1. Ne a mea e fakamoe‵moe tatou ke ‵tupu, kae se a te mea e mafai o mautinoa i a tatou?

 I TE taimi e fai ei te ‵tou galuega talai, e fakamoe‵moe eiloa tatou ke fe‵paki mo ‵tekemaiga. Kae ko ‵tekemaiga konā kāti ka gasolo aka ki luga i aso mai mua. (Tani. 11:44; 2 Timo. 3:12; Faka. 16:21) Kae e ui i ei, e mautinoa i a tatou me ka tuku mai eiloa ne Ieova te fesoasoani telā e manakogina. Kaia? Ko oti ne fesoasoani a Ieova ki ana tavini ke fakataunu olotou galuega—faitalia te faigata o te galuega. Ke fakamaoni aka te mea tenā, ka onoono tatou ki mea ne ‵tupu i te olaga o Esekielu, telā ne talai ki tino Iutaia ne ave fakapagota i Papelonia.

2. Ne fakamatala mai pefea ne Ieova a tino i te koga talai a Esekielu, kae ne a mea ka onoono tatou ki ei i te mataupu tenei? (Esekielu 2:3-6)

² Ne a vaegā tino i te koga talai a Esekielu? Ne fakamatala mai ne Ieova a latou e pelā me ne tino “‵teke” kae “loto ma‵keke.” A latou e fakalogo‵mae e pelā me ne mea makai‵kai kae fakama‵taku e pelā me ne akalava. Tenā te pogai ne fai atu faeloa ne Ieova a pati konei ki a Esekielu: “Sa mataku”! (Faitau te Esekielu 2:3-6.) Ne mafai ne Esekielu o fakataunu tena galuega talai me i a ia (1) ne uga atu ne Ieova, (2) ne fakamalosi aka ne te agaga o te Atua, kae ko te (3) ne fakamalosi aka ne pati a te Atua. Ne fesoasoani atu pefea a mea e tolu konei ki a Esekielu? Kae e fesoasoani mai foki pefea ki a tatou i aso nei?

3. Ne a pati kāti ne fakamalosi atu ki a Esekielu, kae ne fakatalitonu atu pefea ne Ieova a Tena ‵lago atu ki a ia?

³ Ne fai atu a Ieova ki a Esekielu: “Ko uga atu ne au koe.” (Eseki. 2:3, 4) Kāti ne fakamalosi atu a pati konā ki a Esekielu. Kaia?  E mautinoa me ne masaua ne ia a pati tai ‵pau penā a Ieova i te taimi ne uga atu ei ne Ia a Mose mo Isaia e pelā me ko Ana pelofeta. (Eso. 3:10; Isa. 6:8) Ne iloa foki ne Esekielu te auala ne fesoasoani atu a Ieova ki pelofeta e tokolua konā ke manumalo i mea faiga‵ta. Tela la, i te lua o taimi ne fai atu ei a Ieova ki a Esekielu: “Ko uga atu ne au koe,” ne maua ne te pelofeta a pogai ‵lei ke talitonu ki te fesoasoani o Ieova. I te tusi foki a Esekielu, e isi ne taimi e ‵sae mai foki ei a pati konei: “Ne oko mai te fekau a Ieova ki a au.” (Eseki. 3:16) Kae ne ‵sae mai faeloa a pati konei, “Ne toe oko mai te fekau a Ieova ki a au.” (Eseki. 6:1) E mautinoa me ne talitonu a Esekielu me i a ia ne uga atu ne Ieova. E se gata i ei, a te tamana o Esekielu se faitaulaga, tela la, kāti ne akoako ne ia tou tagata e auala i tala fakasolopito ki te fakatalitonu atu o Ieova ki Ana pelofeta me ka maua ne latou Tena fesoasoani. Ne fai atu ne Ieova a pati konei ki a Isaako, Iakopo, mo Ielemia: “Au ka fakatasi atu ki a koe.”—Kene. 26:24; 28:15; Iele. 1:8.

4. Ne a pati fakamafanafana ne fakamalosi atu ki a Esekielu?

⁴ Ne ‵saga atu pefea te tokoukega o tino Isalaelu ki te talaiga a Esekielu? Ne fai atu a Ieova: “Te kāiga o Isalaelu ka ita ma faka‵logo ki a koe, me e se ma‵nako latou o faka‵logo mai ki a au.” (Eseki. 3:7) Mai te ‵teke atu ki a Esekielu, ko ‵teke foki ne tino a Ieova. Ne fakamalosi atu a pati konā ki a Esekielu me i te ‵teke o tino e se pogai mai i te sē ‵lei o ana galuega e pelā me se pelofeta. Ne fakamalosi atu foki a Ieova ki a Esekielu me kafai ko fakataunu ana fakamasinoga “ka iloa eiloa ne [tino] me ne isi se pelofeta ne nofo i a latou.” (Eseki. 2:5; 33:33) E mautinoa me ne maua ne Esekielu a te malosi e manakogina ke fakataunu tena galuega talai ona ko pati fakamafanafana konā.

5. Ne a pati i te Isaia 44:8, e maua ei ne tatou te malosi mai i ei?

⁵ E maua foki ne tatou te malosi i te iloa atu me ne uga foki tatou ne Ieova. Ne faka‵malu ne ia tatou mai te ‵taku ne ia o tatou ki ana “molimau.” (Isa. 43:10) Se tauliaga tāua eiloa! E pelā mo te fai atu o Ieova ki a Esekielu: “Sa mataku,” e fai mai foki a Ieova ki a tatou: “Sa ma‵taku.” Kaia e se ‵tau o ma‵taku tatou ki tino ‵teke mai? E pelā loa mo Esekielu, ne uga atu tatou ne Ieova, kae ‵lago mai a Ia ki a tatou.—Faitau te Isaia 44:8.

6. (a) E fakatalitonu mai pefea ne Ieova a tena ‵lago mai? (e) Se a te mea e fakamafanafana kae fakamalosi mai?

⁶ Ne tauto mai a Ieova me ka ‵lago mai a ia ki a tatou. E pelā me se fakaakoakoga, mai mua malie o fai atu a Ieova: “A koutou ko aku molimau,” ne fai atu a ia: “Kafai e fanatu koe i loto i vai, ka fakatasi atu au ki a koe, kae i loto i vaitafe, ka se lofia eiloa koe. Kafai e sasale atu koe i loto i te afi, a koe ka se ‵paku, io me ‵ka koe i ulaga o te afi.” (Isa. 43:2) I te taimi e fai ei ‵tou galuega talai, e fe‵paki tatou mo fakalavelave kolā e fai pelā me ne lofiaga io me ne afi. Kae ona ko te fesoasoani o Ieova, e fai ei tatou ke talai atu faeloa. (Isa. 41:13) E pelā mo aso o Esekielu, e tokouke a tino i aso nei e ‵teke ki te fekau. Ke masaua ne tatou me i ‵tekemaiga konei e se fakauiga i ei me ne seki fai faka‵lei ‵tou galuega e pelā me ne Molimau a te Atua. E fakamafanafana kae fakamalosi mai ke iloa atu me e fiafia a Ieova māfai e tumau tatou i te folafola atu o tena fekau mo te fakamaoni. Ne fai mai te apositolo ko Paulo: “Ka maua eiloa ne tino taki tokotasi a tena taui e ‵tusa mo ana galuega ne fai.” (1 Koli. 3:8; 4:1, 2) Ne fai mai se tuagane telā ko leva ne paenia, penei: “E maua ne au te fiafia mai te iloa atu me e taui mai ne Ieova ‵tou taumafaiga.”

7. I so se taimi ne mafaufau a Esekielu ki te fakaasiga ne lavea ne ia, ne a lagonaga ne mafai o maua ne ia? (Onoono ki te ata i te ‵kava.)

⁷ Ne lavea ne Esekielu te malosi o te agaga o te Atua. I te fakaasiga, ne molimau ne ia te agaga tapu e galue i loto i agelu ma‵losi mo teka ‵lasi o te kaliota afi. (Eseki. 1:20, 21) Ne a mea ne fai ne Esekielu? Ne fakamau ne ia a mea ne ‵tupu. “I te taimi ne lavea ei ne au, ne totuli ifo au mo oku mata e ‵fuli ki lalo.” Ona ko tena ofo, ne fakasiga ifo a Esekielu ki lalo i te laukele. (Eseki. 1:28) Fakamuli loa, i so se taimi ne mafaufau a Esekielu ki te fakaasiga fakaofoofogia tenā, kāti ne fakamalosi aka ei tena loto talitonu me fakatasi mo te fesoasoani o te agaga o te Atua, e mafai eiloa ne ia o fakataunu tena galuega talai.

8-9. (a) Se a te mea ne maua ne Esekielu ona ko te fakatonuga a Ieova? (e) Ne toe fakamalosi aka pefea ne Ieova a Esekielu ona ko te faigata o tena koga talai?

⁸ Ne fakatonu atu a Ieova ki a Esekielu: “Te tama a te tagata, tu mai ou vae ki luga ke faipati atu au ki a koe.” Ne fai ne te fakatonuga tenā fakatasi mo te agaga o te Atua ke maua ne Esekielu a te malosi, telā ne manakogina ke mafai o tu aka a ia mai te laukele. Ne tusi mai a Esekielu: “Ne oko mai ki a au te agaga o te Atua kae ne fai ei au ke tu ki luga i oku vae.” (Eseki. 2:1, 2) Fakamuli ifo, i tena taviniga kātoa, ne takitaki a Esekielu ne te “lima” o te Atua—telā ko te agaga tapu o te Atua. (Eseki. 3:22; 8:1; 33:22; 37:1; 40:1) Ne fakamalosi ne te agaga o te Atua a Esekielu i te galuega telā ne maua ne ia—ko te talai atu ki tino “loto ma‵keke kae fai ‵tonu” i tena koga talai. (Eseki. 3:7) Ne fai atu a Ieova ki a Esekielu: “Ko oti ne fai ne au ou mata ke ma‵keke eiloa e pelā mo olotou mata kae ko tou lae ke makeke eiloa e pelā mo olotou lae. Ko oti ne fai ne au tou lae ke pelā me se taemani, e makeke atu i lō te fatu makeke. Sa  mataku i a latou io me mataku i olotou mata.” (Eseki. 3:8, 9) E pelā loa me ko fai atu a Ieova ki a Esekielu: ‘Ke mo a ma fakavāivāi koe ne te fai ‵tonu o tino konei. Ka fakamalosi ne au koe.’

⁹ Mai tua ifo, ne ave ne te agaga o te Atua a Esekielu ki tena koga talai. Ne tusi mai a Esekielu: “Te lima o Ieova ne malosi ‵ki i luga i a au.” E tasi te vaiaso ne tauloto ei te pelofeta ki te fekau telā ne ‵tau o fakaoko atu ne ia, ko te mea ke mafai o talai atu ne ia mo te loto talitonu. (Eseki. 3:14, 15) Ne fakatonu atu ei a Ieova ki a ia ke fano ki te koga laugatausi, telā “ne oko mai ei te agaga ki [tou tagata].” (Eseki. 3:23, 24) Ne toka a Esekielu o kamata tena galuega talai.

10. Se a te fesoasoani e manakogina ne tatou ke fai te ‵tou galuega talai, kae kaia?

¹⁰ Se a te fesoasoani e manakogina ne tatou ke fai te ‵tou galuega talai? Ke maua te tali, toe mafaufau ki te mea ne tupu ki a Esekielu. Mai mua o kamata tena galuega talai, ne tuku atu ne te agaga o te Atua a te malosi e manakogina ne ia. E pelā mo Esekielu, e manakogina foki ne tatou te fesoasoani o te agaga o te Atua ke fai ‵tou galuega talai i aso nei. Kaia? I a Satani e taua mai ki a tatou ke fakagata te ‵tou galuega talai. (Faka. 12:17) E ‵tusa mo se kilokiloga faka-te-foitino, a Satani ko tō malosi ke ‵teke atu ki ei se tino. Kae e auala i te ‵tou galuega talai, ko fakatakavale ne tatou a ia! (Faka. 12:9-11) I te auala fea? Kafai e ‵kau atu tatou ki te galuega talai, e fakaasi atu ne tatou me e se ma‵taku tatou i fakamatakutakuga a Satani. I so se taimi e talai tatou, ko takavale a Satani. Tela la, se a te mea e fakaiku aka ne tatou māfai ko fai te ‵tou galuega talai faitalia ‵tekemaiga? E fakaiku aka ne tatou me ne fakamalosi tatou ne te agaga tapu o te Atua kae maua foki ne tatou te taliaga a Ieova.—Mata. 5:10-12; 1 Pe. 4:14.

11. Ne a mea ka fai ne te agaga o te Atua mō tatou, kae e maua faeloa pefea ne tatou?

¹¹ Se a te suā fakamalosiga e maua ne tatou  mai te iloa atu me ne fakamakeke ne Ieova a mata mo te lae o Esekielu i se auala fakatusa? E mafai ne te agaga o te Atua o tuku mai te malosi ke ‵teke ne tatou so se mea faigata e fe‵paki mo tatou i te ‵tou galuega talai. (2 Koli. 4:7-9) Kae se a te mea e mafai o fai ne tatou ke fakamautinoa aka me e maua faeloa ne tatou te agaga o te Atua? E ‵tau faeloa o ‵talo tatou mo te loto tali‵tonu me e lagona ne Ieova ‵tou ‵talo. Ne akoako ne Iesu ana soko: “Tumau i te fakamolemole atu, . . . tumau i te salasala atu, . . . tumau i te tukituki atu.” Kae ka tuku atu ne Ieova “a te agaga tapu ki tino kolā e fakamolemole atu ki a ia.”—Luka 11:9, 13; Galu. 1:14; 2:4.

12. E pelā mo te Esekielu 2:9–3:3, ne aumai mai fea te pelugā tusi, kae ne a mea e aofia i ei?

¹² E se gata fua i te maua ne Esekielu a te malosi mai te agaga o te Atua, kae ne fakamalosi aka foki a ia ne muna a te Atua. I se fakaasiga, ne lavea ne Esekielu se lima e taofi ne ia te peluga tusi. (Faitau te Esekielu 2:9–3:3.) Ne aumai mai fea te pelugā tusi? Ne a mea e aofia i ei? Ne fakamalosi aka pefea i ei a Esekielu? Ke onoono aka tatou. A te pelugā tusi ne aumai mai te nofogaaliki o te Atua. Kāti ne fakaaoga ne Ieova se tokotasi mai i agelu e tokofa kolā ne lavea muamua ne Esekielu ke tuku atu te pelugā tusi ki tou tagata. (Eseki. 1:8; 10:7, 20) E maua i te pelugā tusi a muna a te Atua—se fekau o fakamasinoga telā ne ‵tau o folafola atu ne Esekielu ki tino ‵teke kolā ne ave fakapagota. (Eseki. 2:7) Te fekau tenā ne tusi i te feitu ki mua mo te feitu ki tua o te pelugā tusi.

13. Ne a mea ne fai atu ne Ieova ki a Esekielu ke fai ki te pelugā tusi, kae kaia ne magalo ei?

¹³ Ne fai atu a Ieova ki tena pelofeta ke kai te pelugā tusi, kae “faka‵fonu [tena] tinae ki ei.” Ona ko te fakalogo, ne kai kātoa ne Esekielu a te pelugā tusi tenā. Se a te uiga o te vaega tenei o te fakaasiga? Ne ‵tau o talitonu katoatoa a Esekielu ki te fekau tenā, telā ka fakaoko atu ne ia. Ne fai mo fai se vaega o ia, e pelā eiloa me ko pokotia ana lagonaga i ei. Kae isi se mea fakaofoofogia ne tupu. Ne iloa aka ne Esekielu me i te pelugā tusi “ne magalo pelā me se hani.” (Eseki. 3:3) Kaia? Ne iloa ne Esekielu me i te tāua o te fai mo sui o Ieova ne fai eiloa pelā me se mea magalo io me se mea ‵lei. (Sala. 19:8-11) Ne loto fakafetai tou tagata me ne talia ne Ieova ke tavini atu a ia e pelā me sena pelofeta.

14. Se a te mea ne fesoasoani ki a Esekielu ke talia ne ia tena galuega?

¹⁴ Fakamuli ifo ne fai atu a Ieova ki a Esekielu: “Tausi a mea konei i tou loto kae fakalogo mai ki aku pati katoa e fai atu ki a koe.” (Eseki. 3:10) Ne fakatonu atu a Ieova ki a Esekielu ke tausi i tena mafaufau a pati ne tusi i te pelugā tusi kae mafaufau ‵loto ki ei. I te faiga penā, ne fakamalosi aka ei te fakatuanaki o Esekielu. Ne tuku atu foki i ei se fekau ‵mafa ke fakaoko ne ia ki tino. (Eseki. 3:11) Ne talia ne Esekielu ke fai kae fakataunu tena galuega ona ko te mea ko nofo atu te fekau a te Atua i tena loto mo ana laugutu.—Fakatusa ki te Salamo 19:14.

15. Ke kufaki, ne a mea e ‵tau o ‘tausi i ‵tou loto’?

¹⁵ Ke kufaki i ‵tou galuega talai, e ‵tau foki o fakamalosi aka faeloa tatou ne muna a Ieova. E ‵tau o ‘tausi i ‵tou loto’ a pati katoa kolā e fai mai ne Ieova. I aso nei e faipati mai a Ieova ki a tatou e auala i tena Muna tusia, ko te Tusi Tapu. E mautinoa pefea i a tatou me i te Muna a te Atua e tumau tena aoga ki ‵tou mafaufauga, lagonaga, mo manakoga?

16. Ne a mea e ‵tau o fai ne tatou ki te Muna a te Atua, kae e mafai pefea o ‵goto tonu ki ‵tou loto?

¹⁶ E pelā loa mo te fakamalosi aka o ‵tou foitino  māfai e ‵kai kae lamulamu ‵tou mea‵kai ke ma‵lū ko te mea ke fologofie, e penā foki a te fakamalosi mai o te Muna a te Atua māfai e sukesuke kae mafaufau ‵loto tatou ki ei. Ke tuku faeloa i ‵tou mafaufau a te akoakoga e uiga ki te pelugā tusi. E pelā mo te Muna a te Atua, e manako a Ieova ke “faka‵fonu [‵tou] tinae ki ei,” ko tena uiga ke malamalama faka‵lei i ei. E mafai o fai tatou penā e auala i ‵talo, faitau, kae mafaufau ‵loto ki ei. A te mea muamua, e ‵talo tatou ke fakatoka ‵tou loto ke talia a mafaufauga o te Atua. Ka oti, ko faitau ei se vaega i te Tusi Tapu. Oti ko mānava malie ke mafaufau ‵loto ki ‵tou mea ne faitau. Se a te ikuga? Ko te lasi o te mafaufau ‵loto ki te Muna a te Atua, ko te gasolo aka foki o ‵goto malosi ki ‵tou loto.

17. Kaia e tāua ei ke mafaufau ‵loto tatou ki ‵tou mea ne faitau i te Tusi Tapu?

¹⁷ Kaia e tāua ei ke faitau ki te Tusi Tapu kae mafaufau ‵loto ki ei? I te faiga penā, ka maua ei ne tatou te malosi e manakogina ke talai i te taimi nei kae ke folafola atu te fekau ‵mafa o te fakamasinoga telā ka talai ne tatou i aso mai mua. E se gata i ei, kafai e mafaufau ‵loto tatou ki uiga ‵gali o Ieova, ka gasolo aka ei o malosi atu te ‵tou fesokotakiga mo Ia. Kae ka iku atu ei ki se mea gali, fakafiafia kae ‵lei—ko te filemu mo te lotomalie i loto i a tatou.—Sala. 119:103.

18. Ne a mea e ‵tau o iloa ne tino i ‵tou koga talai, kae kaia?

¹⁸ E ‵kese mo Esekielu, a tatou e se ne pelofeta. Kae e tiga i ei, ne fakaiku aka ne tatou ke tumau i te talai atu a te fekau fakaosofia telā ne tausi ne Ieova i loto i tena Muna, ke oko ki te taimi ko lotomalie ei a ia o fakagata. Kafai ko oko mai te aso o te fakamasinoga, e seai se pogai e fai mai ne tino i ‵tou koga talai me e seai se fakailoaga ne oko atu ki a latou io me ne seki fia saga atu te Atua ki a latou. (Eseki. 3:19; 18:23) I lō te fai penā, e ‵tau o iloa ne latou me i te fekau e talai atu ne tatou ne aumai mai te Atua.

19. Ne a mea e maua mai ei te malosi ke fakataunu ‵tou galuega talai?

¹⁹ Se a te mea ka fakamalosi aka ei tatou ke fakataunu te ‵tou galuega talai? Ko pogai foki loa e tolu kolā ne fakamalosi aka ei a Esekielu. E tumau tatou i te talai me e iloa ne tatou i a tatou ne uga atu ne Ieova, ne fakamalosi aka ne te agaga o te Atua, kae fakamalosi aka foki tatou ne te Muna a te Atua. Mai te fesoasoani o Ieova, ne fakamalosi aka tatou ke fai te ‵tou galuega talai kae kufaki “ke oko ki te gataga.”—Mata. 24:13.