ne latou. (Faitau te Galuega 20:33-35.) Faitalia te manino ‵lei o te fakatakitakiga tenei, ko ‵saga atu eiloa a te ukega o lotu ki te salasalaga o tupe io me ko taumafaiga ko te mea ke mafai o maua olotou tupe mo tausi latou. E isi ne olotou faifeau mo nisi tino ga‵lue e tokouke kolā e ‵togi. I te ukega o taimi, e maua eiloa ne takitaki lotu i Fenua Kelisiano a koloa e uke.—Fa. 17:4, 5.

9. Ne fakaasi mai pefea ne Molimau a Ieova me e maua ne latou a te lagonaga tonu mō te ‵kau atu ki te galuega talai?

⁹ Se a te tala o Molimau a Ieova e uiga ki te mauaga o olotou tupe? E ‵lago atu eiloa ki te lotou galuega a tupe kolā e tuku fakameaalofa atu. (2 Koli. 9:7) E seai ne tupe e ‵tae i olotou Fale Tapuaki io me ko fono. Kae i te tausaga fua ko teka, ne fakamāumāu ne Molimau a Ieova a itula e 1.93 piliona i te talaiatuga o te tala ‵lei mo te faiga o akoga faka-te-Tusi Tapu sē ‵togi e toko iva miliona tupu i masina katoa. Se mea fakaofoofogia me e se gata fua i te seai o se lotou ‵togi mō te lotou galuega kae e fia‵fia foki latou o fakamāumāu olotou tupe ki ei. I te taimi ne faipati mai ei e uiga ki Molimau a Ieova, ne fai mai se tino fai sukesukega e tokotasi: “A te lotou fakamoemoega tāua ko te talaiatuga mo te akoakoatuga. . . . E seai ne olotou faifeau kolā e ‵tau o ‵togi.” Se a te lagonaga tonu e maua ne tatou mō te faiga o te galuega tenei? A te tali faigofie, e fakaiku aka eiloa ne tatou ke fai a te galuega tenei ona ko te ‵tou a‵lofa ki a Ieova mo ‵tou tuakoi. A te uiga loto fiafia tenei ko te fakataunuga o te valoaga i te Salamo 110:3 (Faitau.)

10. Ne a auala ne fakaaoga ne Iesu mo ana soko ke talai atu?

¹⁰ Ne a auala ne fakaaoga ne Iesu mo ana soko ke talai atu te tala ‵lei? Ne olo atu latou ki tino i so se koga ne mafai o maua ne latou i ei—i koga e tokouke i ei a tino mo fale totino.  Ne aofia i te galuega talai a te ‵sala atu ki tino loto ‵lei mai fale ki fale. (Mata. 10:11; Luka 8:1; Galu. 5:42; 20:20) Ne fakaasi mai i te auala tenei a te sē fakailoga tino.

11, 12. I te faiga te galuega talai, e pefea a taumafaiga a Fenua Kelisiano māfai e fakatusa ki tino o Ieova?

¹¹ E mata, e ‵pau te auala e talai atu a lotu i Fenua Kelisiano mo te auala ne talai atu ei a Iesu mo ana soko? I te ukega o koga, e fia‵fia eiloa a tino ‵lotu ke fai ne faifeau ‵togi a te galuega talai. Kae i lō te fai mo fai ne “tino faiika ki tino,” e foliga mai me e sili atu te manava‵se o faifeau i Fenua Kelisiano ki te tausiga fua o “ika” kolā ko maua ne latou. E tonu, i nisi taimi e mafai o taumafai a nisi faifeau ke fakamalosi aka se vaegā talaiga. E pelā mo te kamataga o te tausaga ko te 2001, ne fai mai a te Pope ko John Paul II i se tusi: “I te fia o tausaga, ne fakafoki‵foki atu faeloa ne au a lāuga ki tino talai ‵fou. Tenei eiloa te mea e fai faeloa ne au. . . E ‵tau o toe ati aka ne tatou i a tatou a te loto finafinau telā ne ‵ka pelā me se afi i a Paulo, telā ne tagi pakalaga atu penei: ‘Kalofa eiloa au māfai e se talai atu ne au te Tala ‵Lei.’ ” Ne toe fai mai te pope me i te galuega tenei “e se ‵tau fua o tuku atu ki se potukau o ‘tino apo’ kae e ‵tau o fai mo fai te tiute o sui katoa o Tino o te Atua.” Kae e tokofia ne ‵saga atu ki te fakatagi tenei?

¹² Ne a tala e uiga ki Molimau a Ieova? Ko latou fua e talai atu me i a Iesu ko pule mai nei e pelā me ko te Tupu talu mai te 1914. E pelā mo te mea ne fakatonu mai ne Iesu, e fakatulaga muamua eiloa ne latou a te galuega talai. (Male. 13:10) A te tusi ko te Pillars of Faith—American Congregations and Their Partners, e fai mai: “Mō Molimau a Ieova, e fakatāua atu ne latou a te galuega fakamisionale i lō nisi mea katoa.” I te fakasino atu ki fakamatalaga ne fai ne se Molimau, ne fai mai te tino tusitala: “Kafai ko fe‵paki latou mo te fiakai, te sē sologa, mo masaki, e taumafai latou ke fesoasoani atu, . . . kae e se mafai o puli i a latou a te lotou galuega tāua ko te fakaokoatuga o te fekau faka-te-agaga e uiga ki te oko mai o te gataga o te lalolagi mo mea e ‵tau o fai ke ‵sao atu.” E tumau eiloa a Molimau a Ieova i te fakaokoatuga o te fekau tenā, mai te fakaaogaga o auala ne fakaaoga ne Iesu mo ana soko.

13. E ‵tau o pefea te lasi o te galuega talai?

¹³ Ne fakamatala mai ne Iesu a te lasi o te galuega talai i te taimi ne fai mai me i te tala ‵lei ka “talai atu ki te lalolagi kātoa.” (Mata. 24:14) E ‵tau o fai a soko i “fenua katoa.” (Mata. 28:19, 20) E aofia i te mea tenā se galuega i te lalolagi kātoa.

14, 15. Ne a mea e fakamaoni mai me ne fakataunu eiloa ne Molimau a Ieova a te valoaga a Iesu e uiga ki te lasi o te galuega? (Ke onoono ki ata i te kamataga.)

¹⁴ Ke malamalama i te auala ne fakataunu ei ne Molimau a Ieova a te valoaga a Iesu e uiga ki te lasi o te galuega talai, ke mafau‵fau tatou ki nisi fakamatalaga ‵tonu. E nofo pelā ki te 600,000 o faifeau i lotu kese‵kese i te Iunaite Sitete, kae e nofo ki te 1,200,000 o Molimau a Ieova. I te lalolagi kātoa, e silia  malie atu i te 400,000 o faifeau i te Lotu Katolika Loma. Nei la, ke mafaufau ki te aofaki o Molimau kolā e aofia i te galuega talai o te Malo telā e fakavae ki te Tusi Tapu. I te lalolagi kātoa, e nofo ki te valu miliona o faifeau volenitia e talai atu ki tino i fenua e 240. Ko oko eiloa i te fakaofoofogia o te galuega ne fai, kae ko mea katoa konei e avatu ei a tavaega mo te ‵malu ki a Ieova!—Sala. 34:1; 51:15.

¹⁵ E pelā me ne Molimau a Ieova, e ma‵nako tatou ke oko atu ki tino e tokouke mo te tala ‵lei a koi tuai o oko mai te gataga. Ona ko te pogai tenei, e tu ‵kese eiloa tatou i te galuega e fai ne tatou ki te ‵fuliga mo te ‵lomiga o tusi faka-te-Tusi Tapu. E lau i miliona o tusi, mekesini, tamā pepa, mo pepa ‵kami ki fono mo te Fakamanatuga ko oti ne tufatufa atu e aunoa mo se ‵togi. Ne ‵lomi ne tatou a tusi kese‵kese i ‵gana e silia atu i te 700. Ko oti ne ‵lomi foki a ‵kopi o te New World Translation of the Holy Scriptures i ‵gana e silia atui te 130. I te tausaga fua ko teka, e nofo loa ki te 4.5 piliona o tusi faka-te-Tusi Tapu ne ‵lomi ne tatou. I luga i te ‵tou fakatuatusi i te itaneti, ko maua i ei a ‵gana e silia atu i te 750. Se a foki te suā potukau o faifeau e fai ne latou se galuega tai ‵pau penei?

16. E iloa pefea ne tatou me e maua ne Molimau a Ieova a te agaga tapu?

¹⁶ E pefea te leva e ‵tau o fai ei te galuega talai? Ne fai mai a Iesu me ka tumau te galuega tenei i te lalolagi ke oko ki aso fakaoti, “ko oko mai ei te gataga.” E mata, e isi aka foki se potukau fakalotu telā ko oti ne tumau i te talai atu o te tala ‵lei i toe aso fakaoti tāua konei? E mafai o fai mai a nisi tino kolā e fetaui mo tatou i te galuega talai: “E maua ne matou te agaga tapu, kae e fai ne koutou a te galuega.” Kae e mata, e sē se manatu tonu me i te tumau o tatou i te faiga o te galuega talai ko te fakamaoniga me e maua ne tatou te agaga o te Atua? (Galu. 1:8; 1 Pe. 4:14) I nisi taimi, ne taumafai a nisi potukau fakalotu ke fai a mea kolā e fai sāle ne Molimau a Ieova, kae ne seki manuia faeloa a taumafaiga konā. E aofia a nisi tino i mea kolā e fai mai me ne galuega fakamisionale mō se vaitaimi kae ka oti, ko toe ‵foki latou ki olotou olaga masani. Kae kāti koi taumafai a nisi tino ke olo atu latou mai fale ki fale, kae ne a mea e talai atu ne latou? A te tali ki te fesili tenā e fakaasi manino mai i ei me e se fai ne latou te galuega telā ne kamata ne Iesu.

17, 18. (a) Kaia e mafai ei o mautinoa i a tatou me ko Molimau a Ieova fua e talai atu ne latou te talai ‵lei o te Malo i aso nei? (e) E mafai pefea o tumau tatou i te galuega talai tenei?

¹⁷ Tela la, ko oi eiloa e talai atu ne latou te tala ‵lei i aso nei? E mafai eiloa ne tatou o fai atu mo te loto tali‵tonu: “Ko Molimau a Ieova!” Kaia e tali‵tonu katoa ei tatou penei? Ona ko te mea e talai atu ne tatou a te fekau tonu, te tala ‵lei o te Malo. Mai te olo atu ki tino, e fakaaoga foki ne tatou a auala ‵tonu. E fai ‵tou galuega talai mo lagonaga ‵tonu—ko te alofa, kae e se mō te mauaga o tupe. E lasi ‵ki ‵tou galuega, me e oko atu tatou ki fenua mo ‵gana katoa. Kae ka tumau eiloa tatou i te faiga o te galuega tenei e aunoa mo te fakatalave, i tausaga katoa, ke oko ki te taimi e oko mai ei te gataga.

¹⁸ E ofo eiloa tatou i mea ko oti ne fai ne tino o te Atua i taimi tāua konei e ola tatou i ei. Kae ne mafai pefea o fai a mea katoa konei? Ne tali mai a te apositolo ko Paulo i tena tusi ki te kau Filipi: “Me ko te Atua eiloa telā e fai ne ia koutou ke ma‵losi, i te tukuatuga o te fiafia mo te ‵mana ke ga‵lue koutou e ‵tusa mo te mea e fiafia a ia ki ei.” (Fili. 2:13) Ke na fakamalosi aka tatou katoa ne te ‵tou Tamana alofa i te taimi e fai ne tatou te ‵toe mea e mafai o fai kae fakataunu katoatoa ‵tou galuega.—2 Timo. 4:5.