1. Ne a mea e aofia i ‵tou “manakoga faka-te-agaga,” kae se a tena sokoga ki te fiafia?

 A TE fiafia tonu e sē se lagonaga fiafia fua telā e oko mai kae oti ko galo atu. E mafai o maua te fiafia tenā i te olaga kātoa o se tino. E pefea la? Ne fakamatala mai ne Iesu i tena Lāuga i luga i te Mauga: “E fia‵fia a latou kolā e iloa ‵lei ne latou olotou manakoga faka-te-agaga.” (Mata. 5:3) Ne iloa ne Iesu me ne faite a tino mo se manakoga lasi ke iloa kae tapuaki ki te lotou Mafuaga, ko Ieova te Atua. Tenā te mea e fakauiga ki ei ‵tou “manakoga faka-te-agaga.” Kae ona ko Ieova se “Atua fiafia,” a latou kolā e tapuaki ki a ia e mafai foki o fia‵fia.—1 Timo. 1:11.

2-3. (a) E ‵tusa mo te lāuga a Iesu, ko oi foki e mafai o fia‵fia? (e) Ne a mea ka sau‵tala tatou ki ei i te mataupu tenei, kae kaia e ‵tau o suke‵suke ki ei?

² E mata, e ‵tau o seai ne ‵tou fakalavelave i te olaga ko te mea ke fia‵fia tatou? Ikai. I tena lāuga, ne fai atu ne Iesu se mea fakapoi. A “latou kolā e fanoa‵noa”—ona ko te loto mafatia i olotou agasala io me fe‵paki mo fakanofonofoga fakafi‵ta i olotou olaga—e mafai o fia‵fia. Ne fai atu foki a Iesu me ka penā a “latou kolā e fakasauagina ona ko te amiotonu” io me e “fakatauemu” atu ona ko te fai mo fai se soko o Keliso. (Mata. 5:4, 10, 11) Kae e mafai pefea o fiafia tonu se tino i vaegā tulaga penā?

³ Ne akoako mai a Iesu me e se māfua mai te fiafia i fakanofonofoga ‵gali i ‵tou olaga, kae mai te fakataunuga o ‵tou manakoga faka-te-agaga kae fakapilipili atu ki te Atua. (Iako. 4:8) E mafai pefea o fai tatou penā? I te mataupu tenei, ka sau‵tala tatou ki sitepu faigofie e tolu kolā e iku atu ki te fiafia tonu.

4. Se a te sitepu muamua ki te mauaga o te fiafia tonu? (Salamo 1:1-3)

⁴ SITEPU 1: Ke fiafia tonu, e ‵tau mo tatou o ‵kai ki mea‵kai faka-te-agaga. E ‵tau o ‵kai a tino mo manu ki mea‵kai faka-te-foitino ko te mea ke tumau i te ola. Kae ko tino fua e mafai o ‵kai ki mea‵kai faka-te-agaga. Kae e manakogina ne tatou. Tenā te pogai ne fai mai ei a Iesu: “E se ko meakai fua e ola ei te tagata, kae ko pati katoa kolā e ‵to mai i te gutu o Ieova.” (Mata. 4:4) Tela la, e se ‵tau o talia ne tatou ke seke se aso e aunoa mo te ‵kai ki mea‵kai faka-te-agaga mai te Muna tāua a te Atua, ko te Tusi Tapu. Ne fai mai te faisalamo: ‘E fiafia a te tagata telā e fiafia ki te tulafono a Ieova, kae e faitau ki Tena tulafono i te ao mo te po.’—Faitau te Salamo 1:1-3.

5-6. (a) Ne a mea ne tauloto ne tatou mai te Tusi Tapu? (e) Ne a auala e mafai o fesoasoani mai a te faitau ki te Tusi Tapu?

⁵ I te Tusi Tapu, ne tuku mai mo te alofa ne Ieova a fakamatalaga tāua ki te auala ke ola i se olaga fakafiafia. E tauloto ne tatou i ei tena fuafuaga mō ‵tou olaga. E tauloto tatou ki te auala e mafai o fakapili‵pili atu ki a ia mo te auala ke fakamagalo ne ia ‵tou agasala. Kae e tauloto foki ne tatou a te fakamoemoega gali telā ko oti ne folafola mai ne ia mō aso mai mua. (Iele. 29:11) A muna‵tonu konei ne maua ne tatou mai i se sukesukega ki te Tusi Tapu, e fai ei ke fia‵fia malosi tatou!

⁶ E pelā mo te mea e iloa ne tatou, e ‵fonu te Tusi Tapu i pati fakatonutonu aoga mō te olaga i aso katoa. Kafai e fakagalue ne tatou a pati fakatonutonu konā, e mafai o fia‵fia tatou. So se taimi e loto vāivāi koe ona  ko fakalavelave o te olaga, ke fakamāumāu a taimi e uke atu ke faitau ki te Muna a Ieova, kae mafaufau ‵loto ki ei. Ne fai mai a Iesu: “E fia‵fia a latou kolā e lagona ne latou te muna a te Atua kae tausi ki ei!”—Luka 11:28.

7. E mafai pefea o maua ne koe a mea aoga e uke māfai e fakamāumāu ne koe se taimi tai leva ke faitau ki te Muna a te Atua?

⁷ Kafai e faitau koe ki te Muna a te Atua, fakaaoga faka‵lei a taimi e lava ke mafaufau faka‵lei ki au mea ne faitau. Ke fai se fakatusaga, kai fai aka eiloa ne koe te mea tenei? E kuka ne se tino te meakai e fiafia malosi koe ki ei. Kae kāti ko tō fakava‵vave koe io me ko tō saga atu ki nisi mea fakaa‵tea, ko kai folofolo koe e aunoa mo te fiafia ki te gali o te meakai. I tau otiga ne kai, ne iloa aka ne koe a tou kai vave kae mafaufau koe me moi ne kai malie koe, penei e fiafia koe ki te gali o te meakai. Ia, kai faitau aka loa koe i se auala penā, telā ko se mafaufau faka‵lei koe ki te gali o te fekau i ei? Ke fakaaoga se taimi tai leva o faitau ki te Muna a te Atua; fakaataata a mea ‵tupu i tou mafaufau, ‵tagi o leo kae mafaufau ki au mea ne faitau. Kafai e fai koe penā, ka ati aka ei tou fiafia.

8. E fakataunu pefea ne “te tavini fakamaoni kae poto” tena tiute? (Onoono foki ki te fakamatalaga mai lalo.)

⁸ Ne ‵tofi aka ne Iesu a “te tavini fakamaoni kae poto” ke tuku mai a mea‵kai faka-te-agaga i te taimi tonu, kae ne fagai faka‵lei eiloa tatou i te feitu faka-te-agaga. * (Mata. 24:45) A te Tusi Tapu ko te fakavae o mea tāua katoa kolā e tuku mai ne te tavini fakamaoni. (1 Tesa. 2:13) E fesoasoani mai a mea‵kai faka-te-agaga konā ke iloa ne tatou a mafaufauga o Ieova e ‵tusa mo mea e fakaasi mai i te Tusi Tapu. Tenā te pogai e fai‵tau tatou ki mekesini, ko te Faleleoleo Maluga mo te Ala Mai! mo mataupu i te jw.org. E fakatoka tatou ki fakatasiga a te fakapotopotoga i te vaiaso mo fakaotiga o vaiaso. Kae onoono tatou ki polokalame takitasi o te Leo Fakasalalau o te JW^® māfai ko toka. A te ‵kai faka‵lei ki mea‵kai faka-te-agaga, ka fesoasoani mai ke fai ne tatou te lua o sitepu telā e iku atu ki te fiafia tonu.

9. Se a te lua o sitepu telā e iku atu ki te fiafia tonu?

⁹ SITEPU 2: Ke fiafia tonu, e ‵tau o ola tatou e ‵tusa mo tulaga o Ieova. Ne tusi mai te faisalamo: “E fia‵fia a latou katoa kolā e ma‵taku ki a Ieova, ko latou kolā e sa‵sale i Ana auala.” (Sala. 128:1) A te mataku ki a Ieova e fakauiga me e āva malosi tatou ki a Ia, telā e ‵kalo keatea tatou mai te faiga o so se mea e fakafanoanoa atu ki a ia. (Faata. 16:6) Tela la, e taumafai faeloa tatou ke fakafetaui aka ‵tou olaga ki tulaga o Ieova e uiga ki te mea tonu mo te mea ‵se kolā e fakamatala mai i te Tusi Tapu. (2 Koli. 7:1) Ka fia‵fia eiloa tatou māfai e fai ne tatou a mea kolā e fiafia malosi ki ei a Ieova kae ‵teke atu ki mea kolā e takalialia a ia ki ei.—Sala. 37:27; 97:10; Loma 12:9.

10. E ‵tusa mo te Loma 12:2, se a te ‵tou tiute?

¹⁰ Faitau te Loma 12:2. Kāti e iloa ne se tino me e maua ne Ieova te pulega ke fakaiku aka a te mea tonu mo te mea ‵se, kae e ‵tau foki o talia ne ia a tulaga o te Atua e uiga ki mea e ‵tau o fai ne ia. E pelā me se fakaakoakoga, e iloa ne ia me e ‵tau o fai ne te malo o se fenua a tulafono o te auala. Kae kāti e se loto fiafia a ia ke talia a tapula konā. E iku atu i ei ki te fakatele ne ia o te motoka i se makini e sili atu i te tulafono. E fakaasi atu ne tatou i ‵tou amioga me e tali‵tonu katoatoa tatou me i tulaga o Ieova ko te ‵toe auala ‵lei mō tatou.  (Faata. 12:28) Ne penā a lagonaga o Tavita telā ne fai mai ei a ia e uiga ki a Ieova: “E fakailoa mai ne koe ki a au te auala o te ola. E lasi te fiafia e maua i ou mua; e maua faeloa te fiafia i tou lima fakaatamai ki te se-gata-mai.”—Sala. 16:11.

11-12. (a) Kafai ko se ‵lei ‵tou lagonaga io me loto vāi‵vai, se a te mea e ‵tau o fakaeteete tatou i ei? (e) E fesoasoani mai pefea a pati i te Filipi 4:8 māfai ko filifili aka a fakafiafiaga?

¹¹ Kafai ko se ‵lei ‵tou lagonaga io me e loto vāivāi, kāti ka ma‵nako tatou ke fai se mea telā e mafai o faka‵seke tatou mo ‵tou fakalavelave. E malamalama tatou i te mea tenā, kae e ‵tau o fakaeteete tatou ke mo a ma fai se mea telā e takalialia a Ieova ki ei.—Efe. 5:10-12, 15-17.

¹² I tena tusi ki te kau Filipi, ne fakamalosi atu te apositolo ko Paulo ki Kelisiano ke tumau i te mafau‵fau ki mea kolā e “amiotonu, . . . ‵ma, . . . alofagina, [mo te] tavaegina.” (Faitau te Filipi 4:8.) E tiga eiloa e seki tusi atu a Paulo e uiga ki fakafiafiaga, a mea ne tusi ne ia, e ‵tau o fakamalosi mai ki a tatou i mea kolā e filifili ne tatou. Tofo aka te mea tenei: So se taimi e sae mai te pati “mea” i te fuaiupu, ke sui ki pati penei “pese,” “ata vitio,” “tusi,” io me ko “tafaoga i vitio.” Kafai e fai ne tatou te mea tenei, ka iloa ‵lei ne tatou a mea kolā e talia mo mea e se talia ne te Atua. E ma‵nako tatou ke fakafetaui ‵tou olaga ki tulaga ma‵luga o Ieova. (Sala. 119:1-3) Mai i se loto lagonaga ‵ma, e mafai ei o fai ne tatou a te suā sitepu telā e iku atu ki te fiafia tonu.—Galu. 23:1.

13. Se a te tolu o sitepu telā e iku atu ki te fiafia tonu? (Ioane 4:23, 24)

¹³ SITEPU 3: Ke fakamautinoa aka me e fakamuamua ne koe te tapuaki ki a Ieova i tou olaga. E pelā me ko te ‵tou Mafuaga, e ‵tau eiloa o tapuaki atu fua tatou ki a Ieova. (Faka. 4:11; 14:6, 7) Tela la, e ‵tau mo tatou o fakamuamua a te tapuaki atu ki a ia i te auala telā e talia ne ia, “i te agaga mo te munatonu.” (Faitau te Ioane 4:23, 24.) E ma‵nako tatou ke takitaki ‵tou tapuakiga ne te agaga tapu o te Atua ko te mea ke fetaui ‵lei mo muna‵tonu i tena Muna. E ‵tau o fakamuamua te ‵tou tapuakiga faitalia me e ‵nofo tatou i fenua kolā e se saoloto io me fakatapu i ei ‵tou galuega. Nei la, ko sili atu i te 100 o ‵tou taina mo tuagane ko oti ne ‵pei ki te falepuipui ona ko te mea i a latou ne Molimau a Ieova. * Kae faitalia loa, e fia‵fia latou o fai so se mea e mafai ne latou o fai ke ‵talo, sukesuke, kae fai‵pati atu ki nisi tino e uiga ki te ‵tou Atua mo tena Malo! Kafai ko fakatauemu io me fakasauagina tatou, e mafai o fia‵fia tatou ona ko te iloa atu me e fakatasi mai a Ieova kae ka taui foki ne ia tatou.—Iako. 1:12; 1 Pe. 4:14.

14. Se a te mea ne tupu ki te taina talavou i Tajikistan, kae kaia?

¹⁴ E fakamaoni mai ne tala ‵tonu me i sitepu e tolu kolā ne sau‵tala tatou ki ei, e iku atu eiloa ki te fiafia tonu faitalia ‵tou fakanofonofoga. Mafaufau ki te mea ne tupu ki a Jovidon Bobojonov, telā ko 19 ana tausaga mai Tajikistan, kae ne ita fitifiti ma kau atu ki te kautau. I a Oketopa 4, 2019, ne ave mālō keatea a ia mai tena fale kae ‵pei atu ki te falepuipui i masina e uke, kae ne fai fakamasei ne latou e pelā me se tino solitulafono. Ne fakasalalau atu te faifaiga sē fakamaoni ki te lalolagi kātoa. Ne lipoti mai me ne ta fakamasei tou tagata i se taumafaiga ke faimalo atu ke fai tena tautoga  mō te kautau kae pei ki te togiga o te kautau. Mai tua ifo i konā, ne fakasala a ia kae avatu ki se falepuipui telā e ga‵lue ‵mafa i ei ke oko ki te taimi ne fakatonu atu ei a te pelesitene o te fenua ke fakasaoloto tou tagata. I te taimi kātoa tenei, ne fakatumau ne Jovidon tena fakamaoni mo tena fiafia. E pefea la? Mai te tausi atu faeloa ki ana manakoga faka-te-agaga.

15. Ne kai pefea a Jovidon ki mea‵kai faka-te-agaga i te falepuipui?

¹⁵ I te taimi ne nofo atu ei i te falepuipui, a Jovidon, ne kai faeloa ki meakai faka-te-agaga, faitalia me e seai sena Tusi Tapu io me ko ‵tou nisi tusi. Ne mafai pefea o fai ne ia te mea tenā? Ne avatu ne taina mo tuagane a mea‵kai faka-te-foitino ki a ia kae tusi atu ne latou a te tusi siki o te aso i taga mea‵kai konā. Tela la, ne mafai ne ia o faitau ki te Tusi Tapu kae mafaufau ‵loto ki ei i aso katoa. I te taimi ko saoloto a ia mai te falepuipui, ne fai atu ne ia a te manatu fesoasoani tenei ki a latou kolā e seki fe‵paki mo tofotofoga faiga‵ta: “Se mea tāua ke fakaaoga faka‵lei katoatoa tou saolotoga ke ati aka tou iloaga e uiga ki a Ieova, mai te faitau ki tena Muna mo ‵tou tusi.”

16. Ne a mea ne saga tonu atu ki ei te mafaufau o Jovidon?

¹⁶ Ne ola ‵tou taina e ‵tusa mo tulaga o Ieova. I lō te saga atu fua ki manakoga ma‵sei kae  fai a amioga ma‵sei, ne saga tonu atu a ia ki a Ieova mo mea e fakatāua ne Ia. Ne ofo a Jovidon i te ‵gali o mea ne faite ne te Atua. I taeao katoa, e ala aka a ia ki te logoa mo te usu pese mai o manu. I te po, e kilo atu a ia ki te masina mo fetu. Ana muna: “A meaalofa konā mai i a Ieova, ne fai ei ke fiafia kae fakamalosi mai ki a au.” Kafai e loto fia‵fia tatou ki te fesoasoani o Ieova i te feitu faka-te-agaga mo te feitu faka-te-foitino, e maua ne tatou a te fiafia kae ko te fiafia tenā e maua ei ne tatou a te malosi ke kufaki.

17. E fakagalue aka pefea a pati i te 1 Petelu 1:6, 7 ki se tino e fepaki mo se tulaga telā e ‵pau mo Jovidon?

¹⁷ Ne fakamuamua foki ne Jovidon a te tapuakiga ki a Ieova. Ne iloa ne ia te tāua ke tumau i te fakamaoni ki te Atua tonu. Ne fai mai a Iesu: “E ‵tau mo koe o tapuaki ki a Ieova tou Atua kae ko ia fua tokotasi e ‵tau o avatu ne koe ki ei te taviniga tapu.” (Luka 4:8) Ne ma‵nako a takitaki kautau mo sotia ke fulitua atu a Jovidon ki tena lotu. I lō te fai penā, ne ‵talo malosi atu a ia i ao mo po katoa kae akai atu ki a Ieova ki tena fesoasoani ke mo a ma ‵fiu a ia io me e gutugutulua a ia i tena fakatuanaki. Faitalia a faifaiga sē ‵lei ne maua ne ia, ne seki gutugutulua lele eiloa a Jovidon. Ona ko te mea tenā, ko fiafia malosi nei a ia me ko maua ne ia se mea telā ne seki maua ne ia mai mua o tena ave mālō kea‵tea mai tena fale, ta fakamasei, kae ‵pei ki te falepuipui—se fakatuanaki telā ko oti ne tofotofogina.—Faitau te 1 Petelu 1:6, 7.

18. E mafai pefea o fakatumau ne tatou ‵tou fia‵fia?

¹⁸ E iloa ne Ieova a mea e manakogina ke maua ne tatou te fiafia tonu. Kafai e tau‵tali atu tatou ki sitepu e tolu kolā e iku atu ki te fiafia tonu, e mafai ne koe o fakatumau tou fiafia faitalia a tulaga faiga‵ta. Ko mafai ei ne koe o fai atu penei: “E fia‵fia a tino kolā e fai a Ieova mo olotou Atua!”—Sala. 144:15.