1. E iloa pefea ne tatou me e manako a Ieova ke fakapili‵pili atu tatou ki a ia?

 E ‵KAMI ne Ieova tatou ke fakapili‵pili atu ki a ia. (Iako. 4:8) E manako a ia ke fai mo fai ‵tou Atua, ‵tou Tamana, mo ‵tou Taugasoa. E tali mai ne ia ‵tou ‵talo kae fesoasoani mai i taimi faiga‵ta. Kae fakaaoga ne ia tena fakapotopotoga ke akoako kae puipui tatou. Kae ne a mea e ‵tau o fai ne tatou ke fakapili‵pili atu ki a Ieova?

2. E mafai pefea o fakapili‵pili atu tatou ki a Ieova?

² E mafai o fakapili‵pili atu tatou ki a Ieova e auala i te ‵talo atu ki a ia mo te faitau ki tena Muna kae mafau‵fau ‵loto ki ei. Kafai e fai tatou penā, e fakamalosi aka ei ‵tou a‵lofa mo ‵tou loto fakafetai ki a ia. E fakamalosi aka i ei tatou ke faka‵logo ki a ia kae tuku atu a vikiga kolā e ‵tau o maua ne ia. (Faka. 4:11) Ko te uke o mea e iloa ne tatou e uiga ki a Ieova, ko te momea aka foki o te ‵tou loto tali‵tonu ki a ia mo te fakapotopotoga telā ne tuku mai ne ia ke fesoasoani mai ki a tatou.

3. E taumafai pefea te Tiapolo ke ‵vae keatea tatou mai i a Ieova, kae se a te mea ka fesoasoani mai ke se tiaki lele ne tatou a te ‵tou Atua mo tena fakapotopotoga? (Salamo 31:13, 14)

³ Kae e taumafai te Tiapolo ke ‵vae keatea tatou mai i a Ieova, kae maise māfai ko fe‵paki tatou mo tulaga faiga‵ta. Se a tena togafiti? E taumafai malielie a ia ke fakavāivāi ‵tou loto tali‵tonu ki a Ieova mo tena fakapotopotoga. Kae e mafai ne tatou o ‵teke atu ki ana auala faitogafiti. Kafai e malosi ‵tou fakatuanaki kae ‵mautakitaki ‵tou loto tali‵tonu ki a Ieova, ka se tiaki lele eiloa ne tatou ‵tou Atua mo tena fakapotopotoga.—Faitau te Salamo 31:13, 14.

4. Ne a mea ka sau‵tala tatou ki ei i te mataupu tenei?

⁴ I te mataupu tenei, ka sau‵tala tatou ki mea faiga‵ta e tolu kolā e maua ne tatou mai tua o te fakapotopotoga; a mea takitasi konā e mafai o fakavāivāi aka ei ‵tou loto tali‵tonu ki a Ieova  mo tena fakapotopotoga. E ‵vae keatea pefea tatou ne mea faiga‵ta konei mai i a Ieova? Kae ne a mea e mafai ne tatou o fai ke ‵teke atu ki taumafaiga a Satani?

5. E mafai pefea o fakavāivāi ne mea faiga‵ta ‵tou loto tali‵tonu ki a Ieova mo tena fakapotopotoga?

⁵ I nisi taimi, e fe‵paki tatou mo mea faiga‵ta—e pelā mo te ‵teke mai o kāiga io me ko fakamalōlō mai tena galuega ‵togi. E mafai pefea ne mea faiga‵ta penā o fakavāivāi ‵tou loto tali‵tonu ki te fakapotopotoga a Ieova kae ‵vae kea‵tea tatou mai i a ia? Kafai e kufaki ne tatou a puapuaga mō se taimi leva, e mafai o mafau‵fau tatou me ko seai se ‵tou fakamoemoega kae loto vāi‵vai. E fakaaoga faka‵lei ne Satani a avanoaga penā kae taumafai o fai tatou ke fakalotolotolua ki te alofa o Ieova mō tatou. E manako te Tiapolo ke fakalotolotolua tatou me e māfua mai i a Ieova io me ko tena fakapotopotoga ‵tou logo‵maega. Ne tupu foki se mea tai ‵pau penā ki nisi tino Isalaelu i Aikupito. I te taimi muamua , ne tali‵tonu latou me ne ‵tofi aka ne Ieova a Mose mo Alona ke faka‵sao latou mai te ‵nofo pologa. (Eso. 4:29-31) Kae fakamuli ifo ne fai ne te Falao olotou olaga ke faigata atu, telā ne ‵losi atu latou me ne māfua mai i a Mose mo Alona olotou fakalavelave, kae fai atu: “Ko oti ne fai ne koulua a te Falao mo ana tavini ke takalia‵lia mai ki a matou, kae ko oti ne tuku ne koulua se pelu ki olotou lima ke tamate matou.” (Eso. 5:19-21) Ne ‵losi atu latou ki tavini fakamaoni a te Atua. Se mea fakafanoanoa eiloa! Kafai ne kufaki koe i mea faiga‵ta mō se taimi leva ‵ki, e mafai pefea o fakatumau ne koe te malosi o tou loto talitonu ki a Ieova mo tena fakapotopotoga?

6. Se a te mea e tauloto ne tatou mai te pelofeta ko Sapakuka e uiga ki te fakafesagai atu ki mea faiga‵ta? (Sapakuka 3:17-19)

⁶ Fakaasi atu a mea katoa i tou loto ki a Ieova i se ‵talo kae fakalagolago ki a ia mō se fesoasoani. Ne fe‵paki a te pelofeta ko Sapakuka mo mea faiga‵ta e uke. I te taimi e tasi, e foliga mai me ne fakalotolotolua tou tagata ki te atafai o Ieova ki a ia. Tela la, ne fakaasi atu ne ia ana lagonaga ki a Ieova i se ‵talo. Ana muna: “E pefea te leva, e Ieova, e ‵tau ei mo au o tagi atu mō se fesoasoani, kae e se lagona ne koe? . . . Kaia e talia ei ne koe a amioga fakasaua?” (Sapa. 1:2, 3) Ne tali atu a Ieova ki te ‵talo mai te loto o tena tavini fakamaoni. (Sapa. 2:2, 3) I te otiga ne mafaufau ‵loto a ia ki faifaiga faka‵sao a Ieova, ne toe maua ne Sapakuka a te fiafia. Ne kamata o talitonu a ia me e atafai atu a Ieova kae ka fesoasoani atu ki a ia ke kufaki i so se tofotofoga. (Faitau te Sapakuka 3:17-19.) Se a te akoakoga mō tatou? Kafai e fe‵paki tatou mo mea faiga‵ta, ‵talo ki a Ieova kae fai atu ki a ia ou lagonaga totino. Ko fakalagolago atu ei koe ki a ia mō se fesoasoani. Kafai e fai koe penā, e mafai o maua ne koe te loto talitonu me ka tuku atu ne Ieova te malosi e manakogina ne koe ke kufaki. Kae kafai e lagona ne koe tena fesoasoani, ka momea aka te malosi o tou fakatuanaki.

7. Se a te mea ne taumafai a kāiga o Shirley o fakatalitonu atu ki tou fafine, kae se a te mea ne fesoasoani atu ke fakatumau te malosi o tena fakatuanaki ki a Ieova?

⁷ Fakatumau tau polokalame faka-te-agaga. Mafaufau ki te auala ne fesoasoani atu te mea tenā ki a Shirley, se tuagane i Papua Niu Kini, i te taimi ne fepaki ei tou fafine mo mea faiga‵ta. b Ne ma‵tiva te kāiga o Shirley kae i nisi taimi e faigata o maua a meakai e lava mō latou. Ne taumafai se kāiga o fakavāivāi tena loto talitonu ki a Ieova. Ana muna: “E fai mai koe me e fesoasoani atu te agaga tapu o te Atua ki a koe, kae tefea tena fesoasoani? Te otou kāiga koi ma‵tiva eiloa. Ko oko loa te māumāu ou taimi i te galuega talai.” Ne taku  ‵tonu mai a Shirley: “Ne fesili ifo au: ‘E mata, e atafai mai te Atua ki a matou io me ikai?’ Tela la, ne ‵talo fakavave atu au ki a Ieova kae fai atu ki a ia a mea katoa i toku mafaufau. Ne tumau eiloa au i te faitau ki te Tusi Tapu mo ‵tou tusi, kae ne tumau foki toku kau atu ki te galuega talai mo fakatasiga.” E seki leva, kae kamata o lavea ne ia me ne tausi ne Ieova tena kāiga. Ne seki fia‵kai te lotou kāiga kae ne fia‵fia latou. E fai mai a Shirley: “Ne maua ne au se lagonaga me ne tali mai a Ieova ki aku ‵talo.” (1 Timo. 6:6-8) Kafai e ‵piki ‵mau koe ki tau polokalame faka-te-agaga, ka se talia foki ne koe a mea faiga‵ta io me ko manatu fakalotolotolua ke ‵vae keatea ne ia koe mai i a Ieova.

8. Se a te mea e mafai o tupu ki taina tōfia i te fakapotopotoga a Ieova?

⁸ E auala i tala fakasalalau mo neti, e fakasalalau atu ne ‵tou fili a loi io me ko fakamatalaga ‵se e uiga ki taina tōfia i te fakapotopotoga a Ieova. (Sala. 31:13) Ko oti ne puke fakapagota a nisi taina kae fakasala e pelā me ne tino solitulafono. Ne fe‵paki a Kelisiano i te senitenali muamua mo se tulaga tai ‵pau penā, i te taimi ne ‵losi ‵se atu ei ki te apositolo ko Paulo kae puke fakapagota. Ne a olotou lagonaga e uiga ki ei?

9. Ne a mea ne fai ne nisi Kelisiano i te taimi ne ‵pei atu ei a te apositolo ko Paulo ki te falepuipui?

⁹ Ne taofi aka ne nisi Kelisiano i te senitenali muamua a te lotou ‵lago atu ki te apositolo ko Paulo i te taimi ne ‵pei ei ki te falepuipui i Loma. (2 Timo. 1:8, 15) Kaia? E mata, ne ‵ma latou ona ko te mea ne ‵kilo atu a tino ki a Paulo e pelā me se tino solitulafono? (2 Timo. 2:8, 9) Io me ne ma‵taku i a latou ma fakasauagina foki? Faitalia me ne a olotou pogai, mafaufau ki lagonaga o Paulo. Ne kufaki a ia i mea faiga‵ta e uke kae ne tu atu foki tena ola i se tulaga fakamataku mō latou. (Galu. 20:18-21; 2 Koli. 1:8) Ke mo a eiloa ma fai tatou, e pelā mo latou kolā ne tiaki ne latou a Paulo, i te taimi ne manako malosi ei a ia ki te lotou fesoasoani! Se a te mea e ‵tau o masaua faeloa ne tatou māfai ko fakasauagina a taina tōfia?

10. Se a te mea e ‵tau o masaua ne tatou māfai ko fakasauagina a taina tōfia, kae kaia?

 ¹⁰ Masaua te pogai e fakasauagina ei tatou mo te māfuaga. E fai mai te 2 Timoteo 3:12: “Me i tino katoa kolā e ma‵nako o ola kae tapuaki fakamaoni atu ki te Atua i te ‵kau fakatasi mo Keliso Iesu ka fakasauagina foki.” Tela la, e se ‵tau o ‵poi tatou me e taua tonu atu a Satani ki taina tōfia. E mafaufau a ia me i te taua tonu atu penā ka fakamasei aka ei te lotou fakamaoni kae fakamatakutaku mai ki a tatou.—1 Pe. 5:8.

11. Se a te akoakoga e tauloto ne tatou mai i a Onesefolo? (2 Timoteo 1:16-18)

¹¹ Tumau i te fesoasoani kae fakamaoni ki ou taina. (Faitau te 2 Timoteo 1:16-18.) Ne ‵kese te faifaiga a te Kelisiano i te senitenali muamua e igoa ki a Onesefolo i te taimi ne ‵pei ei a Paulo ki te falepuipui. “E se mā tou tagata i . . . pikifao [o Paulo] i te falepuipui.” I lō te fai penā, ne ‵sala atu a Onesefolo ki a Paulo kae i te taimi ne maua ne ia, ne onoono a ia ki auala aoga ke fesoasoani atu ki a ia. A te fai penā ne fakamataku ki te ola o Onesefolo. Se a te akoakoga mō tatou? E se ‵tau o ma‵taku tatou i tino, io me taofi aka te ‵tou fesoasoani atu ki ‵tou taina kolā ne fakasauagina. I lō te fai penā, ke na ‵pulu kae fesoasoani atu ki a latou. (Faata. 17:17) E ma‵nako latou ki ‵tou a‵lofa mo ‵tou fesoasoani.

12. Se a te akoakoga e maua ne tatou mai ‵tou taina mo tuagane i Lusia?

¹² Mafaufau ki te fesoasoani o ‵tou taina mo tuagane i Lusia ki ‵tou taina tali‵tonu pele kolā ne ‵pei ki te falepuipui. I te taimi ne ‵tu atu a nisi tino i mua o te fono tulafono, ne olo atu a taina mo tuagane e tokouke ke ‵lago atu ki a latou i te fono. Se a te akoakoga mō tatou? Kafai ko fakamaseigina, puke fakapagota, io me fakasauagina ‵tou taina tōfia, ke mo a ma ma‵taku tatou. ‵Talo atu mō latou, atafai atu ki olotou kāiga, kae onoono ki nisi auala aoga ke fesoasoani atu ki a latou.—Galu. 12:5; 2 Koli. 1:10, 11.

13. E fakavāivāi pefea ne pati fakatauemu a te ‵tou loto tali‵tonu ki a Ieova mo tena fakapotopotoga?

¹³ E mafai o fakatauemu tatou ne ‵tou kāiga sē tali‵tonu, soa ga‵lue, io me ko tama‵liki i te akoga, ona ko te ‵tou galuega talai io me ko te ola e ‵tusa mo tulaga ma‵luga o Ieova. (1 Pe. 4:4) Kāti ka fai mai latou: “E fiafia au ki a koe, kae ko tau lotu ko oko eiloa i te faigata, kae koi ‵piki ‵mau loa ki faifaiga mua.” E mafai o fakamasei ne nisi tino a tatou ona ko ‵tou faifaiga ki tino faka‵tea, telā e fai mai latou: “E mafai pefea o fai mai koe i a koe se tino alofa?” A vaegā pati penei, e mafai o ‵toki aka i ei a manatu fakalotolotolua i ‵tou mafaufau. Kāti e mafai o mafaufau koe penei: ‘E mata, ko tō uke a mea e manako a Ieova ke fai ne au? E mata, ko tō uke a tulafono i tena fakapotopotoga?’ Kafai ko fepaki koe mo se tulaga penā, e mafai pefea o tumau koe i te fakapilipili atu ki a Ieova mo tena fakapotopotoga?

14. Ne a ‵tou mea e ‵tau o fai māfai ko fakatauemu mai a nisi tino ona ko te ‵tou ola e ‵tusa mo tulaga o Ieova? (Salamo 119:50-52)

¹⁴ Ke fakamautinoa aka me e fakamaluga ne koe a tulaga o Ieova. A Iopu se tagata telā ne fakamaluga ne ia a tulaga o Ieova, faitalia a te fakatauemu atu ona ko te mea tenā. Ke oko ki se taugasoa loi e tokotasi o Iopu, ne taumafai o fakatalitonu atu me e se tāua ki te Atua a te tautali atu o Iopu ki ana tulaga io me ikai. (Iopu 4:17, 18; 22:3) Kae ne ita fitifiti a Iopu ke talitonu ki vaegā loi penā. Ne iloa ne ia me i tulaga o Ieova ki te mea ‵lei mo te mea masei e ‵tonu, kae ne fakaiku aka ne ia ke fakamaluga ne ia. Ne seki talia ne ia a nisi tino ke ave keatea ne latou tena fakamaoni. (Iopu 27:5, 6) Se a te akoakoga mō tatou? Sa talia a pati  fakatauemu ke fakalotolotolua ei koe ki tulaga o Ieova. Mafaufau ki mea ne ‵tupu i tou olaga. Kai lavea aka eiloa ne koe i te ukega o taimi a te ‵tonu mo te aoga o tulaga o Ieova ki a koe? Ke tumau i te ‵lago atu ki te fakapotopotoga telā e fakamaluga aka i ei a tulaga konā. Tenā, ka se mafai ei ne so se fakatauemuga o ‵vae keatea koe mai i a Ieova.—Faitau te Salamo 119:50-52.

15. Kaia ne fakatauemu atu ei ki a Brizit?

¹⁵ Mafaufau ki te tala o Brizit, se tuagane i Initia. Ne fakatauemu tou fafine ne tino o tena kāiga ona ko tena fakatuanaki. E seki leva mai tua o tena papatisoga i te 1997, ne fakamalōlō tena avaga sē talitonu mai tena galuega ‵togi. Tela la, ne fakaiku aka ne tou tagata ke olo atu latou mo Brizit mo ana tama fāfine o ‵nofo mo ana mātua kolā ne ‵nofo atu i te suā fa‵kai. Kae ne fe‵paki a Brizit mo nisi tulaga tai faiga‵ta atu. Ona ko te mea e seai se galuega a tena avaga, ne ‵tau o galue tou fafine ke tausi atu ki tena kāiga. I tafa i ei, a te ‵toe fakapotopotoga pili, kāti e nofo ki se 350 kilomita te ‵mao. Se mea fakafanoanoa me ne ‵teke atu a te kāiga o tena avaga ona ko tena fakatuanaki. Ne gasolo o masei te tulaga tenā, telā ne ‵tau o toe olo atu a te kāiga o Brizit ki se isi koga. Kae ‵soko atu ki ei, ne mate fakapoi tena avaga. Fakamuli ifo, tena tamaliki fafine e tokotasi ne mate ona ko te kenisa kae ko 12 fua ana tausaga. Kae sili atu i te masei, ne fai atu a kāiga o Brizit me i a ia ko te pogai o mea katoa konei ne ‵tupu. Ne fai atu latou me moi se fai a ia mo fai se Molimau a Ieova, e se taitai o ‵tupu a mea katoa konei. Kae ne tumau eiloa te loto talitonu o tou fafine ki a Ieova kae ne kau atu faeloa ki tena fakapotopotoga.

16. Ne fakamanuia atu pefea ki a Brizit mō te ‵piki ‵mau ki a Ieova mo tena fakapotopotoga?

¹⁶ Ona ko te ‵nofo ‵mao atu o Brizit mai te fakapotopotoga, ne fakamalosi atu se ovasia o te seketi ke talai atu tou fafine i tena fa‵kai kae fai foki a fakatasiga i tena fale. Muamua la, ne manavase malosi tou fafine. Kae ne fakalogo loa a ia ki te fakatakitakiga tenā. Ne talai atu ne ia te tala ‵lei ki nisi tino, ne fai ne ia fakatasiga i tena fale, kae fakaavanoa foki ne ia se taimi mō tapuakiga a kāiga mo ana tama fā‵fine.  Ne a mea ne iku mai i ei? Ne mafai ne Brizit o kamata kae fai a a‵koga faka-te-Tusi Tapu e uke, kae uke foki ana akoga faka-te-Tusi Tapu ne papatiso. I te 2005, ne kamata o tavini atu tou fafine e pelā me se paenia tumau. Ne taui atu eiloa tena loto talitonu ki a Ieova mo tena fakamaoni ki tena fakapotopotoga. Ko tavini atu mo te fakamaoni ana tama fafine ki a Ieova, kae ko lua nei a fakapotopotoga i te koga tenā! Ne talitonu a Brizit me i a Ieova ne tuku atu ne ia te malosi ke fakafesagai atu ki tulaga faiga‵ta kae ke kufaki i fakatauemuga mai i tena kāiga.

17. Se a te mea e ‵tau o fakaiku aka ne tatou ke fai?

¹⁷ E manako a Satani ke tali‵tonu tatou me e tiaki tatou ne Ieova i taimi faiga‵ta, kae ko te ‵lago atu ki te fakapotopotoga a Ieova ka fai fua i ei ke faigata ‵tou olaga. E manako Satani ke ma‵taku tatou māfai ko fakamaseigina, fakasauagina, io me ‵pei ki te falepuipui a taina tofia. Kae e auala i fakatauemuga, e manako a ia ke fakavāivāi ‵tou loto tali‵tonu ki tulaga o Ieova mo Tena fakapotopotoga. Kae e iloa ‵lei ne tatou ana togafiti matagā, kae e se mafai o fakaloiloi ne ia tatou. (2 Koli. 2:11) Fakaiku aka ke ‵teke atu ki loi a Satani kae tumau i te fakamaoni ki a Ieova mo tena fakapotopotoga. Masaua, ka se tiaki lele eiloa koe ne Ieova. (Sala. 28:7) Tela la, sa talia se mea ke ‵vae kea‵tea ei koe mai i a Ieova!—Loma 8:35-39.

18. Se a te mea ka sau‵tala tatou ki ei i te suā mataupu?

¹⁸ I te mataupu tenei, ne sau‵tala tatou ki mea faiga‵ta e mafai o fe‵paki mo tatou mai tua o te fakapotopotoga. Kae e mafai foki o tofotofogina ‵tou loto tali‵tonu ki a Ieova mo tena fakapotopotoga ne mea faiga‵ta kolā e fe‵paki mo tatou mai i loto i te fakapotopotoga. E mafai pefea o fakafesagai atu tatou mo te manuia ki vaegā tulaga penā? Ka sau‵tala tatou ki ei i te suā mataupu.