1-2. (a) Ne a fesili ka mafau‵fau tatou ki ei? (e) Se a te mea e fakaasi mai me e loto fiafia a Ieova o fesoasoani mai ki a tatou?

 E MAFAI o fesoasoani mai a Ieova ke fa‵ki i tatou i tulaga faiga‵ta i ‵tou olaga kae ke maua te fiafia i te ‵tou tavini tapu. Ne a auala e fesoasoani mai i ei a ia ki a tatou? Kae e maua katoatoa pefea ne tatou a mea aoga mai te fesoasoani e tuku mai ne Ieova? Ka tali aka a fesili konei i te mataupu tenei. Kae koi tuai o iloilo aka ne tatou a tali, ke na mafau‵fau tatou ki te suā fesili tai ‵pau: E mata, e loto fiafia a Ieova o fesoasoani mai ki a tatou?

² E isi se pati ne fakaaoga ne te apositolo ko Paulo i tena tusi ki kau Epelu, telā e mafai o fesoasoani mai ke maua ne tatou te tali. Ne tusi atu a Paulo: “A Ieova ko toku fesoasoani; ka se mataku eiloa au. Ne a mea e mafai ne tino o fai mai ki a au?” (Epe. 13:6) E fai mai se fakamatalaga e uiga ki te Tusi Tapu me i te pati ko te “fesoasoani,” e pelā mo te fakaaogaga i te fuaiupu tenei, e fakasino atu ki se tino telā e tele atu o fesoasoani ki se tino e tagi mai mō se fesoasoani. Mafaufau me ko fakava‵vave a Ieova ke fakasao se tino loto mafatia. Ka lotomalie eiloa koe me e fakaasi mai i te fakamatalaga tenei a te loto o Ieova—ao, tena loto finafinau—ke fai mo fai ‵tou Fesoasoani. Ona ko te mea e kau mai a Ieova ki a tatou, e mafai ne tatou o kufaki mo te fia‵fia ‵tou tofotofoga.

3. Ne a auala e tolu e fesoasoani mai ei a Ieova ke kufaki tatou i ‵tou tofotofoga mo te fia‵fia?

³ Ne a nisi auala e fesoasoani mai a Ieova ke kufaki tatou i ‵tou tofotofoga mo te fia‵fia? Ke tali aka te fesili tenā, ke onoono tatou ki te tusi o Isaia. Kaia? E uke a valoaga ne fakaosofia a Isaia ke tusi mai e fakasino ki tavini a te Atua i aso nei. E se gata i ei, e fakamatala mai ne Isaia a Ieova i tugapati kolā e faigofie ke malamalama tatou i ei. Mafaufau ki se mea e tasi, Isaia mataupu e  30. I konā, e auala i se ‵gana telā e mafai o fakaataata ne tatou a ata i ‵tou mafaufau, e fakamatala mai i ei ne Isaia a auala e mafai o fesoasoani mai a Ieova ki a tatou e pelā me ne ana tino (1) mai te fakalogologo faka‵lei kae tali mai ki ‵tou ‵talo, (2) mai te tukumaiga o fakatakitakiga, kae ko te (3) mai te tukumaiga o fakamanuiaga nei mo aso mai mua. Ke na onoono faka‵lei tatou ki auala e tolu kolā e fesoasoani mai ei a Ieova ki a tatou.

4. (a) Ne fakamatala mai pefea ne Ieova a te kau Iutaia i aso o Isaia, kae se a te mea ne talia fakamulia ne Ia ke tupu? (e) Se a te fakamoemoega ne fakaasi atu ne Ieova ki tino fakamaoni? (Isaia 30:18, 19)

⁴ I pati kamata o te Isaia mataupu e 30, e fai mai a Ieova me i tino Iutaia ne “tama tāgata loto ma‵keke,” kolā ne “fakaopoopo atu [ne latou] te agasala ki te suā agasala.” Ne toe fai mai a ia: “Me i a latou se fenua ‵teke, . . . kolā e se fia faka‵logo ki te tulafono a Ieova.” (Isa. 30:1, 9) Ona ko te mea ne ita fitifiti a tino ke faka‵logo, ne ‵valo mai ne Isaia me ka talia ne Ieova ke logo‵mae latou i puapuaga. (Isa. 30:5, 17; Iele. 25:8-11) Tenā, ne ave fakapagota ei latou ne te kau Papelonia. E isi ne tino fakamaoni i tino Iutaia konā, kae ne maua ne Isaia se fekau o te fakamoemoega mō latou. Ne fai atu a ia ki a latou me ka toe maua ne latou te taliaga a Ieova. (Faitau te Isaia 30:18, 19.) Kae tenā eiloa te mea ne tupu. Ne fakagata ne Ieova te lotou ‵nofo fakapagota. Kae ne seki oko vave atu te lotou faka‵saoga. A te fuaiupu “kae ko Ieova e fakatalitali mo te kufaki o fakaasi te alofa ki a koutou,” ne fakaasi mai i ei me ne ‵tau o ‵teka atu se vaitaimi leva a koi tuai o faka‵sao a tino fakamaoni. A te ‵tonuga loa, ne ‵nofo fakapagota a te kau Isalaelu i Papelonia mō se 70 tausaga a koi tuai o talia ke toe ‵foki atu se ‵toega ki Ielusalema. (Isa. 10:21; Iele. 29:10) I te taimi ne oko atu ei a tino ki te lotou fenua, ne sui olotou loimata fanoa‵noa i te lotou avega fakapagota ki loimata o te fiafia.

5. Se a te fakatalitonuga e tuku mai i te Isaia 30:19?

⁵ I aso nei, e maua ne tatou a fakamafanafanaga mai pati konei: “Ka fakaasi atu eiloa ne ia te alofa ki a koutou ona ko te otou ‵tagi mō se fesoasoani.” (Isa. 30:19) E fakatalitonu mai ne Isaia me ka fakalogologo faka‵lei kae saga fakavave mai a Ieova māfai ko ‵tagi kae faka‵tagi atu tatou ki a Ia. Ne toe fai mai a Isaia: “Ka tali fakavave atu a ia ki a koutou i te taimi e lagona ei ne ia te otou ‵tagi.” A pati fakamafanafana konei e fakamasaua mai i ei me i te ‵tou Tamana e loto fiafia—ao, e loto finafinau—ke vau o fesoasoani mai ki a latou kolā e ka‵laga atu ki a ia. E fesoasoani a te manatu tenei ke kufaki tatou mo te fia‵fia.

6. E fakaasi mai pefea ne pati a Isaia me e fakalogologo a Ieova ki ‵talo o ana tavini katoa?

⁶ Se a te suā fakatalitonuga e uiga ki ‵tou ‵talo e mafai o maua ne tatou mai te fuaipu tenei? E saga tonu mai a Ieova ki ‵talo a tatou katoa. Kaia e mafai ei ne tatou o fai atu penā? I te vaega muamua o te Isaia mataupu e 30, a te pati “koutou” e fakaaoga i konei ke fakasino atu ki tino e tokouke, telā e fakasino atu a Ieova ki ana tino e pelā me se potukau. Kae i te fuaiupu 19, a te pati “koutou” e fakasino atu ki se tino e tokotasi; te fekau tenā e fakasino atu ki tino taki tokotasi. Ne tusi mai a Isaia: “A koutou ka se ‵tagi mautuutu eiloa”; “ka fakaasi atu eiloa ne ia te alofa ki a koutou”; “ka tali fakavave atu a ia ki a koutou.” E pelā me se tamana alofa, e se fai atu a Ieova ki sena tama loto vāivāi, “E ‵tau o malosi koe e pelā mo tou taina io me ko tou tuagane.” I lō te fai penā, e kilo mai a ia ki a tatou taki tokotasi kae saga tonu mai ki ‵tou ‵talo totino.—Sala. 116:1; Isa. 57:15.

7. Ne fakaasi mai pefea ne Isaia mo Iesu a te tāua o te ‵talo atu faeloa?

 ⁷ Kafai e olo atu tatou ki te Atua e uiga ki se mea e manava‵se tatou ki ei, a te tali fakavave a Ieova ko te tuku mai o te malosi ke mafai o fa‵ki i te tulaga tenā. Kae kafai e se gata fakavave ‵tou tofotofoga e pelā mo te mea e ma‵nako tatou ki ei, kāti e ‵tau o akai fakafia atu faeloa ki a Ieova mō te malosi ke kufaki i ei. E ‵kami ne ia koe ke fai penā. E fakaasi mai te mea tenā i pati konei a Isaia: “Sa fai ke malōlō a ia [Ieova].” (Isa. 62:7) Se a te mea e fakauiga ki ei? E ‵tau o fai faeloa ‵tou ‵talo ki a Ieova e pelā eiloa me e se talia ne tatou ke malōlō a Ieova. E fakamasaua mai ne pati a Isaia a te tala fakatusa a Iesu e uiga ki ‵talo i te Luka 11:8-10, 13. I konā, e fakamalosi mai a Iesu ke ‵talo atu tatou mo te “kinau atu faeloa” kae “tumau i te fakamolemole atu” mō te agaga tapu. E mafai foki o akai atu tatou ki a Ieova ke takitaki mai tatou ko te mea ke mafai o fai o fakaikuga ‵lei.

8. I aso mua, ne fakataunu pefea a pati i te Isaia 30:20, 21?

⁸ Faitau te Isaia 30:20, 21. I te taimi ne puke fakatamilo ei ne te kautau a Papelonia a Ielusalema mō se tausaga mo te āfa, ne kamata o masani a tino mo tulaga faiga‵ta konā, e pelā mo te lotou masani ki falaoa mo vai. Kae e ‵tusa mo te fuaiupu 20 ki te 21, ne folafola atu a Ieova me kafai e sala‵mo a te kau Iutaia kae ‵fuli olotou amioga, ka faka‵sao ne ia latou. I te fakasino atu ki a Ieova e pelā me ko te lotou “Faiakoga Tafasili i te Maluga,” ne folafola atu a Isaia ki tino me e akoako ne Ieova a latou ke tapuaki atu ki a Ia i te auala e talia ne ia. Ne fakataunu a pati konā i te taimi ne fakasaoloto ei a te kau Iutaia mai te ‵nofo fakapagota. Ne fai eiloa a Ieova mo fai te lotou Faiakoga Tafasili i te Maluga, kae mai lalo i tena takitakiga, ne manumalo ana tino i te ‵toe fakafouga o te tapuakiga ‵ma. E manuia eiloa tatou ke fai a Ieova e pelā me ko te ‵Tou Faiakoga Tafasili i te Maluga i aso nei.

9. Se a te auala e tasi e maua ei ne tatou i aso nei a te takitakiga a Ieova?

⁹ I fuaiupu konei, e fai mai a Isaia me e fai tatou e pelā me ne tamaliki a‵koga kolā ne akoako ne Ieova i auala e lua. Muamua la, ne fai mai a ia: “Ka lavea ne koutou te otou Faiakoga Tafasili i te Maluga ki otou mata eiloa.” I te fakamatalaga tenei, e fakaata mai a te faiakoga e pelā me e tu i mua o ana tama‵liki a‵koga. Ko tauloto eiloa tatou ke maua a mea aoga mai i ana akoakoga i aso nei. E akoako pefea tatou ne Ieova? E fai eiloa ne ia penā e auala i tena fakapotopotoga. Ko oko eiloa i te ‵tou loto  fakafetai ki fakatakitakiga manino e maua ne tatou mai i ei! A akoakoga e tuku mai i fakatasiga a ‵tou fakapotopotoga mo fono, e pelā foki mo tusi, leo fakasalalau, mo nisi auala aka e uke, e fesoasoani mai ki a tatou i taimi faiga‵ta ke kufaki mo te fia‵fia.

10. Se a te auala e lagona ei ne tatou “se leo i [‵tou] tua”?

¹⁰ Ne fakamau foki ne Isaia a te lua o auala e akoako ei tatou ne Ieova, i ana pati konei: “Ka lagona ne otou taliga se leo i otou tua e fai mai.” Ne fakamatala mai ne te pelofeta i konei a Ieova e pelā me se faiakoga telā e saga tonu atu kae sasale mai tua o ana tama‵liki a‵koga, telā e fakasino atu ki te auala i mua kae tuku atu a fakatakitakiga. I aso nei, e lagona ne tatou te leo o te Atua mai ‵tou tua. E pefea la? E fakasino atu ki muna fakaosofia a te Atua kolā ko leva eiloa ne fakamau i te Tusi Tapu, se taimi leva ‵ki mai i ‵tou tua. Tela la, kafai e fai‵tau tatou ki te Tusi Tapu, e pelā eiloa me e lagona ne tatou te leo o te Atua mai i ‵tou tua.—Isa. 51:4.

11. Ke kufaki mo te fia‵fia, ne a mea e ‵tau o fai ne tatou, kae kaia?

¹¹ E maua katoatoa pefea ne tatou a mea aoga mai te takitakiga a Ieova e auala i tena fakapotopotoga mo tena Muna? Onoono la ki fakamatalaga e lua konei a Isaia. Muamua, “tenei te auala.” A te lua, “sa‵sale i ei.” (Isa. 30:21) E se lava fua ke iloa ne tatou “te auala.” E ‵tau foki mo tatou o “sa‵sale i ei.” E auala i te Muna a Ieova, e ‵tusa mo fakamatalaga a tena fakapotopotoga, e tauloto tatou ki mea e manako a Ieova ke fai ne tatou. E tauloto foki tatou ki te auala ke fakagalue aka i ei. Ke kufaki mo te fia‵fia i te ‵tou taviniga ki a Ieova, e ‵tau o fai ne tatou a mea e lua konei. Tenā fua te auala e mafai ei o maua ne tatou a te fakamanuiaga a Ieova.

12. E ‵tusa mo te Isaia 30:23-26, ne fakamanuia pefea ne Ieova ana tino?

¹² Faitau te Isaia 30:23-26. E fakataunu pefea te valoaga tenei ki te kau Iutaia kolā ne ‵foki atu ki te fenua o Isalaelu mai tua o te lotou ‵nofo fakapagota i Papelonia? Ne maua ne latou a fakamanuiaga e uke ‵ki—i te feitu faka-te-foitino mo te feitu faka-te-agaga. Ne fakamanuia ne Ieova ana tino ki mea‵kai e uke. Kae sili atu i ei, ne fakaasi tena fiafia ki a latou mai te tuku atu o mea‵kai faka-te-agaga e uke i te taimi ne toe fakafou malielie aka ei a te tapuakiga ‵ma. A fakamanuiaga faka-te-agaga kolā ne maua ne tino o te Atua i te taimi tenā, ne sili fakafia atu i lō mea ne fe‵paki muamua mo latou. E pelā mo te fuaiupu 26, ne fai ne Ieova ke maina malosi atu latou i te feitu faka-te-agaga. (Isa. 60:2) Ne fesoasoani atu a fakamanuiaga a Ieova ki ana tavini ke tumau i te tavini  atu ki a ia i te fiafia mo te malosi “ona ko te tulaga ‵lei i olotou loto.”—Isa. 65:14.

13. Ne fakataunu pefea a te fakafouga o te tapuakiga ‵ma i ‵tou aso nei?

¹³ E mata, e fakasino mai foki ki a tatou i aso nei a te valoaga e uiga ki te fakafouga o te tapuakiga ‵ma? Ao, e mautinoa eiloa! Se a te auala ne fakataunu ei? Talu mai te 1919 T.A., ko oti ne fakasaoloto te fia miliona o tino mai te ‵nofo pologa ki Papelonia te Sili, te emupaea o lotu ‵se i te lalolagi kātoa. Ko oti ne takitaki atu latou ki se koga tai ‵lei atu i lō te Fenua o te Folafolaga i Isalaelu. Ne ‵taki atu latou ki se palataiso faka-te-agaga. (Isa. 51:3; 66:8) Se a te palataiso faka-te-agaga?

14. Se a te palataiso faka-te-agaga, kae ko oi e ‵nofo i ei i aso nei? (Onoono ki Fakamatalaga o te Pati.)

¹⁴ Talu mai te 1919 T.A., ne ‵nofo atu a te kau fakaekegina i se palataiso faka-te-agaga. b I te tekaatuga o taimi, ne ‵nofo atu foki a latou kolā e fakamoe‵moe ki te lalolagi, ko “nisi mamoe,” i te fenua faka-te-agaga tenei kae ne maua ne latou a fakamanuiaga e uke a Ieova.—Ioa. 10:16; Isa. 25:6; 65:13.

15. Tefea te koga e tu i ei a te palataiso faka-te-agaga?

¹⁵ Tefea te koga e tu i ei a te fenua io me ko te palataiso faka-te-agaga i aso nei? E mafai o maua a tino tapuaki ki a Ieova i koga katoa o te lalolagi. Tela la, e maua atu a te palataiso faka-te-agaga i te lalolagi kātoa. Kae i aso nei, faitalia me tefea te koga e nofo koe i ei i te lalolagi, e mafai o fai koe mo vaega o te palataiso faka-te-agaga māfai e ‵lago malosi atu koe ki te tapuakiga tonu.

16. E mafai pefea o ‵kilo atu faeloa tatou ki te gali o te palataiso faka-te-agaga?

¹⁶ Ke tumau i te palataiso faka-te-agaga, e ‵tau o fakatumau ne tatou, i tafa o nisi mea, a te loto fakafetai lasi ki te fakapotopotoga Kelisiano i te lalolagi kātoa. E mafai pefea o fai ne tatou te mea tenā? Mai te ‵saga atu ki uiga ‵gali kae e se ko vāivāiga o latou kolā e ‵nofo i ei. (Ioa. 17:20, 21) Kaia e tāua ‵ki ei te mea tenā? Mafaufau ki te fakatusaga tenei. E mafai o fakamoe‵moe tatou ke lavea atu a vaegā lakau kese‵kese i se malae io me se fatoaga gali. E penā foki loa, a te palataiso faka-te-agaga telā  e maua atu i fakapotopotoga i aso nei, e fakagaligali ki tino kese‵kese kolā e mafai o fakatusa ki lakau. (Isa. 44:4; 61:3) E ‵tau o fakamautinoa aka ne tatou me e tumau te ‵saga tonu atu o tatou ki te gali o te “togavao,” kae e se ko mea sē ‵lei kolā e maua atu i “lakau” takitasi i ‵tou tafa. E se mafai o talia ne tatou ‵tou vāivāiga io me ko vāivāiga o nisi tino i te fakapotopotoga ke fai ei tatou ke se ‵saga atu ki te gali kātoa o te fealofani o te fakapotopotoga Kelisiano i te lalolagi kātoa.

17. Ne a mea e mafai ne tatou katoa o fai ke fesoasoani ki te fealofani o te fakapotopotoga?

¹⁷ E fakamalosi aka pefea ne tatou katoa a te fealofani tenei? Mai te fai e pelā me ne tino faka‵tupu te filemu. (Mata. 5:9; Loma 12:18) I taimi takitasi e ga‵sue mua tatou ke tausi a va filemu mo nisi tino i te fakapotopotoga, e fesoasoani atu ki te gali o te palataiso faka-te-agaga. E masaua ne tatou me ne ‵futi mai ne Ieova a tino takitasi i te palataiso faka-te-agaga ki te tapuakiga ‵ma. (Ioa. 6:44) Mafaufau la ki te fiafia o Ieova i te taimi e lavea ei ne ia tatou e ga‵lue malosi ke ati aka te filemu mo te fealofani i tino kolā e fakatāua malosi ne ia—ko ana tavini!—Isa. 26:3; Haka. 2:7.

18. Ne a mea e ‵tau o mafau‵fau ‵loto faeloa tatou ki ei, kae kaia?

¹⁸ E aoga katoatoa pefea ki a tatou a fakamanuiaga e maua ne tatou e pelā me ne tavini a te Atua? E mafai o mafaufau ‵loto tatou ki ‵tou mea e sukesuke i te Muna a te Atua mo ‵tou tusi faka-te-Tusi Tapu. A sukesukega mo te mafaufau ‵loto penā, ka fesoasoani mai ke ati aka ne tatou a uiga faka-Kelisiano kolā e fakamalosi mai ke fakaasi atu ne tatou te “alofa fakataina” mo te “fakatau a‵lofa” i te fakapotopotoga. (Loma 12:10) Kafai e mafau‵fau ‵loto tatou ki ‵tou fakamanuiaga nei, e fakamalosi aka ei ‵tou fesokotakiga mo Ieova. Kae ko te mafaufau ‵loto ki fakamanuiaga kolā ko oti ne fakatoka ne Ieova mō tatou, ka ‵kilo atu faeloa tatou ki te fakamoemoega ke tavini ki a ia ki te se-gata-mai e pelā me se mea tonu eiloa. Ka fesoasoani mai a mea katoa konei ki te ‵tou fia‵fia i te tavini atu nei ki a Ieova.

19. (a) E ‵tusa mo te Isaia 30:18, se a te mea e mafai o tali‵tonu katoatoa tatou ki ei? (e) Ne a mea ka fesoasoani mai ke kufaki tatou mo te fia‵fia?

¹⁹ “Ka tu aka” a Ieova o fesoasoani mai ki a tatou māfai ko fakaoko mai ne ia te gataga ki te lalolagi masei tenei. (Isa. 30:18) E tali‵tonu tatou me i a Ieova—“te Atua fai mea tonu”—ka se talia ne ia ke tumau te lalolagi a Satani i se leva telā e silia atu mo te mea e manakogina ne te fai mea tonu. (Isa. 25:9) E faka‵tali tatou mo te kufaki ki te oko mai o te aso o te faka‵saoga. I te vaitaimi tenei, ke na tumau eiloa i te fakatāua ne tatou a te tauliaga o te ‵talo, sukesuke kae fakagalue aka te Muna a te Atua, kae mafaufau ‵loto ki ‵tou fakamanuiaga. Kafai e fai tatou penā, ka fesoasoani mai a Ieova ke kufaki tatou mo te fia‵fia i te ‵tou tapuaki atu ki a ia.